Lajmet më të reja nga ekonomia dhe biznesi

Drejtori Ekzekutiv i FMN viziton Kosovën

Drejtori Ekzekutiv i Fondit Monetar Ndërkombëtar (FMN), Age Bakker, zhvillon sot vizitë zyrtare në Kosovë, disa ditë pas anëtarësimit të vendit tonë në këtë institucion monetar ndërkombëtar dhe në ditën kur ligjvënësit kosovarë procedojnë legjislacionin për këtë anëtarësim.

Për anëtarësimin e Kosovës në FMN siç dihet kanë votuar 96 shtete, 38 tjera kanë abstenuar, ndërsa vetëm 10 shtete kanë votuar kundër. /rtk/

Bakket: FMN ju mundëson zhvillim ekonomik

Anëtarësimi i Kosovës në FMN, është e një rëndësie të veçantë për hapat e mëtutjeshëm në zhvillimin ekonomik të Kosovës si dhe në anëtarësimin e saj në organizma tjerë financiar”, tha drejtori ekzekutiv i FMN, Bakker.

Drejtori Ekzekutiv i Fondit Monetar Ndërkombëtar, Age Bakker, tha se anëtarësimi në FMN i hap rruge zhvillimit te vendit, pas një takimi me kryeministrin Hashim Thaçi dhe ministrin e Ekonomisë dhe Financave Ahmet Shala.

Ai tha se Kosova tashmë duhet të angazhohet më shumë dhe të bëjë përpjekje që ekonomia e saj të forcohet në mënyrë që të ngrihet në këmbët e saja edhe financiarisht.

“Anëtarësimi i Kosovës në këtë mekanizëm është një mesazh i mirë edhe për investitorët e huaj, pasi tregon se në Kosovë ka stabilitet ekonomik e financiar”, tha ministri i Ekonomise dhe Financave Ahmet Shala.

Gjate qershorit një delegacion kosovar do të udhëtojë për në Uashington për të nënshkruar pranimin e Kosovës në këto dy organizma. /Telegrafi/

Rritje e papunësisë që nuk mbahet mend

Shkalla globale e papunësisë sivjet mund të ngjitet deri në 7,4 për qind, që do të thotë se pa punë në botë do të mbeten 239 milionë persona.

Këtë e treguan vlerësimet e reja të Organizatës Ndërkombëtare të Punës (ILO), sipas të cilave shkalla botërore e papunësisë do të mund të ngjitej midis 6,5 dhe 7,4 për qind, që përputhet me 210 deri 239 milionë persona të papunë në mbarë botën.

Numri i të papunëve në vitin 2009 në botë do të rritet për 39 deri 59 milionë, përballë parashikimet paraprake të ILO-së për rritje prej 24 deri 52 milionë persona.

Kjo është rritje e pa mbajtur mend deri tani e papunësisë, deklaroi drejtori i ILO-së, Huan Somavia në Gjenevë, duke shtuar se një numër gjithnjë e më i madh i njerëzve janë në rrezik t`i humbasin vendet e punës dhe të hasin në varfëri.

Ai paralajmëroi edhe në mundësinë e trazirave politike, nëse papunësia vazhdon të shënojë rritje dhe theksoi se tregur të punës i nevojiten katër deri pesë vite prej fillimit të krizës, që shkallët e papunësisë të kthehen në nivelin e njëjtë si para krizës.

Sipas ILO-së, papunësia më së shumti do t`i godasë personat e ri, ndërsa parashikon që deri në vitin 2015 doemos duhet të hapen 300 mijë vende të reja të punës, me qëllim që të absorbohet rritja e popullatës së aftë për punë.

Raporti i ILO-së është publikuar para Konferencës ndërkombëtare të Punës që javën e ardhshme mbahet në Gjenevë, e në të cilën pritet të marrin pjesë dhjetëra presidentë të shteteve.

Kuvendi miratoi Projektligjin për anëtarësimin e Kosovës në FMN dhe BB

Kuvendi i Kosovës miratoi me procedurë të veçantë në shqyrtim të parë Projektligjin për anëtarësimin e Kosovës në Fondin Monetar Ndërkombëtar dhe në Organizatat e Grupit të Bankës Botërore.

Ahmet Shala, ministër i Financave tha se projektligji në fjalë do t’i mundësojë Kosovës stabilitet fiskal dhe qëndrueshmëri ekonomike. Kuvendi pasdite pas shqyrtimit të dytë pritet ta miratojë në tërësi këtë projektligj.

Me procedurë të përshpejtuar deputetët e Kuvendit të Kosovës, miratuan në parim projektligjit për anëtarësimin e Kosovës në Fondin Monetar Ndërkombëtar dhe në Organizatat e Grupit të Bankës Botërore.

Në seancën në të cilën mori pjesë edhe shefi ekzekutiv i FMN-së, deputetët me 79 vota për e kaluan në shqyrtim të dytë projektligjin në fjalë.

Ahmet Shala, ministër i Financave tha se projektligji në fjalë do t’i mundësojë Kosovës stabilitet fiskal dhe qëndrueshmëri ekonomike.

Sipas Shalës me qëllim që Kosova të arrijë në qershor të jetë edhe pjesë e Bankës Botërore, ligji duhet të miratohet me procedurë të përshpejtuar.

Të gjitha grupet parlamentare u shprehën në favor të miratimit të këtij projektligji ndërkaq komisionet e ngarkuara për këtë ligj janë mbledhur për të diskutuar që pasdite në seancë tjetër të miratohet ligji në tërësi.

FMN-ja i ka bërë ftesë zyrtare Kosovës për anëtarësim, ku 138 vende e kanë përkrahur Kosovën për të qenë anëtare e FMN-së. Qeveria ka kërkuar nga këto shtete që ta mbështesin Kosovën edhe për anëtarësim në BB. /rtk/

Fiat tërhiqet nga bisedimet për shitjen e GM europian

Drejtuesit e kompanisë Fiat i kanë quajtur të paarsyeshme kërkesat shtesë të vendosura për shitjen e filialit europian të General Motors.

Ata vendosën të mos marrin pjesë në një takim, ku do të paraqiten ofertat për blerjen e saj. Prodhuesi italian i automjeteve tha se dëshironte ta blinte filialin europian, por kërkesa e qeverisë gjermane për fonde shtesë ishte e paarsyeshme.

Tani kanë lindur dyshime nëse bisedimet do të vazhdojnë ose jo. Shitja e filialit europian të GM, që përfshin edhe Vauxhall dhe Opel është pjesë e rëndësishme për planet e kompanisë amerikane për ristrukturimin e biznesit të saj.

Ndërkaq, zyrtarët gjermanë po bejnë përpjekje për të nxjerrë nga telashet filialin europian të kësaj kompanie. Ata kërkojnë një kompromis për një plan shpëtimi. Gati gjysma e 50 mijë punonjësve europianë të GM janë të punësuar në Gjermani. /Telegrafi/tch/

Shtatë Kompanive Regjionale të Ujërave u vazhdohen lejet ujore

Përmes këtyre Lejeve Ujore kompanitë përveç fitimit të së drejtës mbi shfrytëzimin e burimeve ujore për furnizim publik obligohen që gjerë në fund të vitit 2011, të hartojnë elaboratet e zonave mbrojtëse të burimeve të furnizimit me ujë.

Skënder Bublaku, drejtor i Ujësjellësit Rajonal Batllava, tha se vazhdimi i lejeve ujore , neve si kompani , na obligon që shfrytëzimin e ujit ta bëjmë në mënyrë racionale dhe qytetarëve tu ofrojmë furnizim cilësor të ujit.

Ndersa ministri i Mjedisit dhe Planifikimit Hapësinor, Mahir Yağcılar, ua ndau sot vazhdimet e lejeve ujore shtatë kompanive regjionale të ujërave.

Në fjalën e tij ministri Yağcılar i njoftoi drejtorët e kompanive regjionale të ujërave se vazhdimi i Lejeve Ujore, bëhet në bazë të Udhëzimit Administrativ mbi përmbajtjen, formën, kushtet dhe mënyrën e lëshuarjes dhe ruajtjes se Lejes Ujore të cilat Kompani më parë kanë qenë të pajisura me Leje ujore të lëshuara nga MMPH në Janar të vitit 2007 mbi shfrytëzimin e rreth 160 milion m3 ujë në vit. /telegrafi/

Përcaktohet përbërja e Këshillit Ekonomik Social

Ky komision është organ i nivelit nacional i cili do të merret me udhëheqjen e konsultimeve nga lëmi i marrëdhënies së punës, mirëqenies sociale dhe çështjeve tjera për politikat ekonomike në Republikën e Kosovës.

Ministria e Punës dhe Mirëqenies Sociale, duke u bazuar në Rregulloren mbi Degën e Ekzekutivit të Institucioneve të Kosovës dhe në përputhje me këtë rregullore, duke marrë në konsideratë rekomandimin e Komisionit për verifikimin e dokumentacionit të punëmarrësve (sindikatave) dhe të organizatave të punëdhënësve ka nxjerr vendimin me të cilin përcaktohet përbërja e Këshillit Ekonomik Social (KES) të Republikës së Kosovës.

Në këtë këshill institucionet e Republikës së Kosovës do të përfaqësohen nga ministrat e Ministrisë së Punës dhe Mirëqenies Sociale; Ministri i Ministrisë së Ekonomisë dhe Financave; Ministri i Tregtisë dhe Industrisë; ai i Arsimit Shkencës dhe Teknologjisë dhe nga Ministri i Shëndetësisë.

Organizatat e punëmarrësve do t’i përfaqësojnë tre anëtarë të Bashkimit të Sindikatave të Pavarura të Kosovës dhe dy anëtarë të Konfederatës së Sindikatave të Lira të Kosovës.

Kurse në këtë organ interesin e organizatave të punëdhënësve do t’i përfaqësojnë tre përfaqësues nga Oda Ekonomike e Kosovës dhe dy përfaqësues nga Aleanca Kosovare e Biznesit.

Mandati i kryesuesit të KES-it dhe anëtarëve tjerë të këtij organi do të rregullohet sipas dispozitave ekzistuese ligjore të Qeverisë së Republikës së Kosovës. /telegrafi/

Shpërndahet 20 % edhe për 7 ndërmarrje tjera

Në këtë takim të Bordit të Drejtorëve janë aprovuar listat finale të punëtorëve të pranueshëm për 20% në lidhje me ndërmarrjet shoqërore “Utva”, Pejë, “28 Nëntori”, Gjilan, “Çy çavica” Vushtrri, “Kosovatrans”, Kamenicë, “Mustafë Goga”, Ferizaj, “Agromorava”, Viti dhe “Stacioni Bujqësor”, Gjakovë.

Këto Lista do të publikohen në përputhje me dispozitat ligjore në fuqi, dhe të gjitha ankesat eventuale pas publikimit të tyre mund ti drejtohen Odës së Veçantë të Gjykatës Supreme të Kosovës.

Kryetari i Bordit të Drejtorëve, Dino Asanaj, theksoi se AKP mbetet e përkushtuar ndaj zotimeve për përshpejtimin e shpërndarjes së mjeteve të 20%-it tek punëtorët e Ndërmarrjeve Shoqërore.”

Një vendim tjetër i rëndësishëm i Bordit të Drejtorëve ishte edhe aprovimi i valës së 37-të të privatizimit, si dhe aprovimi i rezultateve të valës së 34-të të privatizimit.

" Gjithashtu, me propozimin e menaxhmentit të Agjencisë, Bordi i Drejtorëve vendosi që Ndërmarrja Shoqërore “18 Nëntori”, Hoqë e Madhe dhe Ndërmarrja Shoqërore “Thertorja Eksportuese”, Prizren të tërhiqen nga mbikëqyrja e njësisë së Administrimit të Drejtpërdrejtë të AKP", thuhet ne komunikate.

Mbledhja e ardhshme e Bordit të Drejtorëve do të mbahet në fund të muajit qershor.

Çmimi i naftës, Obama: Do diskutoj me mbretin e Arabisë

Presidenti Obama tha dje se do të diskutojë për çmimet e naftës në takimin që do të ketë javën e ardhëshme me mbretin e Arabisë Saudite, Abdullah.

Zoti Obama tha se nuk është në interes të Arabisë Saudite krijimi i një situate në të cilën ekonomia amerikane të varet së tepërmi ose të goditet vazhdimisht nga rritje të mëdha dhe të menjëhershme të çmimeve të energjisë.

Presidenti Obama tha se Shtetet e Bashkuara dhe Arabia Saudite duhet të marrin masa për të pakësuar varësinë nga nafta me qëllim që të rigjallërojnë ekonomitë e tyre dhe të ulin kërcënimet ndaj mjedisit.

Zoti Obama i bëri komentet për gazetarët pas bisedimeve në Shtëpinë e Bardhë me Presidentin palestinez Mahmud Abas. Ai do të shkojë në Riad më 3 qershor. /VOA/

Berisha e Thaçi nesër përurojnë hapjen e njërit tunel të Kalimashit

Kryeministri i Shqipërisë, Sali Berisha dhe ai i Republikës së Kosovës Hashim Thaçi nesër do të përurojnë hapjen e njërit tunel të Kalimashiti cili përfundimisht bashkon kombin shqiptar.

Ndërkohë galeria e dytë e tunelit po me këto përmasa pritet të përfundojë në shtator të këtij viti.

Puna për hapjen e tunelit ka filluar pikërisht e 25 maj të vitit 2007 nga kompania amerikane “Bektel” dhe kompania nënkontraktuese turke “Enka”.

Kompania “Bektel’Enka” ka rritur ritmet e punimeve edhe në sektorë të tjerë, si përfundimi i 27 urave me një gjatësi prej më shume se 5 kilometra në gjithë segmentin e rrugës prej 60.4 kilometrash, Rrëshen-Kalimash.

Rruga Durrës-Kukës- Morinë, një projekt ky i Qeverise shqiptare është vepra më e madhe inxhinierike në Shqipëri.

Një vit me parë, gjatë inspektimit të punimeve në këtë tunel, kryeministri Berisha kishte deklaruar se, “mendimi i parë që të vjen në mendje është se malet nuk ndajnë më kombin, nuk i ndajnë më shqiptaret. Udhëtimi tek tuneli të rikujton legjendat e shkrirjes së maleve, pasi këto janë punime të përmasave gjigande, të cilat kanë bërë që aorta e shqiptarëve të mbartë një famë në mbarë Evropën, si kryevepër e njeriut”.

Me përurimin e njërit tunel, pritet që së shpejti brenda qershorit të bëhet edhe përurimi i rrugës që ka një gjatësi 170 kilometra nga Durrësi deri në Morinë. Rruga do të mundësojë një lidhje të shpejtë mes Prishtinës dhe brigjeve shqiptare për me pak se 3-orë. /Telegrafi/

Magna përzgjidhet për të shpëtuar Opel-in

Prodhuesi kanadezo-austriak i pjesëve të makinave, “Magna International” është përzgjedhur nga Gjermania për të shpëtuar Opel-in, pjesë e filialit europian të “General Motors”.

Marrëveshja u arrit orët e para të mëngjesit pas bisedimeve të gjata në Berlin dhe u njoftua nga ministri gjerman i Financave, Peer Steinbrueck. Qeveria gjermane ka vendosur që Magna, se bashku me bankën ruse Sberbank, të ketë shumicën e aksioneve të Opel-it.

Qeveria pritet të sigurojë kredinë e menjëhershme prej 1,5 miliardë eurosh për të mbijetuar. Plani parashikon që Opeli të shkëputet në terësi nga General Motors dhe të mos futet në procesin e falimentimit të tij të mundshëm. Megjithatë, 2500 vende pune rrezikojnë të mbyllen në Gjermani.

Në bisedime morën pjesë politikanë gjermanë, mes të cilëve kancelarja Merkel, zyrtarë të qeverisë amerikane dhe përfaqësuesit nga GM dhe Magna. /Telegrafi/tch/

GM para shpalljes së falimentimit

Autogjiganti i dikurshëm amerikan General Motors planifikon të hënën të kërkojë mbrojtje gjyqësore nga kreditorët dhe në këtë mënyrë ta shmangë likuidimin, sqaroi Agjencia Bloomberg, duke theksuar se ky do të jetë falimentimi më i madh në historinë e SHBA-së në sektorin jofinanciar.

General Motors do ta shesë pjesën më të madhe të pasurisë së tij në pajtim me porcedurën e falimentimit, thuhet sipas një burmi të afërt të pordhuesit më të madh të automjeteve në botë.

Ndërkohë, Shtëpia e Bardhë paralajmëroi se presidenti i SHBA-së Barack Obama gjithashtu të hënën do të flasë për reformat në General Motors, kur skadon afati i fundit, që sipas vendimit qeveritar, duhet patjetër të përgatisë program për reformat apo të ballafaqohet me falimentim.

Të enjten kompania aksinarëve i ofroi aksione me vlerë prej 27 miliardë dollarësh, me të cilën do t'i mundësojë që të marrin 25 për qind nga pjesa e ardhshme e kompanisë së reformuar General Motors.

Paraprakisht aksionarët me shumicë të votave e hodhën poshtë tentimin e General Motors ta zvoglojë borxhin në atë mënyrë që kreditorët do t'i kishte dëmshpërblyer me aksione, në vend të parave. Ajo praktikisht i shkatërron të gjitha shpresat se fati i kompanisë do të mund të zgjidhet jashtë porcedurës së falimentimit.

Kriza globale dhe financiare rëndë e ka goditur General Motorsin dhe po të mos merret ndihmë financiare nga Qeveria amerikane kompania do të falimentonte prej kohësh, kurse dhjetëra mijë punëtorë do të mbeteshin pa punë. /mia/

Përurohet tuneli që lidh Shqipërinë me Kosovën

Rrëzohet muri që 'ndante' Shqipërinë me Kosovën dhe shënon hapjen zyrtare tuneli i Kalimashit. Kryeministri shqiptar Sali Berisha dhe ai kosovar Hashim Thaçi janë takuar mes tyre në mes të tunelit të Kalimashit, duke bërë në këtë mënyrë edhe inaugurimin e kësaj pjese të autostradës Durrës-Kukës-Prishtinë.

Kryeministri Berisha, është nisur në këmbë nga njëri krah i tunelit, prej kantierit të ndërtimit në Thirrë, ndërkohë që Thaçi, ishte nisur prej anës tjetër të tunelit nga Kalimashi. Ata u takuan në mes të tunelit dhe më pas do të përshkojnë më këmbë 100 metërshin e fundit drejt hyrjeve të tunelit nga zona e Kukësit.

Ishte kryeministri Berisha, që, hipur në një ekskavator në mënyrë simbolike ka gërmuar, duke rrëzuar dhe pengesën e fundit në beton, që shënon përfundimisht hapjen e tunelit.

Një ceremoni e përgatitur prej ditësh, që zhvillohet një ditë para mitingut të madh të fushatës, njoftuar nga Partia Demokratike. Delegacioni i kryeministrit Berisha përbëhet nga 14 ministrat e tij dhe kandidatët e PD-së për zgjedhjet e 28 qershorit, ndërkohë që një tjetër delegacion zyrtar eshte nisur nga Prishtina.

Rruga e re do të kalojë në akset Durrës- Vorë- Fushë Krujë- Milot- Rrëshen- Reps- Thirrë- Kalimash- Kukës- Morinë dhe ka një gjatësia prej 170 km.
Punimet për hapjen e këtij tuneli nisën dy vjet më parë kompania amerikane "Bektel" dhe kompania nënkontraktuese turke "Enka", dhe u punësuan rreth 3400 punonjës, shumica shqiptarë, si dhe në funksion të vazhdimit normal të punës u vunë mbi 1300 mjete të llojeve të ndryshme

Shpejtësia e planifikuar për të ecur në këtë rrugë është 80- 100 km /orë. Pjesë e kësaj rruge me dy korsi janë 27 ura. Autostrada do të jetë gati 45 km më e shkurtër se rruga ekzistuese drejt Kosovës, dhe koha e udhëtimit do të reduktohet në dy orë, nga gjashtë orë që është sot.

"Dëshiroj t'u përshëndes të gjithëve përzemërsisht dhe të ndaj me ju gëzimin e madh të shndërrimit sot në këtë moment të një ëndrre gjithëshqiptare në një realitet. Sot inauguruam tunelin që bashkoi jo vetëm shqiptarët, por me shërbimet që ofron në fushën e transportit e qarkullimit i bashkon më shumë me rajonin, maqedonasit, serbët bullgarët. Tuneli, do të bëjë që brigjet e Shqipërisë e portet e saj t'i shërbejnë, jo vetëm shqiptarëve në Shqipëri e Kosovë, por të gjithë kombeve të rajonit", tha kryeministri i Shqipërisë, Sali Berisha.

"Në Kalimash sjell mesazhin e përgëzimit të qeverisë së Kosovës për këtë kryevepër. Ekziston një lidhje shumë e fuqishme mes këtij rrugëtimi e Kosovës. Janë të shumta e të pallogaritshme herët kur unë me luftëtarët e mi e bëmë në këmbë këtë rrugë për lirinë e vendit. Sot Kosova e Shqipëria janë si kurrë ndonjëherë më pranë njëra-tjetrës e do të afrohen më tepër. Ato janë pranë njëra-tjetrës e kështu do jemi përgjithmonë. Kemi qenë të ndarë me shekuj, por kurrë nuk kemi qenë larg", është shprehur kryeministri i Kosovës, Hashim Thaçi. /Shekulli/Telegrafi/

Ndërtimi i tunelit, reagon PS-ja

Partia Socialiste e Shqipërisë, nëpërmjet kryetarit të PS-së së Tiranës, Besnik Bare, ka denoncuar shpenzimin ekstra të përdorur për rrugën Rreshen-Kalimash.

Sipas tij, me 600 milionë eurot e shpenzuara tepër për këtë rrugë, mund të ndërtoheshin qindra vepra të tjera të nevojshme për vendin.

“Kjo rrugë në një vend normal të BE-së do të kushtonte vetëm 418 milionë euro, në Shqipërinë tonë kjo kushton më shumë së 1 miliardë euro. Shpenzimi ekstra është 600 milionë euro, me këtë diference mund të ndërtoheshin në Shqipërinë tonë 1450 shkolla, mund të ndërtoheshin 145 spitale që t’u shërbenin të gjithë shqiptaëve”, është shprehur Bare.

Kosova dhe Shqipëria do të përfitojnë nga rruga e re

“Të mirat ekonomike që pritet të vijnë nga hapja e rrugës Durrës- Kukës –Morin do të jenë reciproke si për Shqipërinë, ashtu edhe për Kosovën”, kanë vlerësuar ekspertët ekonomikë.

Muhamet Mustafa dhe Musa Limani kanë theksuar se këmbimet tregtare do të dalin në pah, sidomos pas bllokimeve që po pëson Kosova në zbatimin e CEFTA-s.

Ekspertët kanë parashikuar edhe rritjen e sektorit të turizmit në të dyja vendet. Qytetarët kosovarë kanë paralajmëruar vizita më të shpeshta në Shqipëri tash e tutje. /ktv/

GM merr mbështetje për planin e shpëtimit

Gjigandi amerikan i prodhimit të makinave, General Motors, njoftohet të ketë arritur një marrëveshje me shumicën e pronarëve të bonove.

Ky është një zhvillim që pritet të lehtësojë ristrukturimin masiv të kompanisë.

Afati skadon të hënën për prodhuesin më të madh të makinave, një afat ky i vendosur nga administrata Obama për të ndrequr kompaninë.

General Motors aplikon mbrojtje nga falimentimi si pjesë e një plani të mbështetur nga qeveria për ta shpëtuar kompaninë nga likuidimi.

Ky proces mori një përkrahje nga shumica e pronarëve të bonove që vendosën që të realizohet marrëveshja.

Në këmbim të kësaj, ata do të marrin të paktën 10 për qind të një kompania më të vogël, siç pritet të dalë nga ristrukturimi General Motors.

Qeveria pritet të marrë marrë më shumë se 70 për qind të aksioneve, duke paguar kështu faturën e falimentimit më të madh të një kompanie në historinë e industrisë së Shteteve të Bashkuara. /bbc/

Nesër hapet Panairi “Prishtina 2009”

Oda Ekonomike e Kosovës për herë të dhjetë nga data 02 – 05 qershor 2009, organizon Panairin e Përgjithshëm Ndërkombëtar “Prishtina 2009”.

Bazuar në një njoftim zyrtar të OEK-së, sikurse edhe viteve të mëparshme edhe sivjet ndërmarrjet vendore dhe ndërkombëtare kanë treguar interesim të madh për pjesëmarrje në Panairin “Prishtina 2009”, gjë që dëshmon se ky panair ka një rol të rëndësishëm në zhvillimin ekonomik të Republikës së Kosovës.

“Panairi Ndërkombëtar “Prishtina 2009”, është mundësi e mirë për të promovuar ambientin ekonomik të Kosovës, dhe njëkohësisht do të shërbejë për krijimin e urave të reja të bashkëpunimit në mes të ndërmarrjeve kosovare dhe atyre ndërkombëtare ekonomik të Republikës së Kosovës”.

OEK po ashtu ka njoftuar se Panairi Ndërkombëtar “Prishtina 2009”, është mundësi e mirë për të promovuar ambientin ekonomik të Kosovës, dhe njëkohësisht do të shërbejë për krijimin e urave të reja të bashkëpunimit në mes të ndërmarrjeve kosovare dhe atyre ndërkombëtare.

“Sipas shënimeve te fundit pjesëmarrjen ne Panair e kane konfirmuar 101 ndërmarrje nga Kosova dhe vendet tjera. Prej tyre 42 ndërmarrje janë nga Kosova, 12 nga Shqipëria, 21 nga Maqedonia, 15 nga Bosnja e Hercegovina, ndërsa 11 ndërmarrjet tjera vijnë nga Gjermania, Austria, Kroacia, Belgjika, Spanja dhe Serbia”.

Ndryshe Panairi do të mbahet ne lokalet e Ministrisë së Bujqësisë, Pylltarisë dhe Zhvillimit Rural - Zona Industriale (Prishtinë – Fushë Kosovë). /Telegrafi/tch/

Buxheti grek me "vrimë të zezë" prej pesë miliardë euro

Mungesë prej pesë miliardë eurove është regjistruar në buxhetin e Greqisë, transmetojnë sot mediumet lokale.

"Vrima e zezë" buxhetore ka të bëjë me të ardhurat e zvogëluara buxhetore, ndërsa sipas opozitës greke edhe me zgjedhjet e ardhshme parlamentare.

Komisioni Evropian, si edhe Fondi Monetar Ndërkombëtar, tashmë e paralajmëruan Qeverinë greke që t`i ulë shpenzimet, meqë në të kundërtën vendin e pret shkatërrim ekonomik.

Qeveria greke, nga ana tjetër, për ta zvogëluar mungesën në buxhet, tashmë paralajmëroi se do të vendosë një pako "të matur" të masave të reja tatimore. /Makfaks/

Pas Kalimashit, radhën e ka Porti i Shëngjinit

Në maj të 2006-s, Kryeministri Sali Berisha i kishte premtuar homologut Agim Çeku se Porti i Shëngjinit do t‘i shërbente nevojave dhe interesave ekonomike të Kosovës. Duket se ky premtim po mbahet dhe tre vjet më pas, plani ndodhet drejt finalizimit.

Vullneti i palës shqiptare për të pasur një bashkëpunim më të ngushtë me Kosovën paraqitet me fakte, duke nisur nga ndërtimi i rrugës Durrës-Kukës-Morinë, aeroporti i Kukësit, koncesionari për celularin e katërt, dhe së fundmi Porti i Shëngjinit.

Mendohet se ky port do t‘i jepet me koncesion Kosovës, duke shënuar dhe të parën herë kur Shqipëria jep një port me koncesion.

Gjithashtu mësohet se janë ngritur Komitetet Ndërministrore në Tiranë dhe në Prishtinë, që do të studiojnë dhe nxjerrin të dhënat e fizibilitetit të projektit.

Koncesionari duhet të jetë privat, por që i shërben interesave të palës kosovare. Ende nuk është qartësuar forma e detyrimit ndaj palës sonë dhe çfarë asetesh do t‘i ofrohen palës kosovare, pasi në port janë të ndërtuara disa magazina doganore dhe depozita nafte dhe gazi.

Ndërkaq, Kryeministri Berisha ka siguruar disa herë palën kosovare se Porti i Shëngjinit do të jetë në dispozicion të Kosovës. Kosova ka lidhje me detin nëpërmjet vendeve fqinje, Selanikut dhe Malit të Zi, si dhe nëpërmjet Shqipërisë.

Në këtë drejtim, Porti i Shëngjinit është shumë i përshtatshëm, i cili do të jetë i lirë për Kosovën. Kalata e tij operative është vetëm 160 metra, me një thellësi që varion nga 5-7.5 metra, ku mund të ankorohen vetëm anije 5 mijë tonësh.

Sasia maksimale e mallrave, që përpunohen në Portin e Shëngjinit, arrin deri në 350 mijë tonë, ndonëse kapaciteti është për 500 mijë tonë. /Gazeta Shqip/

Mëtohet sensibilizimi për konsumin e prodhimeve vendore të qumështit

USAID-i në bashkëpunim me Ministrinë e Bujqësisë dhe asociacionin e prodhuesve dhe përpunuesve të qumështit duke eksponuar prodhimet në sheshin e qytetit të Prishtinës kanë organizuar promovimin e prodhimeve vendore të qumështit.

Organizatorët dhe prodhuesit e qumështit vendorë kanë ofruar prodhimet e tyre për t’u shijuar falas nga kalimtarët e rastit dhe kanë shpërndarë bluzat për fëmijë të cilat mbanin logon “pini qumësht Kosove”.

Kohë më parë Instituti i Veterinarisë së Kosovës ka vlerësuar me notë të lartë prodhimet e qumështit vendorë. /rtk/

Bankat ruse kanë nevojë për 40 mld $

Bankat ruse sivjet kanë nevojë për 40 miliardë dollarë kapital plotësues, me të cilin është paraparë t`i mbulojnë shpenzimet e bëra nga plasmanet e këqija.

Sipas raportit zyrtar bankar të Moskës, numri i huave të këqija të bankave në Rusi deri në fund të vitit do të mund të ngjitej në 20 për qind.

Autoritetet ruse tashmë u ndihmuan bankave me 23,6 miliardë dollarë, ndërsa është premtuar edhe ndihmë plotësuese prej 15,6 miliardë dollarë. /Makfaks/

Obama: General Motors do të rimëkëmbet

Hapi i GM për falimentim është mbështetur nga administrata e Shteteve të Bashkuara, e cila do të marrë 60 përqind të akcioneve të kompanisë, në këmbim të ndihmës finansiare prej 50 miliarda dollarë

Presidenti Barak Obama tha se falimentimi ishte pjesë e “planit të qëndrueshëm e të arritshëm”, i cili do t’i japë mundësi kompanisë të “rimëkëmbet përsëri”.

“Jam i bindur se hapat që i shpall sot do ta shënojnë fundin e një GM të vjetër dhe fillimin e një GM të ri, i cili nesër mund të prodhojë automjete të cilësisë së lartë, të sigurta dhe që shpenzojnë më pak karburant. Ai mund ta çojë Amerikën drejt të ardhmes ku nuk dot ë varet nga energjia, dhe do të jetë një simbol tjetër për suksesin e Amerikës”, tha presidenti Obama. /rel/

Amerikanët pakësojnë shpenzimet nga frika e papunësisë

Konsumatorët amerikanë shkurtuan shpenzimet në muajin prill, pasi shtimi i papunësisë dhe shqetësime të tjera i nxitën që të shtojnë kursimet.

Sipas raportit të publikuar sot nga Departamenti i Tregtisë, shpenzimet ranë 0.1 përqind, muaji i dytë radhazi që shënon rënie.

Ekonomistët ndjekin me vemendje nivelin e shpenzimeve të konsumatorëve sepse kërkesat e tyre përbëjnë dy të tretat e aktivitetit ekonomik në Shtetet e Bashkuara.

Në të njejtën kohë, raporti i një grupi të pavarur të biznesit thotë se edhe sektori i prodhimit vazhdoi të tkurret, megjithëse me një ritëm më të ngadaltë.

Një raport tjetër i qeverisë mbi ndërtimet përmban nota më optimiste, duke treguar se shpenzimet për ndërtimet u rritën 0.8 përqind në muajin prill, rritja më e madhe që nga gushti i vitit të kaluar./woa/

Zvicra hyri në recesion

Bruto Prodhimi Vendor (BPV) i Zvicrës në tre muajt e parë të këtij viti regjistroi rënie prej 0.8 për qind, lajmëroi sot Ministria zvicrane e Ekonomisë.

Kjo do të thotë se Zvicra hyri në recesion, pasi që paraprakisht shënoi rënie të BPV-së edhe në tremujorin e fundit të vitit 2008.

Në nivel vjetor, BPV-ja e Zvicrës është zvogëluar për 2,4 për qind.

Impulset negative në ekonominë zvicrane arrijnë nga tregtia e jashtme. Eksporti i Zvicrës në tremujorin e parë shënon rënie prej 5,4 për qind, thuhet në kumtesën e Ministrisë zvicrane të Ekonomisë.

Të huajt do të marrin vizë për në Shqipëri

Vendimi i ri i qeverisë synon të plotësojë kushtet e Bashkimit Evropian për procesin e liberalizimit të vizave. Një sërë vendimesh u morën gjatë muajve mars dhe prill për të përshtatur rregullat e lejeve të punës për të huajt me rregullat e BE-së, por ekspertët thonë se këto vendime të qeverisë erdhën shumë vonë për të pasur ndonjë ndikim më verdiktin e Brukselit për liberalizimin e vizave.

Një rregullore e re e miratuar nga qeveria ka përcaktuar procedura dhe burokraci për të huajt që kërkojnë vizë shqiptare, të ngjashme me procedurat dhe burokracitë që shqiptarët duhet të plotësojnë për të marrë vizat e standardit të vendeve Shengen.
Vendimi u miratua nga qeveria në prill dhe u publikua së fundmi në Fletoren Zyrtare. Ai mund ta fusë Shqipërinë në listën e vendeve që torturojnë të huajt e vendeve të varfra. Për t‘u pajisur me vizë shqiptare, të huajve do t‘u kërkohet rezervimi i hotelit, bileta e kthimit, dokument punësimi, kontratë punësimi, vërtetim page, garanci financiare, të dhënat bankare, garanci nga pritësi, ftesë nga pritësi, sigurim jete në udhëtim, epikrizë, (në rast se udhëton për kujdes mjekësor në Shqipëri), para për të paguar koston e kujdesit shëndetësor, dokumentin, që provon veprimtarinë profesionale, tregtare në vendin përkatës, me të cilin lidhen motivet e vizitës etj. Mali me dokumente që do t‘u kërkohet të huajve si parakusht për t‘u pajisur me një vizë shqiptare, është po aq i lartë sa mali i dokumenteve që u kërkohen shqiptarëve për t‘u pajisur me vizë Shengen.

Linjë direkte nga New York

Kompania ajrore amerikane Scanderbeg Air, do të nisë fluturimet me avion nga New York në drejtim të Tiranës dhe Prishtinës. Në faqen e internetit të kësaj kompanie, thuhet se Scanderbeg Air tashmë do të bëjë fluturime direkte nga drejtim të dy kryeqyteve shqiptare.

Aeroplani me 214 ulëse Boeing 767-200ER do të shfrytëzohet për fluturimin 8.5 orësh nga aeroporti JFK në kryeqytetin e Shqipërisë, duke filluar nga 14 qershori, e transmeton AP drejtorin ekzekutiv Petrit Ujkaj.

Kompania thekson se mision të ofrojë udhëtim të sigurt, efikas, me kosto të ulët konkurruese të konsumit të udhëtimit shërbimin ajror.

Fluturimet do të vijojnë normalisht që prej kësaj date. Biletat do të kushtojnë 1200 dollarë New York-Tiranë-Njew York. I njëjti çmim është edhe për linjën e Prishtinës. Kompani bën të ditur gjithashtu, çmimi i biletës dhe kohëzgjatja e udhëtimit, janë prioritet e kompanisë.

Fluturimi testues pritet të kryhet gjatë ditës së sotme në Aeroportin Ndërkombëtarë të Prishtinës. /Telegrafi/

Mediat ndërkombëtare, jehonë hapjes së tunelit të Kalimashashit

Agjencia e lajmeve AP që është cituar deri në Tajvan News online, e sheh hapjen e tunelit që lejon ndërtimin e një rruge të shpejtë që do të shkoje në Kosovë, 20 vjet pas rrëzimit të komunizmit, si një hap që do të afrojë më shumë shqiptarët në të dy anët e kufirit.

Stacioni i mirënjohur televiziv amerikan, CNBC dhe ai Euronews, do të citonin Kryeministrin Berisha teksa shprehet i emocionuar se “sot ne kemi vendosur se nuk ka më male, nuk ka më pengesa, nuk ka më asgjë që shpirtërisht ose fizikisht të ndalojë këtë komb”.

CNN më tej ka thelluar më pas në analizën e përfitimeve që do të sjellë kjo rrugë si në rritjen e madhe të fluksit të turizmit drejt brigjeve shqiptare që do të arrihen në vetëm 4 orë.

Agjencia prestigjioze e biznesit BusinessWeek ka veçuar fjalët e Kryeministrit të Kosovës, Thaçi se me këtë tunel Shqipëria dhe Kosova, Tirana dhe Prishtina janë më pranë se kurrë dhe do të qëndrojnë kështu përgjithmonë.

Agjencia IntelliNews me lajme nga 16 vende të Evropës Qendrore dhe Lindore, me 10 vjet eksperiencë, ka pasqyruar ngjarjen qe pritet të japë efekte ekonomike te fuqishme ne zhvillimin e rajonit.

Stacionet BBC, Deutsche Welle dhe Zëri i Amerikës i dhëne gjithashtu peshën qendrore në edicionet e tyre ngjarjes së Kalimashit.

Zëri i Amerikës e prezantoi ngjarjen me simboliken e takimit të dy kryeministrave në mesin e tunelit të Kalimashit, pas rrëzimit edhe të pengesës së fundit që shënoi bashkimin e të dy anëve të tij.

Kryeministri Sali Berisha hipi vetë dhe drejtoi makinerinë e rëndë që çau murin ndarës të mbetur. Delegacioni nga Kosova priste në anën tjetër.

Mbi domethënien e përfundimit të punimeve në njërin prej dy objekteve më të vështirë të autostradës që do të lidhë Shqipërinë me Kosovën, BBC ka veçuar deklarimin e kryeministrit Berisha që tha se rruga që përmes tunelit të Kalimashit do të zgjatet më tej drejt Kosovës, 'bashkon kombin' dhe 'integron përveç shqiptarëve dhe maqedonasit, serbët, bullgarët dhe gjithë rajonin e Ballkanit”.

Kanali i lajmeve (Nachrichten CH.) në Gjermani e ka komentuar festimin e “Republikës se Shqipërisë” dhe të “Kosovës se qeverisur nga shqiptaret” për lidhjen e parë me autostradë si “një hap tjetër drejt afrimit“.

Agjencia “Rinascita Balkanica” ka njoftuar gjithashtu hapjen e tunelit pas një sere njoftimesh ne radhe për ecurinë e punimeve ne 800 metra thellësi të malit.

Lidhja me e shpejte mes Shqipërisë dhe Kosovës është bere e ditur dhe ne citimin e Agjencisë Gjermane të lajmeve SDA e cila ka veçuar deklarimin se “vendet janë ndarë nga historia dhe padrejtësia“.

Përurimi i kryeministrit Berisha dhe Thaçi ka gjetur pasqyrim nga agjencia e lajmeve DPA të cilat komentojnë se lidhjet politike dhe ekonomike mes dy vendeve pritet të intensifikohen tani.

Radio B92 e Beogradit me burime te agjencisë se lajmeve Beta duke cituar dhe mediat shqiptare, e ka pasqyruar me vëmendje takimin simbolik ne mes te tunelit qe shpreh lidhjen e kombit të ndarë.

Ngjarja e madhe për shqiptaret kudo që janë sjell në ato që citon B92 shpresë dhe integrim.

Gazetat shqiptare kanë pasqyruar gjithashtu në vend qendror përurimin e ditës së diel, ku një mur simbolik i shembur nga ekskavatori ne te cilin ishte kryeministri Berisha, çeli një nga galeritë e tunelit më të gjatë të rrugës që do të shkurtojë distancat me Kosovën.

Gjithashtu kjo ngjarje e madhe për kombin shqiptar është paraqitur gjerësisht edhe në SHBA përmes “The Boston Globe”, “The Herald Sun”, “Cleveland online”, “Sun News” etj., si dhe në agjencinë turke të lajmeve “World Bulletin”.

ProCredit Bank, tani paratë terhiqen edhe në pikat terminale të shitjes

ProCredit Bank, ka lansuar në treg shërbimin më të ri dhe më të përshtatshëm “Tërhiq para edhe në pikat terminale të shitjes” për ata që kanë nevojë të tërheqin para dhe të kursejnë kohën.

Shërbimi më i ri nga ProCredit Bank “Tërhiqi para edhe në pikat terminale të shitjes” ju bën të mundur klientëve, tërheqjen e parave të gatshme, në arkat e tregtarëve apo dyqaneve, çdo herë që paguajnë me kartelë për mallin e blerë apo shërbimin e bërë.

Shërbimi më i ri nga ProCredit Bank “Tërhiqi para edhe në pikat terminale të shitjes” ju bën të mundur klientëve, tërheqjen e parave të gatshme, në arkat e tregtarëve apo dyqaneve, çdo herë që paguajnë me kartelë për mallin e blerë apo shërbimin e bërë.

Ky shërbim, është posaçërisht i dizajnuar për klientët e ProCredit Bank-ës, për të gjithë ata që posedojnë kartelat e lëshuara nga ProCredit Bank dhe të cilët realizojnë pagesa me këto kartela.

Në mënyrë që klientët e ProCredit Bank-ës të shfrytëzojnë këtë shërbim, e vetmja gjë që ju nevojitet është posedimi i njërës nga kartelat e debitit Maestro apo Visa Electron, me të cilën realizojnë pagesë në të gjitha lokacionet ku është e ekspozuar shenja “Tërhiq para edhe në pikat terminale të shitjes”

Me anë të këtij shërbimi klientët e ProCredit Bank-ës do ta kenë shumë të lehtë qasjen në paratë e tyre duke mos humbur kohë në kërkim të bankomatit më të afërt, për arsye se me shërbimin “Tërhiq para edhe në pikat terminale të shitjes” është e mundur tërheqja e parave edhe në lokacionet ku nuk ka bankomat.

Shuma maksimale që lejohet të tërhiqet me anë të shërbimit “Tërhiq para edhe në pikat terminale të shitjes” është 100 euro.

“Tërhiq para edhe në pikat terminale të shitjes” është shërbimi më i ri që ProCredit Bank ka lansuar për klientët, duke u përpjekur që t’ju lehtësojë gjithmonë e më shumë qasjen në produktet e saja. Ky shërbim është vetëm vazhdim i synimit të bankës tonë për të ofruar produkte dhe shërbime të reja në tregun bankar”- tha Florin Lila, z.v.drejtor gjeneral në ProCredit Bank.

Deri më tani ProCredit Bank ka instaluar më shumë se 2000 Pos-terimale (pika të shitjes) dhe më shumë se 110 bankomate nëpër tërë Kosovën, me anë të të cilave klientët kanë mundësinë e realizmit të pagesave të ndryshme dhe qasjes në paratë e tyre 24 orë për 7 ditë të javës, kudo brenda dhe jashtë Kosovës.

PTK ndihmon personat me aftësi të kufizuara

Kryeshefi Ekzekutiv i PTK-së Shyqyri Haxha, në një takim të organizuar me rastin e pranimit të tyre në punë, ka thënë se PTK si pasojë e rrjedhave të biznesit nëpër të cilat po kalon, i është dhënë mundësia që të punësojë punëtorë të rinj, në këtë rast me aftësi të kufizuara.

Sipas tij kjo tregon se menaxhmenti aktual i PTK-së, kujdes të veçantë u jep edhe personave më aftësi të kufizuara duke u dhënë mundësinë që edhe ata të japin kontributin e tyre në zhvillimin e mëtutjeshëm të korporatës sonë.

“Nuk dyshoj në asnjë moment se ju nuk mund të jepni kontributin tuaj, përkundrazi besoj fuqishëm se kontributi juaj do të jetë i madh dhe shembull i punës dhe përkushtimit”, ka pohuar kryeshefi ekzekutiv i PTK-së Shyqyri Haxha.

Haxha mes tjerash ka pohuar, se PTK duhet të merret si shembull i mirë nga kompanitë e tjera se si duhet kujdesur për të gjitha shtresat e shoqërisë, e veçmas për personat me aftësi të kufizuara, për të cilët si kompani publike kemi edhe përgjegjësi sociale.

Të punësuarit janë shpërndarë pothuajse në të gjitha njësitë e PTK-së, si në Teleshitje, Qendër të Thirrjeve dhe në Sigurim Fizik.

Sa u përket pozitave nëpër të cilat janë sistemuar këta gjashtë punëtorë të rinj, Haxha ka shprehur besimin se këta punëtorë të rinj, do të përshtaten mirë në pozitat ku janë sistemuar dhe do ta kryejnë punën me plot përgjegjësi.

Nga ana tjetër, të sapo punësuarit, të emocionuar për këtë gjest shumë human të menaxhmentit aktual të PTK-së, janë shprehur shumë të lumtur që u është dhënë mundësia që edhe ata të japin kontributin e tyre në zhvillimin e mëtutjeshëm të PTK-së.

Ndërsa, Agim Vatoci, Drejtor për Përgjegjësi Sociale në PTK, ka thënë se e veçanta e këtij takimi qëndron në faktin se, me përkrahjen e Shyqyri Haxhës kanë arritur që të konkretizojmn punësimin e gjashtë personave më aftësi të kufizuara të cilët nga sot do të jenë në vendet e tyre të punës dhe kjo është dëshmi që këta persona nuk janë barrë e shoqërisë.

“Kjo është dëshmi, se të menduarit human dhe social në PTK, është në fokus të menaxhmentit aktual dhe jam i bindur se një përkrahje e tillë e PTK-së, dhënë personave me aftësi të kufizuara do të jetë model edhe për subjektet tjera se si të trajtohet ky segment i shoqërisë” ka pohuar Vatovci. /Telegrafi/

Kosova, sot anëtare e Bankës Botërore

Përderisa të mërkurën (sot) përmbyllet procesi i votimit për anëtarësimin e vendit tonë në Bankën Botërore, guvernatori i Bankës Qendrore të Kosovës, Hashim Rexhepi në prononcim për Radio Dukagjinin ka theksuar se Kosova do të marrë votat e nevojshme nga po ato vende që votuan pro anëtarësimit së Kosovës në Fondin Monetar Ndërkombëtar.

Ashtu siç e kishte paralajmëruar anëtarësimin e Kosovës në Fondin Monetar Ndërkombëtar, guvernatori i Bankës Qendrore të Kosovës, Hashim Rexhepi ka paralajmëruar edhe anëtarësimin në Bankën Botërore.

“Kam informacione mjaft të sakta. Kjo çështje do të kryhet me sukses duke e marrë parasysh se procesi i votimit për Fondin Monetar Ndërkombëtar ka shkuar në mënyrë jashtëzakonisht të suksesshme, të njëjtat vende do të votojnë edhe për anëtarësimin e Kosovës në Bankën Botërore”

Guvernatori Rexhepi ka theksuar se anëtarësimi në Bankën Botërore do të krijojë lehtësira në marrjen e kredive.

“Për dallim nga FMN-ja, Banka Botërore ka rol më të madh në mbështetjen e projekteve të ndryshme zhvillimore të Kosovës në mundësinë e marrjes së linjave të marrjes së kredive nga Banka Botërore për këto projekte. Pra Kosovës po i hapet një derë e re dhe e fuqishme për realizimin e projekteve të mëdha”

Rexhepi ka shtuar se anëtarësimi në Bankën Botërore, do të krijoi siguri edhe më te madhe për investitorët e huaj në Kosovë.

Procesi i votimit përmbyllet sot, ndërkohë që duhet pritur më shumë se një javë që të kumtohet rezultati definitiv. /RTV Dukagjini/

Hapet panairi Prishtina 2009

Kryeministri i Republikës se Kosovës, Hashim Thaçi ka thëne sot në hapjen e panairit të Dhjetë jubilar “Prishtina 2009” se Qeveria e Republikës së Kosovës është e përcaktuar për partneritet me bizneset kosovare.

“Besoj se ju jeni dëshmitar se çdo ditë e më shumë jemi duke thelluar dhe zgjeruar këtë partnerit i cili ka për qellim krijimin e kushteve sa me të favorshme për biznes dhe zhvillimin e gjithmbarshëm ekonomik dhe krijimin e vendeve të reja të punës”.

Ai tutje shtoi se, rekomandimet dhe këshillat e biznesit kanë qenë vendimtare edhe për vendimet e Qeverise se Kosovës,duke përmendur kështu edhe zbritjen e tatimeve e të cilat Thaçi i vlerësoi si më të ultat në jo vetëm në rajon por edhe në Evropë.

“Ne kemi zbrit tatimin në fitim nga 20 në 10 për qind, si dhe taksën nga të ardhurat personale. Për herë të parë shohim infrastrukturë rrugore me të mirë e me moderne, si në nivel kosovar ashtu edhe në atë regjional dhe lokal. Jemi duke punuar me përgjegjësinë me të madhe shtetërore që sivjet të filloj edhe ndërtimi i auto rrugës Vermicë - Prizren - Prishtinë. Kosova ka shënuar edhe progres në lëmi tjera. Në pjesën e dytë të këtij viti do të nënshkruhet integrimi i saj në FMN, e duam te besojmë fuqishëm edhe në BB”.

Kryeministri theksoi se është krijuar stabilitet dhe qëndrueshmëri makroekonomike fiskale dhe monetare.

Në anën tjetër Presidenti i Kosovës Fatmir Sejdiu i ftoi afaristët kosovarë që të tregojnë se çka duhet bërë për të ndryshuar gjendjen.

“Unë dua të them na thuani çka te bëjmë me shpejt në pjesën e investimeve të rëndësishme institucionale për të pas biznese të mira, të sigurta, kamatë sa me të ultë oferta sa me të mëdha , qarkullim sa me të mirë. Kjo është ekonomia e tregut dhe atë duhet ta bëjnë institucionet, prandaj keni garancinë tonë në sigurimin e kornizës legjislative, për mbështetje te këtyre proceseve dhe e keni garancinë e hapjes së mirë të Kosovës me partneritet të rëndësishme me botën ekonomike”.

Kryetari i Odës Ekonomike të Kosovës Besim Beqaj theksoi se viti 2009 ka sjell shumë zhvillime pozitive për Kosovën.

“Qeveria e Kosovës duke dëgjuar zërin e arsyes të biznesit kosovar, ka bërë një hap të rëndësishëm në drejtim të reformës fiskale”.

Ai tutje shtoi se anëtarësimi në FMN dhe fakti se Kosova gjendet para anëtarësimit në BB dhe në BERZH hapin rrugën drejtë tërheqjes së fondeve zhvillimore të cilat janë shumë të nevojshme për Kosovën.

“Ekonomia e Kosovës është duke u ballafaquar me efektet e krizës financiare dhe globale, andaj edhe pritjet për rritje ekonomike për ketë vit duhet të janë të matura. Duhet konsideruar se trendët pozitive ekonomike do të ishin sukses i madh i Qeverise se Kosovës”.

“Oda Ekonomike e Kosovës mbetet e përkushtuar për te promovuar fuqishëm zhvillimin ekonomik te vendit dhe për dialog konstruktiv me institucionet e Republikës se Kosovës”, përfundoi Beqaj.

Ndryshe ne panairit e dhjete jubilar “Prishtina 2009” marrin pjese 101 ndërmarrje nga Kosova dhe vendet tjera. Prej tyre 42 ndërmarrje janë nga Kosova, 12 nga Shqipëria, 21 nga Maqedonia, 15 nga Bosnja e Hercegovina, ndërsa 11 ndërmarrjet tjera vijnë nga Gjermania, Austria, Kroacia, Belgjika, Spanja dhe Serbia. /Telegrafi/

Ford, rënie me 24% e shitjeve në muajin maj

“Ford Motor”, e vetmja shtëpi e automobilizmit që nuk është në procedurë falimentimi, ka regjistruar në muajin maj një rënie me 24% të shitjeve.

Bëhet fjalë për muajin e 18 rresht që regjistrohet një humbje jo pak e konsiderueshme, bëjnë të ditur mediat amerikane.

Sipas burimeve, shitjet e automjeteve, përfshirë markën “Volvo”, kanë rënë në 161.531 makina nga 213.238 që ishte një vit më parë.

Gjithesesi, rënia me 24 për qind është më e ulët se 29% që kishin parashikuar analistët. /Telegrafi/tch/

Zvogëlohet numri i turistëve në Kroaci

Numri i turistëve që kanë vizituar Kroacinë gjatë katër muajve të parë të vitit 2009 është zvogëluar për 6% krahasuar me periudhën e njëjtë të vitit të kaluar.

Sipas të dhënave të Agjencisë turistike nacionale, për periudhën janar-prill të vitit 2009, 834.984 njerëz vizituan Kroacinë, shumica e tyre duke shkuar në bregun e Adriatikut.

Shumica e vizitorëve kanë ardhë nga Gjermania, ndërsa në vendin e dytë dhe të tretë janë sllovenët, si dhe turistët vendor. /Makfaks/

Rusia: Vendet në zhvillim do ta nxjerrin ekonominë botërore nga kriza

Disa shtete me zhvillim të shpejtë ekonomik, të njohur si grupimi BRIK (Brazil, Rusi, Indi, Kinë), do të jenë lokomotiva që do ta nxjerrë ekonominë botërore nga kriza.

Këtë sot e deklaroi zëvendëskryeministri rus Sergej Ivanov para Forumit Ekonomik të Persburgut (FEP), i cili prej 4 deri 6 qershor do të mbahet në Sankt Petersburg.

Ivanov theksoi se ekonomitë e Kinës dhe Indisë së paku i kanë ndier lëkundjet globale ekonomike, përderisa situata në Brazil është diçka më e ndërlikuar, për shkak të lidhshmërisë me ekonominë amerikane.

Për dallim prej tyre, ekonomia ruse ishte goditur seriozisht nga kriza botërore financiare, ndërsa sipas vlerësimeve më të reja BPV-ja ruse do të mund të binte sivjet në rreth gjashtë për qind.

Zëvendëskryeministri rus paralajmëroi se gjatë periudhës së ardhshme vendet e BRIK planifikojnë t`i intensifikojnë kontaktet në më shumë sfera. /Makfaks/

TI publikon raportin për korrupsionin, Kosova notën 3.4

Organizata Transparency International, e cila mat nivelin e korrupsionit në vendet e ndryshme të botës, ka publikuar raportin “Barometri i Korrupsionit Global 2009”.

Hulumtimet janë zhvilluar në 69 vende dhe gjetjet kryesore dëshmojnë se partitë politike, shërbimi civil, parlamenti dhe drejtësia mbeten sektorët më të korruptuar.

Vendet më të korruptuara, sipas raportit, janë Armenia, Azerbeixhani, Kamboxha, Kameruni, Iraku, Liberia, Siera Leone dhe Uganda.

Kosova është rradhitur në grupin e tretë të vendeve të ndikuara nga korrupsioni, duke fituar notën 3.4.

Nota 5 tregon nivelin më ekstrem të korrupsionit. Sektori më i korruptuar në Kosovë raportohet të jetë ai i drejtësisë dhe ai i partive politike.

Raporti është realizuar në periudhën tetor 2008 – shkurt 2009. /rel/

Sot votohet për Kosovën në Bankën Botërore

Sot duhet të përfundojë votimi për anëtarësimin e Kosovës në Bankën Botërore, duke e rrumbullakësuar kështu një proces formal i cili filloi tash gati një vit pas aplikimit e që do të zyrtarizohet me një votë nga ana e Guvernatorëve të Bankës.

Kusht për anëtarësim në Bankën Botërore ishte edhe anëtarësimi paraprak në Fondin Monetar Ndërkombëtar, ndërsa një kusht tjetër qe edhe miratimi nga Kuvendi i Kosovës i ligjit për anëtarësimin e Kosovës në Fondin
Monetar Ndërkombëtar dhe në Organizatat e Grupit të Bankës Botërore.

Anëtarësimi në Bankën Botërore do të përfshijë edhe organizmat e tjerë që janë në Bankën Botërore, si Bankën Ndërkombëtare për Rindërtim dhe
Zhvillim, Shoqatën për Zhvillim Ndërkombëtar e të tjera.

Ashtu si edhe në FMN, anëtarësimi Bankën Botërore nuk kushtëzohet me anëtarësim paraprak në Organizatën e Kombeve të Bashkuara, mirëpo e ndihmon mjaft shumë hapjen e mëtejme të rrugës së Kosovës për anëtarësim në të gjithë mekanizmat relevantë ndërkombëtarë.

Një zyrtar i Bankës Botërore në Washington tha për RTK-në se është pothuajse i sigurt anëtarësimi i Kosovës, ndërsa nuk mundi të precizonte se kur do të jepet lajmi zyrtar.

Ai shtoi se një anëtar i ri në Bankën Botërore pranohet me shumicë votash nga ana e Guvernatorëve, ndërkaq fuqinë votuese me shumicë në Bankën Botërore, ashtu si edhe në FMN, e kanë vendet perëndimore, shumica e të cilave edhe e kanë njohur pavarësinë e Kosovës.

Banka Botërore është krijuar në dhjetor të vitit 1945 dhe ashtu siç e thotë edhe emri i saj, ajo është një bankë ndërkombëtare që ofron ndihmë financiare dhe teknike vendeve në zhvillim dhe si mision të saj të deklaruar ka zvogëlimin e varfërisë. /rtk/

Protestë në shenjë revolte dhe pakënaqësie ndaj AKP

Shoqata Sindikale ,, KOSOVATEX,, nga Prishtina në shenjë revolte dhe pakënaqësia me AKP, do të organizoj protestë paqësore, me qëllim të alarmimit të opinionit dhe Organizmave kompetente për realizimin e kërkesave legale dhe legjitime të punëtorëve të saj.

Kërkesat e protestës janë, përshpejtimi urgjent për realizimin e 20% te punëtorëve, përfundimi i procedurave të likuidimit, borxhi nga pagat e pa paguara, realizimi i kontestit gjyqësor për periudhën diskriminuese etj.

" Kërkojmë që procedurat e privatizimit te realizohen nëpërmes Degës së tekstilit,përkatësisht KSLK-së, që edhe jemi anëtarë. Protesta do të jetë paqësore dhe do të zgjat një orë",thuhet ne komunikate. /telegrafi/

300 mil euro për Hidrocentralin e Zhurit, shpejt tenderi

Sipas ministres Pula, ky hidrocentral mendohet të ndërtohet për 3 deri në 5 vjet varësisht prej teknologjisë. Shprehja e interesit do të bëhet brenda këtij viti dhe se financimi do të jetë kryesisht privat. Eshtë planifikuar që ky hidrocentral te prodhoje rreth 300 megawat. Ministrja Shiroka- Pula tha se janë me rëndësi edhe të reshurat atmosferike, mirëpo sipas saj, është planifikuar që me këto kushte që aktualisht janë, do të instalohen diku 305 MWh, ndërkaq prodhimi vjetor rreth 400 GWh.

Qeveria e Republikës së Kosovës, Banka Botërore dhe kompania kroate “Elektroprojekt” nga Kroacia, kanë prezantuar studimin e fizibilitetit për ndërtimin e një hidrocentrali në Zhur të Prizrenit, i cili është vlerësuar të kushtoje rreth 300 milionë euro.

Kryeministri Hashim Thaçi tha se ndërtimi i këtij Hidrocentrali në Zhur, është i një rëndësie të veçantë, sepse do të ndihmojë vendin në përmirësimin e gjendjes energjetike. /telegrafi/

PTK ndihmon ndërmarrjen Trepça

Me kërkesë të Kryeshefit Ekzekutiv të PTK-së,Shyqyri Haxhës dhe me miratimin nga Bordi i Drejtorëve të kompanisë, kompleksit xehetaro-metalurgjik, sot i është ndarë një donacion në vlerë prej 80 mijë euro, për përmirësimin e kushteve dhe ushqimit të punëtorëve dhe rregullimin e mensave në minierat Kishnicë dhe Stantërg.

Gjithë këto ndihma i janë dhënë ndërmarrjes “Trepça”, që ta bëjnë më të lehtë kapërcimin e gjendjes së vështirë në këtë ndërmarrje.

Bazuar në një njoftim zyrtar të kompanisë, kjo ndihmë e vogël financiare, por madhore në aspektin social dhe shoqëror, vjen pas vizitës që Kryeshefi Ekzekutiv i PTK-së, Shyqyri Haxha i ka bërë ndërmarrjes “Trepça”.

Me këtë rast Haxha është shprehur i lumtur, që krahas afarizmit shumë të sukseshëm nëpër të cilin po kalon PTK-ja, me kontributin e madh në buxhetin e Qeverisë së Republikës së Kosovës si tatim paguesja më e madhe, po ndihmon dhe kontribuon edhe në aspektin social e shoqëror.

“PTK, po ndan sot një donacion për ndërmarrjen që dikur ka qenë krenaria e vendit, krenari e cila shpresojmë shumë se do t’i kthehet kësaj ndërmarrjeje. Por, sot kjo ndërmarrje ka nevojë për ndihmë dhe PTK po i ndihmon, që minatorët të kenë kushte më të mira, së paku për kohën kur ata pushojnë”.

Në anën tjetër, Drejtori Menaxhues i “Trepçës”, Ferat Shala, ka pohuar se 80 mijë euro, të ndara nga PTK-ja, janë shumë të rëndësishme dhe do të reflektojnë në punën e përditshme të minatorëve.

“Kjo ndihmë do të përmirësojë kushtet e punës së minatorëve në kohën e pushimit, në kohën kur të lodhur dalin nga miniera dhe drekojnë apo pushojnë. Këto mjete do të përdorën pikërisht që minatorët sërish ta ndiejnë vetën krenar se janë minatorë të ndërmarrjes “Trepça”. /Telegrafi/

Përveç kësaj, “Trepçës”, i është shlyer borxhi i telefonisë fikse në vlerë prej 14 mijë euro, me vendim të Bordit të Drejtorëve dhe i është dhënë gjithashtu donacion një autoveturë .

GM i jep kinezëve marken Hummer

Shoqëria kineze Sichuan Tengzhong do të marrë marken Hummer të General Motors.

Kështu konfirmon kompania amerikane në Detroit, që ka firmosur një marrëveshje paraprake me kompaninë aziatike.

Menaxhimi i Hummer, gjithsesi do të qendrojë në Shtetet e Bashkuara të Amerikës. Termat financiare të paktit janë ende në diskutim e sipër dhe nuk do të bëhen publike.

Kosova, anëtare e Bankës Botërore

Ka përfunduar procesi i votimit për anëtarësimin e Kosovës në Bankën Botërore. Votimi është bërë të mërkurën në Washington rreth orës 16:00 sipas kohës lokale dhe rezultatet pritet të shpallen pas 8 ditësh.

Sipas mediave ndërkombëtare menjëherë pas procesit të votimit në Bankën Botërore, Guvernatori i Bankës Qendrore të Kosovës, Hashim Rexhepi ka konfirmuar se është arritur kuorumi i nevojshëm për anëtarësimin e Kosovës në këtë Institucion.

Republika e Kosovës pritet të bëhet anëtare e ligjshme në Bankën Botërore pas anëtarësimit në Fondin Monetar Ndërkombëtar, i cili ishte edhe kushti kryesor për anëtarësim.

Kusht tjetër për anëtarësimin e Kosovës në BB ishte edhe miratimi nga Kuvendi i Kosovës i ligjit për anëtarësimin e Kosovës në FMN dhe në Organizatat e Grupit të Bankës Botërore.

Anëtarësimi i Kosovës në Bankën Botërore do të përfshijë edhe organizmat e tjerë që janë në Bankën Botërore, si Bankën Ndërkombëtare për Rindërtim dhe Zhvillim, Shoqatën për Zhvillim Ndërkombëtar e të tjera.

Ashtu si edhe në FMN, anëtarësimi Bankën Botërore nuk kushtëzohet me anëtarësim paraprak në Organizatën e Kombeve të Bashkuara, mirëpo e ndihmon mjaft shumë hapjen e mëtejme të rrugës së Kosovës për anëtarësim në të gjithë mekanizmat relevantë ndërkombëtarë.

Banka Botërore është krijuar në dhjetor të vitit 1945 dhe ashtu siç e thotë edhe emri i saj, ajo është një bankë ndërkombëtare që ofron ndihmë financiare dhe teknike vendeve në zhvillim dhe si mision të saj të deklaruar ka zvogëlimin e varfërisë. /Telegrafi/

Rritje e papunësisë në Francë

Tregu francez i punës në tremujorin e parë të vitit 2009 pësoi goditje të fuqishme nga kriza financiare me çka papunësia u ngjit prej 7,6 në 8,7 për qind.

Sipas Entit francez për Statistikë, numri i përgjithshëm i personave të papunë arrin 2,46 milionë persona.

Nëse përfshihen edhe territoret detare franceze, shkalla e papunësisë arrin 9,1 për qind.

Ekspertët presin që trendi i rritjes së papunësisë në Francë të vazhdojë edhe gjatë kuartalit të ardhshëm.

Ministria franceze e Financave parashikon rënie të Bruto Prodhimit Vendor prej tre për qind në vitin rrjedhës. /Makfaks/

Ballkanasit lusin njëri-tjetrin në kërkim të turistëve

Vetëm qeveria shqiptare nuk ka ndërmarrë ndonjë veprim të tillë. Sipas saj, pavarësisht se ccfarë ndodh në botë, numri i turistëve të huaj është në rritje këtë vit. Asnjë reklamë për ulje çmimesh nuk është bërë. Megjithatë shpresat janë që një numër më i madh kosovarësh do të vizitojnë Shqipërinë këtë vit përmes rrugës së re Rrëshen-Kalimash.

Kriza ekonomike aktuale ka krijuar një miqësi të panjohur më parë mes Ballkanasve. Qeveria e Malit të Zi ftoi dje turistët nga Shqipëria të vizitojnë këtë vend, duke premtuar ccmime "në përputhje me kushtet e krijuara nga kriza". Kroacia, e cila gjatë dekadës së fundit parapëlqente të refuzonte turistët ballkanas dhe shpresonte të bëhej "destinacion luksi", i shtriu dorën ish-armiqve serbë dhe i ftoi për pushime.

Të dhënat paraprake flasin për ulje me 20 për qind të numrit të turistëve të huaj në këtë vend gjatë pjesës së parë të këtij viti. Hotelet pothuajse i kanë përgjysmuar ccmimet e fjetjes në bregdetin Dalmat, me shpresë se do të bindin turistët të kthehen.

Malazezët patën filluar të tërheqin turistë nga vendet perëndimore vitin e kaluar dhe u bënë refuzues përkundrejt turistëve të varfër nga vendet e tjera të Ballkanit. Por dje, ministri i turizmit Predrag Neneziç, i bëri një ftesë të drejtpërdrejtë shqiptarëve dhe kosovarëve, gjatë një takimi me agjenci turistike, duke dhënë shenja të qarta se objektivi për t‘u bërë destinacion luksi, është lënë mënjanë.

Ekonomia malazeze është goditur më shumë sesa vendet e tjera të Ballkanit nga kriza. Gjatë vitit të kaluar, 30 mijë shqiptarë kaluan 155 mijë netë turistike në vendin fqinj. Numri i shqiptarëve që kanë vizituar këtë vend ka ardhur në rënie në raport të drejtë me rritjen e çmimeve.

Qeveritë e Kroacisë dhe Malit të Zi janë angazhuar gjatë muajve të fundit të bindin operatorët turistikë të ulin ccmimet, ndërsa kanë ditur të reklamojnë uljet. /shqip/

Ministria e Transporteve i jep zyrtarisht licencën e katërt celulare PTK-së

Bashkimit të Ofertuesve, përfaqësuar nga Postë Telekomunikacioni i Kosovës, i është dërguar njoftimi i fituesit për licencën e operatorit të katërt GSM me kusht që brenda 7 ditëve të likuidojë në llogari të buxhetit të shtetit pagesën në shumën 7.200.000 (shtatë milionë e dyqind mijë) euro.

Me tej në njoftimin zyrtar të MPPTT-së thuhet se, “Ministri i Punëve Publike, Transportit dhe Telekomunikacionit për çështje të transparencës së këtij procesi, në mënyrë të veçantë kushteve të parashikuara në nenet 3 dhe 4 të ligjit të sipërpërmendur, ju fton të ndiqni ditët në vijim të gjitha komunikimet eventuale, për këto procedura”.

Sejdiu përshëndet anëtarësimin e Kosovës në BB

Presidenti i Republikës së Kosovës, Fatmir Sejdiu ka përshëndetur sot anëtarësimin e vendit tonë në Bankën Botërore, një vendim ky i marrë të mërkurën me shumicën e votave të Bordit të Guvernatorëve të Bankës Botërore.

Anëtarësimi në Bankën Botërore pason anëtarësimin muajin e kaluar të Republikës së Kosovës në Fondin Monetar Ndërkombëtar, si dhe miratimin nga ana e Kuvendit të Kosovës të ligjit për anëtarësimin në këto institucione.

Presidenti Sejdiu e vlerësoi si shumë të rëndësishëm dhe historik anëtarësimin e Republikës së Kosovës në Bankën Botërore, si dhe ka falënderuar Bordin e Guvernatorëve të Bankës Botërore për vendimin e marrë pro anëtarësimit të vendit tonë në këtë institucion shumë të rëndësishëm financiar botëror.

Ai the se anëtarësimi në Bankën Botërore, sikur edhe anëtarësimi në FMN, do t’i krijojë vendit tonë shumë mundësi të reja për zhvillim dhe prosperim të përgjithshëm, sikur edhe përballje më të lehtë me sfidat që dalin si pasojë e krizës ekonomike globale.
Sejdiu gjithashtu e ka vlerësuar si shumë të rëndësishëm faktin se për anëtarësimin e Kosovës në Bankën Botërore kanë dhënë votën e tyre rreth 100 shtete, numër ky edhe më i madh nga shtetet që votuan pro anëtarësimit të Kosovës në FMN.

“Nga kjo del se pro pranimit të Kosovës kanë votuar edhe një numër i madh shtetesh që ende nuk e kanë njohur Republikën e Kosovës, ndërsa votimi për anëtarësim në këto dy institucione financiare ndërkombëtare paraqet edhe një shenjë se këto shtete në të ardhmen e afërt do ta njohin Republikën e Kosovës”. /Telegrafi/

Shtypi italian: Lamtumirë skafistë, tani Vlora është porti i energjisë

Ky është investimi më i madh në kompleks, realizuar nga një kompani italiane në Shqipëri deri më sot", shkruante dje agjencia e lajmeve "ANSA" lidhur me përfundimin e terminalit të gazit e naftës të "Petroliferas", në Vlorë.

Terminali "hap faktikisht tregun energjetik të Shqipërisë ndaj ndërmarrjeve italiane të naftës", citohet të ketë thënë zv/ministri italian për agjencinë "ANSA" dhe të përditshmen "La Gazzetta del Mezzogiorno".

Nga ana e saj, e përditshmja "Il Giornale" shkruan se, për ndërtimin e këtij terminali janë dashur "dy vjet punime efektive".

"Sot Vlora rikonfirmon rolin e portës së hyrjes në Adriatik e në Ballkan, - citon kjo gazetë zv/ministrin italian, Urso, edhe falë pozicionit gjeografik të favorshëm krahasuar me rafineritë e tjera të Mesdheut qendror".

Më tej, "Il Giornale" shkruan se terminali është projektuar për të përpunuar anije deri në 20 mijë tonëshe në fazën e parë, e mbi 30 mijë tonëshe në fazat pasuese.

"Il Tempo", filial i së përditshmes ekonomike "Il Sole 24 Ore", në titullin e shkrimit të saj shkruan se: "Shqipëria ndryshon: lamtumirë skafistë. Tani Vlora është porti i energjisë".

"Sot Vlora sheh nga e ardhmja. Pikërisht dje u përurua terminali i produkteve të djegshme (naftë, gaz, por në të ardhmen do të jetë i gatshëm edhe për produkte ushqimore)... U rihapën marrëdhëniet mes dy vendeve; në të ardhmen e afërt janë tre miliardë e gjysmë euro në dispozicion të investitorëve italiane, të gatshëm për investime në Shqipëri".

Shtypi i përtej Adriatikut përmend edhe investimet e tjera italiane, që janë në proces e sipër në Shqipëri: një hidrocentral me kapacitet 800 megavat, që po përgatitet të ndërtohet nga "Moncada-Energy", një tjetër i tillë që po ndërtohet nga grupi "Marsiglia", me një investim prej 700 milionë eurosh, si dhe fillimi i punimeve prej kompanisë nga Roma, "BEG" për ndërtimin e një tjetër hidrocentrali në jug të vendit, pranë Tepelenës. /balkanweb/

Robert Wright, drejtor i ri në Raiffeisen Bank Kosovë

Raiffeisen International Bank-Holding AG, Vienna-kompania ëmë e Raiffeisen Bank në Kosovë, emëroi Robert Wright në pozitën e Drejtorit të Përgjithshëm të Raiffeisen Bank në Kosovë.

Wright emërimi i të cilit pritet të aprovohet nga Banka Qendrore e Kosovës, do të merr detyrën nga Bogdan Merfea.

Wright pritet që të fillojë me ushtrimin e detyrës së tij nga fundi i Qershorit; së fundi ai ishte Anëtar i Bordit Menaxhues përgjegjës për Retail banking në kuadër të Raiffeisen Bank Shqipëri.

Robert Wright është 52 vjeçar dhe ka më se 20 vjet përvoje në retail banking në Evropë si dhe Lindjen e Mesme duke mbuluar të gjitha aspektet e biznesit të konsumit dhe bankingut të biznesit.

Përgjegjësitë e tij në Shqipëri përfshinin rrjetin e degëve, ATM-të, marketingun, zhvillimin e produkteve si dhe zhvillimin e bizneseve ne tregun e individëve private dhe ndërmarrjeve të mesme, thuhet në komunikatën e kësaj banke. /Telegrafi/

Banka Botërore: Mos u ngutni me deklarata

Banka Botërore, me rastin e informatës së kumtuar nga ana e kryeministrit të Kosovës, Hashim Thaçi për anëtarësimin e Kosovës në këtë organizatë, kumtoi se ende asgjë nuk është zyrtare, ndërkaq që rezultatet e votimit të vendeve-anëtare ende nuk janë përfundimtare.

"Votimi përfundoi, por shpallja e rezultateteve nuk do të ndodhë derisa këshilli drejtues nuk i regjistron rezultatet në pajtim me dispozitat e institucionit", thuhet në komunikatën e Bankës Botërore.

Kryeministri i Kosovës, Hashim Thaçi, dje deklaroi se Kosova është pranuar në Bankën botërore, dhe kjo do t'i lejojë kredi nga institucioni financiar ndërkombëtar.

Kosova e parashtroi kandidaturën për anëtarësim në FMN dhe Bankën botërore në korrik të vitit të kaluar.
Ndryshe rezultatet procesit të votimit për anëtarësimin e Kosovës në Bankën Botërore pritet të shpallen me 15 qershor. /Telegrafi/MiA/

Euro kalon në 133 lekë

Leku shqiptar humbi 53 qindarka kundrejt monedhës së përbashkët euro gjatë kësaj jave, bëhet e ditur nga të dhënat e Bankës së Shqipërisë. Euro kushtoi dje 133 lekë sipas kursit fiks të Bankës së Shqipërisë, kuotë që nuk është parë që nga marsi i vitit 2004.

Leku u forcua disi kundrejt dollarit për shkak se kartëmonedha e gjelbër regjistroi një javë shumë të keqe në tregun ndërkombëtar. Që nga janari i këtij viti, leku ka humbur 7.1 për qind të vlerës së vet kundrejt euros, ndërkohë që në krahasim me kursin mesatar të vitit 2008, ka humbur 9 për qind.

Shumë shqiptarë kanë paguar gjatë muajve të fundit kredi më të shtrenjta për shkak të rritjes së interesave të bonove të thesarit për kreditë në lekë dhe shtrenjtimit të euros për kreditë në këtë monedhë. Banka e Shqipërisë raportoi javën e kaluar se çmimet në Shqipëri nuk janë ulur në raport të drejtë me uljen në tregun ndërkombëtar, përgjithësisht për shkak të zhvlerësimit të lekut.

Çmimi i naftës në tregun shqiptar u rrit sërish në 120-125 lekë për litër, ndërkohë që pati zbritur deri në 100 lekë për litër tre muaj më parë. Çmimet në Shqipëri janë të lidhura ngushtë me kursin e këmbimit. Vlerësohet se rënia e vlerës së lekut me 10 për qind, sjell rritje të çmimeve në tregun e brendshëm me minimalisht 5-6 për qind. Për muajin prill, inflacioni ishte ende në kuotën 1.5 për qind, por pritet të rritet ndjeshëm në muajt në vijim.

Thaçi rifalënderon mbështetësit e Kosovës për anëtarësim në BB

Kryeministri i Republikës së Kosovës Hashim Thaçi falënderoi edhe njëherë, të premten, të gjithë mbështetësit e Kosovës për anëtarësimin e saj në Bankën Botërore dhe ditë më parë anëtarësimin në Fondin Monetar Ndërkombëtar.

“Është kjo mbështetje ekonomike, politike dhe diplomatike që do t’i duhet Kosovës edhe në të ardhmen”, tha Thaçi në hapje të mbledhjes së Qeverisë.

Kryeministri Thaçi duke folur për zhvillimet shumë pozitive për vendin gjatë kësaj jave anëtarësimin në institucionet financiare ndërkombëtare e vlerësoi para së gjithash edhe si rezultat i punës së mirë në Kosovë.

Shefi i ekzekutivit të vendit gjithashtu ka vlerësuar shumë lartë edhe raportin e “Transparency Internacional” për Kosovën.

“Kjo agjenci e ka radhitur Kosovën të fundit në rajon për shkallën e ultë të korrupsionit “, ka thënë kryeministri Thaçi duke shtuar se ky është rezultat i punës së mirë të institucioneve, i qeverisjes së mirë , sundimit të ligjit dhe luftës së pa kompromis kundër dukurive negative.

“Kjo është një mirënjohje për angazhimin e Qeverisë së Republikës së Kosovës por edhe obligim që të punojmë edhe më mirë në të ardhmen”, ka potencuar kryeministri Hashim Thaçi. /Telegrafi/