Lajme te reja nga bota e Sporti

Edhe Sunderlandi në garë për Canën

Skuadra angleze Sunderland i është bashkëngjitur garës për të fituar shërbimet e mesfushorit shqiptar, Lorik Cana.

Dy skuadrat më të përfolura të cilat kërkojnë shërbimet e kosovarit janë Evertoni dhe Hamburgu, ndërsa po ashtu interesim kanë shprehur edhe Liverpooli, Arsenali dhe Tottenham Hotspur.

“Daily Mirror” shkruan se trajneri i Sunderlandit, Steve Bruce, ka kontaktuar me kapitenin e Marseille dhe është i interesuar seriozisht që ta transferojë mesfushorin.

Ndërkohë, Cana duhet të vendosë sa më shpejtë për të ardhmen e tij, kurse cilado skuadër që e transferon atë duhet të paguajë më shumë se tetë milionë euro.

Milani i konkurron Interit për Eto’o

Kampioni i Italisë, Inter, është pranë transferimit të sulmuesit të Barcelonës, Samuel Eto’o, ndërsa sipas njoftimeve më të reja, rivali i qytetit, Milan, ka ndërhyrë për ta joshur kamerunasin që ta veshë fanellën kuqezi.

Kalimi i Eto’o tek Inter është pjesë e marrëveshjes për transferimin e Zlatan Ibrahimovicit te Barcelona, mirëpo bisedimet kanë stagnuar si pasojë e kërkesës së lartë të e kamerunasit për pagën e tij.

Ndërkohë, “Sky Italia” njofton se përkundër problemeve financiare, Milani është përfshirë në garën për “ta vjedhur” Eto’o-n.

Një gjë është e sigurt, Eto’o do të transferohet në Milano, por të presim dhe të shohim se cilën fanellë do ta veshë, atë zikaltër apo atë kuqezi.

Roma përgatitet për shitjen e Aquilanit

Drejtuesit e Romës i kanë thënë mesfushorit të tyre Alberto Aquilani që të përgatitet për të kaluar në Ligën Premier ku mund të luajë për Liverpoolin.

Redsat dëshirojnë shërbimet e mesfushorit italian nëse Xabi Alonso kalon në Real Madridi, ndërsa “Il Corriere Dello Sport” njofton se Giallorossët janë të gatshëm ta shesin yllin e tyre për të grumbulluar para për të balancuar problemet e tyre ekonomike.

Për zhvillimet e mëtutjeshme gjithçka do të varet nga Real Madridi dhe Alonso. Nëse spanjolli kalon në Santiago Bernabeu, atëherë italiani do të kalojë në Anfield.

Gigli: Ka ardhur koha të shesim

Presidenti i Juventusit, Giovanni Cobolli Gigli, ka mohuar spekulimet për një shkëmbim të mundshëm me Milanin, të David Trezeguet dhe Massimo Oddo, duke thënë se bardhezinjtë nuk kanë në plan të sjellin tjerë lojtarë në skuadër, porse të shesin disa prej tyre.

Të hënën është spekuluar se Bianconerët po mendonin për ta transferuar Massimo Oddon nga Milani, derisa në drejtim të kundërt do të udhëtonte Trezeguet. Mirëpo Gigli thotë se “kjo është vetëm diçka që kam lexuar nëpër gazeta”.

Ai po ashtu ka mohuar se Juve interesohet për mbrojtësin e krahut të Barcelonës, Martin Caceres, duke thënë se “objektivi i Juves tani është që të shesë lojtarë”.

Nëse Sevilla nuk ulë kërkesat Fabiano nuk transferohet

Zëvendëspresidenti i Milanit, Adriano Galliani, thotë se Sevilla duhet t’i zvogëlojë kërkesat për shitjen e sulmuesit brazilian Luis Fabiano.

Rossonerët janë të interesuar për shërbimet e brazilianit, po ashtu edhe vetë lojtari dëshiron të luajë në San Siro, mirëpo shifra të cilën e kërkon Sevilla për shërbimet e sulmuesit është shumë e lartë.

“Nëse Sevilla nuk dëshiron t’i zvogëlojë kërkesat, e gjithë marrëveshja do të bie në ujë”.

“Situata është shumë e qartë, ne jemi të interesuar dhe lojtari është i interesuar, mirëpo dallimi ndërmjet dy skuadrave është shumë i madh, saqë kompletimi i transferimit është i pamundur”, ka thënë Galliani.

Berbatov: Mund të ofroj më shumë

Sulmuesi bullgar Dimitar Berbatov ka thënë se ai ka shumë për të dhënë për Manchester Unitedin në sezonin e ri.

Berbatov kaloi te United sezonin e kaluar nga Tottenham Hotspur, ndërsa me fanellën e Djajve të Kuq shënoi 14 gola, duke i ndihmuar skuadrës ta fitonte trofeun e 18-të të Ligës Premier, Kupën Carling dhe po ashtu, United luajti në finale të Ligës së Kampionëve, ku u mposht nga Barcelona.

“Mund të paraqitem më mirë sesa në sezonin e kaluar. Prandaj jam i lumtur që jam në turneun parasezonal me klubin”.

“Është gjithmonë përparësi të fillohet mirë në këtë fazë përgatitore dhe mendoj se po stërvitem mirë gjatë kësaj kohe”.

“Jam këtu për të shënuar gola dhe shpresoj se këtë do ta bëj në sezonin e ri”, është shprehur Berbatov për MUTV.

Beckham shpreson të kthehet te Milan

Mesfushori i LA Galaxy, David Beckham, është i bindur se sezonin e ardhshëm do të kthehet te Milani.

Beckham la përshtypje pozitive gjatë qëndrimit gjashtëmujor te Rossonerët, ndërsa trajneri i ri i Milanit, Leonardo, shpreson që anglezi të kthehet në San Siro.
Tottenham Hotspur, Manchester City dhe Chelsea, janë skuadrat tjera të cilat dëshirojnë shërbimet e ish- mesfushorit të Manchester United, mirëpo Beckham shpreson se pas përfundimit të sezonit në MLS do të kthehet te Milan.

“Shpresoj se do të luaj për Milanin. Milani ka mbetur në zemrën time dhe jam i bindur se do të bashkohemi sërish në nëntor”, ka thënë Beckham për faqen zyrtare të Rossonerëve.

Malouda nënshkruan kontratë të re me Chelsean

Chelsea ka konfirmuar se mesfushori Florent Malouda ka nënshkruar kontratë të re trevjeçare me Blutë.

“Klubi i Chelseat konfirmon se Florent Malouda ka nënshkruar kontratë të re trevjeçare, në bazë të marrëveshjes së arritur më herët. Lojtari, i cili ka edhe një vit në kontratën e mëparshme, tash e ka zgjatur besnikërinë e tij ndaj klubit deri në vitin 2012”, shkruan në deklaratën zyrtare të Chelseat.

Ndërkohë, Malouda ka thënë: “Arritëm marrëveshje gjatë kohës kur isha në pushime dhe tash kur u ktheva, vetëm i nënshkrova dokumentet. Jam vërtet i lumtur, sepse kjo e dëshmon besimin e ndërsjellë ndërmjet skuadrës dhe mua, ndërsa për mua ky është fillimi i një tregimi tjetër”.

Samir Nasri tre muaj jashtë fushe

Arsenali ka pohuar se mesfushori francez Samir Nasri do të qëndrojë jashtë fushës së gjelbër për dy deri në tre muaj, pasi ka pësuar lëndim mëngjesin e sotëm.

Siç bëjnë të ditur mediat austriake, francezi ka pasur lëndim të rëndë pas një përplasje në stërvitjet e sotme dhe është nxjerrë jashtë fushe me ndihmën e dy fizioterapistëve.

Arsenali më pas ka pohuar se Nasri ka frakturë në këmbë dhe për këtë shkak ai duhet të pauzojë nga dy deri në tre muaj.

“Samir Nasri ka pësuar thyerje të këmbës gjatë stërvitjes së mëngjesit në kampin përgatitor në Austri. Mesfushori do të jetë jashtë fushe gjatë dy deri në tre muajt e ardhshëm”, thuhet në deklaratën e Arsenalit.

Caceres lojtar i Juves pas dhjetë ditësh ?

Agjenti i Martin Caceres, Daniel Fonseca, thotë se klienti i tij është pranë kalimit te Juvetnusi, ndërsa në ditët në vijim pritet që të zyrtarizohet ky transferim.

“Asgjë nuk ka ndodhur që nga kontakti ynë i fundit, mirëpo Juventusi është optimist për transferimin”.

“Mendoj se çështja do të zgjidhet pas dhjetë ditësh. A varet kjo nga Barcelona ose Juventusi? Nga asnjëra skuadër- ne po presim përgjigjen e lojtarit, e cila do të vijë pas 4-5 ditësh, dhe pastaj do të mund të vazhdojmë përpara”, ka thënë Fonseca për tuttomercatoweb.com.

Tirana eliminohet nga Liga e Kampionëve

Kampioni i Shqipërisë, Tirana, është eliminuar nga faza kualifikuese e Ligë së Kampionëve, pasi që në ndeshjen kthyese është mposhtur nga ekipi norvegjez, Stabaek.

Ndeshja e zhvilluar të martën mbrëma në Telenor Arena të Oslos, ndërmjet Stabaekut dhe Tiranës, përfundoi me fitoren prej 4-0 të skuadrës vendase.

Ndeshja e parë e zhvilluar në “Qemal Stafa” kishte përfunduar me rezultat të barabartë 1-1, dhe kështu Tirana u përshëndet me garat evropiane për këtë sezon.

Chelsea mposht Interin

Chelsea ka shënuar fitore prej 2-0 kundër Interit në kuadër të ndeshjeve përgatitore parasezonale në turneun World Football Challenge, që po zhvillohet në Pasadena të Kalifornisë.

Sulmuesi nga Bregu i Fildishtë, Didier Drogba, kaloi Blutë në epërsi (11’) duke mposhtur portierin Belec me një gjuajtje nga 23 metra.

Në minutën e 50-të u akorduar penallti në favor të Chelseat, pasi që Burdisso preku topin me dorë, ndërsa i pagabueshëm nga pika e bardhë ishte Frank Lampard, i cili vendosi rezultatin e përfundimtar të këtij takimi.

Mascherano dëshiron të transferohet te Barca

Agjenti i Javier Mascheranos thotë se klientit të tij nuk i pëlqen jeta në Angli dhe dëshiron të transferohet te Barcelona.

Mesfushori i Liverpoolit kërkohet nga Blaugranët, mirëpo trajneri i Redsave, Rafael Benitez, i ka thënë JO këtij transferimi.

Megjithatë, agjenti i lojtarit thotë se klienti i tij dëshiron të luajë për trekampionët.

“Barcelona është zgjidhja më e mirë për t’u realizuar, pasi që Javier dëshiron të shkojë në Spanjë. Ai është lodhur me jetën në Angli”.

“Liverpooli refuzon ta shesë, mirëpo kjo mund të ndryshojë nëse vjen një ofertë e madhe”, ka thënë agjenti.

Ancelotti: Beckham teknikisht më i mirë se Kaka

Menaxheri i Chelseat, Carlo Ancelotti, ka lavdëruar mesfushorin e Los Angeles Galaxy, David Beckham.

“Beckham është një lojtar i shkëlqyeshëm, por jo i jashtëzakonshëm. Sidoqoftë, ai më bëri për vete me qëndrimin dhe karakterin e tij. Në fushë ai i sheh gjërat shumë para lojtarëve të tjerë dhe vizioni i tij i lojës është shumë përtej kohës kur ai luante me Manchester United”, ka thënë Ancelotti.

“Ai nuk duhet t’ia ketë lakmi askujt, as edhe një lojtari si Kaka në pozitën e tij. Ai është më i ngadaltë, por më i fuqishëm se Kaka si taktikisht ashtu edhe teknikisht”, ka shtuar ish-trajneri i Milanit.

Eto’o arrin marrëveshje me Interin ?

"Sky Sport" njofton se sulmuesi i Barcelonës, Samuel Eto’o, ka arritur marrëveshje për të nënshkruar kontratë pesëvjeçare më kampionin e Italisë, Inter.

Presidenti zikaltër Massimo Moratti ka negociuar me agjentin e lojtarit, Josep Maria Mesalles, derisa vetë Eto’o e ka thirrur në telefon drejtorin teknik të Interit, Marco Branca, për t’i thënë se është i lumtur që do t’u bashkëngjitet Nerazzurëve.

Marrëveshja është arritur pasi që kamerunasi është pajtuar të merr 10 milionë euro për sezon, por me kusht që Interi do t’i paguajë nga dy milionë euro për secilën trofe të fituar.

Pas kësaj marrëveshje, është gjithnjë e më pranë edhe kalimi i Zlatan Ibrahimovicit në drejtim të kundërt- te Barcelona.

Beckenbauer: Ribery vlen sa edhe Ronaldo

Presidenti i Bayern Munichut, Franz Beckenbauer, ka bërë të ditur se klubi gjerman është i gatshëm të shesë francezin Frank Ribery, por vetëm nëse dikush paguan 94 milionë euro.

Beckenbauer thotë se ylli i ekipit është në të njëjtin nivel me Cristiano Ronaldo dhe Lionel Messi, andaj nëse dikush dëshiron ta angazhojë atë do të duhet të paguajë aq sa ka kushtuar portugezi.

“Çfarë duhet që Bayern të heqë dorë nga Ribery? Ne vetëm e ndjekim atë që ndodh në tregun e transferimeve. Dhe nëse Ronaldo vlen 94 milionë euro, Ribery ka të njëjtin çmim me portugezin”, ka thënë Beckenbauer për Bild.

“Ribery, Ronaldo, Messi dhe Kaka, me siguri se janë lojtarët më të mirë në Evropë. Nëse dikush nuk planifikon ta harxhojë këtë shumë, atëherë ai do të mbetet me ne derisa nuk i skadon marrëveshje në vitin 2011”, ka shtuar gjermani.

Zanetti dëshiron titullin e pestë të radhazi

Të mërkurën është publikuar kalendari i Kampionatit italian në futboll, ndërsa kampioni Inter do ta fillojë sezonin e ri me ndeshjen kundër skuadrës së promovuar ne Serie A, Bari, ndërsa një javë më pas do të përballet me rivalin e qytetit, Milan.

“Në Ligë secila ndeshje është e vështirë, sepse asnjëherë nuk e di se çfarë rreziku vjen. Ne e dimë këtë mirë, sepse e kemi dëshmuar me rezultatet e treguara në vitet e fundit”.

“E dimë potencialin e skuadrës sonë dhe e dimë se mund të fitojmë kundër të gjithëve, dhe gjithmonë do ta japim më të mirën përballë çdo kundërshtari”.

“Do të mundohemi të japim maksimumin që ta konfirmojmë veten si kampionë. Dëshirojmë ta fitojmë titullin e pestë radhazi”, ka thënë kapiteni i Interit, Javier Zanetti.

Bayerni turpëron Milanin

Milani po vazhdon me formën e keqe në ndeshjet miqësore parasezonale, ndërsa të mërkurën mbrëma është mposhtur me rezultat prej 4-1 nga Bayern Munichu.

Është kjo humbja e katërt radhazi e Rossonerëve, të cilët duket se nuk po e gjejnë formulën e fitores.

Bavarezët dolën fitues me golat e Muller (12’ dhe 90’), Schweinsteiger (80’) dhe Sene (89’). Ndërsa golin e nderit për kuqezinjtë e shënoi Pirlo (81’).

Arbeloa: Liverpooli më ka bërë edhe më të mirë

Nënshkrimi i ri i Real Madridit, Alvaro Arbeloa, thotë se gjatë kohës së tij në Liverpool ai është bërë një lojtar shumë më i mirë.

“Liverpooli është një klub i madh me një histori mbresëlënëse, me shumë suksese. Në Angli ky është një ekip me më së shumti tituj... Andaj tashmë e kam shijuar atë kënaqësi dhe shpresoj se kjo do të më ndihmojë tash në këtë sfidë, e cila qartas është më madhja në karrierën time”, ka thënë Arbeloa.

“Mendoj se jam bërë një futbollist më i mirë dhe po ashtu më i pjekur. Kur luani në një klub si Liverpooli e keni shansin të luani me lojtarë të mëdhenj, unë po ashtu jam ftuar nga Spanja dhe kemi fituar Kampionatin Evropian... në këto vite kam mësuar shumë gjëra”.

“Kjo më ka bërë lojtar më të mirë dhe shpresoj të jem në gjendje ta tregoj këtë, që në fund është gjë e rëndësishme”, ka shtuar spanjolli.

Viera refuzon Tottenhamin për shkak të Arsenalit ?

Mesfushori i Interit, Patrick Vieira, ngurron të transferohet te Tottenhami, për shkak se kjo mund të humb simpatinë që kanë fansat e Arsenalit për të.

Siç shkruan Daily Mail, Vieira, i cili dëshiron të largohet nga Interi në kërkim të një ekipi ku do të mund të luajë me ekipin e parë, që do t’i ndihmonte atij të sigurojë një vend për Kupën Botërore të verës së ardhshme, ka lënë anash idenë për t’u transferuar te Tottenham.

Viera është e kuptueshme se e ka marrë më me qetësi rikthimin e tij në Londër, pasi kjo mund ketë ndikim në njollosjen e reputacionit të tij si legjendë e Arsenalit.

Ekipet franceze Lyon dhe Paris Saint-Germain po ashtu kanë shprehur interesim për 33-vjeçarin, derisa edhe Birmingham bëri interesim të hershëm për të. Por Vieira do të jetë më i lumtur të qëndrojë në Serie A nëse i ofrohet ndonjë marrëveshje e pranueshme.

Ndërkohë disa media raportojnë edhe mundësinë pak të besueshme që ish-kapiteni i Arsenalit, të rikthehet në mesin e topçinjve.

Ferguson i kënaqur me Anderson

Menaxheri i Manchester United, Sir Alex Ferguson, ka qenë i ngazëllyer të shohë Anderson të shënojë golin e tij të parë me klubin anglez.

Kampioni i Ligës Premier mposhti ekipin argjentinas Boca Juniors me rezultat 2-1 në ndeshjen e mbrëmshme të Kupës Audi. Anderson dhe përforcimi i ri Antonio Valencia, shënuan për avantazhin e dyfishtë të Manchesterit, derisa rezultatin për Boca a ngushtoi Federico Insua.

“Është një mrekulli e Munichut”, ka bërë shaka Ferguson. “Por ndoshta kjo do ta shpërthejë djaloshin, kjo mund të jetë një nxitje për të shënuar më shumë. Ai ka talent, andaj shpresojmë se ai do të mund të shënojë më shumë”.

Zyrtare: Elano nënshkruan me Galatasarayn

Mesfushori brazilian Elano është larguar nga Manchester City për t’iu bashkuar Galatasarayt, ka konfirmuar vetë klubi turk me anë të një deklarate në faqen zyrtare.

Milani dhe Interi u raportua se ishin po ashtu të interesuar për lojtarin, por Sky Sports bën të ditur se braziliani tashmë ka lëvizur në drejtim të ekipit turk për një shumë që besohet të jetë afro 9.5 milionë euro.

“Lojtari i kombëtares së Brazilit, Elano Blumer (27) ka nënshkruar kontratë katërvjeçare me Galatasarayn pasi ka luajtur për dy vite në Manchester City”, shkruhet në deklaratën e klubit turk.

City ka filluar të reduktojë numrin e lojtarëve dhe Elano bëhet kështu lojtari i katërt që largohet këtë verë, pas Ched Evans, Valeri Bojinov dhe Felipe Caicedo.

Ekipi ka sjellë një varg të përforcimesh të reja muajin e fundit si Gareth Barry, Roque Santa Cruz, Carlos Tevez, Emmanuel Adebayor dhe së fundi Kolo Toure.

Benitez ul çmimin e Xabi Alonsos

Menaxheri i Liverpoolit, Rafa Benitez, tashmë është i gatshëm të arrijë kompromis për të shitur mesfushorin spanjoll Xabi Alonso te Real Madridi.

Siç shkruan Daily Mail, lëvizja e Alonsos në Bernabeu është zvarritur gjithë verën, me menaxherin e Liverpoolit, Rafael Benitez, që kërkonte 35 milion dhe me Realin që ofronte 25 milionë funte për spanjollin.

Megjithatë dy klubet tash janë larg vetëm 5 milionë euro në negociatat e tyre dhe pritet që ata të arrijnë marrëveshje nën shumën 30 milionë funte deri në vikend.

27-vjeçari do të ribashkohej me tashmë ish-bashkë-lojtarin e tij të Liverpoolit, Alvaro Arbeloa, i cili dje kompletoi transferimin në Bernabeu për 3.5 milionë funte.

Kaka: Nuk jam në nivelin e Zidane

Ylli i ri i Real Madrid, Kaka, ka shpjeguar se pse ai ka refuzuar shansin për të veshur fanellën e Zinedine Zidane, me numrin 5.

“Nuk kam asgjë të bëj me Zidane. Kjo ishte më shumë sepse për brazilianët numri 5 është më shumë defansiv. Andaj unë preferova të qëndroj me numrin 8, me të cilin kam filluar në Sao Paolo”, ka thënë Kaka.

“Zidane është legjendë e futbollit, ai ka bërë më së shumti histori me Francën dhe Real Madridin. Ai është në një nivel tjetër, pasi ai tashmë ka bërë histori në karrierën e tij. Unë ende nuk e kam arritur atë. Nuk ndjehem komod me krahasimin, por është OK”, ka shtuar braziliani.

Aston Villa i bashkohet garës për Upson

Klubi i Ligës Premier, Aston Villa, është i interesuar të marrë shërbimet e mbrojtësit të West Ham United, Matthew Upson.

Menaxheri i Aston Villas, Martin O'Neill, dëshiron të nënshkruajë me edhe dy mbrojtës në disa javët e mbetura të afatit kalimtar.

Dhe, siç shkruajnë mediat angleze, Villa ka përqendruar vëmendjen në Matthew Upson, duke iu bashkuar kështu listës së ekipeve që kërkojnë mbrojtësin e kombëtares angleze, ku janë edhe Arsenal dhe Manchester City.

Martins drejt Wolfsburgut

Sulmuesi i Newcastle United, Obafemi Martins, pritet të largohet nga ekipi anglez për të kaluar në radhët e kampionit të Bundesligës, Wolfsburg.

Nigeriani tashmë ka zbuluar dëshirën e tij për të kaluar në radhët e Wolfsburgut në disa javët në vazhdim.

Dhe sipas “The Sun”, Martins, nuk ishte në mesin e zëvendësuesve në ndeshjen e mbrëmshme miqësore kundër Leeds United, duke nxitur edhe më tej spekulimet se ai mund të kalojë në kampionatin gjerman.

Newcastle pritet të fitojë rreth 7.5 milionë euro nga shitja e sulmuesit, ndërsa përcaktimi i kushteve personale dhe testeve mjekësore pritet të realizohen gjatë javës së ardhshme.

Eduardo shpreson në sezon të suksesshëm

Sulmuesi brazilian me nënshtetësi kroate Eduardo Da Silva është i bindur se ai mund të mbulojë zbrazëtirën e mbetur pas largimit të Emmanuel Adebayor drejt Manchester City.

26-vjeçari, i cili shënoi dy gola në fitoren 5-0 në miqësoren e Arsenalit kundër Szombathelyi, përfundimisht është kthyer në formë të plotë pas thyerjes së dyfishtë të këmbës që në shkurt të vitit 2008.

“Ndeshja e të hënës ishte shumë e rëndësishme për mua dhe jam i lumtur që shënova dy herë. Shpresoj se do të arrijmë diçka këtë sezon dhe se do të shënoj edhe më shumë në të ardhmen”, ka thënë Eduardo.

Sulmuesi po ashtu pritet të jetë pjesë e kombëtares kroate për ndeshjet e radhës kualifikuese për Kupën Botërore, kundër Bjellorusisë më 12 gusht.

Zyrtare: Hleb transferohet te Stuttgart

Barcelona ka konfirmuar se Aliaksandr Hleb në sezonin e ri do të luajë për skuadrën e Stuttgartit.

“Klubi i Barcelonës konfirmon se Aliaksandr Hleb ka kompletuar transferimin te Stuttgarti”, shkruan në deklaratën zyrtare të Barcës.

Fillimisht Hleb është dashur të transferohej tek Interi, si pjesë e marrëveshjes për kalimin e Zlatan Ibrahimovicit në Camp Nou. Mirëpo bjellorusi vendosi të transferohej në klubin e tij të dikurshëm ku ka kaluar pesë vite (2000-2005).

Konfirmimin zyrtar për huazimin e Hlebit në Bundesliga e ka bërë edhe Stuttgarti, që do të paguajë pagën e plotë të mesfushorit.

Ndërkohë, Barcelona do t’i paguajë Interit diçka më shumë se tre milionë euro, duke qenë se Hleb nuk do luajë për zikaltrit.

Tare mohon afrimin e Cruz me Lazion

Drejtori sportiv i Lazios, Igli Tare, ka mohuar spekulimet se sulmuesi argjentinas Julio Cruz është pranë kalimit te Lazio.

“Cruz nuk është pranë Lazios. Është normale që një lojtar si ai të tërheq interesimin tonë, por edhe të të gjithë të tjerëve”, është shprehur ish-sulmuesi i Përfaqësueses kuqezi për Tuttomercatoweb.com.

Tare ka mohuar edhe spekulimet e deritanishme në lidhje me sulmuesin e Lazios, Goran Pandev, duke thënë se deri më tani nuk ka ndonjë zhvillim në lidhje me transferimin e maqedonasit.

Sneijderi do ta zëvendësojë Pirlon ?

Milani ka shënjestruar mesfushorin e Real Madridit, Wesley Sneijder, si alternativë nëse Andrea Pirlo vendos të transferohet te Chelsea.

“La Gazzetta Dello Sport” njofton se kuqezinjtë tashmë e kanë refuzuar një ofertë të Bluve për yllin e tyre, mirëpo zëvendëspresidenti i Milanit, Adriano Galliani, ka deklaruar se skuadra e tij nuk ka pranuar ofertë nga Chelsea, duke lënë kështu gjithçka të hapur.

Milani ende nuk ka siguruar lojtarët e nevojshëm për sezonin e ri, prandaj nëse Pirlo largohet, atëherë Rossonerët do të detyrohen ta përforcojnë edhe mesfushën, ndërsa holandezi Sneijder do të jetë tepricë te Mbretërit pas transferimit të Xabi Alonsos nga Liverpooli.

Caceres kalon ekzaminimet mjekësore te Juve

Mbrojtësi i Barcelonës, Martin Caceres, ka kaluar ekzaminimet mjekësore te Juventusi dhe është në prag të kompletim të transferimit të tij në formë huazimi te Zonja e Vjetër.

“Il Corriere Dello Sport” shkruan se uruguaiani kishte arritur në Torino mëngjesin e të enjtes, me ç’rast i ka kaluar me sukses testet mjekësore, ndërsa së shpejti pritet të nënshkruhet edhe huazimi njëvjeçar te Bianconerët.

Sipas të njëjtit burim, në fund të sezonit Juve do ta ketë mundësinë që ta blejë lojtarin për shumën prej afër 12 milionë eurosh.

FIA do t’i sigurojë licencë Schumacherit

Rikthimi i legjendës së Formula 1, Michael Schumacher, duket të jetë shumë pranë realizimit, sidomos pasi që FIA ka vendosur t’ia sigurojë lejen për ta zëvendësuar pilotin e lënduar të Ferrarit, Felipe Massa.

Të enjten trupi drejtues i Formula 1, FIA, ka konfirmuar se do t’i japë licencë shtatëherë kampionit të botës që të garojë në kompeticionet e radhës, duke filluar nga Çmimi i Madh i Evropës që do të mbahet muajin e ardhshëm në Valencia.

Schumacher herën e fundit është paraqitur në garën për Çmimin e Madh të Brazilit me 22 tetor 2006, ndërsa sipas rregullave të FIA-s një pilot mund ta sigurojë licencën nëse para tre vitesh ka garuar në 15 kompeticione.

Gjermani e plotëson këtë kusht, meqenëse ka pilotuar bolidin e Ferrarit në 18 garat e vitit 2006.

Ronaldo operon dorën

Fenomeni brazilian Ronaldo i është nënshtruar sërish operacionit, por këtë radhë për trajtimin e frakturës së dorës.

Sipas “Il Corriere Dello Sport”, ish-sulmuesi i Cruzeiro, PSV, Barcelona, Real Madrid dhe Milan, i cili aktualisht vesh fanellën e Corinthians- në ndeshjen e vikendit të kaluar kundër Palmeiras kishte pësuar dy thyerje në dorën e majtë, prandaj të enjten është dashur t’i nënshtrohet operacionit.

Sipas njoftimeve të para, Ronaldo do të mungojë pesë javë, të cilat i nevojiten për shërimin e dorës.

Reali dhe Marseille arrijnë marrëveshje për Heinzen

Marseille ka njoftuar se ka arritur marrëveshje me Real Madridin për transferimin e mbrojtësit argjentinas, Gabriel Heinze.

Pas ardhjes së menaxhmentit të ri në krye të Los Blancos, Heinze menjëherë hyri në listën e lojtarëve që do të largohen, ndërkohë që Marseille ka bërë disa përforcime në skuadër.

Në faqen zyrtare të klubit francez thuhet se dy skuadrat kanë arritur marrëveshje paraprake për transferimin e argjentinasit, ndërsa nuk dihet shuma që do ta paguajë skuadra nga Velodrome për shërbimet e mbrojtësit të dikurshëm të Manchester United.

Cana: Jam lider natyral

Transferi i ri i Sunderlandit, Lorik Cana, është zotuar se do të jetë lider i skuadrës, ndërsa ka shtuar se është shumë entuziast që do të garojë në Ligën Premier.

“Ndjehem mirë. Është dita ime e parë në stërvitje, një klub i ri, dhe një aventurë e re për mua”.

“Është shumë emocionuese të luaj në Ligën Premier. Sot kam kontaktin e parë me trajnerin, me Ericun (menaxherin ndihmës) dhe me bashkëlojtarët. Mezi po pres të luaj për Sunderlandin dhe të shënojmë disa rezultate të mira, sido që të jetë përshtypjet e mia të para janë të mira”.

“Kam luajtur për dy nga skuadrat më të mira në Francë- te Paris (Saint-Germain) dhe te Marseille- dhe në Ligën e Kampionëve, që do të thotë se jam këtu që të ofroj përvojën personale te Sunderlandi dhe t’i ndihmoj skuadrës”.

“Për mua Liga Premier është më e mira në botë, dhe të gjithë e dinë këtë. Kjo është arsyeja që kam ardhur këtu, ndërsa Sunderlandi është një vend i jashtëzakonshëm për të luajtur futboll dhe ka tifozë të shkëlqyer”.

“Unë jam një fitues dhe e kam përvojën e duhur që të luaj në krye të ligës dhe do të mundohem ta bëjë këtë me Sunderlandin”.

“Qëllimi im është të jap 300% nga vetja, të jem i fortë dhe të jem lider. Të jem lider është veti natyrore e imja. Dhe mendoj se loja ime është tipike britanike”, ka thënë mesfushori kuqezi për SAFC TV.

Chiellini: Kaka, Ronaldo, Messi dhe Ibra janë të të njëjtit nivel

Mbrojtësi i Juventusit, Giorgio Chiellini, ka folur për ndeshjen kundër Real Madridit në kudër të Peace Cup, ndërkohë që ka mohuar pikëpamjet se ai dhe Fabio Cannavaro nuk mund të luajnë bashkë.

“Është e pakuptimtë! Gjithmonë kur kemi luajtur bashkë kemi luajtur mirë dhe nuk e kuptoj se si po gjykohemi kështu nga larg, mund të na gjykoni në fushë, por jo nga largësia”, ka thënë Chiellini

Qendërmbrojtësi bardhezi ka folur edhe për ndeshjen e të premtes kundër Real Madridit në gjysmëfinalen e Kupës së Paqes.

“Ekziston një dallim shumë i vogël ndërmjet Kaka dhe Ronaldo, vlera e tyre është e njëjtë. Besoj se Reali ka kuptuar nevojën e Milanit për ta shitur dhe e ka shfrytëzuar rastin”.

“Për mua, Kaka, Ronaldo, Messi dhe Ibrahimovic, të gjithë janë të të njëjtin nivel. Kaka nuk është prapa të tjerëve, ai është absolutisht i jashtëzakonshëm”, ka shtuar italiani.

Lavezzi: Nuk largohem nga Napoli

Ezequiel Lavezzi është i lumtur te Napoli dhe nuk planifikon t largohet nga San Paolo gjatë këtij afati kalimtar.

“Jam i lumtur në Napoli dhe dëshiroj të vazhdoj të luaj këtu. Sido që të jetë, duhet të presim dhe të shohim sepse e ardhmja nuk varet vetëm nga unë”

“Ka pasur interesime nga Boca Juniors. Do të ishte gjë e komplikuar për mua që të kthehesha në vendlindje dhe të ushtroja profesionin tim. Nuk mendoj për paratë ose për mundësinë e nënshkrimit të një kontrate të re, krejt çka më intereson është të luaj futboll dhe të jap më të mirën nga vetja”, ka thënë argjentinasi.

Xavi: Ibrahimovic vlen sa edhe Kaka dhe Ronaldo

Mesfushori i Barcelonës, Xavi Hernandez, ka lavdëruar nënshkrimin e fundit të blaugranëve, duke e krahasuar atë me investimet që ka bërë Reali i Madridit.

“Ibrahimovic është një lojtar i jashtëzakonshëm dhe me prirje teknike. Nënshkrimi i tij është një ngritje e madhe për klubi dhe po ashtu gjë shumë e rëndësishme”, ka thënë Xavi.

“Ai padyshim mund të krahasohet me Cristiano Ronaldo dhe Kaka, edhe në kuptimin e vlerësimit nga mediat dhe po ashtu edhe në futboll. Gjithmonë më ka pëlqyer Ibrahimovic dhe ai do ta përmirësojë lojën tonë ajrore”, ka shtuar spanjolli.

29-vjeçari po ashtu ka shprehur keqardhjen për largimin e mikut të tij të mirë Samuel Eto’o.

Toure: Me Adebayor do të sjellim kulturën e Arsenalit në City

Përforcimi i ri i Manchester Cityt, Kolo Toure, është i ngazëllyer që po i bashkohet ish-bashkëlojtarit të tij Emmanuel Adebayor në Eastlands, duke thënë se ata do të sjellin përvojën e Arsenalit në City.

“Manu (Adebayor) vërtet është një mik i mirë i imi. Kur ai nënshkroi për Cityn e dija se kjo ishte një lëvizje e qëlluar për të dhe të jem tash bashkë me të këtu, është e rëndësishme për mua. Do të sjellim në City atë që mësuam në Arsenal”, ka thënë Toure për faqen zyrtare të klubit.

“Isha i ngazëllyer që erdha këtu, jo vetëm sepse ka lojtarë vërtet të mirë, por për shkak të ambicieve që secili ka. Ka shumë lojtarë të mirë të vlerësuar dhe kjo është e mirë për klubin. Micah Richards është një prej tyre. Ne tash duhet të kombinohemi dhe të punojmë së bashku për t’i sjellë sukses klubit dhe për t’u përpjekur dhe për të fituar diçka”, ka shtuar Toure.

Ferguson i kënaqur pavarësisht humbjes

Menaxheri i Manchester United, Sir Alex Ferguson, është ndarë i kënaqur pavarësisht humbjes në penalti ndaj Bayern Munichut në finalen e Audi Cup.

“Do t’iu japim lojtarëve disa ditë pushim, ata e kanë merituar. Ka qenë një rrugë e gjatë. Gjithmonë është lodhëse të shkosh në Lindjen e Largët. Gjëja më e mirë është që erdhëm përmes Gjermanisë dhe shpresojmë se iu kemi ri-dhënë energji”, ka thënë Ferguson.

“Ata do të përfitojmë pushim treditor tash dhe kur të rikthehen të hënën, ata do të jenë të gatshëm për punë të shpejtë”, ka shtuar skocezi.

Edhe pse Bayerni ka fituar trofeun e Kupës Audi pas penaltive (ndeshja përfundoi baras 0-0), Ferguson ende është i kënaqur me paraqitjen e fundit të lojtarëve.

“Ishte mbresëlënëse, mendoj se ishte një ndeshje për të cilën kishim nevojë. Në gjysmën e parë ata ishim më të mirë, ne nuk ishim garues sa duhet. Por, kur filluam të ishim ca më agresiv në lojën tonë në sulm, duhej të kishim fituar ndeshjen”, ka thënë më tej Ferguson.

Benitez: Reina portieri më i mirë në Ligën Premier

Menaxheri i Liverpoolit, Rafael Benitez, thotë se njëshi i ekipit të tij, Pepe Reina, është portieri më i mirë në Ligën Premier.

“Pepe është një portier fantastik. Për momentin mendoj se ai është portieri më i mirë në Ligën Premier. Ai është shumë i qëndrueshëm”, ka thënë Rafa Benitez.

“Për një ekip të kreut ndonjëherë mund të jetë vështirë të ketë një portier i cili mund të luajë vazhdimisht në nivelin me të cilin luan Pepe, pasi ai nuk është aq i hapur sa disa portierë të tjerë”.

“Ndonjëherë ai duhet të bëjë vetëm një ose dy mbrojtje për ta kryer punën e tij në ndeshje dhe nuk është gjithmonë aq i ngarkuar. Por të jesh aq i mirë sa është ai, na tregon se ai është një portier fantastik”, ka shtuar spanjolli.

Besiktas interesohet për Decon

Klubi turk Besiktas i është bashkuar betejës për të marrë shërbimet e mesfushorit të Chelseat, Deco.

Mediat turke shkruajnë se Besiktas dëshiron të rivalizojë Interin, për të sjellë portugezin në Turqi para fundit të sezonit të ri.

Deco në disa raste ka shprehur pakënaqësinë e tij te ekipi londinez, ndërsa mediat e kanë lidhur atë me një ribashkim me ish-trajnerin e tij të Portos, Jose Mourinhon, i cili tash drejton kampionin e Serie A, Interin.

Me dëshitimin e transferimit të mesfushorit të Barcelonës, Alexandr Hleb, gjasat që Deco të kalojë në kampionatin italian janë hapur, por nëse diçka nuk shkon mirë, Besiktas po ashtu mund të jetë një destinacion i mesfushorit.

Zola e dëshiron Tonin në West Ham

Menaxheri i West Ham United, Gianfranco Zola, raportohet se është duke kërkuar shërbimet e sulmuesit të Bayern Munich, Luca Toni.

Siç shkruan The Guardian, drejtori ekzekutiv i klubit, Scott Duxbury, dhe drejtori teknik, Gianluca Nani, kanë vendosur të vazhdojnë qëndrimin në Evropë për të ndjekur dy sulmuesit, Luca Toni dhe atë të Barcelonës, Eidur Gudjohnsen, derisa Zola dhe ekipi tij vazhdojnë turneun në Kinë.

Klubi anglez ka qenë në vëzhgim të Gudjohnsen, por pakënaqësia e Tonit te klubi gjerman po ashtu ka alarmuar drejtuesit e klubit, të cilët tash mund të bëjnë përpjekje për të sjellë të dy sulmuesit.

Arshavin: City kërcënon top katërshin

Mesfushori i Arsenalit, Andrey Arshavin, thotë se Manchester City është duke paraqitur një kërcënim serioz për top katërshin e Ligës Premier.

“City e ka fuqizuar ekipin. Nuk do të them se ata do ta fitojnë titullin, por ata janë në formë të mirë për të depërtuar në Katërshen e Madhe. Qëllimi jonë kryesor do të jetë të gjejmë një vend për të Ligën e Kampionëve”, thotë mesfushori rus.

Arshavin po ashtu ka kërkuar një gjetje të shpejtë të një mbrojtësi i cili do të mund ta zëvendësonte të larguarin e fundit, Kolo Toure.

“Pas largimit të Kolo Toure, caku ynë në transferim duhet të jetë më shumë një mbrojtës se sa një sulmues”, ka thënë rusi.

Sir Bobby Robson ndërroi jetë

Trajneri legjendar Sir Bobby Robson ka nderuar jetë në moshë 76-vjeçare në orët e hershme të mëngjesit të së premtes, pasi humbi luftën me kancerin.

Përveç se është i njohur si trajner, Sir Bobby bëri emër në vitet e pesëdhjeta si lojtar i Fulhamit, ndërsa më vonë u transferua te West Bromwich Albion, për t’u kthyer sërish te Fulhami në vitin 1962.

Në vitin 1968 u shndërrua në menaxher i Fulhamit, pastaj drejtoi Ipswichin, përfaqësuesen e Anglisë, PSV Eindhovenin, Sporting Lisbonën, FC Porton, Barcelonën dhe Newcastle Unitedin.

Me Ipswichin ishte dy herë nënkampion i Anglisë, njëherë fitues i FA Cup dhe njëherë fitues i Kupës UEFA.

Sir Bobby fitoi dy tituj të Holandës me PSV, pastaj kampionatin portugez me Porton dhe Kupën e Evropës me Barcelonën.

Pirlo përshëndetet me Rossonerët

Duket se tifozët e Milanit do ta humbin një tjetër emër të madh të skuadrës, pasi që Andrea Pirlo ka vendosur t’i bashkëngjitet trajnerit Carlo Ancelotti te Chelsea.

Që nga marrja e postit të trajnerit të Bluve, ish-trajneri i Milanit ka shprehur dëshirën që ta transferojë Pirlon në Stamford Bridge.

Ndërkohë, “Corriere dello Sport” njofton se pas ndeshjes kundër Interit në Boston, mesfushori italian është përshëndetur me bashkëlojtarët e tij.

“Ky ishte derbi im i fundit”, citohet të ketë thënë Pirlo.

Pirlo ka kontratë me Milanin deri në vitin 2011 dhe paguhet pesë milionë euro në sezon. Ndërsa njoftohet se Chelsea i ka ofruar kontratë katërvjeçare me vlerën prej 6.5 milionë euro për sezon.

Aquilani më pranë Liverpoolit

Mesfushori i Romës, Alberto Aquilani, është pranë transferimit te skuadra nga Liga Premier, Liverpool.

E përditshmja romake “Il Messaggero” njofton se italiani është pajtuar që të nënshkruajë kontratë pesëvjeçare me Redsat, ndërsa do të fitojë katër milionë euro për sezon.

Megjithatë, duhet që njëherë të arrihet marrëveshja mes Romës dhe Liverpoolit, ndërkohë Të Kuqtë duhet ta shesin Xabi Alonson te Real Madridi për t’i bërë vend 25-vjeçarit.

Arsenali shënjestron De Rossin

Menaxheri i Arsenalit, Arsene Wenger, është i interesuar ta transferojë mesfushorin e Romës, Daniele De Rossi.

Pas shitjes së Emmanuel Adebayor dhe Kolo Toure, Wenger ka në dispozicion 47 milionë euro, të cilat do t’i shfrytëzojë për të tentuar transferimin e De Rossit.

“The Independent” shkruan se Topçinjtë planifikojnë të bëjnë një ofertë prej 35 milionë eurosh për të bindur Romën që të lejojë largimin e mesfushorit italian.

Zyrtare: Panucci lojtar i Parmës

Parma ka kompletuar transferimin e mbrojtësit veteran Christian Panucci.

“Parma FC S.p.A njofton se ka arritur marrëveshje me mbrojtësin Christian Panucci, i lindur në Savona më 12 prill 1973”, shkruan në faqen zyrtare të Parmës.

Ish-mbrojtësi i Romës ka nënshkruar kontratë njëvjeçare me Parmën, me shpresën për ta treguar përvojën e tij me skuadrën e porsainkuadruar në Serie A.

Mutu do t’i paguajë 17 milionë euro Chelseat

Sulmuesi i Fiorentinës, Adrian Mutu, duhet t’i paguajë diçka më shumë se 17 milionë euro dëmshpërblim Chelseat.

Në maj të vitit 2008, Oda për zgjidhjen e kontesteve e FIFA-s kishte vendosur që rumuni ka prishur kontratën me Chelsean kur është gjetur pozitiv në testin e dopingut në vitin 2004.

Mutu ka apeluar te Gjykata e arbitrazhit për sport (CAS) kundër këtij vendimi, mirëpo pas mbledhjes së mbajtur të enjten, CAS kishte vendosur në disfavor të lojtarit dhe ka mbështetur vendimin paraprak të Odës për zgjidhjen e kontesteve.
Kështu sulmuesi duhet t’i paguajë Chelseat 17.173.990 euro dëmshpërblim.