Lajme me te reja nga bota e Teknologjisë

Rrjedhin specifikat e iPhonet të ri?

Vera po afrohet, e kjo është përafërsisht koha kur nga kompania Apple pritet (edhe pse nuk është vërtetuar zyrtarisht paralajmërimi askund) të paraqes një iPhone të ri. Në lidhje me këtë çdo ditë e më shumë po paraqiten informata të pavërtetuara, e kjo e fundit tingëllon bukur e besueshme.

Sipas pamjes së përzgjedhësit kryesor i cili është paraqitur në një forum kinez, thamë edhe më herët se informacioni është i pavërtetuar, iPhone i ri do të ketë procesor me takt punues prej 600 MHz (aktualisht ka 400 MHz), 32 GB memorie për ruajtje të dhënave, 256 MB memorie punuese (dyfish më shumë se tani) dhe fotoaparat me auto-fokus me rezolucion prej 3.2 megapikselash.

Përmenden edhe kompasi digjital e radio FM, dhe tëra këto në shtëpizën e dimensioneve dhe pamjes së njëjtë si dy të mëhershmit iPhone.

Tingëllon bukur besueshëm, mirëpo jemi të sigurt se thashetheme si këto do të ketë ende, e po ashtu jemi të sigurt se Apple, si gjithmonë, fsheh ndonjë befasi edhe për këtë iPhone të fundit.

www.apple.com

Microsoft konfirmon edhe zyrtarisht, Windows 7 këtë vit

Prodhuesi i sistemit operativ Windows u ka dhënë fund spekulimeve nëse Windows 7 do të vjen në treg gjatë këtij apo vitit tjetër. Do të vjen këtë vit.
Microsoft ka njoftuar që Windows 7 të lëshohet në shitje para sezonit të festave të këtij fundviti. Kjo nënkupton se sistemi operativ në shitje me pakicë dhe i parainstaluar nëpër kompjuterë do të mund të paraqitej para muajit nëntor, kur fillon zyrtarisht sezoni i blerjes së festave të fundvitit në Amerikë.

Windows 7 do të duhej që brenda tre muajsh të arrij statusin RTM (release to manufacturing), që do të thotë se atëherë do të fillohet me shitje tek partnerët afaristë të cilët do t’i instalojnë në kompjuterët e gatshëm dhe të fillojnë shumëzimin e disqeve si dhe vendosjen e numrave serik. Periudha RTM zakonisht zgjat tre muaj dhe pas kësaj sistemet operative do të fillojnë të dalin në shitje me pakicë.

Acer, prodhuesi me kalibër botëror i kompjuterëve, ka njoftuar se pret të fillojë më shitjen e sistemit të ri operativ Windows 7 më 23 tetor të këtij viti.

www.microsoft.com

Vjen Lenovo IdeaPad S10-2

Lenovo ka paraqitur versionin e përditësuar të netbookut të saj IdeaPad S10. Shenja dalluese e laptopit të ri është IdeaPad S10-2 i cili vjen në shtëpizë për katër milimetra më të hollë dhe 200 gramë më të lehtë se paraardhësi i tij.
Edhe më tutje është mbajtur ekrani 10.1 inçësh me ndriçim të prapavijës prej 1.024 x 600 piksela, procesori është ai 1.6 GHz Atom nga Intel, është integruar edhe një gigabajt e memories punuese si dhe disku klasik prej 160 GB. Së bashku me lidhjen Wi-Fi, në mënyrë opsionale ofrohet edhe qasja 3G në internet, derisa koha e deklaruar e kohëzgjatjes së baterisë është gjashtë orë.

Nga softuerët me të shitet Windows XP Home, QuickStart, VeriFace dhe OneKey Rescue.

Në tregun amerikan netbooku do të paraqitet në fund të këtij muaji me çmim të rekomanduar të shitjes prej 350 dollarësh.

Netbooku i parë i bazuar në Android

Sapo janë paraqitur disa celularë solidë me sistemin operativ Android të kompanisë Google, tashmë dikush veçmë ka tentuar të bëj edhe një laptop të vërtetë me Android.
Nuk jemi krejtësisht të sigurt nëse më shumë bëhet fjalë për telefon celular apo kompjuter, sikur që nuk jemi të bindur se Android si platformë është e pjekur sa duhet për të kaluar në kompjuterë personal të vërtetë.

Mirëpo Alpha 680 ka disa karakteristika interesante, të cilat madje edhe nuk janë të lidhura me sistemin operativ; në të gjendet ekrani i madh i ndjeshëm në prekje i cili mund të sillet.

Specifikat më shumë i afrohen celularit sesa kompjuterit. Ai përmban procesor ARM11 me takt punues prej 533 MHz, rezolucioni i ekranit është 800 x 480 piksela, 128 MB DDR2 RAM memorie, Wi-Fi si dhe disk SSD me kapacitet prej një gigabajt.

Olympus Stylus Tough-8000

Kompania e cila merret me krijimin, prodhimin dhe shitjen e fotoaparateve, Olympus, ka paraqitur modelin e saj më të ri Olympus Stylus Tough-8000.
Shpesh ndodh që telefonat tonë celularë, MP3-të, kamerat digjitale apo fotoaparatet prishen gjatë rënies, goditjes apo lagies me ujë në to dhe do të bënim çdo gjë që t’i mbrojmë prej kësaj. Mu për këtë, Olympus ka nisur një linjë të plotë të fotoaparateve digjitale të cilët do të janë rezistues ndaj rrethanave që i përmendëm më lartë, e një prej tyre është edhe Olympus Stylus Tough-8000.

Ky është modeli më i pajisur nga seria Tough. Është rezistues nga rënia prej dy metrash, mund të qëndrojë në thellësi të ujit deri në 10 metra dhe mund të mbaj peshën deri në 100 kilogramë.

X-Walkman, konkurrenca e iPod Touch

Kompania japoneze Sony zyrtarisht ka paraqitur serinë e re të vet të X-Walkman me ekranet OLED të cilët në treg do të duhej të janë një konkurrencë serioze për pajisen iPod Touch të kompanisë Apple.
Mirëpo, Sony me linjën e re të Walkman-ëve me ekrane OLED i ka tejkaluar pajisjet shumë të popullarizuara iPod Touch të kompanisë Apple të cilat kanë ekrane LED.

Sony X-Walkman ka ekran prej tre inçësh dhe mbështetje për Wi-Fi, si dhe mbështet formatet MP3, WMA e AAC. Ka procesor të avancuar të zërit, S-Master i cili eliminon zhurmën edhe atëherë kur dëgjoni muzikën me zë jashtëzakonisht të lartë.

Seria X-Walkman në tregun botëror del në mesin e muajit qershor, derisa blerësit do të kanë në dispozicion dy versione të pajisjes, atë 16-gigabajt Sony NWZ- X1051 me çmim prej 299 dollarëve amerikanë, si dhe Sony NWZ- X1061 me 32 gigabajt memorie me çmim prej 399 dollarë.

Opel shfaq Astran e re

Pas një muaji pritje Opel edhe zyrtarisht na i ka paraqitur fotografitë e para zyrtare të Astras së re, e cila premierën e saj botërore do ta ketë në panairin e automjeteve në Frankfurt që mbahet në vjeshtën e këtij viti, derisa në shitje do të duhej të del deri në fund të vitit.
Për dallim nga konkurrentet në klasën e saj, të cilat nga gjenerata në gjeneratë evoluojnë në dizajn, Astra e re nuk i ngjan paraardhëses së saj. Siç ka thënë drejtori i marketingut të kompanisë “Vauxhall” Andy Gilson: “Vetëm emri i ka mbetur i njëjti”.

Në Opel përmendin edhe platformën e re Delta të cilën Astra e ndan me Chevrolet Cruze, e mu për këtë do të duhej të ishte dukshëm më e orientuar kah automjetet sportive sesa paraardhësja e saj.



Nën kofano do të gjenden katër motorë me benzinë dhe tre me naftë.

Netbooku Dynabook i ri nga Toshiba, i përsosur

Netbookët janë një gjë e mirë: të vogël, të përdorshëm e të lirë. Mirëpo, nganjëherë njeriu ka dëshirë për diçka që është e fuqishme, e shpejtë, e vogël, e lehtë , por fatkeqësisht, bukur shtrenjtë.
Laptopi i ri i Toshibas me emër tepër të gjatë Toshiba Dynabook SS RX2/WAJ para së gjithash, është laptopi i parë në treg me disk SSD të kapacitet prej 512 GB. Më pas në të gjendet procesori Core 2 Duo SU9400 i kompanisë Intel, edhe pse Toshiba nuk përmend shumë detaje, supozojmë që edhe komponentët tjerë do të janë në majë të ofertës aktuale.

Mirëpo nëse keni menduar se të gjitha këto gjëra janë vendosur në një shtëpizë të madhe, jeni mashtruar; Dynabook i ri ka ekran me diagonale prej 12 inçësh, derisa pesha e tij e përgjithshme është vetëm 1.1 kilogramë.

Çmimi, për fat të keq, do të jetë i lartë, sigurish mbi një mijë dollarë amerikanë.

www.toshiba.com

Kompania koreane Sky lanson celularin Hommage

Për disa Hommage i ri është vetëm edhe një telefon celular i rrëshqitës i radhës por kompaninë koreane Sky ai është gjithçka. Me lansimin e tij kompania shënon solemnisht 10-vjetorin e punës.
Hommage ka karakteristika bukur të rëndomta të klasës së celularëve të cilës i takon. Interesante janë 112 drita LED në panelin e përparmë të cilat gjatë përdorimit të telefonit ndriçojnë në forma të ndryshme.

Sky ka ofruar edhe tri variante të ngjyrave të telefonit: të zezë, të bardhë dhe rozë dhe një çmim të vetëm, atë prej 400 dollarësh amerikanë.

Gmail importon kontaktet dhe e-mailat nga Hotmail, Yahoo...

Qëkur është paraqitur, shërbimi falas për e-maila i kompanisë Google ka dalë të jetë një prej më të mirëve të llojit të tij. Kohë pas kohe Gmail na befason me disa mundësi të reja, e tani mundëson që në të të importojmë edhe përmbajtjet nga shërbimet tjera të ngjashme.
Gmail prej tani mundëson importimin e arkivit të e-mailave dhe kontakteve nga rreth 40 shërbime tjera për përdoruesit që dëshirojnë një gjë të tillë dhe atë në mënyrë të thjeshtë dhe pa humbur të dhëna.

Kjo mundësi e re e Gmail është realizuar në bashkëpunim me kompaninë TrueSwitch.

Importimi i kontakteve nga shërbimet tjera në Gmail tani për tani u është mundësuar përdoruesve të rinj të këtij shërbimi, derisa atyre ekzistues do t’u mundësohet gjatë javëve në vijim.

www.gmail.com

HP në telashe me bateri

Hewlett Packard në SHBA tërheq rreth 70.000 bateri për laptopë nga disa linja të tyre për shkak të mundësisë së nxehjes dhe shkaktimit të zjarrit.
Kompania tërheq bateritë e përdorura në modelet e ndryshme të laptopëve të linjave Pavilion, Compaq Presario, HP e HP Compaq.

Kompjuterët janë shitur online nga muaji gusht 2007 deri në mars të vitit të kaluar. Çmimet e laptopëve kanë qenë mes të 500 e 3.000 dollarë, derisa bateritë e tyre janë prodhuar në Kinë.

HP këshillon ndërprerjen së përdorimit të baterive në modelet e përmendura dhe se kryen ndërrimin e tyre pa pagesë.



www.hp.com

Hakerët sulmojnë rrjetin Facebook

Hakerët kanë kryer sulm në 200 milionë njerëz, përdorues të rrjetit Facebook, duke arritur që me sukses të bëjnë për veti disa të dhëna me të cilat nuk do t’i lënë rehat anëtarët e këtij rrjeti jashtëzakonisht të popullarizuar online.
"Faqet aktualisht janë duke u pastruar nga dëmi të cilin e ka shkaktuar sulmi”, ka pohuar zëdhënësi i Facebookut, Barry Schnitt. Numri i llogarive të vjedhura të përdoruesve tani për tani është i panjohur.

Hakerët deri tek të shifrat kanë ardhur ashtu që kanë depërtuar në llogaritë e përdoruesve të Facebook, nga llogaritë e tyre të e-maileve u kanë dërguar e-maila miqve të tyre në të cilët u kanë bërë thirrje të klikojnë në lidhjet e rrejshme të faqeve të internetit.

Qëllimi i këtyre sulmeve është vjedhja e identiteteve dhe dërgimi i e-mailave spam.

Schnitt ka thënë se ekipi i sigurisë së Facebook beson se hakerët kanë për qëllim të bëjnë bashkë një numër të madh të identiteteve, e më pas t’i përdorë ato llogari gjatë dërgimit të e-mailave spam, për t’iu dërguar reklama të ndryshme anëtarëve të Facebookut.

www.facebook.com

Shfletuesit më të popullarizuar edhe më të ngadalshmit

Shikuar në përgjithësi, Internet Explorer e Firefox së bashku mbajnë 90 për qind të pjesëmarrjes në treg. Megjithatë, kjo e dhënë nuk garanton se janë edhe më të shpejtit në punën e përditshme, gjë që ka arritur ta dëshmojë ekipi i kompanisë Futuremark.
Kompania Futuremark e ka ofruar versionin e fundit të Peacekeper, një mekanizëm pa pagesë online i cili mat dhe krahason performansat e shfletuesve të ndryshëm të internetit. Sipas të dhënave të publikuara, të mbledhura nga 400.000 përdorues, shfletuesit më të ngadaltë në të njëjtën kohë përdoren edhe më së shumti.

Edhe pse sipas të dhënave të shtëpive tjera analitike lista e shfletuesve më të popullarizuar duket diç më ndryshe, përdoruesit të cilët e kanë testuar shfletuesin e tyre me mekanizmin Peacekeeper më së shpeshti e përdorin Firefox (37 për qind), pasuar nga Internet Explorer (25 për qind), Chrome (16 për qind), Opera (11 për qind) dhe Safari (9 për qind).

Sipas të dhënave të publikuara, më i shpejti në testin e Peacekeeper ka qenë Safari nga kompania Apple, pasuar nga Chrome i Google, Opera, Firefox dhe në vendin e fundit Internet Explorer.

Performansat e shfletuesit tuaj të uebit mund t’i kontrolloni në adresën www.futuremark.com/peacekeeper.

Ultra-laptopi HP Pavilion dv2z

Hewlett Packard e ka lëshuar në shitje ultra-laptopin interesant Pavilion dv2z, një prej të rrallëve që vjen i bazuar në procesorët Neo të kompanisë AMD.

Shtëpiza e dizajnuar bukur është përpunuar nga legura e aluminit dhe magnezit dhe vjen në kombinim të ngjyrave me emra inovativ Espresso black dhe Moonlight white.

Në ofertë janë tre procesorë, një-bërthamëshi Athlon Neo MV-40 me takt punues 1.6 GHz si dhe dy-bërthamëshit Athlon Neo X2 L355 e Turion Neo X2 L625, që të dy po ashtu me takt prej 1.6 GHz.

Blerësit mund të zgjedhin në mes të memories 2 apo 4 GB DDR2, deri në 500 GB hapësirë disku dhe grafikën e ATI-së, atë të integruar X1250 apo diskrete Mobility Radeon HD 3410.

Ekranin e ka të diagonales 12.1 inç (1280 x 800 piksela), derisa në gjërat tjera hynë kamera e uebit, rrjeti me dhe pa tela me Bluetooth, lexuesi i kartelave të memories, 3 konektorë USB si dhe altoparlantët e Altec Lansing.

Kompjuteri në formë standarde vjen me baterinë me gjashtë qeli dhe Vista Home Basic (32-bitëshe) apo atë Home Premium (64-bitëshe). Çmimet sillen prej 600 dollarë e lartë.

Më shumë fuqi, më shumë ekonomi

Prodhuesi Citroën edhe zyrtarisht i ka publikuar detajet e motorit të ri të avancuar me naftë 3.0 HDi V6, i cili nga kjo verë do të fillojë të shitet me modelet C5 e C6.

Në vend të motorit të njohur 2.7 litërsh HDi me fuqi prej 208 kuaj fuqi, të zhvilluar në bashkëpunim me grupimin PSA dhe Ford, në ofertën e re të prodhuesit francez gjendet i riu, me 300 ccm volum të shtuar.

Falë këtij volumi, fuqia tani është 240 KF, dhe si i tillë është motori më i fuqishëm në historinë e Citroën.

Shpenzimi i karburantit është zvogëluar për 13-17 për qind, si dhe emetimi i CO2, i cili është në mes 12-15 për qind më i vogël sesa tek 2.7 litërshi me naftë. Motori në fjalë i plotëson standardet EURO 5 të cilat fillojnë së aplikuari në fillim të vitit 2011.

I çiftëzuar me marshin automatik prej gjashtë shpejtësish, motori i ri shpenzon pak më shumë sesa shtatë litra naftë në 100 kilometra të kaluara, derisa emetimi i CO2 është 195 gramë për kilometër.

MySpace largon nga puna 30 për qind të punësuarve

Thashethemet për zvogëlimin e të punësuarve në taborin e rrjetit shoqëror MySpace të cilat po sillen nëpër në internet që një kohë të gjatë tani janë bërë edhe zyrtare. Nga puna largohen rreth 500 të punësuar të MySpace.

Njoftimi zyrtar i MySpace pohon se largimet nga puna janë pjesë e “planit për ristrukturimin e një kompanie më inovative, të efektshme dhe afariste”, mirëpo të gjithë e kanë të qartë se bëhet fjalë për reduktimin klasik të shpenzimeve me anë të largimit të fuqisë punëtore. Aktualisht në MySpace janë të punësuar rreth 1.600, derisa 480 prej tyre do të pranojnë sot letrën për largim nga puna.

Drejtori ekzekutiv i MySpace ka deklaruar se “më thjesht, fuqitë punëtorë në kompani janë të tepërta, që shkakton që kompania të mos jetë e efektshme. E kuptoj se ndryshimet janë të dhimbshme për një numër të caktuar të të punësuarve, mirëpo ato janë të domosdoshme për qëndrueshmërinë e MySpace”, ka shtuar ai.

MySpace që një kohë është duke humbur betejën me konkurrentin e vet Facebook, i cili sipas të dhënave të analistëve gjatë muajit prill të këtij viti ka shënuar diç më shumë se 100 milionë vizita unike të përdoruesve, derisa në periudhën e njëjtë MySpace ka numëruar diç më shumë se 60 milionë.

www.myspace.com

iPhone OS 3.0 në dispozicion

Përditësimi i sistemit operativ për iPhone e iPod Touch është ofruar në dispozicion për instalim me anë të iTunes.

Apple, siç edhe ka premtuar, ka lëshuar në distribucion iPhone OS 3.0 për pajisjet iPhone e iPod Touch. Siç dihet, ky përditësim më i madh i sistemit operativ sjell risi të shumta, në mesin e të cilave më të rëndësishmet janë mbështetja për shfletim në formë peizazhi (landscape) dhe shkrim të tekstit, mbështetja për MMS, kërkimi Spotlight dhe mundësia copy e paste.

Në të është edhe aplikacioni i ri Voice Memos, shfletuesi i avancuar Safari, mbështetja për stereo Bluetooth, mundësia e sinkronizimit të të dhënave, opsioni shake to shufle për dëgjim të muzikës dhe risi tjera.

Përditësimi, sikur edhe deri më tani, mund të bëhet me anë të iTunes, për pronarët e iPhone pa pagesë derisa atë që posedojnë iPod Touch duhet të paguajnë 9.95 dollarë.

Vjen televizioni OLED nga LG

LG në fund të vitit do të lansojë televizionin 15-inçësh me ekran OLED, i dyti i këtij lloji pas atij XEL-1 nga kompania Sony.

Specifikat e tij ende nuk janë bërë të njohura, mirëpo rezolucioni i paralajmëruar është më i madh se tek modeli i kompanisë Sony. Siç ka paralajmëruar nënpresidenti i kompanisë, televizori fillimisht do të shitet në Kore, e më pas edhe në pjesën tjetër të botës.

Vitin e ardhshëm priten ekranet 30-inçëshe nga LG, Samsung e Sony. Besohet se teknologjia OLED është teknologji e ardhmes për integrimin e ekraneve në televizorë. Ekranet OLED nuk kërkojnë ndriçim të prapavijës prandaj edhe shpenzojnë më pak energji, derisa ofrojnë kontrast më të mirë dhe ngjyra më të mira sesa ato LCD.

Del versioni Firefox 3.5 RC1

Për përdoruesit e versionit eksperimental të Firefox 3.5 këto ditë ka dalë edhe Firefox 3.5 RC1 (release candidate), derisa versioni përfundimtar i këtij shfletuesi pritet të vjen shpejt.

Duke marrë parasysh se bëhet fjalë për një softuer i cili nuk është përfunduar në tërësi, shfrytëzuesit e versionit release candidate mund të presin probleme në kompatibilitet me faqe të caktuara dhe shtojca (add-ons).

Me të gjitha karakteristikat tjera, ky version është pothuajse i njëjtë me versionin përfundimtar Firefox 3.5 i cili do të duhej të del gjatë këtij muaji.

Në Mozilla pohojnë se versioni përfundimtar i Firefox 3.5 do të jetë dyfish më i shpejtë sesa versioni aktual e madje dhjetë herë më i shpejtë sesa Firefox 2.0.

Edhe një audio player miniatural nga Sony

Prodhuesi japonez i elektronikës shpenzuese Sony e ka plotësuar serinë e vet B të audio playerëve bartës me një model të ri. Emërtimi i plotë i pajisjes së re është Walkman NWZ-B142F (JE) Zappin.

Sikur edhe tek anëtarët tjerë të serisë Walkman të këtij prodhuesi, ashtu edhe Zappin përmban tastin përkatës “zap”, i cili përdoruesve u mundëson dëgjimin e muzikës së ruajtur në të me kohëzgjatje prej pesë sekondash për këngë.

Zappin me kompjuterin lidhet me anë të lidhjes klasike USB, derisa bartja e dosjeve të formatit mp3 apo wma bëhet pa pasur nevojë për softuerë shtesë. Hapësira e të dhënave është ndaluar në 2 GB, derisa pajisja posedon edhe pranues të radiovalëve FM. Bateria e integruar do të duhej të mundësonte 18 orë të pandërprera të riprodhimit të muzikës.

Sony Zappin do të paraqitet më 10 korrik në tregun japonez, dhe atë në variante të shtëpizave me ngjyrë të kuqe, zezë, rozë apo portokalli dhe çmim prej 49 dollarësh amerikanë.

Logitech paraqet miun bartës me Bluetooth

Logitech ka paraqitur dje miun me emërtimin M555b i cili mundëson lidhje pa tela (wireless) me kompjuterë e laptopë të cilët posedojnë teknologjinë Bluetooth.

Që puna me këtë mi të jetë jashtëzakonisht e këndshme, ai përmban edhe opsionin e ashtuquajtur “hyper scrolling” i cili mundëson shfletimin e dokumenteve dhe faqeve të internetit me shpejtësi të madhe.

Laseri i integruar ofron kontroll të drejtimit pothuajse mbi çfarëdo sipërfaqe që ai të jetë vendosur.

Pritet që miu M555b në Evropë e SHBA të del në shitje gjatë këtij muaji me çmim të rekomanduar me pakicë prej 60 dollarësh.

Seat Leon Cupra R vjen deri në fund të vitit ?

Sipas informacioneve të fundit, deri në fund të vitit në treg do të duhej të arrinte versioni më i fuqishëm i versionit kompakt të Seatit. Bëhet fjalë për versionin R të Cupra të cilin do ta fuste në lëvizje motori 2.0 TSI me 269 kuaj fuqi.

Gjithsesi bëhet fjalë për motorin 2.0 nga modeli Scirocco R të Volkswagen, derisa integrimi i tij pritet të bëhet edhe në Golf R. Përveç fuqisë prej 269 KF, ky motor zhvillon edhe momentin maksimal të rrotullimit prej 350 Nm. Të gjitha këto shifra e bëjnë që Leon Cupra të arrijë shpejtësinë prej 0 deri në 100 km/h për rreth 6 sekonda.

Ndryshe, motori do të jetë i çiftëzuar me marshin mekanik prej gjashtë shpejtësish, derisa në versionin opsional në ofertë do të duhej të gjendej edhe ai DSG me lidhje të dyfishtë.

Çip i memories prej 32 gigabajt

Kompania koreane ka prodhuar pllakën DD3 të memories të dedikuar për integrim në kompjuterët që shërbejnë si serverë, kapaciteti i së cilës është 32 gigabajt.

Samsung ka premtuar se do të prodhojë modulin e kapacitetit prej 32 gigabajt në muajin janar të këtij viti kur kishte prodhuar modulin e saj të parë 50 nm DDR3 prej katër gigabajt. Moduli i memories është i dedikuar për integrim në serverë dhe tani për tani nuk ekziston versioni për kompjuterë personalë.

Tensioni i punës së modulit është 1.35 volt, që është më pak se ata standard prej 1.5, mirëpo Samsung pohon se ka arritur të arrij 20 për qind më shumë depërtueshmëri nga memoriet tjera DDR3.

Ende nuk është bërë i njohur çmimi i këtij produkti, por është e sigurt që do të jetë i lartë.

www.samsung.com

FreeAgent Go prej 640 gigabajt

Disku bartës Free Agent Go nga kompania Seagate tani mund të gjendet edhe në kapacitetet prej 250, 320, 500 e 640 gigabajt.

Seagate është bërë një prej prodhuesve të parë që ofron diskun 2.5 inçësh me kapacitet më të madh se 500 gigabajt. Në modelin FreeAgent Go të kësaj kompanie mund të vendosen hiq më pak se 640 gigabajt të dhëna.

Disku ka dimensione 12.5 x 80 x 130 milimetra, peshon 160 gramë, mund të blihet në ngjyrë të zezë dhe argjendtë dhe vjen me çantën e lëkurës për bartje. Disku lidhet me qasjen USB 2.0. Përveç në kapacitetin prej 640 GB ai mund të vjen edhe në versione prej 250, 320 e 500 GB.

Në tregun amerikan FreeAgent Go do të shitet me garanci prej pesë vitesh, me çmim tani për tani të panjohur.

HTC Magic më i shpejt sesa Dream

Celulari i dytë i kompanisë HTC me sistemin operativ Android të kompanisë Google po shitet dy herë më shpejt sesa modeli i parë – T-Mobile G1.

Shefi i HTC-së Peter Chou në një intervistë për Commercial Times ka deklaruar se pret që kompania deri në muajin gusht të shes një milion njësi të modelit Magic.

Nëse parashikimet realizohen, milioni i parë i HTC Magic do të arrihet brenda tre muajsh që është dyfish më shpejt sesa që i është nevojitur Androidit të parë, modelit Dream i cili ka qenë i njohur me emrin e tij tregtar T-Mobile G1. Shitjes më të mirë i ka kontribuar shitja më e shpërndarë nëpër ofrues të shërbimeve mobile dhe dizajni larg më tërheqës.

Pos Palm Pre, HTC Magic vlerësohet një nga konkurrentët kryesor të popullarizuarit iPhone.

Asus e Disney krijojnë laptopin për fëmijë

Prodhuesi tajvanez i kompjuterëve Asus dhe kompania amerikane “Disney” gjatë kësaj vere do të fillojnë shpërndarjen e laptopëve miniatural të dedikuar për fëmijët në mes gjashtë e 12 vjeç.

Kompjuteri “Disney Netpal" do të shitet në ngjyrë rozë dhe të kaltër dhe do të jetë i përshtatur për shikimin e dhjetëra filmave të animuar siç janë Wall-E, Toy Story apo Cars.

Kompjuteri ka ekran prej 8.9 inçësh, si dhe procesorin Atom N270 nga kompania Intel me një gigabajt memorie flash, kamerë uebi prej 0.3 megapiksela dhe tri qasje USB.

Në Shtetet e Bashkuara ai do të shitet në dy modele: me memorien për ruajtjen e dhënave SSD prej 16 gigabajt dhe peshë prej 990 gramë, derisa modeli i dytë do të ketë disk klasik prej 160 gigabajt dhe peshë prej 1.17 kilogramë.

Netpal do të funksionojë me sistemin operativ Windows XP të kompanisë Microsoft në të cilin janë parainstaluar një numër i madh i mekanizmave me të cilët prindërit do të kanë mundësi të kontrollojnë shfrytëzimin e kompjuterit nga fëmijët e tyre.

Çmimi i kompjuterit do të jetë 350 dollarë amerikanë.

Opel Astra – pamjet e para të enterierit

Opel Astra praktikisht është paraqitur disa herë, dhe me secilën nga fotografitë të reja të paraqitura kemi mësuar nga diç të re. Mirëpo, edhe pse ky automjet më i rëndësishëm i Opelit do të ketë premierën e tij në vjeshtë në panairin e automjeteve në Frankfurt, fotografitë e enterierit tanimë janë publikuar.

Siç edhe është pritur, Astra mbështetet shumë në Opel Insignian sa i përket enterierit. Me këtë personat përgjegjës në Opel kanë dashur të rrisin nivelin e kualitetit dhe ndjenjës së mirë brenda automjetit, prandaj kopjimi i Insignias është gjëja e duhur, derisa Astra duket shumë e fuqishme me shtojcat e vendosura nga alumini.

Shumë njerëz kanë kritikuar gjeneratën e tanishme të Astras për shkak të enterierit të varfër, derisa ky version i fundit lë përshtypje krejtësisht tjetër. Inxhinierët e kanë emëruar “hapësirë inteligjente”, prandaj vend për imtësira ka në çdo vend të mundshëm të tij.

Shihni animacionin e mëposhtëm dhe kuptoni se për çfarë bëhet fjalë: