Lajme me te reja nga bota e Teknologjisë

Visa Platinum Linux për shpëtimin e Linux

Linux Foundation, shoqata jofitimprurëse e cila mbështet Linuxin, ka paralajmëruar paraqitjen e kredit kartelës së parë Visa Platinum "Pinguin" e cila mundëson dhënien e kontributit për komunitetin Linux.

Në bashkëpunim me Visa-n, do t’u mundësohet të gjithë përdoruesve të sistemit operativ Linux t’i japin mbështetje lëvizjes, si dhe mbështetje financiare për të gjitha iniciativat e Fondacionit Linux. Falë bashkëpunimit me CardPartner e UMB Bank, Fondacioni Linux do të pranojë $50 dollarë për aktivizimin e secilës kartelë dhe një përqindje të vogël në secilin transaksion të bërë me të.

"Kjo kartelë krediti është përgjigje në kërkesat e atyre të cilët duan të përfshihen në mbështetjen e Fondacionit Linux", ka deklaruar Jim Zemlin, drejtor i Fondacionit.



"Disa shkruajnë kode, tjerët punojnë në marketing apo mbrojnë Linuxin. Kartela e kreditit me shenjën Linux është mënyrë e thjeshtë për secilin që të kontribuojë në zhvillimin e Linuxit dhe të identifikojë veten si mbështetës të komunitetit, duke pasur një pinguin në xhep", ka shtuar ai.

Aktualisht, kredit kartelën mund ta aktivizojnë vetëm ata në Shtetet e Bashkuara të Amerikës, por në muajt e radhës do të përfshihen edhe shtetet tjera.

Yahoo e Microsoft arrijnë marrëveshjen ?

Pas disa vitesh zvarritjesh dhe një javë negociatave supozohet se Microsoft e Yahoo kanë arritur marrëveshjen për bashkëpunim mes tyre.

Microsoft e Yahoo supozohet se kanë arritur marrëveshjen e shumëpritur për bashkëpunim, të cilën do të duhej ta bëjnë publik nesër. Lajmet natyrisht vijnë nga burimet anonime të afërta me kompanitë, derisa ato transmetohen nga portali i besueshëm amerikan All Things Digital.

Sipas informatave në dispozicion, vet marrëveshja është më e vogël sesa që është pritur, nuk flitet për pagesa të shumave të mëdha apo blerjeve të pjesëve të caktuara të kompanive. Microsoft supozohet se do të merr përsipër afarizmin e kërkimeve në faqet e kompanisë Yahoo, i cili në prapavijë tani do të ketë makinën e re të kërkimit Bing. Yahoo do të vazhdojë t’i ofrojë platformën e reklamimit në mesin e faqeve të saj edhe kërkuesit Bing, por me anë të teknologjisë AdCenter të Microsoftit.



Informatat e fundit flasin edhe për një përfitimin të majmë të Yahoo-së. Kompania gjatë dy viteve të para do të mbajë për veti 110 për qind të profitit (domethënë me pagesë shtesë të Microsoftit), derisa gjatë vitit të tretë të bashkëpunimit 90 për qind. Në këmbim, Microsoft fiton në përmbushjen e qëllimit të shumëpritur, ndikimit të dukshëm në tregun e makinave të kërkimit.

Për informatat zyrtare dhe konkrete vlen të pritet edhe pak kohë, mirëpo me bashkimin e fuqive të Yahoo e Microsoft ato fitojnë 30 për qind të tregut të kërkimeve online. Pjesën tjetër prej pothuajse 70 për qind natyrisht e mban Google, e cila me këtë marrëveshje megjithatë bëhet me një konkurrencë pak më të fortë.

Disk i jashtëm prej një terabajt nga Toshiba

Toshiba ka paralajmëruar diskun e saj të jashtëm 3.5 inçësh i cili do të ofrohet në kapacitete prej 640 gigabajt dhe një terabajt.

Disku është vendosur brenda një shtëpize të forcuar e cila do të duhej të ofronte rezistencë më të madhe në goditje.

Janë përdorë disqet me pllaka të cilët rrotullohen 5.400 rpm, me të do të mund të përdorin USB 2.0 dhe eSATA, derisa janë kompatibil me sistemet operative Windows dhe Mac.

Çmimi i paralajmëruar për tregun amerikan është 130 dollarë për versionin 640 gigabajt dhe 160 dollarë për version prej një terabajt. Së bashku me disqet do të shitet edhe softueri për të kryer back-up, derisa vjen me garanci prej tri vitesh.

Padi e re ndaj The Pirate Bay

Faqja më e njohur e internetit në botë për shkëmbimin e dosjeve "The Pirate Bay” është duke u përballur edhe një kërcënim të ri gjyqësor me qëllim të mbylljes së saj.

Trembëdhjetë kompani hollivudiane kanë ngritur padi të re në tentim që të mbyllin faqen e popullarizuar, transmeton BBC.

Themeluesit e faqes në muajin prill janë shpallur fajtorë për shkeljen e të drejtave autoriale dhe janë dënuar me një vit burg, si dhe dënim me para në vlerë prej 4.5 milionë dollarësh.

Faqja ka vazhduar të punojë, prandaj edhe më tutje u mundëson përdoruesve të shkëmbejnë filma, emisione televizive dhe muzikë.

Padinë e re e kanë ngritur Columbia Pictures, Disney, Studio Universal dhe dhjetë kompani tjera, nga të cilat shumica do të marrin dëmshpërblim nga shuma e përcaktuar nga gjykata në muajin prill.

The Pirate Bay është themeluar në vitin 2003 nga organizata e cila angazhohet kundër ekzistimit të drejtave autoriale “Piratbiran”, por me faqen gjatë pesë viteve të fundit udhëheqin individët.

Paraqiten fotot e LG NewChocolate

Janë paraqitur fotografitë e para komplete të celularit BL40-New Chocolate të kompanisë LG.

Celulari i stilizuar nga kompania LG "New Chocolate" që disa muaj radhë është duke u paralajmëruar, por LG ka qenë mjaft e mençur që të mos lëshojë të gjitha informatat se si ky celular do të duket, prandaj fotografitë zyrtare kanë qenë siluetë e pajisjes pa detaje të vërteta. Dje më në fund kanë dalë fotografitë në detaje në të cilat shihet edhe fytyra dhe dizajni komplet i risisë së LG-së në serinë e telefonave celularë Black Label.

Nga specifikat e këtij celulari vlen të theksohen mbështetja për WiFi 802.11 b/g, Bluetooth, pranuesi i radiovalëve FM, si dhe mbështetja për GSM/Edge, por nuk përmendet 3G, edhe pse spekulohet se edhe kjo do të mund (duhej) të jetë pjesë e paketës standarde.



Ekrani vjen në format të pazakontë të zgjatur 21:9 me rezolucion prej 800 x 345 piksela.

Vjen Toyota IQ elektrike

Një burim i afërm me prodhuesin Toyota ka zbuluar detaje të reja për automjetin e radhës elektrik japonez të bazuar në modelin kompakt IQ.

Supozohet se automjeti Toyota IQ elektrik do të duhej të paraqitej qysh vitin e ardhshëm, derisa do të përdorë bateritë litium-jon si dhe elektromotorë në çdo bosht. Performansat tani për tani nuk janë të njohura, mirëpo automjeti i vogël kompakt, gjoja, me një mbushje do të duhej të ishte në gjendje të kalojë deri në 150 kilometra rrugë.

Mjafton për vozitje të përditshme nëpër qytet, por asgjë më shumë se kaq. Sipas Toyotas, mbushja e baterisë në rrjet standard elektrik nuk do të duhej të zgjas më shumë se tetë orë.

RIM konfirmon BlackBerry Curve 8520

Pas paraqitjes së teknologjisë touchscreen me modelin Storm, RIM i është kthyer recetës së dëshmuar, tastierës QWERTY.

BlackBerry Curve 8520 vjen me tastierë të plotë fizike QWERTY me të cilën RIM për sa vite tani na ka mësuar, mirëpo edhe më mbështetje të plotë për lidhjen Wi-Fi, që u ka munguar shumë paraardhësve të tij.

Curve 8520 ka procesor i cili punon në taktin 512 MHz, 256 MB memorie flash, fotoaparat prej 2 megapikselash si dhe mbështetje lokale për kompjuterët Mac dhe teknologjinë Bluetooth 2.0.

Risia më e re në radhën e telefonave të mençur BlackBerry të kompanisë RIM do të duhej që në treg të paraqitej gjatë muajit gusht.

Audi R8 elektrik në panairin e Frankfurtit

Që disa vjet rresht prodhuesit nga njëri panair në tjetrin po na befasojnë me zgjidhjet hibride dhe automjete të reja. Duket se më në fund ka ardhur koha që të njëjtën gjë ta bëjnë edhe me automjetet e vërteta elektrike.

Audi, nëse mund t’u besohet spekulimeve të mediave, në panairin e Frankfurtit, do të mund të na paraqes modelin R8 të pajisur me motor elektrik. Duke marrë parasysh se automjeti do të ketë në dispozicion ekskluzivisht bateri pa motor me djegie të brendshme, revista Automobile Magazin pohon se ai nuk do të jetë hibrid, por krejtësisht elektrik.

Supozohet se koncepti do të duhej të thirrej R8 ePerformance. Në krahasim me automjetin standard, R8 do të duhej të dallojë me pamjen e jashtme e cila nuk do të jetë i dekoruar me thithësit e ajrit pasi që motorit elektrik nuk i vyejnë gjë.

Lëshim kritik në Acrobat e Flash

Kompania Adobe ka lëshuar një arnim për një problem kritik në Adobe Reader, Acrobat e Flash Player i cili sulmuesit potencial i mundëson të marrë përsipër kontrollin mbi sistemin e përdoruesit.

Lëshimi ka të bëj me një dosje e cila është lëshuar me versionet 9.x e 10.x të Flash Player dhe Adobe Reader e Acrobat 9.x për të gjitha platformat e mbështetura.

Në Adobe theksojnë se këtu bëhet fjalë vetëm për një mundësi teorike e cila vështirë mund të përdoret në kushte reale, por se bëhet fjalë për një lëshim i cili në mënyrë aktive keqpërdoret nëpërmes sulmeve të kufizuara të drejtuar në Adobe Reader 9 për sistemin operativ Windows.

Shkarkohen një miliard shfletues Firefox

Pas paralajmërimit fillestar, Mozilla ka shënuar edhe shkarkimin e kopjes së një miliardët të shfletuesit Firefox i cili sot mban mbi 30 për qind të tregut.

Deri tek kjo arritje e madhe është dashur të pritet mbi katër vite e gjysmë, versioni i parë i Firefoxit është paraqitur më 9 nëntor të vitit 2004.



Marrë parasysh se në ndërkohë është bërë alternativa më e popullarizuar e shfletuesit Internet Explorer, Firefox ka arritur të rrezikojë dhe ndalojë pothuajse dominimin absolut që e gëzonte shfletuesi i Microsoftit.