Lajme te reja nga bota e Sporti

Kuqi shënon edhe një herë

Sulmuesi kosovar me nënshtetësi finlandeze, Shefki Kuqi, ka shënuar edhe një herë për ekipin e tij Crystal Palace, që fitoi 3-1 në fushë të Swasea në kuadër të ligës së dytë angleze, Championship.

Swansea City pësoi humbjen e dytë në shtëpi, kësaj here nga Crystal Palace, që u ka dhënë edhe një shtytje shpresave për të siguruar vend për në play-off dhe inkuadrim në Premierligë.

Victor Moses hapi rezultatin për Palace në fillim të pjesës së dytë (49’), ndërsa Jose Fonte dyfishoi 12 minuta më vonë (61’). Gorka Pintado ngushtoi rezultatin për vendasit (65’), por ishte Shefki Kuqi që vulosi fitoren për Crystal Palace, në minutat shtesë të ndeshjes.

Kuqi shënoi edhe në ndeshjen e kaluar të Crystal Palace ndaj Burnley-t, të cilën ndeshje ekipi i tij e humbi me rezultat 4-2.

Juve shton presionin ndaj Interit
Takimi i zhvilluar të shtunën mbrëma në Stadio Olimpico të Torinos ndërmjet Juventusit dhe Bolognas ka përfunduar me fitoren e Zonjës së Vjetër me rezultat prej 4-1.

Mysafirët kaluan të parët në avantazh pas një pasimi të mirë të golashënuesit më të mirë në Serie A këtë sezon, Marco Di vAio, në drejtim të Massimo Mutarellit, i cili e mposhti portierin Gigi Buffon (24’). Me rezultat 0-1 përfundoi pjesa e parë e ndeshjes.

Në pjesën e dytë bardhezinjtë e shkatërruan skuadrën mysafire.

Lojtari, i cili ishte pjesëmarrës në të gjitha golat e Juventusit në këtë përballje, boshnjaku Hasan Salihamidzic, barazoi rezultatin porsa filloi pjesa e dytë (48’).

Në njëzet minutat e ndeshjes Juventus shënoi edhe tri herë. Sebastian Giovinco krijoi epërsinë e parë për Zonjën e Vjetër (71’), derisa asistues ishte Salihamidzic.

Dy golat e radhës për vendasit i shënoi super-Alex Del Piero (75’ dhe 87’), i cili përdori magjinë e tij parapara portës kundërshtarë, ndërkohë asistues edhe në të dy golat e kapitenit bardhezi ishte i njëjti lojtar, Hasan Salihamidzic.

Ikona e Juves nuk pati fatin të shënonte hat-trick në këtë përballjes, pasi që përveç rasteve tjera, në minutën e fundit të kohës së rregullt ai e goditi shtyllën.

Me këtë fitore Juventus i afrohet Interit në vetëm katër pikë diferencë, derisa Nerazzurët të dielën e zhvillojnë ndeshjen e vështirë kundër Fiorentinës në Giuseppe Meazza.

Reali bombardon Bilbaon
Real Madridi ka shënuar fitore të lartë si mysafir i Athletic Bilbaos për të mbajtur hapin në garën drejt titullit kampion të La Ligas.

Ndeshja e zhvilluar të shtunën mbrëma në San Mames, ndërmjet Athletic Bilbaos dhe Real Madridit, ka përfunduar me fitoren e Mbretërve me rezultat 5-2.

Kampionët spanjollë krijuan avantazh të dyfishtë në pjesën e parë të ndeshjes me golat e Arjen Robben (22’) dhe Gabriel Heinze (34’), mirëpo vendasit arritën ta barazojnë rezultatin pa përfunduar pjesa e parë.

Gabriel Heinze shënoi edhe golin e dytë personal në këtë përballje (36’), por këtë radhë në portën e skuadrës së tij duke ngushtuar epërsinë.

Edhe pse nga minuta e 37-të vendasit mbetën me një lojtar më pak në fushë, ata arritën ta barazonin rezultatin pa përfunduar gjysma e parë e ndeshjes (45’+1), ndërsa golashënues ishte Fernando Llorente.

Në pjesën e dytë Los Merengues dominuan lojën duke arritur të shënojnë tri herë.
Porsa filloi gjysma e dytë e ndeshjes (47’), Klaas-Jan Huntelaar krijoi sërish avantazhin për mysafirët. I njëjti lojtar shënoi edhe golin e katërt për Realin (61’) dhe të dytin personal në këtë përballje.

Për rezultatin përfundimtar të ndeshjes u përkujdes, Gonzalo Higuain, i cili e mposhti portierin Iraizoz nga pika e bardhë (85’).

Me këtë fitore, Real Madridi afrohet në vetëm tre pikë diferencë ndaj Barcelonës. Katalunasit të dielën e zhvillojnë ndeshjen e javës së 27-të në udhëtim kundër Almerias.

Redknapp e dëshiron Beckhamin te Spursat
Trajneri i Tottenhamit, Harry Redknapp, ka deklaruar se ka dëshirë që ta transferojë David Beckhamin në skuadrën e tij.

Beckham, i cili po përjeton një ‘rilindje’ te Milan, ka vendosur të qëndrojë me Rossonerët deri në qershor dhe dhe pastaj do të kthehet te skuadra amerikane LA Galaxy, ndërsa Redknapp thotë se nëse do ta kishte mundësinë, ai do ta sillte Beckhamin te Spursat.

“Unë jam një tifoz i madh i Beckhamit. Ai është një futbollist fantastik dhe një model shumë i rëndësishëm për secilën skuadër. Do ta huazoja në skuadër pa menduar dy herë”, ka thënë Redknapp “Sunday Mirror”.

Zidane dhe Valdano kthehen te Reali
Zinedine Zidane dhe Jorge Valdano do të kthehen te Real Madridi nëse Florentino Perez fiton presidencën e klubit mbretëror.

“Sport” njofton se ish-presidenti i Los Blancos është afër konfirmimit të kandidaturës së tij për president, ndërsa nëse fiton do t’i kthejë dy ikonat e klubit në Bernabeu.

Zidane, i cili ka kaluar vite të arta në Madridit pritet të caktohet si këshilltar kryesor i presidentit, ndërkohë Valdano, i cili përveç si lojtar ka pasur edhe rolin e drejtorit sportiv, pritet që sërish ta merr të njëjtin rol.

Sir Bobby: Liverpooli nuk do ta fitojë Ligën Premier
Sir Bobby Robson ka thënë se pavarësisht fitores së lartë në Old Trafford kundër Manchester Unitedit, Liverpooli nuk do ta fitojë titullin kampion të ligës më të fortë në botë.

“Kur të vijë maji, mendoj se fitorja prej 4-1 e Liverpoolit do jetë vetëm një shifër në librat statistikore dhe kjo nuk do të ndikojë për destinimin e trofeut të Kampionatit”.

“Unitedi thjeshtë ka shumë klas dhe përvojë, për të lejuar që një ditë e keqe t’ua dëmtojë objektivat e tyre”, ka thënë 76-vjeçari.

Salihamidzic: Juve nuk e shikon tabelën
Njëri nga lojtarët më të rëndësishëm në fitoren e të shtunës mbrëma të Juventusit kundër Bolognas, Hasan Salihamidzic, ka thënë se bardhezinjtë nuk shqetësohen se cili është lideri aktual në Serie A.

“Në pjesën e parë (kundër Bolognas) nuk luajtëm mirë, pasi që është vështirë të kthehesh i disponuar nga eliminimi prej Ligës së Kampionëve. Bologna po luante mirë dhe po i mbyllte të gjitha hapësirat. Mirëpo në pjesën e dytë ne luajtëm mirë dhe kjo dha rezultat”.

“Jemi shumë të lumtur me këtë fitore, por tash nuk e shikojmë renditjen tabelore, por duhet ta përcjellim suksesin tonë. Kanë mbetur edhe 30 pikë në garë, prandaj për renditjen do të mendoj kur të afrohet fundi i Kampionatit”, ka thënë boshnjaku për Juventus.com.

Zbulohet lista e galaktikëve
Sipas njoftimeve më të reja në Spanjë, pretendenti kryesor për president të Real Madridit, Florentino Perez, ka bërë listën e ngushtë për lojtarët të cilët do t’i transferojë në afatin kalimtar veror.

Ish-presidenti madrilen është favoriti kryesor për të marrë udhëheqësinë e Los Merengues, ndërsa “Sport” ka zbuluar listën e lojtarëve, të cilët Perez planifikon t’i sjellë në Bernabeu.

Cristiano Ronaldo, Kaka, Steven Gerrard, Xabi Alonso, Fernando Torres, David Villa dhe David Silva përbëjnë listën e superyjeve të cilët i ka në shënjestër Perez.

Behrami: Anglia është e tashmja dhe e ardhmja ime
Mesfushori i West Ham United, Valon Behrami, ka deklaruar se në afatin kalimtar të janarit, Roma kishte kërkuar shërbimet e tij, mirëpo pavarësisht se atij i pëlqen Italia, kosovari me pasaportë zvicerane e ka pasur të vështirë të luajë për Romën, pasi që paraprakisht ka qenë lojtar i Lazios.

“Pas largimit nga Lazio, do të ishte e vështirë për mua të kthehesha në një skuadër italiane, sidomos kur flitet për Romën”.

“Tash jam në Londër, më pëlqen këtu dhe nuk planifikoj të largohem. Më mungon Italia sepse është një vend i jashtëzakonshëm, por ishte koha për ndryshime, dhe Anglia është e tashmja dhe e ardhmja ime”, ka thënë mesfushori.

Behrami i ka lënduar ligamentet e gjurit në fillim të këtij muaji dhe do të mungojë një kohë të gjatë, ndërsa do të ketë kohë për ta ndjekur derbin e kryeqytetit italian që zhvillohet më 11 prill.

“Do ta përcjell, sepse kam shumë miq te Lazio. Do të bëj tifo për ata, sepse një fitore do të ishte shumë e rëndësishme për kualifikimin e mundshëm në Ligën e Kampionëve”, ka përfunduar Behrami.

Quagliarella do ta zëvendësojë Trezeguet?
Juventusi pritet t’i ndajë rrugët me sulmuesin francez David Trezeguet në fund të këtij sezoni, ndërsa të dielën “La Gazzetta dello Sport” ka njoftuar se drejtuesit e Zonjës së Vjetër,e konsiderojnë sulmuesin e Udineses, Fabio Quagliarella, si zëvendësim të përsosur.

Trezegol i ka ‘prishur’ punët me trajnerin Claudio Ranieri pas deklaratave të tija kritikuese në adresë të tij, ndërsa tani spekulohet se kjo zënkë do t’i kushtojë me ndërprerjen e qëndrimit në Torino, ku i kaluar nëntë vite.

Quagliarella ka qenë njëri nga lojtarët e preferuar për gjigantët italianë sezoneve të fundit, ndërsa këtë verë pritet që Bianconerët të bëjnë një lëvizje serioze për ta transferuar 26-vjeçarin, i cili vlen afër 12 milionë euro.

"Pleqtë" do të largohen
Mësohet se pronari i Chelseat, Roman Abramovich, dëshiron të bëjë disa ndryshime, për t’i dhënë një pasqyrë të re skuadrës së tij.

Nëse Chelsea nuk arrin ta fitojë titullin kampion në Ligën Premier ose në Ligën e Kampionëve, atëherë Michael Ballack, Didier Drogba dhe Deco, janë disa nga lojtarët të cilët do të ‘pastrohen’ nga Blutë.

“Duket se do të jetë viti i tretë radhazi që Cheslea nuk e ka fituar titullin dhe kjo nuk është mirë”, është cituar Abramovich nga “News of the World”.

Sipas burimit të njëjtë, mësohet se vetëm Frank Lampard dhe Ricardo Carvalho, do të qëndrojnë prej lojtarëve të cilët i kanë mbi 30 vjet.

Guardiola do ta shesë Krkic

Trajneri i Barcelonës, Pep Guardiola, tashmë ka filluar të bëjë planet e transferimeve për sezonin e ardhshëm.
AS shkruan se Guardiola dëshiron t’i ofrojë portierit Albert Jorquera një kontratë të re, derisa përgatitet të shesë mesfushorin Alexandr Hleb, për të cilin interesim ka shprehur Bayern Munich.

Po ashtu pritet që trajneri t’ia tregojë derën edhe sulmuesit të ri Bojan Krkic, që sigurisht se do të alarmojë klubet më të mëdha evropiane.

NBA: Parker shkëlqen në fitoren e Spurs

Tony Parker ka shënuar 28 pikë derisa San Antonio Spurs ka mposhtur Houston Rockets me rezultat të ngushtë 88-85.
San Antonio (44 fitore dhe 21 humbje) tashmë ka dy ndeshje e gjysmë avantazh ndaj Rockets (43 fitore, 25 humbje), në divizionin Jugperëndimor.

Michael Finley shënoi 17 pikë dhe Tim Duncan 15 pikë dhe 12 kërcime për Spurs.

Ron Artest udhëhoqi tek Houston me 21 pikë dhe nëntë kërcime, derisa Yao Ming kontribuoi me 18 pikë dhe 11 kërcime.

Chelsea rimerr pozitën e dytë

Blutë e Chelseat kanë arritur të shënojnë fitore minimale prej 1-0 në Stamford Bridge ndaj Manchester Cityt, duke rimarrë vendin e dytë të tabelës së Premierligës.
Vendasit patën rastin të shënojnë që në minutën dytë të lojës, por goli i shënuar nga Lampard ishte nga pozicioni jashtë loje.

Por nuk vonoi shumë dhe blutë gjetën golin e avantazhit. Lampard pas një harkimi nga gjuajtja e lirë gjeti në zonë mesfushorin Michael Essien, i cili kalon në avantazh Chelsean.

Kjo ishte paraqitja e tretë e Essien pas rikthimit nga lëndimi, dhe goli i tij i parë këtë sezon për Chelsean.

Ekipi i Guus Hiddinks me këtë fitore barazon pikët me Liverpoolin, por merr vendin e dytë falë diferencës më të mirë të golave. Dy ekipet tash mbeten vetëm katër pikë prapa liderit Manchester United.

Milani shkatërron Sienën

Inzaghi ka arritur golin e 300-të në karrierë, derisa ai dhe Pato kanë shkëlqyer duke shënuar nga dy gola secili, për të ndihmuar Milanin të shënojë fitore 5-1 në fushë të Sienës.
Pjesa e parë

Rosonerët shënuan pas vetëm shtatë minutash lojë. Pas një harkimi nga këndi, mesfushori Mathieu Flamini u faulua nga Houssine Kharja në zonën e rreptësisë, ndërsa nga pika e bardhë nuk huqi Andrea Pirlo.

Në çastet e fundit të pjesës së parë, një harkim i shkëlqyeshëm nga këndi i David Beckham, gjeti Filippo Inzaghin, i cili nuk huqi për të çuar Milanin në pauzë me avantazh të dyfishtë.

Pjesa e dytë

Furia e mysafirëve vazhdoi edhe në pjesën e dytë, kur pas dhjetë minutash Pato shënoi edhe golin e tretë për rosonerët nga gati 20 metra largësi (55’). Vendasit ngushtuan në 3-1 pas shtatë minutash tjera me anë të Massimo Macaronne.


Inzaghi, tregon fanellën e tij me numrin 300, derisa feston golin jubilar. Foto: AP

Për t’i dhënë shkëlqimin Milanit, në skenë dolën sërish Inzaghi dhe Pato. Sulmuesi veteran i rosonerëve shënoi në minutën e 71-të, shtatë minuta para se edhe Pato të gjejë për të dytën herë golin, duke vulosur fitoren 5-1.

Me këtë fitore Milani forcon pozitën e tretë me pesë pikë prapa Juventusit, dhe gjashtë mbi Genoan.

Bogdani shënon, Lazio turpërohet

Erjon Bogdani ka shënuar golin e parë për Chievon, që turpëroi Lazion para tifozëve të vet duke e mposhtur me rezultat 3-0.
Sulmuesi i kombëtares shqiptare u fut si zëvendësues në minutën e 20-të, në vend të të lënduarit Makinwa, dhe shënoi golin parë pas 7 minutash inkuadrimi në lojë (27’). Dy golat tjerë për Chievon i shënoi Sergio Pellisier.

Kapiteni dyfishoi avantazhin një minutë pas golit të Bogdanit, duke heshtur turmën e tifozëve vendas. Goli i tretë që vulosi gjithçka, erdhi po nga Pellisier gjashtë minuta para fundit të kohës së rregullt.

Edhe ekipi tjetër romak, Roma, po ashtu ka dështuar të shënojë fitore dhe të futet në katërshen që dërgon në Ligën e Kampionëve, pasi barazoi 2-2 në fushë të Sampdorias.

Cana: Ëndërroj ligën gjermane dhe angleze

Kapiteni i Olimpique Marseille, Lorik Cana, ka zbuluar se largimi i tij nga klubi francez është vetëm çështje kohe, dhe se dëshirë e tij është të luajë në Bundeligë apo Premierligë.
“Kam kontratë me klubin deri në vitin 2010. Ky është një moment i vështirë por vendimtar për mua, pasi gjithçka do të varet nga ofertat që do të bëhen”, ka thënë 25-vjeçari.

“Ajo çfarë mund të ju them sigurt është se nuk do ta kaloj të gjithë karrierën time në Marseille, pasi dua të eksploroj edhe ligat e huaja, atë angleze ose gjermane. Do t’i mbush 26 vjet në korrik, andaj nuk e kam asgjë për nguti”.

“Lëvizja nuk është e patjetërsueshme. Marseille është si shtëpi për mua. Kam kaluar sezone të shkëlqyeshme me klubin dhe vetëm titulli na mungon”, shton mesfushori i kombëtares shqiptare.

Cana sonte do të përballet me ish-ekipin e tij, Paris Saint Germain, në derbin më të rëndësishëm të ligës franceze.

Tottenham prish planet e Villas

Tottenham ka shënuar fitore me rezultat 2-1 në derbin e Premierligës përballë Aston Villas në Villa Park, duke prishur planet e vendasve për të rimarrë pozitën e katërt.
Të zgjedhurit e trajnerit Harry Rednkapp shënuan që në minutën e pestë të ndeshjes, kur Aaron Lennon dërgoj një harkim nga e majta për të gjetur në zonë Jermaine Jenas, i cili mposhti portierin Brad Friedel.

Goli i dytë i mysafirëve erdhi po në minutën e pestë të pjesës së dytë, dhe autor i golit kësaj here ishte Daren Bent.

Gjithë çfarë arritën vendasit ishte një gol i vetëm i shënuar me kokë nga John Carew pas një harkimi nga e djathta të James Milner, pesë minuta para fundit të kohës së rregullt.

Me humbjen e sotme Aston Villa humb edhe vendin e katërt në tabelën e Premierligës, ku tash ngrihet Arsenali, që ka pikë të barabarta, por diferencë më të mirë golash në krahasim me Villan.

Totenhami me këtë fitore i ik edhe më shumë zonës së rreptësisë, duke mbajtur vendin e 11-të me 35 pikë, sa ka edhe Manchester City në pozitën e 10-të.

Lyoni rrezikon kreun e tabelës

Kampioni i Francës, Lyoni, vazhdon me paraqitje të dobëta, duke pësuar humbje kësaj here në fushë të vet nga Auxerre dhe duke rrezikuar edhe kreun e tabelës.
Pole Ireneusz Jelen solli avantazhin për Auxerre në fund të pjesës së parë të ndeshjes (41’), duke shënuar nga afërsia, para se Dane Thomas Kahlenberg të vulosë fitoren, pasi mposhti portierin Hugo Lloris në kohën shtesë (90’).

Portieri i Lyonit, kishte mbrojtur një penalti të Cedric Hengbart disa minuta më herët.

Lyoni nuk ka fituar në gjashtë ndeshjet e fundit. U eliminua nga Barcelona në 1/8 e finales së Ligës së Kampionëve, një javë pasi humbi ndaj Lille në Kupën e Francës.

Me këtë humbje, Lyoni e bën më interesante garën për titullin e Francës e edhe më interesante derbin e sotëm francez, ku ish-ekipi i Lorik Canës, Paris Saint Germain, pret në fushë të vet ekipin aktual të kosovarit, Olimpique Marseille.

Nëse PSG, që mbledh 52 pikë, shënon fitore në ndeshjen e sotme, do të marrë kreun e Ligue 1 nga Lyoni që ka 53 pikë. Në rast se Marseielle shënon, do të marrë pozitën e dytë, me Lyonin që do të vazhdojë të mbajë kreun.

Kampionët vazhdojnë me fitore
Ndeshja kryesore e javës së 28-të në Serie A, e cila është zhvilluar të dielën mbrëma në Giuseppe Meazza, ndërmjet Interit dhe Fiorentinës, ka përfunduar me fitoren e skuadrës vendase me rezultat prej 2-0.

Zikaltrit kanë arritur të shënojnë fitore shumë të rëndësishme në një ndeshje të vështirë, për të mbajtur diferencën prej shtatë pikëve me Juventusin.

Vendasit e filluan furishëm ndeshjen duke arritur shumë shpejt te goli i avantazhit (11’), të cilin e shënoi Zlatan Ibrahimovic duke u gjetur më së mirë para portës së Sebastian Freyt, pas një goditje të Mario Balotellit.

Mysafirët gjatë gjithë ndeshjes provuan të bënin diçka për ta ndërruar rezultatin, megjithatë ishin të pafuqishëm përballë kampionëve.

Në minutat shtesë trajneri kontrovers i Interit, Jose Mourinho, u përjashtua me karton të kuq (90’+3), pas reagimeve të tij për një ndërhyrje në dëm të Santon.

Porsa u përjashtua portugezi, Ibracadabra vulosi fitoren e Interit (90’+4) duke shënuar nga një goditje e lirë.

Me këtë fitore Interi vazhdon të mbetet i qetë në krye të tabelës drejt titullit të radhës, kur kanë mbetur edhe dhjetë javë për të përfunduar Kampionati.

Atletico përmbys rezultatin ndaj Villarrealit
Atletico Madrid ka arritur të rikthehet nga dy gola disavantazh për të mposhtur Villarrealin me rezultat 3-2 në Vicente Calderon, dhe për të mbajtur gjallë shpresat për të marrë vendin e katërt, që dërgon në Ligën e Kampionëve.

Atletico humbi një penalti të hershme, kur Diego Forlan nuk ishte i saktë nga pika e bardhë në minutën e tretë të ndeshjes.

Villarreali kaloi në epërsi me anë të Matias Fernandez në minutën e 19-të të ndeshjes, ndërsa rezultatin për mysafirët e dyshifoi Ruben Cani, shtatë minuta pas fillimit të pjesës së dytë (52’).

Por nuk zgjati shumë, pas edhe një minute, Sergio ‘Kun’ Aguero ringjalli shpresat për Atleticon. Pika vendimtare e ndeshjes ishte përjashtimi nga loja i mesfushorit të Villarealit, Javi Venda, në minutën e 65-të të ndeshjes, pas dy kartonëve të verdhë.

Golat nga Diego Forlan (80’) dhe Antonio Lopez (84’) në dhjetë minutat e fundit, i dhanë fitoren Atletico Madridit, që tash i afrohet në dy pikë Villarrealit, që vazhdon të mbajë vendin e katërt.

Sikur Villarreal të fitonte, do të krijonte tetë pikë epërsi ndaj Atleticos, dhe do të zbehte gjasat e këtij klubi për të siguruar vend për në Ligën e Kampionëve.

Cana mposht ish-ekipin e tij, PSG
Mesfushori kosovar Lorik Cana ka shënuar edhe një herë kundër ish-ekipit të tij Paris Saint German, në fitoren 3-1 të Olimpique Marseille, ekip që kështu ngrihet në pozitën e dytë me një pikë më pak se lideri, Lyoni.

Mysafirët e Marseille kaluan në epërsi pas 24 minutash lojë me golin e ish-lojtarit të Liverpoolit, Boudewijn Zenden, por vendasit barazuan dy minuta para fundit të ndeshjes me anë të ish-yllit të Barcelonës, Ludovic Giuly.

Minuta e 53-të ishte momenti kyç në ndeshje, kur vendasit mbetën me 10 lojtarë në fushë për shkak të përjashtimit të Zoumana Camara me karton të kuq.

Dy minuta më pas Bakari Kone risolli avantazhin për Marseillen, ndërsa kapiteni i ekipit Lorik Cana vulosi rezultatin në minutën e 61-të të ndeshjes.

Me këtë fitore, Marseille barazohet në pikë me Paris Saint Germain, por ia merr vendin e dytë falë diferencës më pozitive të golave.

Lyoni vazhdon të kryesojë tabelën, por pas humbjes së fundit ndaj Auxerre, tash ka vetëm një pikë epërsi ndaj dy ndjekësve.

Të rikujtojmë se Cana shënoi golin e vetëm të fitores (1-0) kundër Paris Saint Germain edhe në sezonin 2005/06, që ishte sezoni i parë pas kalimit tek Marseille, dhe fitorja e parë e këtij ekipi ndaj atij parisien pas tre vitesh aso kohe.

Krkic ia sjell fitoren Barcelonës
Barcelona ka shënuar fitore si mysafir i Almerias në stadiumin Juegos del Mediterraneo, me rezultat prej 2-0.

Pjesa e parë përfundoi pa gola, ndërsa me të filluar pjesa e dytë Blaugranët shënuan dy gola të shpejtë për ta blinduar fitoren në këtë përballje.

Tetë minuta brenda pjesës së dytë (53’), Bojan Krkic shfrytëzoi një goditje të Lionel Messi për ta shënuar golin e parë.

Tre minuta më pas, Krkic u shënua sërish në listën e golashënuesve duke dyfishuar epërsinë dhe duke ia siguruar fitoren skuadrës së tij.

Me këtë fitore, Barcelona rikthen diferencën prej gjashtë pikëve kundrejt përcjellësit të parë në La Liga, Real Madrid.

Ronaldo: Nuk më intereson për Mourinhon
Ylli i Manchester United, Cristiano Ronaldo, ka dhënë shenja se zënka e tij me menaxherin e Interit, Jose Mourinho, ende nuk ka përfunduar.

Derisa ishte ende në Chelsea në vitin 2007, Mourinho kishte një fjalosje publike me Ronaldon dhe ylli i Manchester United tha se ‘ai nuk din si t’i pranojë dështimet e tija”.

“Nuk dua të flas për Jose Mourinhon. Nëse më pyesni për Sir Alex do të ju them diçka, por nuk më intereson çfarë ndodh me Mourinhon”, ka thënë Ronaldo për Sunday Mirror.

Hiddink: Falenderon Liverpoolin
Pas fitores ndaj Manchester Cityt, menaxheri i Chelseat, Guus Hiddink, ka thënë se Liverpooli iu ka bërë atyre favor duke e mposhtur Manchester United në ndeshjen e të shtunës.

Me fitoren e djeshme Chelsea ruan vendin e dytë të tabelës, me katërt pikë më pak se Manchester United, që megjithatë ka një ndeshje më pak të luajtur. Liverpooli me pikë të barabarta me Chelsean, mban vendin e tretë.

“Nëse do të ishte vetëm katër pikë, do të ishte shumë afër, por ata kanë edhe një ndeshje pa zhvilluar. Por është e qartë se pas rezultatit të papritur të së shtunës, presioni është rikthyer në ligë”, ka thënë Hiddink.

“Kjo është një shtytje. Por, nëse duam t’i ndjekim, duhet të vazhdojmë të fitojmë. Kjo do të bëjë presioni të vazhdojë deri në fund të sezonit, që është mirë për secilin”, shton holandezi.

Huntelaar: Barcelona ende duhet ta vizitojë Realin
Sulmuesi i Real Madridit, Klaas-Jan Huntelaar, shpreson se ata do të mund ta arrijnë liderin e La Ligës, Barcelonës.

“E di se duhet të luftojmë, por jemi aq afër, veçanërisht nëse e marrim parasysh se Barcelona duhet të na vizitojë në Bernabeu. Këtë mund ta fitojmë pa dyshim”, ka thënë Huntelaar.

“Gjëja më e rëndësishme është të luajmë si ekip, siç ndodhi kundër Athletic Bilbao, pasi atëherë jemi më të fuqishëm. Nëse qëndrojmë të bashkuar, mund t’i fitojmë të 11 ndeshjet e mbetura në ligë”, ka shtuar holandezi.

Inzaghi: Jam gëzuar si një fëmijë
Filippo Inzaghi është i ngazëllyer me dygolëshin e tij në fitoren 5-1 të Milanit ndaj Sienës, dhe thotë se është ndjerë si fëmijë me golin e tij të 300-të në karrierë.

“Jam aq i lumtur sa një fëmijë në ditën e Krishtlindjeve, pasi po festoj një arritje që më bën të jem krenar. I falënderoj të gjithë bashkë-lojtarët e mi në secilin ekip që kam lutur. Titujt me klubin janë të rëndësishme, por edhe arritjet individuale bëjnë të ndjehesh më i veçantë”, ka thënë Inzaghi.

Nga 300 golat në të gjitha garat, 110 prej të cilave me Milanin, Inzaghi kujton ata të finales së Ligës së Kampionëve kundër Liverpoolit në vitin 2007.

“Golat më të veçantë ishin ata në Athinë në finalen e Ligës së Kampionëve kundër Liverpoolit. Ata janë të veçantë së bashku me golat në Kupën Botërore të Klubeve dhe Superkupën Evropiane të vitit 2007”, ka shtuar sulmuesi italian.

Guardiola: Nuk ishte fitore e lehtë
Menaxheri i Barcelonës, Josep Guardiola, është i kënaqur nga fitorja e mbrëmshme ndaj Almerias, por pranon se nuk ishte aspak një fitore e lehtë.

Barcelona iu përgjigj Real Madridit me tri pikë në fitoren ndaj Almerias, për të rikthyer avantazhin prej 6 pikësh në krye të tabelës.

Barcelona shënoi fitore 2-0 me dy golat e Bojan Krkic, por Guardiola thotë se megjithatë nuk ishte një fitore e lehtë.

“Ndoshta u duk se kishim një ndeshje të lehtë, por jo, nuk ishte gjithçka aq e lehtë. Kishim kontroll të ndeshjes, por në pjesën e parë e mbajtëm shumë kohë topin, duhej të ishim më të shpejtë dhe këtë e bëmë në pjesën e dytë”, ka thënë Guardiola.

“Almeria nuk kishte shumë raste të shënojë, dhe kjo sepse luajtëm mirë dhe i uroj futbollistët e mi. Por në futboll asgjë nuk është aq e thjeshtë. Duhet të punojmë dhe të vazhdojmë të përparojmë”, ka shtuar trajneri i Barcelonës.

Lyon interesohet për Trezeguet
Presidenti i Lyonit, Jean-Michel Aulas, thotë se ekipi i tij mund të sjellë sërish në Francë sulmuesin e Juventusit, David Trezeguet.

Trezeguet nuk është shumë i kënaqur nga hapësira që i jepet në klub pas rikthimit të tij nga rikuperimi, dhe kjo pakënaqësi ishte e dukshme edhe në ndeshjen kundër Chelseat, kur u nxor nga loja.

“Ne e kemi dëshiruar atë edhe para dy vitesh. Nuk është e fshehtë që e duam Trezeguet. Nuk kam folur me trajnerin për këtë, as me Juventusin, por ne e duam atë futbollist. Ai është një futbollist i jashtëzakonshëm, por ne e kemi Bezneman...”, ka thënë Aulas.

Benitez: Liverpooli skuadra më e mirë në Evropë
Edhe pse trofetë e sezonit të kaluar gjenden në kabinetin e Manchester Unitedit dhe çmimin për lojtarin më të mirë në botë e ka fituar Cristiano Ronaldo, trajneri i Liverpoolit, Rafael Benitez, thotë se skuadra e tij ka qenë skuadra më e mirë në Evropë vitet e fundit.

“Besoj se Liverpooli ka qenë skuadra më e mirë në Evropë në pesë vitet e fundit. Kemi arritur që në të njëjtën javë ta mposhtim Real Madridin dhe Manchester Unitedin, nëse mund t’i mposhtim ata, atëherë mund ta mposhtim çdo skuadër”, është cituar Benitez nga “The Sun”.

Nga an tjetër kapiteni Steven Gerrad ka shtuar: “Do ta nevojitet fat për ta fituar trofeun e Ligës Premier, mirëpo fitorja jonë kundër Unitedit, do të krijojë besim edhe te skuadrat tjera se Manchesteri nuk është skuadër e cila nuk mund të mposhtet”.

Operacioni i Chiellinit i suksesshëm
Mbrojtësi i Juventusit, Giorgio Chiellini, i është nënshtruar ndërhyrjes kirurgjike në hundë, ndërsa lajmet më të reja janë se operacioni ka dalë i suksesshëm.

Chiellini e lëndoi hundën në një përballje me Francisco Vallianin në ndeshjen kundër Bolognas të shtunën, ndërsa për ta korrigjuar këtë lëndim është dashur t’i nënshtrohej të ndërhyrjes kirurgjike të hënën.

“Chiellini është dashur t’i nënshtrohej ndërhyrjes kirurgjike në hundë në mëngjesin e sotëm. Operacioni ka zgjatur më pak se tridhjetë minuta dhe ndërhyrja ka qenë e suksesshme, ndërsa lojtari do të lëshohet brenda disa orësh. Është e mundur që lojtari të jetë në fushën stërvitore që të mërkurën”, shkruan në deklaratën zyrtare të klubit.

Ky është një lajm i mirë për Zonjën e Vjetër, pasi që fundjavën që vjen do ta zhvillojë ndeshjen derbi kundër Romës në Olimpico të kryeqytetit italian.

Kaka i shqetësuar për lëndimin e radhës

Superylli i Milanit, Kaka, është kthyer nga lëndimi të dielën për të luajtur kundër Sienas në Stadio Franchi, mirëpo ekziston frika se lëndimi i është kthyer sërish, prandaj është dashur të largohet nga ndeshja në minutën e 72-të.

Kaka nuk ka luajtur për Milanin që nga 7 shkurti kur ishte lënduar në përballjen kundër Regginas, mirëpo rikthimi i tij në fushë ka bërë që braziliani të lëndohet sërish.

“Jam vërtet i shqetësuar dhe nuk e di kur do të mund të luaj sërish. Nuk di se çfarë të bëj, e ndjeva të njëjtën dhimbje sikurse herën e fundit. Një goditje e vogël dhe menjëherë jam kthyer në gjendjen e mëparshme. Nuk e di se kur do të më largohet kjo dhimbje”, është shprehur Kaka i dëshpëruar.

Probleme ndërmjet Robben dhe Huntelaar
Arjen Robben dhe Klaas Jan Huntelaar ishin dy nga lojtarët më të mirë në fushë në fitoren e Real Madridit, prej 5-2, në fushën e Athletic Bilbaos të shtunën mbrëma, mirëpo njoftohet se gjërat nuk shkojnë mirë ndërmjet dy holandezëve.

“Sport” dhe “AS” kanë njoftuar se dy bashkëkombësit e kanë problem të përshtaten me njëri-tjetrin. Gjatë një momenti në ndeshjen kundër Bilbaos, Huntelaar i ka thënë Robbenit pse nuk ia ka pasuar topin, ndërsa ky i fundit ka reaguar duke i thënë: “Mbylle gojën!”.

Pas zëvendësimit të të dy lojtarëve, Robben e ka zgjatur dorën për ta përshëndetur, ndërsa ish-sulmuesi i Ajaxit nuk i është përgjigjur këtij reagimi.

Mësohet se Huntelaar ndjehet i frustruar për shkak të numrit të vogël të topave që pranon nga Robben që nga momenti kur është inkuadruar në formacionin bazë të Realit.

Vidic mungon në dy ndeshjet e radhës
Mbrojtësi i Manchester Unitedit, Nemanja Vidic, do të mungojë në dy ndeshjet e radhës në Ligën Premier, pasi që FA e ka dënuar me dy ndeshje moslojë për shkak të kartonit të kuq që mori të shtunën në ndeshjen kundër Liverpooolit.

Serbi do të mungojë në ndeshjen e të shtunës kundër Fulhamit si edhe në ndeshjen pas dy javësh kundër Asron Villas.

Arsyeja që Vidic është dënuar me dy ndeshje moslojë, është për faktin se ai e ka marrë kartonin e dytë të kuq këtë sezon.

Giordano: Gara për titull nuk ka marrë fund
Legjenda e Lazios, Bruno Giordano, nuk beson se Interi e ka siguruar Scudetton, pavarësisht se gjendet shtatë pikë përpara Juventusit.

“Nuk mendoj se ka marrë fund, sepse Interi duhet të luajë kundër Juventusit”.

“Nerazzurët arritën të nxjerrin fitore kundër Fiorentinës, edhe pse nuk treguan lojë të mirë. Megjithatë kjo fitore iu jep kurajë dhe iu siguron pikë”.

“Mendoj se Juventusi duhet të besojë në Scudetto, sepse ka akoma shumë pikë në lojë dhe Interi do të udhëtojë në Torino për t’u përballur me Bianconerët”, ka thënë Giordano për “Sky Sport Italia”, duke shtuar se Roma, Fiorentina dhe Genoa i kanë shanset e njëjta për t’u kualifikuar në Ligën e Kampionëve sezonin e ardhshëm.

NBA: Lakers-at mposhtin Mavericks-at
Kobe Bryant ka shënuar 28 pikë në ndeshjen e radhës të NBA-së, të cilën Los Angeles Lakers e fitoi me rezultat 107-100 ndaj Dallas Mavericks.

Bryant kontribuoi edhe me tetë kërcime dhe pesë asistime derisa Trevor Ariza shënoi pikët më të larta në karrierë në këtë ndeshje, 26. Pau Gasol ndihmoi me 25 pikë. Kjo ishte fitorja e 53-të e Lakers këtë sezon, kundrejt 13 humbjeve.

Jason Terry shënoi 29 pikë, derisa Dirk Nowitzki ndihmoi me 20 tjera për Dallas, që aktualisht renditen në pozitën e tetë të Konferencës Perëndimore, me 40 fitore dhe 27 humbje.

Ancelotti mund të transferohet te Reali
Carlo Ancelotti ka deklaruar se është i ngazëllyer që është kandidati kryesor në listën e Florentino Perezit për ta marrë drejtimin e Real Madridit, duke mos e mohuar një transferim të mundshëm në Bernabeu.

Trajneri i Rossonerëve ka qenë pjesë e spekulimeve për t’u angazhuar si trajner i Los Blancos, nëse ish-presidenti Perez fiton presidencën, ndërsa vetë italiani nuk i ka thënë jo kësaj mundësie.

“Unë trajner i Real Madridit? Çka do që ndodh, ndodh. Më pëlqen fakti që Florentino Perez më ka mua në listën e tij”, është cituar të ketë thënë trajneri i Milanit nga “Marca”.

Wenger: Walcott është lojtari kyç i Arsenalit

Trajneri i Arsenalit, Arsene Wenger, e konsideron anësorin e ri Theo Walcott, si lojtarin kryesor për sukseset e Topçinjve këtë sezon.

“Ai na jep diçka shumë të rëndësishme, sidomos kur luajmë në shtëpi. Ai krijon hapësira dhe luan lojë të drejtpërdrejtë. Ne kemi nevojë për këtë gjë në ndeshjet që zhvillojmë në shtëpi”.

“Kthimi i tij është shumë i rëndësishëm, sepse ai mund të na ndihmojë të ndryshojmë diçka nëpër ndeshje. Ai po përmirësohet vazhdimisht dhe shumë të mira do të vijnë në të ardhmen nga Theo”, ka thënë Wenger për “Setanta Sports”.

Ancelotti konfirmon interesimin për Maxwell

Trajneri i Milanit, Carlo Ancelotti, ka konfirmuar se Rossonerët janë të interesuar për ta transferuar mbrojtësin e Interit, Maxwell.

Braziliani e ka humbur vendin në formacionin bazë të zikaltërve, kështu që ka refuzuar ta vazhdojë kontratën me skuadrën aktuale duke shprehur dëshirën për t’u larguar.

“Maxwell është një lojtar i cili i pëlqen Milanit. Mendoj se së shpejti do të bisedojmë për transferimin e tij. Ai është njëri nga mbrojtësit më të mirë të krahut”, i ka thënë Ancelotti faqes Sky.it.

Riquelme i uron sukses Argjentinës

Mesfushori i Boca Juniors, Juan Roman Riquelme, ka thënë se ai nuk do të japë shpjegime të mëtutjeshme në lidhje me vendimin e tij për të hequr dorë nga përfaqësuesja e Argjentinës dhe ia ka uruar më të mirën kombëtares së tij.

Javën që shkoi, Riquelme i dha fund karrierës së tij me përfaqësuesen për shkak të mospajtimeve me trajnerin Diego Maradona, dhe kërkon që të mos i bëhet më pyetja në lidhje me vendimin e tij.

“Nuk dëshiroj të flas më për këtë temë. Mendoj se isha shumë i qartë atë ditë (të mërkurën)”.

“Përfaqësuesja do të vazhdojë të ketë sukses, sepse aty ka shumë lojtarë të mëdhenj. Ua dëshiroj atyre më të mirën. Shpresoj të kenë sukses në kualifikime dhe në Kampionatin Botëror”, ka thënë mesfushori i dikurshëm i Barcelonës dhe Villarrealit për “Canal 13”.

Gerrard: Fitoret kundër Unitedit dhe Chelseat tregojnë fuqinë tonë

Simboli i Liverpoolit, Steven Gerrard, mendon se Të Kuqtë kanë treguar fuqinë e tyre, madje edhe nëse nuk shpallen kampionë, ata kanë dëshmuar se e meritojnë titullin e Ligës Premier.

“Kemi luajtur në Stamford Bridge (kundër Chelseat) dhe kemi fituar, kemi barazuar në Emirates (kundër Arsenalit), dhe tash kemi fituar në Old Trafford (kundër Manchester Unitedit)”.

“Këto rezultate tregojnë se ne e kemi potencialin për ta fituar titullin, por në disa ndeshje ku është dashur të fitojmë kemi barazuar, dhe ky ka qenë gabimi ynë. Megjithatë, nuk ia vlen të shikojmë prapa, por përpara”.

“Nuk mbaj mend ndonjë javë më të mirë se kjo që shkoi gjatë karrierës sime me Liverpoolin. E kemi mposhtur Real Madridin në mënyrë shumë komode në Anfield, dhe pastaj kemi udhëtuar në Old Trafford ku kemi zhvilluar një ndeshje të jashtëzakonshme duke dalë fitues”, ka thënë Gerrad për faqen zyrtare të klubit.

Moratti dëshiron të pastrojë Interin

Presidenti i kampionit të Serie A, Interit, Massimo Moratti, raportohet se ka kërkuar nga trajneri Jose Mourinë të pastrojë ekipin.

Mediat italiane kanë shkruar se eliminimi i hershëm i Interit nga Liga e Kampionëve e ka goditur buxhetin e Morattit dhe ai dëshiron të shtojë në xhepin e tij afro 40 milionë funte, duke shitur një varg lojtarësh.

Mourinho po ashtu ka konfirmuar së fundi se ai është duke punuar në një raport për Morattin, i cili do të detajizojë se cilët lojtarë do të mund të shiten dhe pse.

Në këtë listë raportohet se Mourinho ka përfshirë edhe emrat si Mancini, Ricardo Quaresma, Nicolas Burdisso, David Suazo, Victor Obinna dhe Nelson Rivas.

Milan përgatit ofertë për Clichyn

Milani raportohet se është duke përgatitur një ofertë të vlefshme 14 milionë funte, në përpjekje për të marrë shërbimet e mbrojtësit të Arsenalit, Gael Clichy.

Clichy konsiderohet si një prej më të mirëve në pozicionin e tij dhe Milani është i paepur ta sjellë atë në San Siro.

Me mbrojtësin legjendar Paolo Maldini që pritet të varë këpucët, menaxheri i ekipit Carlo Ancelotti, dëshiron të gjejë një zëvendësim sa më perfekt.

Rosonerët e dinë se kanë nevojë të shtojnë ca rini në ekipin e tyre të moshuar, e që 23-vjeçari Clichy do të ishte një zgjidhje e qëlluar.

Wenger: United mbetet favorit

Menaxheri i Arsenalit, Arsene Wenger, thotë se United edhe krahas humbjes nga Liverpooli mbetet konkurrenti kryesor për të fituar titullin në Premierligë.

Pas humbjes prej Liverpoolit të shtunën, United tash ka vetëm katër pikë epërsi nga Chelsea dhe Liverpooli, por Djajtë e Kuq kanë edhe një ndeshje më pak të zhvilluar.

Wenger mendoj se mu kjo ndeshje është një përparësi e madhe të cilën e ka Sir Alex Ferguson dhe për këtë beson se United do të mbetet favorit kryesor.

“Ka dy gjëra që dua t’i them. Së pari uroj Liverpoolin për fitoren me atë rezultat të shkëlqyeshëm, por mendoj... ishte një rezultat shumë lajkatues”, ka thënë Wenger

“Në pjesën më të madhe të ndeshjes, United dominoi, por ata bënë gabime të cilat zakonisht nuk i bëjnë. Disa lojtarë u treguan mendërisht të lodhur”.

“Gara për titull tash është më e hapur, edhe pse unë mendoj se Manchester United është në një pozicion më të fuqishëm, veçanërisht që ka një ndeshje plus në duar”, ka përfunduar Wenger.

Juventus përgatit 11 milionë funte për Malouda

Mediat angleze përcjellin se Juventusi është duke përgatitur 11 milionë funte për shërbimet e anësorit të Chelseat, Florent Malouda.

The Sun ka shkruar se Zonja e Vjetër ka vendosur të kërkojë shërbimet e francezit, duke rënë në kontakt me agjentin e tij. Gazeta shkruan se juve dëshiron që Malouda të zëvendësojë çekun Pavel Nedved, i cili pritet të heqë dorë nga futbolli në fund të sezonit.

“Jemi duke shikuar çdo mundësi dhe Malouda është lartë në listën tonë. Le të shohim çfarë do të ndodhë deri në fund të sezonit”, ka thënë një burim brenda klubit italian.

Me largimin e Luis Felipe Scolarit dhe ardhjen e Guus Hiddink, 28-vjeçari ka bërë vetëm dy paraqitje si fillestar, dhe do të shohë çdo mundësi të largimit nga Stamford Bridge.

Ai arriti në Chelsea nga Lyoni në vitin 2007 për një shumë prej 13.5 milionë funte.

City do të shfrytëzojë Robinhon për të marrë Riberyn

Manchester City është e bindur se mund të mposhtë konkurrentët tjerë për të marrë shërbimet e yllit të Bayern Munich, Franck Ribery.

The Guardian shkruan se City është duke u përgatitur ta shesë Robinhon në fund të sezonit. Një mundësi është që braziliani të shitet tek Bayerni si pjesë e shkëmbimit me Riberyn.

Ribery është duke u kërkuar nga shumë klube evropiane, përfshirë Manchester United dhe Barcelonën.

Chelsea interesohet sërish për Alves
Chelsea raportohet se është duke kërkuar yllin brazilian të Barcelonës, Daniel Alves.

Mirror shkruan se blutë do të jenë aktiv në afatin transferues të verës dhe një prej caqeve është Alves.

25-vjeçari verën e kaluar kaloi nga Sevilla tek Barcelona duke refuzuar ofertën e Chelseat.

Burime nga Barcelona kanë zbuluar se Chelsea dhe Manchester City janë interesuar për mundësinë e transferimit të Alves.

NBA: Nuggets hakmerren ndaj Nets
Denver Nuggets ka marrë hak për humbjen më të rëndë të sezonit, duke mposhtur New Jersey Nets me rezultat 121-96.

JR Smith dhe Nene Hilario shënuan nga 19 pikë secili, ndërsa edhe katër lojtarë të Nuggets arritën pikë dyshifrore, duke u përgjigjur ndaj humbjes së 7 shkurtit prej 114-70 ndaj Nets.

Vince Carter shënoi pikët më të larta të ndeshjes, 32 pikë, dhe Keyon Dooling kontribuoi me 17 pikë, por që nuk ishin të mjaftueshme për të shmangur humbjen e katërt në radhë të Nets.

Villa prioritet i Barcës
Sulmuesi i Valencias, David Villa, është shndërruar në prioritetin kryesor të Barcelonës, para Fernando Torresit dhe Karim Benzemas.

Para disa javësh Barcelona kishte bërë listën e ngushtë të lojtarëve të cilët do të mund ta zëvendësonin sulmuesin Samuel Eto’o, nëse ai vendos të largohet nga Camp Nou, ndërsa Benzema dhe Torres konsideroheshin kryesorët në listë.

Por sipas të përditshmes “Sport”, drejtori sportiv i Blaugranëve, Txiki Begiristain, dhe trajneri Pep Guardiola, janë pajtuar që Villa përshtatet më shumë në stilin e lojës së katalunasve, në raport me Torresin apo Benzeman.

Ibra dëshiron La Ligan

Zlatan Ibrahimovici dëshiron të ketë sukses në Ligën e Kampionëve dhe mendon se transferimi në La Liga, në veçanti te Barcelona do t’ia ofronte këtë mundësi.

Sipas “La Gazzetta dello Sport” boshnjaku me pasaportë suedeze dëshiron sfida të reja, ndërsa agjenti i tij, Mino Raiola, ka lënë të kuptohet se transferimi në Camp Nou nuk përjashtohet si mundësi.

“Mino Raiola ka një ide të qartë se çfarë mund të ndodhë dhe ka mbajtur kontakte me drejtuesit e Barcelonës. Takimet e para kanë qenë të kënaqshme”, shkruan gazeta italiane.

Si alternativë, Ibrahimovici mund të bashkohet me Carlo Ancelottin te Real Madridi nëse Florentino Perez zgjidhet president”, vazhdon “La Gazzetta dello Sport”.