Lajme te reja nga bota e Sporti

Mexes: Nuk largohem
Qendërmbrojtësi i Romës, Philippe Mexes, iu ka dhënë fund spekulimeve për mundësinë e largimit të tij nga Stadio Olimpico, duke thënë se do të qëndrojë te Giallorossët.

“Do të qëndroj, të jeni të sigurt. Është gjithmonë kënaqësi kur skuadrat tjera interesohen, mirëpo unë jam mirë në Romë”.

“Kam kaluar sezonin më të keq në pesë vitet e fundit dhe nuk dëshiroj të largohem në këtë mënyrë. Dëshiroj ta tregoj vlerën time”, ka thënë 27-vjeçari.

Për shërbimet e francezit janë të interesuar Milani dhe Chelsea.

Milan dhe Inter dëshirojnë Trezeguet
Agjenti i David Trezeguet, Antonio Caliendo, nuk e ka mohuar mundësinë që sulmuesi i Juventusit t’i bashkëngjitet njërës nga skuadrat e qytetit të Milanos, Inter ose Milan.

“Lyoni ende nuk ka bërë ofertë, mirëpo interesimi i tyre është i vërtetë. Sa i përket vendimit të Juventusit, nuk dimë se çfarë do të ndodhë. Gjërat mund të ndryshojnë në javën e ardhshme”.

“Interesimi i Milanit për Trezeguet mund të jetë i vërtetë, ngjashëm sikurse ndodhi me Filippo Inzaghin. Për më shumë edhe Interi dëshiron shërbimet e tij”, ka thënë Caliendo.

Leonardo: Ambrosini do të jetë kapiten
Trajneri i Milanit, Leonardo, ka dalë në konferencën e parë për shtyp si trajner i Rossonerëve, ndërsa veç tjerash ka pohuar se shiriti i kapitenit do t’i takojë Massimo Ambrosinit.

Pritet që mesfushori italian të nënshkruajë kontratë të re me Milanin, ndërsa trajneri i ri ka thënë fjalë të mira për të duke shprehur vendimin e tij për t’ia besuar shiritin e kapitenit.

“Jam i lumtur për Maxin, sepse ai është lojtar që e ka Milanin në ADN tij, sikurse Albertini, Maldini, Costacurta dhe Baresi. Ai simbolizon Milanin. Vepra ime e parë si trajner do të jetë caktimi i tij për kapiten”, ka thënë Leonardo për “Il Corriere dello Sport”.

Benayoun zgjat edhe dy vite kontratën
Liverpooli ka konfirmuar zyrtarisht se anësori Yossi Benayoun i është përkushtuar skuadrës së kuqe duke vazhduar edhe dy vite kontratën e tij aktuale.

Me vazhdimin e kontratës, izraeliti i është bashkëngjitur veprimeve të Steven Gerrard, Daniel Agger, Dirk Kuyt dhe Fernando Torres

“Jam shumë i lumtur që kemi arritur një marrëveshje. Kuptohet, të jesh në një skuadër të këtillë është realizimi i një ëndrre dhe unë dëshiroj të vazhdoj të luaj këtu”, ka thënë Benayoun për faqen zyrtare të Redsave.

Barca dhe Reali në kërkim të Bruno Alves
Rivalët e përjetshëm, Barcelona dhe Real Madridi, janë në kërkim të mbrojtësit të Portos, Bruno Alves.

Portugezi konsiderohet si njëri nga mbrojtësit më të mirë që qarkullojnë në treg këtë afat kalimtar, ndërsa pas formës së mirë që ka treguar me Porton, besohet se ai është i gatshëm të luajë në një skuadër më të madhe.

Dy gjigantët spanjollë janë në kërkim të Alves, ndërsa mësohet se Barcelona ka një nuancë më të madhe të përparësisë.

Marchionni nënshkruan për Fiorentinën
Fiorentina ka kompletuar transferimin e anësorit Marco Marchionni nga Juventusi, njofton "Viola Channel".

Skuadra vjollce ka paguar vetëm dy milionë euro për bashkëpronësinë e 28-vjeçarit, i cili do të bashkohet me trajnerin Cesare Prandelli, me të cilin ka punuar bashkë te Parma në sezonet 2002-2004.

Marchionni iu bashkua Juventusit në vitin 2006, mirëpo nuk arriti të dëshmonte aftësitë e tij si pasojë e lëndimeve që e përcollën.

Ronaldo prezantohet në Bernabeu

Real Madridi ka prezantuar Cristiano Ronaldon para tifozëve të vet në stadiumin e mbushur Santiano Bernabeu në një spektakël që me siguri se do të mbetet gjatë për t’u kujtuar.


Prezantimi i Portugezit ishte shumë më spektakolar se ai i Kaka që u zhvillua javën e kaluar. Në deklaratën para 80.000 tifozëve, Ronaldo tha se kjo ishte ëndrra e tij e fëmijërisë.

“Jam shumë i lumtur që jam këtu. Tash ëndrra ime e fëmijërisë u bë realitet. Nuk prita stadium të mbushur, kjo vërtet është impresive. Ju falënderoj të gjithëve”, ka thënë Ronaldo para publikut.

Siç edhe u paralajmërua, C. Ronaldo do të mbajë fanellën me numrin 9, të cilin e ka bartur legjenda Alfredo Di Stefano, ndërsa gjatë tre sezoneve të tij në Bernabeu e ka bartur edhe superylli brazilian Ronaldo.

Zhirkov: Dua ta fitoj Ligën e Kampionëve
Përforcimi i ri i Chelseat, rusi Yuri Zhirkov, është i ngazëllyer për transferimin e tij dhe thotë se ai dëshiron të fitojë Ligën e Kampionëve me klubin anglez.

“Në Chelsea gjithmonë kanë dashur ta fitojnë këtë trofe dhe për një numër arsyesh kjo nuk ka ndodhur”, ka thënë ish-anësori i CSKA Moskës për Daily Mail.

“Shpresoj se me arritjen time fati i keq të ndryshohet dhe Chelsea përfundimisht ta fitojë këtë trofe”, ka thënë Zhirkov.

Edhe trajneri i ri Chelseat, Carlo Ancelotti, është shprehur se synimi kryesor i tij për këtë sezon do të jetë Liga e Kampionëve.

Jo afër rikthimit në Everton
Sulmuesi brazilian i Manchester Cityt, Jo, është duke u rikthyer te Evertoni për edhe një sezon huazimi.

Daily Mail shkruan se Jo do ta kalojë edhe sezonin e dytë si i huazuar në Goodison Park, pasi ka bindur drejtuesit e këtij klubi për formën e tij në një seri të testeve.

Braziliani bëri një paraqitje mbresëlënëse në Everton në sezonin e kaluar dhe është tepricë në kërkesat e Manchester Cityt.

Nëse Carlos Tevez i bashkohet Roque Santa Cruz dhe Robinhos në sulm, duhet se Jo nuk do të ketë hapësirë në City edhe për sezonin ardhshëm. Madje trajneri Mark Hughes është në kërkim edhe të Samuel Eto’o nga Barcelona.

Capello lavdëron akademinë e të rinjve të Arsenalit
Përzgjedhësi i kombëtares angleze, Fabio Capello, ka thënë se topçinjtë janë shembull për t’u ndjekur sa i përket krijimit të futbollistëve të rinj.

“Jam shumë me fat, pasi kam pasur mundësinë të shikoj në akademinë e Arsenalit kur ekipi anglez është stërvitur dhe puna e tyre është jashtëzakonisht e mirë”, ka thënë Capello.

“Është një shembull i rëndësishëm për akademitë tjera angleze. Jam shumë i interesuar në akademitë e klubeve në Angli, por ata të gjithë duket se punojnë mirë. Jam shumë, shumë i lumtur për të ardhmen e Anglisë dhe mendoj se do të jetë edhe më e mirë”, ka shtuar italiani.

Zyrtare: Lyoni nënshkruan me Lisandro Lopez
Ekipi francez Olimpique Lyon ka konfirmuar se ka arritur të sigurojë shërbimet e sulmuesit të Portos, Lisandro Lopez.

Dy klubet kanë arritur marrëveshje të vlefshme 24 milionë euro, një shumë e cila mund të shkojë në 28 milionë në varësi të paraqitjeve të lojtarit.

Argjentinasi pritet të arrijë në Lyon në ditët e ardhshme për të kompletuar transferimin pasi të kalojë testet mjekësore.

Ky transferim iu jep fund spekulimeve për emra të ndryshëm të cilët do të zëvendësonin Karim Benzema, i cili u transferua në Real Madrid për 35 milionë euro.

Lisandro, i cili iu bashkua Portos nga Racing Club në vitin 2005 për një shumë prej 2.5 milionë euro, ka bërë 28 paraqitje në ligë në sezonin e fundit për ekipin portugez dhe ka shënuar 10 gola.

City interesohet edhe për Dani Guiza
Manchester City lidhet me transferimin e edhe një sulmuesi, kësaj here spanjollit të Fenerbahce, Daniel Guiza.

City është lidhur me një mori sulmuesish javëve të fundit dhe spanjolli Dani Guiza është i fundit në listë. Sipas Marca, klubi anglez sheh te Guiza një partner ideal të Carlos Tevez dhe Roque Santa Cruz, në rast se nuk arrin të transferojë Samuel Eto’o.

Pasi fitoi Euro 2008 me Spanjën, Guiza befasoi të gjithë duke iu bashkuar trajnerit Luis Aragones në Fenerbahce. Megjithatë spanjolli dëshiron të largohet nga Turqia, madje do të pranonte edhe ulje të pagës, që nuk besohet se mund të ndodhë në City.

Fenerbahce thuhet se mund të kërkojë rreth 15 milionë euro për Guiza, një shumë të cilët City sërish nuk do ta kishte problem.

Ancelotti: Premier e rëndësishme sa edhe Champions
Menaxheri i ri i Chelseat ka hedhur poshtë supozimet se klubi do të fokusohet në garën evropiane dhe do të lërë anash Ligën Premier.

Shumica besojnë se historia e suksesshme e italianit në Ligën e Kampionëve ishte arsye kryesore për arritjen e tij në Stamford Bridge, por Ancelotti ka qenë i shpejtë për të mohuar këto supozime.

“Për Chelsean është e rëndësishme të fitojmë Ligën e Kampionëve, por po ashtu është e rëndësishme ta fitojmë edhe Ligën Premier në të njëjtën kohë. Ne do të bëjmë maksimumin që mundemi për t’i fituar të gjitha garat”, ka thënë ish-trajneri i Milanit.

Galliani beson në sukses të Milanit
Pavarësisht se rosonerët ende nuk kanë nënshkruar me asnjë lojtar të ri këtë afat kalimtar, zëvendës-presidenti i Milanit, Adriano Galliani, beson se ekipi është mjaft i fuqishëm për ta vazhduar traditën e fitimit të trofeve dhe garave në vitet e ardhshme.

“Milani ka fituar 26 trofe në 23 sezonet e fundit, 13 në Itali dhe 13 jashtë saj. Këto fitore janë garanci për të ardhmen, falë këtyre trofeve Milani është bërë klubi më fitues në botë”, ka thënë Galliani.

“Asnjë klub tjetër italian nuk ka fituar tituj ndërkombëtar në mileniumin e ri. Ne jemi krenar për këtë. Tash jemi në një moment të rëndësishëm, kur duhet të bëjmë ndryshime. Jam i sigurt se ekipi do të vazhdojë t’ia dalë mirë”, ka shtuar italiani.

Messi kritikon Chelsean
Në një intervistë të fundit Lionel Messi e ka kritikuar lojën e Chelseat në gjysmëfinalen e Ligës së Kampionëve kundër Barcelonës.

Barcelona nuk pati shumë probleme në Ligën e Kampionëve derisa nuk arriti në gjysmëfinale ku për kundërshtarë pati Chelsean.

“Nëse ekipi vjen dhe përpiqet të luajë futboll kundër nesh, atëherë mirë. Por, Chelsea nuk dëshironte të luajë futboll. Ata thjesht refuzuan. Ata dëshironin të na ndalojnë me një lojë të ndytë. Loja ishte më shumë fizike se sa një lojë normale futbolli. Kjo nuk është stili i jonë”, ka thënë Messi.

“Ne dëshirojmë gjithë kohën ta kemi topin. Kur do të shihni ndonjë ekip që luan ashtu do të mendoni: ‘Si mundet një ekip me futbollistë të tillë të mos përpiqet të luajë me top? Si mund thjesht të qëndrojnë aty’?”.

“Vështirë mund të besohet se një ekip që ishte kampion i Ligës Premier dhe para një sezoni ishte finalist i Ligës së Kampionëve, mund të luajë ashtu”, ka përfunduar argjentinasi.

City heq dorë nga Terry, kthehet kah Lescott
Manchester City ka kthyer vëmendjen kah Joleon Jescott pasi ka dështuar në përpjekjen për të sjellë në radhët e veta mbrojtësin e Chelseat, John Terry.

Mark Hughes tashmë ka dërguar një ofertë joformale në drejtim të Evertonit për mbrojtësin Lescott, ndërsa tash do të ndajmë më shumë se 15 milionë funte, sa ishte oferta e parë.

City është i gatshëm ta rritë edhe pagën e lojtarit për trefish me qëllim që ta tërheqë atë drejt Manchesterit.

Menaxheri i Evertonit, David Moyes, ka paralajmëruar se do të mundohet me të gjitha forcat për t’i mbajtur futbollistët më të mirë, por nëse arrin ndonjë ofertë e përshtatshme, klubi nga Liverpooli mund të heqë dorë nga shërbimet e Lescott.

Valdano: Ronaldo mund të jetë sikur Diego Maradona
Drejtori i Real Madrid, Joge Valdano, thotë se përforcimi i ri i klubit mbretëror, Cristiano Ronaldo, i ka të gjitha kualitetet e duhura për t’u krahasuar me Diego Maradonan si futbollist më i mirë në historinë e këtij sporti.

Reali mbrëmë e prezantoi edhe zyrtarisht Ronaldon si futbollist të ri në një ceremoni spektakolare në Bernabeu, para po thuajse 80 mijë shikuesish.

“Më brengos presioni të cilin e bëjnë mediat të cilat nuk janë të lidhura me sportin. Ata të sportit janë shumë më profesionale dhe kanë respekt. Të tjerët më shqetësojnë”, ka thënë Valddano.

“Kurrë nuk kam thënë se Ronaldo ka nevojë për të dashur ose grua. Nuk mendoj se qëllimi i Real Madridit është që ai të ketë të dashur”.

Në pyetjen nëse Ronaldo do të mund të arrijë nivelin e Diego Maradonës dhe të jetë futbollisti më i mirë në historinë e futbollit, Valdanë është përgjigjur:

“Ronaldo ka vetëm 24 vite dhe ende ka një rrugë të gjatë para tij. Ai tashmë ka arritur disa gjëra të rëndësishme, tashmë e ka ngritur Topin e Artë, por ende nuk e ka arritur të gjithë potencialin që ka. Ai është ambicioz. Nuk ka qëllim që ai nuk do të mund ta realizojë. Ka kohë për gjithçka”.

Zyrtare: Milani angazhon Oguchi Onyewu
Ekipi i Milanit ka pohuar se ka arritur të angazhojë në radhë e veta mbrojtësin e Standard Liege, Oguchi Onyewu.

27-vjeçari pati një paraqitje impresive në Kupën e Konfederatave me kombëtaren e SHBA-ve, por kalimi i tij në Milan është pak befasues.

“Ekipi i Milanit dëshiron të informojë se ka arritur të angazhojë Oguchi Onyewu nga ekipi Standarg Liege. Futbollisti i cili angazhohet për kombëtaren e SHBA-ve, po ashtu ka edhe nënshtetësi belge dhe ka nënshkruar marrëveshje e cila do të skadon më 30 qershor 2012”, thuhet në deklaratën e rosonerëve.

Onyewu do të arrijë në Milan si lojtar i lirë, pasi marrëveshja e tij me ekipin Standard përfundoi në fund të sezonit të kaluar.

Bayerni kërkon 80 milionë euro për Ribery
Bayern Munich ka nxjerrë një çmim prej 80 milionë eurosh për mesfushorin francez Franck Ribery, raporton gazeta gjermane Bild.

Bayerni që vazhdimisht ka mohuar se Ribery është në shitje, raportohet se i ka dhënë ultimatum deri në 16 korrik Real Madridit, të vendosë nëse është i gatshëm të ofrojë këtë shumë ose jo.

Reali tashmë ka harxhuar para të majme duke transferuar yjet si Cristiano Ronaldo nga Manchester United, për një shumë rekorde prej 94 milionë eurosh, dhe Kaka nga Milani për 65 milionë euro.

Valdes nënshkruan kontratë të re
Portieri i Barcelonës, Victor Valdes, ka nënshkruar kontratë të re, e cila do ta mbajë atë në Camp Nou deri në vitin 2014.

Në bazë të kontratës së re, 27-vjeçarit do t’i përmirësohet paga vjetore, ndërsa çmimi për largimit e tij është rritur 150 milionë euro.

“Jam shumë i lumtur dhe i kënaqur. Për mua është një nder që t’i mbroj ngjyrat e Barcelonës çdo ditë. Kjo është një ëndërr e realizuar, veç tjerash, kjo lë të kuptoj se do të pensionohem te ky klub”, ka thënë Valdes për faqen zyrtare të Barcës.

Dzeko nënshkruan kontratë të re me Wolfsburgun
Sulmuesi boshnjak Edin Dzeko ka vendosur të qëndrojë te kampioni gjerman Wolfsburg së paku edhe një sezon duke nënshkruar kontratë të re.

23-vjeçari ishte në shënjestër të Milanit, mirëpo Rossonerët nuk arritën të sigurojnë shërbimet e tij gjatë këtij afati kalimtar.

“Wolfsburger Allgemeine Zeitung” njofton se me kontratën e re Dzekos i rritet paga, ndërsa njëkohësisht vlera e tij është zvogëluar dhe në fund të sezonit të ri ai do të mund të largohet për shumën prej 20 milionë eurosh.

Puyol i painteresuar për Cityn
Kapiteni i Barcelonës, Carles Puyol, ka përsëritur përkushtimin e tij ndaj Blaugranëve duke thënë se do ta injorojë çdo ofertë që vjen në drejtim të tij.

Manchester City është skuadër shumë e interesuar për shërbimet e mbrojtësit spanjoll, mirëpo Puyol ka deklaruar se ai do të nënshkruajë kontratë të re me katalunasit për të dëshmuar përkushtimin ndaj skuadrës.

“E vërteta është se unë jam shumë i qetë, Unë kam kontratë me Barcelonën edhe për një vit, ndërsa tani jemi duke biseduar për një kontratë të re”.

“Më ka pëlqyer çdo vit që kam kaluar këtu dhe dëshiroj të vazhdoj të qëndroj. Për mua nuk ka asnjë problem dhe nuk jam i interesuar për thashethemet që shkruhen nëpër gazeta”, ka thënë Puyol për “El Mundo Deportivo”.

De Rossi kryeson listën e transferimeve të Chelseat

Pas sigurimit të shërbimeve të Yuri Zhirkovit, Chelsea vazhdon të jetë aktive në merkato, ndërsa mësohet se mesfushori i Romës, Daniele De Rossi, është në krye të listës për transferimet e mundshme gjatë këtij afati kalimtar.

“Il Romanista” shkruan se trajneri i Bluve, Carlo Ancelotti, dëshiron një mesfushor të fuqishëm në skuadër, ndërsa De Rossi pëlqehet më shumë nga ai sesa ndonjë lojtar tjetër.

Mirëpo, për t’ia arritur qëllimit, pronari i Chelseat, Roman Abramovich, duhet të përgatisë një shumë të madhe parash, pasi që Giallorossët nuk do të heqin dorë lehtë nga ylli i tyre.

Çmimet e Ribery dhe Alonso shumë të larta për Realin
Drejtori gjeneral i Real Madridit, Jorge Valdano, ka bërë të ditur se çmimet e Franck Ribery dhe Xabi Alonso janë shumë të larta për Mbretërit.

Bayern Munichu ka caktuar shifrën prej 80 milionë eurosh për anësorin francez Ribery, ndërsa Liverpooli ka refuzuar dy oferta të Los Blancos për spanjollin Alonso.

“Xabi Alonso është prioriteti i ynë nëse buxheti ynë mund ta përballojë blerjen e tij, mirëpo duket se nuk është kështu. Ne jemi shumë larg shifrave që kërkon Liverpooli”, ka thënë Valdano për “El Partido de la Una”.

Drejtori madrilen ka folur edhe për çmimin që e kanë caktuar bavarezët për Ribery duke thënë: “Është një shifër e paarritshme. Është ngjashëm sikurse të thonë se nuk dëshirojnë ta shesin”.

Nesta: Lëndimet i takojnë të kaluarës
Pasi mungoi sezonin e kaluar si pasojë e lëndimeve, mbrojtësi i Milanit, Alessandro Nesta, thotë se problemet me lëndime tashmë i takojnë të kaluarës.

“I kam bërë sesionet e para të stërvitjeve dhe ndjehem mirë. Mendoj dhe shpresoj që jam rikuperuar nga problemet e sezonit të kaluar”.

“Kam arritur që të kem vazhdimësi në punën time. Kam punuar shumë, ndërsa testi i vërtetë vjen tani kur do të udhëtojmë në SHBA dhe do të zhvillojmë shumë ndeshje njëra pas tjetrës”.

“Megjithatë, dhimbja ime është zhdukur dhe kam vetëbesim për këtë”, është shprehur Nesta për “Milan Channel”.

Juventus transferon Felipe Melon
Juventusi ka nënshkruar me mesfushorin brazilian Felipe Melo nga Fiorentina për shumën prej 20 milionë eurosh, ndërsa në marrëveshje është përfshirë edhe pronësia e plotë e Violas për anësorin e Juves, Marco Marchionni.

“Sky Sport Italia” njofton se marrëveshja është kompletuar, ndërsa të mërkurën do të bëhet edhe njoftimi zyrtar

Melo ka nënshkruar kontratë pesëvjeçare me bardhezinjtë, ndërsa do të fitojë 2.6 milionë euro në vit, duke u bërë kështu braziliani i tretë që bartë fanellën e Zonjës së Vjetër së bashku me Amaurin dhe Diegon.

Wolfsburg nënshkruan me Zianin
Pasi ka kaluar me sukses ekzaminimet mjekësore, mesfushori algjerian Karim Ziani ka nënshkruar për kampionin e Gjermanisë, Wolfsburg.

Tashmë ish-lojtari i Marseille ka nënshkruar kontratë katërvjeçari me skuadrën nga Bundesliga, derisa skuadra franceze do të fitojë shtatë milionë euro nga ky transferim.

“Jam shumë i kënaqur për ardhjen e Karim Zianit. Ai do të përshtatet mirë në skuadrën tonë dhe do të na ndihmojë për të shënuar gola këtë sezon”, është shprehur trajneri i Wolfsburgut, Armin Veh, për Bundesliga.de.

Liverpool transferon Mavingan
Njoftohet se Liverpooli ka transferuar lojtarin e ri nga PSG, Chris Mavinga.

“Sky Sports” njofton se Redsat kanë arritur marrëveshje me 18-vjeçarin, ndërsa konfirmimi zyrtar dhe detajet në lidhje me këtë transferim do të publikohen në ditët në vijim.

Arsenali ka qenë skuadra e cila i konkurruar Liverpoolit për këtë transferim, mirëpo “Të Kuqtë” kanë reaguar shpejtë për të siguruar shërbimet e francezit.

Mësohet po ashtu se Liverpooli është pranë transferimit edhe të një lojtari tjetër të ri. Bëhet fjalë për danezin Nikolaj Kohlert, me të cilin ka mbetur të sqarohen kërkesat personale të lojtarit.

Stuttgart në bisedime për Huntelaar
Stuttgarti ka vendosur të konkurrojë me Milanin dhe Manchester Unitedin për të fituar shërbimet e sulmuesit të Real Madridit, Klaas-Jan Huntelaar.

“AS” shkruan se disa përfaqësues të ekipit gjerman janë takuar të martën me drejtorin gjeneral të Los Blancos, Jorge Valdano, për të biseduar në lidhje me disponueshmërinë e sulmuesit holandez.

Mësohet se skuadra nga Bundesliga është e gatshme të ofrojë 18 milionë euro për Huntelaar, si edhe 2 milionë euro shtesë varësisht nga paraqitjet e tij.

Chelsea do ta bëjë goditjen e fundit për Ribery
Spekulohet se Chelsea është duke përgatitur një ofertë të panegociueshme për anësorin e Bayern Munichut, Franck Ribery.

Bavarezët kërkojnë hiç më pak se 80 milionë euro për superyllin francez, ndërsa e mërkura është dita e fundit për cilëndo skuadër që dëshiron të bëjë ofertë.

“The Daily Mail” shkruan se Blutë do ta bëjnë ofertën e tyre të fundit, e cila llogaritet të jetë 46 milionë euro.

Nëse skuadra nga Liga Premier nuk arrin të sigurojë shërbimet e Ribery, atëherë do të kërkojë transferimin e mesfushorit të Real Madridit, Wesley Sneijder, i cili kushton afër 19 milionë euro.

Xhemajli do ta zëvendësojë Melon te Fiorentina
Vetëm disa orë pas njoftimit se Felipe Melo ka nënshkruar për Juventusin, Fiorentina planifikon të transferojë një lojtar i cili do ta zë vendin e tij.

“Sky” njofton se për këtë pozitë Viola dëshiron ta transferojë mesfushorin e Torinos, Blerim Xhemajli.

Mesfushori nga Tetova sapo ka nënshkruar kontratë me Torinon, ku qëndroi sezonin e kaluar në formë huazimi nga Bolton Wanderers, mirëpo mundësia për të luajtur në Serie A dhe në Ligën e Kampionëve, padyshim që do ta joshë shqiptarin me pasaportë zvicerane.

Ronaldo: Nuk do të jem egoist!
Transferi më i shtrenjtë i të gjitha kohërave, Cristiano Ronaldo, përkundër se ka vetëbesim se vlen 94 milionë euro, premton se ai nuk do të jetë vetjak derisa do ta bartë fanellën e Real Madridit.

“Nuk ka dyshim se tash jam më pak egoist. Kuptohet, në të kaluarën mendoja se vetëm duke shënuar gola mund të siguroja transferimin në një skuadër më të madhe”.

“Mirëpo, përvoja më ka ndihmuar të kuptoj se kur je në një skuadër, bëhesh pjesë e saj, dhe qëllimi është që të arrihen objektiva më të mëdha. Në Madrid do të shihni një Cristiano më të mirë”.

“Do të punoj shumë që të përshtatem sa më shpejt që është e mundur dhe nuk mendoj se do ta kem vështirë të bashkekzistoj me gjithë këta yje”, është shprehur portugezi për “AS”.

Messit nuk i bëjnë përshtypje mega-transferët e Realit
Lionel Messi i ka qetësuar ndjenjat e lojtarëve dhe tifozëve të Barcelonës duke thënë se nuk shqetësohet nga super-dyshja e Real Madridit, Kaka dhe Cristiano Ronaldo.

“Unë jam lojtar i Barcelonë dhe më intereson vetëm skuadra ime. Ne ofruam spektakël sezonin e kaluar dhe shpresoj që edhe këtë sezon do ta bëjmë të njëjtën gjë, ose së paku do ta përsëritim një pjesë të asaj që arritëm sezonin e kaluar”.

“E them pa asnjë dyshim se Barcelona është skuadra më e mirë në botë. Ne kemi lojtarë të shkëlqyer dhe për këtë arsye nuk i frikësohemi askujt”.

“Cristiano dhe Kaka janë lojtarë fantastikë, të cilët do ta përforcojnë shumë Madridin. ‘El Clasico’ do të jetë i jashtëzakonshëm kur të vijë koha të luhet- por Barcelona do të fitojë sërish”, ka thënë argjentinasi për “Sport”.

Del Piero shpreson që Juve të luajë më mirë
Kapiteni i Juventusit, Alessandro Del Piero, të martën mbrëma ishte në Napoli për një eveniment bamirës, ndërsa ka folur në lidhje me objektivat e Zonjës së Vjetër për sezonin e ri.

“Gjithmonë vi në Napoli me kënaqësi. Kam simpati të madhe për qytetin dhe napolitanët, ndërsa sezonin e ardhshëm do ta kem trajner një napolitan”.

“Shpresoj që Juve ta fillojë me këmbë të mbarë dhe ta përfundojë sezonin në nivelin më të lartë të mundshëm”.

“Ende nuk mund të jap mendimin tim për Ferraran si trajner, mirëpo ju garantoj se ai është një njeri i madh. Shpresoj që në sezonin që vjen të jemi të fortë dhe të arrijmë të luajmë mirë dhe t’i argëtojmë tifozët”

“Qëllimi ynë është që të jemi më të mirë se sezonin e kaluar”, është shprehur ikona e Juves.

Van Persie i përkushtohet Arsenalit
Të mërkurën është zyrtarizuar vazhdimi i kontratës së sulmuesit të Arsenalit, Robin van Persie, edhe për katër vite të tjera.

“Është lajm i jashtëzakonshëm që Robin van Persie i është përkushtuar për një kohë të gjatë Arsenalit. Të gjithë jemi të gëzuar”.

“Robin është një lojtar që ka talent të madh dhe aftësi për të shënuar gola dhe për t’i fituar ndeshjet. E kemi parë shumë herë se çfarë është në gjendje të bëjë ai në fushë”.

“Ai është vetëm 25-vjeçar dhe do të vijnë shumë gjëra të mira nga ai në të ardhmen. Robin ka potencial që të bëhet njëri nga lojtarët më të mirë të Arsenalit”, ka thënë trajneri i Topçinjve, Arsene Wenger, për faqen zyrtare të Arsenalit.

Reali ofron 30 milionë euro për De Rossin
Real Madridi nuk planifikon të ndalet gjatë këtij afati kalimtar. Informatat e fundit janë se Mbretërit kanë ofruar 30 milionë euro për të siguruar shërbimet e mesfushorit të Romës, Daniele De Rossi.

“Marca” shkruan se Los Blancos kanë kontaktuar me Giallorossët për të realizuar planin rezervë të presidentit Florentino Perez, nëse dështon transferimi i Xabi Alonsos nga Liverpooli.

Redsat kërkojnë 47 milionë euro për mesfushorin spanjoll, ndërsa nëse kjo shifër nuk zvogëlohet, atëherë Merengues mendojnë se De Rossi është lojtari që mund të përshtatet me superyjet e sapotransferuar: Kaka, Ronaldo dhe Benzema.

Benzemas do t’i takojë numri 19
Të enjten mbrëma Real Madridi do ta prezantojë superyllin e tretë të transferuar gjatë këtij afati kalimtar, Karim Benzema.

“AS” njofton se sulmuesi francez, i cili u kushtoi Mbretërve 35 milionë euro, do ta bartë fanellën me numrin 19, të cilin aktualisht e bart Klaas-Jan Huntelaar.

Holandezi sipas të gjitha gjasave do të largohet nga Santiago Bernabeu, ndërsa Stuttgarti është ‘blerësi’ potencial i tij (që ka ofruar 18 milionë euro plus dy milionë të tjera varësisht nga paraqitja e lojtarit).

Benzema ka bartur numrin 10 te Lyoni, mirëpo edhe pse bartësi aktual i këtij numri, Wesley Sneijder, është njëri nga lojtarët që po ashtu do të largohet nga Los Blancos, duket se Florentino Perez e ruan numrin prestigjioz për një superyll tjetër.

Kështu, sulmuesi francez duhet të jetë i lumtur me numrin 19.

Milan kthehet kah Andre Santos
Mediat italiane paralajmërojnë se Milani ka kthyer vëmendjen kah angazhimi i mbrojtësit të majtë të Corinthians, Andre Santos.

Pas kompletimit të transferimit të Oguchy Onyewu, Milani lidhet me angazhim edhe të një mbrojtësi. Rosonerët një kohë të gjatë janë në kërkim të një mbrojtësi të majtë dhe pas përpjekjeve të dështuara për Ali Cissokho, klubi është kthyer kah Andre Santos.

Braziliani tërhoqi vëmendjen e shumë klubeve me paraqitjet e tij në Kupën e Konfederatave, dhe spekulohet se Corrinthians kërkon rreth 20 milionë euro për të hequr dorë nga shërbimet e Sansos.

Për të interesim kanë shprehur edhe Roma, Juventus dhe Lyon.

Barcelona do ta shesë Touren në United
Kampioni i Ligës Premier, Manchester United, është inkurajuar në tentimin për të marrë shërbimet e mesfushorit të Barcelonës, Yaya Toure.

Mirror shkruan se Barcelona dëshiron ta shesë Touren te United për një shumë prej 20 milionë, por vetëm nëse arrin të marrë shërbimet e mesfushorit të Liverpoolit, Javier Mascherano.

Menaxheri i United, Sir Alex Ferguson, është në kërkim të një mesfushori defansiv, derisa ka dyshime rreth rikthimit në formë të Owen Hargreaves, pas ndërhyrjeve kirurgjike në gju.

Fergie e ka identifikuar Toure, të cilin pati rast ta takonte në finalen e Ligës së Kampionëve, si njeriun e duhur i cili do të plotësojë zbrazëtirën e lënë nga Hargreaves.

Villarreal refuzon ofertën e Cityt për Rossin

Manchester City ka dështuar edhe në një tentativë tjetër, në atë për transferimin e sulmuesit të Villarrealit, Giuseppe Rossi, bëjnë të ditur mediat spanjolle.

Por agjenti i Rossit, Federico Pastorello, ka mohuar se oferta është analizuar nga klubi spanjoll dhe ka dhënë shenja se sulmuesi do të mbetet në El Madrigal edhe në sezonin e ardhshëm.

“Askush nuk e ka ofruar shumën e duhur dhe jam 99 për qind i sigurt se lojtari do të mbetet në Villarreal edhe në sezonin e ardhshëm. Rossi është i lumtur këtu dhe do të analizojë largim vetëm për njërin nga gjashtë klubet më të mëdha në Evropë”, ka shtuar agjenti i lojtari.

Laporta: Nuk do të nënshkruaja me asnjë lojtar

Barcelona do të nënshkruajë me lojtarë të rinj gjatë kësaj vere, por po të shkonte gjithçka sipas dëshirës së presidentit Joan Laporta, ai nuk do ta ndryshonte këtë përbërje aktuale të Pep Guardiolas.

Laporta ka qenë aq shumë i impresionuar me lojtarët të cilët i ndihmuan klubit të fitojë Ligën e Kampionëve, kampionatin spanjoll dhe Kupën e Mbretit gjatë sezonit të kaluar, dhe mendon se përbërja duhet të jetë e njëjta.

“Nëse do të më takonte mua të vendos atëherë nuk do të nënshkruanim me askënd. Unë jam super i qetë rreth gjithë kësaj dhe megjithëse ende nuk kemi nënshkruar me askënd, mendoj se do të ketë arritje të reja edhe këtë verë”, ka shtuar spanjolli.

Zyrtare: United nënshkruan me Gabriel Obertan
Kampioni i Ligës Premier, Manchester United, ka pohuar se ka angazhuar futbollistin e Bordeaux, Gabriel Obertan.

Futbollisti i Bordeaux, Gabriel Obertan, është përforcimi i tretë për Sir Alex Ferguson këtë verë, pasi talenti francez ka nënshkruar marrëveshje katërvjeçare me ekipin nga Old Trafford.

Anësori 20-vjeçar do t’i kushtojë Manchesterit 3 milionë funte, ndërsa ka nënshkruar marrëveshje katërvjeçare e cila do ta mbajë atë në Old Trafford deri më 30 qershor 2013.

“Gabriel është një lojtar të cilin e kemi ndjekur disa vite, por për shkak të programit të tij të edukimit përpjekjet tona për ta sjellë këtu gjithmonë janë shtyrë. Jemi të ngazëllyer që e kemi atë këtu, pasi ai është një perspektivë e jona. Ne dëshirojmë të sjellim lojtarë të rinj dhe t’i zhvillojmë ata, dhe do ta shohim atë në Gabriel gjatë dy viteve të ardhshme”, ka thënë Sir Alex Ferguson në një deklaratë në faqen zyrtare të klubit.

Shevchenko në negociata me Fenerbahcen
Dështimi më i madh i ekipit të Chelseat, Andriy Shevchenko, raportohet se mund të jetë në rrugë për të luajtur në kampionatin turk.

Mediat turke bëjnë të ditur se Fenerbahce vazhdon të kërkojë yje nga top-klubet evropiane për të forcuar ekipin dhe se së fundi ka kthyer vëmendjen kah ukrainasi.

Shevchenko është në kërkim të një klubi të ri ku do të mund të përfshihet në formacionin startues, pas sezonit të dështuar te Chelsea dhe një sezoni tjetër i huazuar te Milani, që po ashtu ishte dështim për të.

Ukrainasi raportohet se mund të largohet për çfarëdo oferte që kalon shumën e 7 milionë eurove, edhe pse në Chelsea ai u transferua për plot 30 milionë euro, por në rast kalimi në Fenerbahce ai do të duhet të pranojë edhe një ulje të dukshme të pagës.

Huntelaar më pranë Unitedit
Manchester Unitedi udhëheq garën për ta transferuar sulmuesin e Real Madridit, Klaas-Jan Huntelaar.

“The Sun” shkruan se Djajtë e Kuq e kanë mundësinë më të madhe për ta transferuar holandezin, sidomos pas faktit që Milani është përqendruar vetëm në transferimin e Luis Fabianos nga Sevilla.

Huntelaar nuk bën pjesë në projektin e menaxhmentit të ri të Los Blancos, kështu që bashkë me holandezët tjerë do të largohet nga Bernabeu.

Van Persie: City dhe Villa kërcënim për Arsenalin
Pas nënshkrimit të kontratës së re, sulmuesi i Arsenalit, Robin van Persie, thotë se Manchester City dhe Aston Villa janë kërcënim jo vërtet për top katërsh por edhe për tituj.

“Një prej arsyeve kryesore pse nënshkrova ishte të arrijmë te një trofe i madh. Nuk dua ta bëj atë me ndonjë ekip tjetër. Dua ta ngre atë me Arsenalin. Ky është caku im kryesor dhe do të më bënte shumë krenar”, ka thënë Van Persie.

“E di se do të jetë vështirë, pasi kemi shumë konkurrencë, me ekipe si Manchester City dhe Aston Villa që bëhen gjithnjë më të fuqishme. Por shoh ende shumë shanse për Arsenalin dhe është një ëndërr për mua të ngre trofe me këtë ekip”, ka shtuar holandezi.

Chelsea në garë për Alves
Chelsea planifikon t’i shesë Decon dhe Ricardo Carvalhon tek Interi për ta blerë Bruno Alvesin nga Porto.

“The Daily Express” shkruan se Blutë planifikojnë të nxjerrin 17 milionë euro nga shitja e dy portugezëve, ndërsa për ta blerë Alvesin duhet të shpenzojnë afër 20 milionë euro.

Mbrojtësi i Portos kërkohet edhe nga Barcelona dhe Real Madridi, ndërsa ai është shprehur i hapur që të luajë edhe në ligën Premier.

“Jam i hapur për t’u transferuar në Angli. Kam folur me babanë dhe agjentin tim dhe ata i dinë ambiciet e mia”, ka thënë së fundmi Alves.

Barca do ta blejë Fabregasin me paratë nga Eto’o?
Barcelona planifikon ta shesë Samuel Eto’o-n te Manchester City për të grumbulluar paratë e nevojshme për blerjen e mesfushorit të Arsenalit, Cesc Fabregas.

“The Daily Star” shkruan se Blaugranët pretendojnë të nxjerrin afër 29 milionë euro nga shitja e kamerunasit, edhe pse ende nuk janë të sigurt nëse Eto’o do të largohet nga Camp Nou.

Nga ana tjetër trajneri i katalunasve, Pep Guardiola është në kërkim të një mesfushori, dhe Fabregas plotëson kërkesat e tij.

Megjithatë, për të fituar shërbimet e mesfushorit spanjoll, Barca duhet të përballet me konkurrencën e rivalit të përjetshëm, Real Madrid, që po ashtu interesohet për shërbimet e Fabregas.

Bayerni do t’ia vazhdojë kontratën Riberyt
Bayern Munichu dëshiron t’ia ripërtërijë kontratën anësorit Franck Ribery, pasi që Real Madridi ka deklaruar se do të heqë dorë nga interesimi për francezin.

Drejtori gjeneral i Los Blancos, Jorge Valdano, ka deklaruar se Reali do të heqë dorë nga dëshira për ta transferuar superyllin francez, pasi që çmimi prej 80 milionë eurosh është shumë i lartë.

Kontrata e Ribery skadon pas dy vitesh, kështu që bavarezët planifikojnë t’ia zgjatin kontratën lojtarit të tyre, me qëllim që të mos kenë presion në sezonin e ardhshëm nga Reali.

“Jo vetëm se dëshirojmë ta mbajmë Riberyn, por dëshirojmë t’ia zgjatim edhe kontratën”, ka thënë për “Sport Bild” kryesuesi i bordit ekzekutiv të Bayernit, Karl-Heinz Rummenigge.

Laporta: Eto’o nuk më lajmërohet në telefon
Presidenti i Barcelonës, Juan Laporta, thotë se nuk mund të kontaktojë me sulmuesin kamerunas, Samuel Eto’o, me të cilin dëshiron të bisedojë për të ardhmen e lojtarit.

“E kam thirrur disa herë Samuelin, por ai nuk lajmërohet. Nuk e di nëse e ka ndërruar numrin”.

“Unë kam pasur raporte të mira me të dhe më vjen keq për këtë që po ndodh”.

“Më duket sikur ai nuk dëshiron të flasë me mua. Ndoshta është hidhëruar me Barcelonën? Nuk e di, për këtë duhet të flasim me të”.

“Ai ka edhe një vit në kontratën e tij dhe ne dëshirojmë të dimë se çfarë planifikon ai dhe agjenti i tij”, ka thënë Laporta.

Ferrara: Do të jemi më sfidues
Sezoni i ri i Juventusit fillon nga e enjtja me trajnerin Ciro Ferrara në krye, i cili është i bindur se udhëheqësit bardhezi po punojnë për të plotësuar të gjitha zbrazëtirat e skuadrës, e cila do të jetë sfiduese në të gjitha garat në sezonin e ri.

“Klubi ka bërë përpjekje të mëdha për ta përmirësuar skuadrën dhe për ta shmangur diferencën me Interin dhe top-skuadrat tjera evropiane”.

“Të jesh trajner i Juventusit do të thotë përgjegjësi e madhe, mirëpo kjo nuk vërehet aspak, sepse është kënaqësi të punosh me lojtarë të nivelit të lartë të cilët janë sfidues për objektiva të mëdha”, ka thënë Ferrara.

Gjatë këtij afati kalimtar, Zonja e Vjetër ka siguruar shërbimet e Diegos dhe Fabio Cannavaros, ndërsa është afër kompletimit të marrëveshjes me Felipe Melon dhe Fabio Grosson.