Lajmet më të reja nga ekonomia dhe biznesi

Banka e Shqipërisë: Ekonomia shqiptare, po ecën ngadalë

Banka e Shqipërisë, paralajmëron se ekonomia shqiptare, ka dhënë shenja të qarta ngadalësimi. Ndërkaq, inflacioni është në rritje, si rezultat i zhvlerësimit të monedhës vendase.

Në analizën e fundit, ky institucion, nuk bëri një parashikim mbi ecurinë e rritjes ekonomike, por, vendosi të mos ndryshojë normën bazë të interesit të lekut, prej 5.75%.

Në maj, inflacioni u rrit në 2.1%. Ndërkaq, Banka Qëndrore, i bën thirrje qeverisë, të tregojë kujdes, pasi defiçiti buxhetor, ka kapërcyer nivelin e planifikuar, duke ushtruar presion te interesat. /tar/

FED nuk ndryshon normën e interesit

Federal Reserve ka vendosur të mos ndryshojë normën e interesit, duke e mbajtur ende në nivelet mes 0 dhe 0.25 përqind.

Sipas zyrtarëve të Bankes Qendrore Amerikane, “recesioni në SHBA po ngadalësohet dhe kushtet e tregjeve financiare janë përmirësuar në muajt e fundit”.

Në një komunikatë per mediat FED saktëson se konsumi familjar “ka treguar shenja të mëtejshme të përmirësimit edhe pse rëndon shtimi i të papunëve”.

Ndërkohë që inflacioni, sipas institucionit me të lartë financiar në SHBA, është nën kontrollë. /Telegrafi/tch/

Durrës-Kukës, Berisha e Erdogan presin shiritin

Kryeministri shqiptar dhe kryeministri turk presin shiritin e inagurimit të autostradës Durrës-Kukës- Morinë. Mungon kryeminsitri kosovar. Berisha: Autostrada, korridor i miqësisë, bashkëpunimit e integritetit rajonal. Erdogan: Do vazhdojmë te mbështesim Shqipërine e Kosovën...

Kryeministri Berisha e cilësoi si një ditë historike, inagurimin e autostradës Durrës-Kukës-Morinë. Ai e quajti autostradën si korridori i miqësisë dhe i bashkëpunimit.

“Sot inaguroj korridorin e kombit. Inaguroj autostradën Rrëshen-Kalimash e cila, përbën veprën më të madhe pas anetaresimit të Shqipërisë në NATO dhe pavarësisë së Kosovës për mbarë kombin shqiptar”, tha kryeministri Berisha në fjalën e tij në podiumin e ngritur në hyrje të një mbikalimi të autostradës.

Ai i shprehu mirënjohje të thellë homologut turk, Recep Tayyip Erdogan për pranimin e ftesës e cila është shenjë e solidaritetit dhe miqësisë mes dy vendeve.

Tuneli- tha Berisha- do të shndërrohet në faktor të madh të bashkëpunimit dhe integrimit rajonal. “Qytetarë të Kosovës ju sot merrni një shpërblim të madh për luftrat tuaja për liri dhe dinjitet kombëtar. Korridoi i kombit është dëshmia e madhe e madhështisë së lirisë e ndërtuar këtu në terrenin ndofta më të vështirë të planetit nga njëri prej kombeve që prej 15 vitesh renditej ndër më të varfrit në botë”.

Kryeministri turk Erdogan nga ana e tij tha se autostrada është një kryevepër, një nismë e madhe insfrastrukturore e ndërtuar nga një firmë turke, Bechtel Enka.“Kjo rrugë është e rëndësishme dhe kryevepër shumë e madhe. “Jemi krenarë që është realizuar një vepër e tillë në një terren të tillë malore në Shqipërinë tonë mike e alate”- tha Erdogan gjatë fjalës së tij përshëndetëse.

Kryeministri turk u shpreh i bindur se parteriteti mes dy vende do të vazhdonte dhe do të forcohej më shumë ndërsa ftonte investitorët turq të hapnin biznese ne Shqipëri.“Ne jemi të gatshëm te bëjmë cdo gjë për dhe të ndihmojmë për mirëqënien dhe stabilitetin e Shqipërisë dhe të Kosovës” -shtoi Erdogan

Mungon Thaçi

Kryeministri kosovar Hashim Thaci mungon në ceremoninë e përurimit të një njërit krah të autostradës Durrës-Kukës-Morinë e cila po zhvillohet këto momente në hyrje të mbikalimit të parë të kësaj autostrade.

Zyra e medias pranë Kryeminsitrit shqiptar Sali Berisha bën të ditur se shkak i mungesës së Hashim Thacit është agjenda e tij, për të cilën kishte planifikur një udhëtim në SHBA. Por në agjendën e publikuar online në faqen zyrtare të kryeministrisë kosovare nuk është shënuar as ceremonia e autostradës Durrës- Kukës-Morinë dhe as vizita në SHBA.

Punimet për këtë autostradë nisën mbi dy vjet më parë. Për segmentin Rrëshen- Kalimash, një ndër më të vështirët e autostradës Durrës-Kukës-Morinë, ku përfshihet dhe tuneli Thirrë-Kalimash, i ndërtuar në një terren shkëmbor, punoi firma amerikano-turke Bechtel-Enka.

Durrës-Kukës Morinë do të shkurtojë me 65 kilometra distancën Shqipëri-Kosovë. Nga 330 që ishte distanca Tiranë-Prishtinë, me përfundimin e kësaj rruge ajo do të jetë 265 kilometra dhe më së shumti atë e shkurton tuneli Thirrë- Kalimash, më i madhi në Ballkan. Përgjatë autostradës Durrës- Kukës-Morinë janë ndërtuar 29 ura, më e larta e të cilave është 80 metra. /TCH/Balkanweb/

UNDP dhe MTI sot diskutojnë rreth politikave të tregtisë në Kosovë

Programi për Zhvillim i Kombeve të Bashkuara (UNDP), në bashkëpunim me Ministrinë e Tregtisë dhe Industrisë do të organizojnë sot një punëtori, ku do të diskutohet për politikat tregtare të Kosovës, vlerësimin e nevojave për institucionet e Kosovës për politika të tregtisë dhe planin përkatës për ngritjen e kapaciteteve institucionale.

Gjatë punëtorisë do të prezentohen dokumenti i rishikuar mbi politikat tregtare të Kosovës dhe të dhënat mbi vlerësimin e nevojave për institucionet e Kosovës për politika të tregtisë dhe do të diskutohet rreth përmirësimit të mëtutjeshëm tyre.

Në këtë takim do të marrin pjesë edhe Ministri i Tregtisë dhe Industrisë, Lutfi Zharku, Drejtori i UNDP së, Maurice Dewulf, si dhe zyrtarë të Ministrisë dhe UNDP së, dhe përfaqësues të komunitetit donatorë.

Barroso: BE-ja përgatitet për ndërprerje të furnizimit të gazit

Bashkimi Evropian (BE) doemos duhet të përgatitet mirë për ndërprerje të mundshme të furnizimit të gazit rus, deklaroi kryetari i Komisionit Evropian, Jose Manuel Barroso.

"Me vazhdimin e "kontestit të gazit" midis Rusisë dhe Ukrainës rreth çmimit të tranzitimit të gazit, BE-ja doemos duhet të jetë e përgatitur për më të keqen, gjegjësisht për ndërprerje të re të furnizimit të gazit", vlerësoi Barroso.

Ai u angazhua për përmirësimin e infrastrukturës, e cila do të mundësonte furnizim të papenguar të gazit "atje ku është i domosdoshëm".

Barroso propozoi t`i kushtohet më shumë vëmendje ndërtimit të depove të reja nëntokësore të gazit në Evropë dhe të rriten rezervat e naftës si karburant alternativ. /Makfaks/

BERZH: Kujdes nga optimizmi i tepruar

Banka Evropiane për Rindërtim dhe Zhvillim (BERZH) paralajmëroi për optimizmin e tepruar lidhur me jetësimin e ekonomisë botërore.

Kryetari i BRDZH-së Thomas Mirow, theksoi se duhet pasur kujdes nga optimizmi i tepruar, duke paralajmëruar se pasojat sociale nga kriza ekonomike do të vijnë me vonesë dhe pa dyshim do të jenë të vrazhda.

Sipas tij, jetësimi ekonomik do të mund të prishej me problemet rreth pagesës së borxheve.

Mirow parashikon se vendet e Evropës Qendrore dhe Lindore sivjet do të shënojnë rënie të ekonomive prej 4 deri 15 për qind, publikoi agjencia Bloomberg. /Makfaks/

Financial Times: Hapet autostrada spektakolare e shqiptarëve

Për Kosovën, thotë e përditshmja britanike, kjo rrugë përbën një linjë jetike, në lidhje me tregtinë. Kjo autostradë do të shkurtojë largësinë mes Prishtinës dhe Tiranës në dy orë, në një kohë që do të eleminojë trafikun. Financial Times shkruan se ndërtimi i saj përbënte sfidën më të madhe në korridorin që lidh portin e Durrësit me pjesët e tjera të Ballkanit.

Projekti kolosal i qeverisë shqiptare, autostrada Durrës-Kukës ka zënë sërish faqet kryesore të mediave botorërore.

Në një shkrim të sajin, prestigjozja Financial Times shkuan, se sot hapet seksioni spektakolar prej 61 kilometrash i rrugës që kalon nëpër malet e Shqipërisë, duke krijuar kështu një lidhje strategjike mes shqiptarëve të të dyja vendeve.

Në hapjen e tunelit, kryeministri i Kosovës, Hashim Thaçi e cilësoi rrugën si “autostradën e shpresës, besimit dhe zhvillimit të shqiptarëve”. Shqipëria, shkruan Financial Times, shpreson se rruga po ashtu do të sjellë numër të madh turistësh.

Vetëm vitin e kaluar për periudhën janar- gusht 2008, Shqipëria u vizitua nga 2 milion e 700 mijë persona, pjesa më e madhe e të cilëve vinin nga Kosova e Maqedonia. Seksioni i ri i autostradës, i financiuar nga qeveria shqiptare ndërtimin e një tuneli 5.6 km me dy hyrje dhe ura që së bashku arrijnë një gjatësi prej 4 kilometrash.

Për Kosovën vazhdimi i ndërtimit të rrugës vlerësohet se do të kushtojë rreth 650 milionë euro. Qeveria e Kosovës është shprehur se prioritet do të jetë ndërtimi i 15 kilometrave rrugë deri në Prizren.

Gazeta shkruan ndër të tjera se hapja e kësaj rruge për kryeministrin Berisha përbën një shans më tepër në zgjedhjet parlamentare të së dielës. Kjo është një arritje e madhe për vendin, përfundon gazeta britanike.

Trusti ka kthyer 30 milionë euro

Guvernatori i Bankës Qendrore, Hashim Rexhepi vlerësoi se edhe në vitin 2009 ka rritje të depozitave, kreditimit mirëpo jo si në vitin 2008. “Problemet kanë filluar të shfaqen në sektorin real të ekonomisë, në ato sektor që janë me ndikim më të vogël në rritjen ekonomike të Kosovës...”, tha Rexhepi.Sipas tij, kryesisht janë goditur eksportet e Kosovës, remitancat të cilat edhe pse tregojnë qëndrueshmëri kanë trend të uljes prej 5-9%.

Gjatë publikimit të raportit për vitin 2008 të BQK , vlerësohet se në vitin 2008 nuk është vërejtur kriza financiare globale në Kosovë, ndersa në 2009 vendi do të përballet me sfida me te medha ndërsa problemet edhe pse në masë jo të lartë kanë filluar të shfaqen në sektorin real të ekonomisë, si në eksport, remitanca dhe në investime.

Gurvenatori Rexhepi vlerësoi se edhe sektori i investimeve është “prekur pak” nga kriza financiare globale dhe mund të ketë impakt të caktuar në dinamikën e zhvillimeve. Sipas Rexhepit kanë paralajmëruar se viti 2009 do të jetë vit më i rëndë për shkak të ambientit të përgjithshëm ndërkombëtarë që është krijuar për shkak të krizës financiare ndërkombëtare.

Sipas tij, Trusti Pensional pas zgjedhjes së bordit është funksional dhe ajo çfarë theksoi se është inkurajuese për të gjithë është fillimi i funksionimit të tregjeve financiare ndërkombëtare dhe performimi i tyre i mirë.

Ai njoftoi se nga muaji mars kthimi nga investimet e Trustit kanë shënuar vazhdimisht rezultate pozitive, kështu që për tre muaj u tha se ka pasur kthime pozitive diku rreth 30 milionë euro.

Vitin e kaluar ky institucion kishte humbur rreth 100 milion euro, pas renies se aksioneve.

Ndryshe, në raportin për vitin 2008 thuhet se në këtë vit me gjithë shtrirjen ekonomia e Kosovës kishte një rritje reale të Bruto Produktit të Brendshëm prej 5.4%.

“Sektori financiar i Kosovës vazhdoi me performancë të kënaqshme. Gjatë vitit 2008 sektori bankar i cili vazhdon të zë vendin kryesor në sistemin financiar të Kosovës, kishte një normë vjetore të rritjes së depozitave prej 26.4% dhe kredive 32.7%, duke financuar në masë të madhe konsumin dhe investimet e sektorit privat”, thuhet në raportin e BQK për vitin 2008. /Telegrafi/

OEK çertifikohet me ISO Standardin 2001:2008

Pas një angazhimi të gjatë dhe të gjithanshëm Oda Ekonomike e Kosovës është çertifikuar sipas standardit IS0 9001:2008 për Menaxhim të Cilësisë në ofrimin e shërbimeve.

Me këtë rast, sekretari i Përgjithshëm të OEK-ut, Berat Rukiqi deklaroi se ky çertifikim përfshin fusha të rëndësishme të ofrimit të shërbimeve për komunitetin e biznesit dhe tregon se OEK ka arritur profesionalizëm që është i matshëm në nivel ndërkombëtar dhe i përgjigjet nevojave të sektorit privat në Kosovë.

“Procesi i çertifikimit ka filluar në shtator të vitit 2008 me përkrahje të GTZ-së dhe ka përfunduar në një afat rekord duke ju falënderuar angazhimit intensiv të stafit të OEK-ut”, ka theksuar Rukiqi.

Ceremonia zyrtare e çertifikimit do të organizohet me 19 gusht në Prishtinë. /Telegrafi/

Prodhuesit dhe përpunuesit e mishit kërkojnë ndryshim të ligjit

Shoqata e prodhuesve dhe përpunuesve të mishit në mbledhjen e mbajtur sot ka vlerësuar se udhëzimi administrativ 07/2009 krijon monopole në lëmine e prodhimit, përpunimit dhe importimit të mishit, është në kundërshtim me ligjet në fuqi dhe si e tillë është i pa pranueshme.

“Kërkojmë publikisht nga nënshkruesi i këtij udhëzimi Kryeministri Hashim Thaqi që të anulojë menjëherë këtë udhëzim administrativ, si udhëzim i njëanshëm i pabazuar, përbuzës për kompanitë vendore dhe në kundërshtim me premtimet e qeverisë për zhvillim të ekonomisë vendore, hapjen e vendeve të reja të punës dhe favorizim e të gjithë asaj që quhet vendore”, u konludua në mbledhjen e mbajtur sot në Odën Ekonomike të Kosovës (OEK).

Kryetari i SHPPM-së Burim Piraj ka vlerësuar se udhëzimi ka përmbajtje të cilat janë të papranueshme për importuesit dhe përpunuesit e mishit si dhe për qytetarët e Kosovës.

“Në mungesë të informatave të drejtpërdrejta nga AUV ne e thirrëm një takim në OEK ku do të diskutojmë në lidhje me këtë udhëzim dhe në lidhje me rrethanat që do të krijonte zbatimi i kësaj rregulloreje”, tha Piraj.

Sipas Piraj, që u përkrah edhe nga pjesëmarrësit tjerë me këtë udhëzim e drejta e importit ju jepet kompanive të huaja, gjë e cila jo që do të dëmtojë vetëm buxhetin por do të shkurtoj dhe shumë vende të punës në Republikën e Kosovës.

“Udhëzimi administrativ 07/2009 është më ekstrem se ai Rus për arsye se i përjashton kompanitë vendore në import të këtyre produkteve”.

Prodhuesit dhe përpunuesit e mishit shprehen besimin se vërejtjet e tyre do të merren seriozisht dhe se Qeveria do të ndryshon këtë urdhëresë administrative. /Telegrafi

S’ka më udhëtime zyrtare me para kesh

Është bërë prezantimi i implementimit të projektit të shpërndarjes së kredit kartelave për udhëtime zyrtare për zyrtarët e organizatave buxhetore. Prezantimin e këtj projekti e bëri Ministri i Ekonomisë dhe Financave, Ahmet Shala, së bashku me zëvendëskryeministrin, Ramë Manaj, ministrin e Shërbimeve Publike, Arsim Bajrami dhe ministrin e Punës dhe Mirëqenies Sociale, Nenad Rashiq.

Në një njoftim zyrtar të MEF-it thuhet se, deri më tani zyrtarët e organizatave buxhetore me rastin e udhëtimeve zyrtare, avancet për udhëtime i kanë tërhequr në para të gatshme dhe të gjitha shpenzimet i kanë paguar me para të gatshme.

“MEF, përmes një Udhëzimi Administrativ, ka krijuar kushte që kjo mënyrë e menaxhimit të avanceve për udhëtime zyrtare të zëvendësohet më përdorimin e kredit kartelave.

“Ky është një projekt i veçantë ngase ofron më shumë mundësi që paraja publike të menaxhohet më mirë, gjithashtu do të dihet në çdo moment se si po shpenzohen mjetet financiare të taksapaguesve”, pohoi ministri i MEF-it, Ahmet Shala me rastin e prezantimit të këtij projekti.

Ndërkaq Zv/ministri Ramë Manaj, u shpreh se përmes këtij projekti Qeveria e Kosovës, do të hyjë në një etapë më të avancuar, e cila do të mundësojë rritje të transparencës për shpenzimet e avanceve për udhëtimet zyrtare .

“Me implementimin e këtij projekti Qeveria e Kosovës po e përmbushë premtimin e bërë për ngritjen e transparencës në nivelin më të avancuar të mundshëm”.

Fillimisht posedues të Kreditë kartelave do të jenë, Presidenti i Republikës së Kosovës, Kryetari i Kuvendit, Anëtarët e Kryesisë së Kuvendit, Kryeministri, Zëvendës Kryeministrat, Ministrat, Zëvendësministrat dhe Zyrtarët e tjerë të organizatave buxhetore të përcaktuar me Udhëzimin Administrativ.

Në bazë të marrëveshjes dhe udhëzimit administrativ implementimi i këtij projekti do të bëhet në bashkëpunim me Raiffeisen Bank. /Telegrafi/

BE, 20 milionë euro për linjën Serbi-Greqi

Studimet e fundit kanë dalë me konkluzionin se mungesa e linjave transmetuese për energjinë elektrike, si dhe kapaciteti i tyre ndikojnë në ecurinë e tregtisë rajonale mes vendeve të Ballkanit.

Për këtë shkak, Bashkimi Evropian ka bërë gati fondin 20 milionë euro për ndërtimin e linjës energjetike mes Serbisë dhe Greqisë. Projekti parashikon fuqizimin e kapacitetit për linjat e tensionit të lartë dhe shtrihet nga Leskovaci, Serbi, e deri në Greqi, ku parashikohet një depërtim përmes Shqiperisë.

Lajmin e ka konfirmuar ambasadori i Komisionit Evropian për Serbinë, Josep Lloveras, referuar agjencise “Beta”. “Ky rajon ka mundësi të mëdha zhvillimi, por i nevojitet një sistem elektrik i fuqishëm për bizneset e këtyre vendeve. Linja e re elektrike do të lidhë Leskovacin me disa zona të tjera të Serbisë, Shqipërisë dhe Greqisë”, deklaroi Lloveras.

Ndërkaq, ministri serb i Energjisë, Petar Skundric, shtoi se linja elektrike do të kontribuojë në afat të gjatë për stabilizimin e rajonit me energji elektrike.

Projekti i ri energjetik parashikon të fuqizojë së tepërmi rolin e Serbisë në rajon, ndërsa Shqipërisë i duhet të përfundojë sa me shpejt ndërtimin e linjave 400 kilovolt Tiranë-Podgoricë, të nisura kohë me parë, por që ende nuk kanë përfunduar. /Telegrafi/tch/

Ekonomia amerikane vazhdon rënien

Ekonomia amerikane po pëson rënie, por me ritme më të ulëta se ç’mendohej më parë, megjithatë numri i të papunëve vazhdon të rritet.

Raporti i publikuar sot nga Departamenti i Tregtisë tregon se prodhimi i brendshëm bruto ra 5.5 për qind sipas ritmit vjetor në tre muajt e parë të vitit, një rënie që është zero presje 2 përqind më e vogël se ç’ishte parashikuar.

Prodhimi i brendshëm bruto është një llogaritje e të gjithë artikujve dhe shërbimeve të prodhuara në vend dhe është matësi më i madh i mbarëvajtjes së ekonomisë.

Një tjetër raport nga Departamenti i Punës tregon se tregu amerikan i punës është keqësuar disi më shumë.

Numri i amerikanëve që kërkuan kompensime për papunësinë për herë të parë u rrit me 15 mijë vetë javën e kaluar duke arritur 627 mijë vetë. /voa/

Bankat Qendrore të rajonit diskutojnë për krizën globale, por jo edhe BQK-ja

Guvernatorët e Bankave Qendrore të vendeve të rajonit, përveë Bankës Qendrore të Kosovës, janë mbledhur në Malin e Zi për të diskutuar për krizën globale.

Efektet e kësaj krize në ekonomitë e rajonit ka qenë edhe tema e diskutimeve në Samitin Rajonal të Guvernatorëve dhe Bankierëve me temë “Masat kundër krizës globale në sektorin financiar”.

Banka e Shqipërisë ka njoftuar se në këtë samit merrnin pjesë guvernatorët e bankave qendrore të Bosnje Hercegovinës, Malit të Zi, Maqedonisë, Serbisë, si dhe shumë drejtues të lartë të bankave, grupeve bankare dhe institucioneve financiare kryesore që operojnë në rajon, duke u anashkaluar kështu Guvernatori i BQK-së, Hashim Rexhepi.

Fokusi i këtij samiti ishte rritja e bashkëpunimit midis institucioneve financiare në rajon dhe shkëmbimi i eksperiencës në parandalimin dhe zbutjen e efekteve të krizës aktuale globale, me qëllim rigjallërimin e sistemit bankar dhe ekonomive të vendeve të rajonit.

Operatorët turistikë në alarm: Muaji qershor na ka falimentuar biznesin

Hotelet nga Durrësi në Sarandë nuk kanë regjistruar asnjë klient. Fushata elektorale, kriza dhe reshjet shkaqet e mungesës së turistëve.

Operatorët turistikë të vendit kanë dhënë alarmin se janë në prag të falimentimit nisur nga ecuria e dobët e zhvillimit të sezonit turistik dhe mungesa e turistëve. Ata kanë evidentuar dhe shkaqet kryesore që po e pengojnë ecurinë normale të kësaj industrie, duke kërkuar ndihmë nga shteti.

Sipas tyre, fushata elektorale, kriza botërore dhe reshjet kanë çuar në dështimin e muajit të parë të sezonit turistik në Durrës. Operatorët turistikë gjatë këtij muaji kanë strehuar nëpër dhomat e tyre vetëm 2 për qind pushues të kapaciteteve të tyre akomoduese, ose 8 mijë pushues. Shumica e këtij kontingjenti kanë qenë nxënës shkollash nga Kosova e Maqedonia, ndërsa pjesa tjetër kanë qenë pushues ditorë.

Ndërsa, pronarët e plazheve private deri tani nuk kanë nxjerrë as shpenzimet e ditës, e jo më fitime. Operatorët turistikë evidentojnë tre, si shkaqet më kryesore që shënojnë shifrat më të ulëta të frekuentimit të turistëve në vitet e fundit. E para është fushata elektorale, e cila ka angazhuar mijëra e mijëra vetë, të cilët për momentin e kanë harruar plazhin.

E dyta është kriza ekonomike, e cila ka detyruar mjaft pushues që ta shtrëngojnë dorën, dhe e treta është prishja e motit gjatë javës së fundit. Shoqëritë turistike dhe pronarët e komplekseve turistike shpresojnë që përfundimi i zgjedhjeve dhe përmirësimi i motit të risjellë turistët.

Australianët kërkojnë një minierë kromi në Shqipëri

Menaxheri për Shqipërinë i JAB RESOURCES, Resmi Kamberaj deklaroi se nga puna dhe studimet e thelluara të kryera deri tani nga ekspertët australianë, pritet që kompania të prodhojë fillimisht 100.000 tonë koncentrat kromi, gjë që konsiderohej e pamundur të realizohej më parë nga përmbajtja e ulët e xeheroreve, duke arritur kështu një shfrytëzim sa më racional të kromit në Shqipëri.

Kompania australiane JAB RESOURCES LIMITED ka aplikuar për hapjen e një miniere të re kromi në zonën e Kalimashit, e cila pritet të ofrojë standarde të reja sigurie dhe mjedisore në Shqipëri me praktika pune të standardeve ndërkombëtare. Aplikimi për marrjen e kësaj leje u krye ditën e premte më datë 19 qershor 2009, 18 muaj pas studimeve paraprake, përfshi punimet e zbulimit dhe studimet e fizibilitetit me një kosto totale prej 3 milionë dollarësh.

Studimet e kryera nën supervizimin e ekspertëve australianë vërtetuan se JAB RESOURCES paraqet një përqasje të re në shfrytëzimin e rezervave të xeherorëve të kromit, të cilat priten të sjellin një përdorim sa më optimal të kromiteve në Shqipëri, se sa në të kaluarën.

JAB do të prezantojë teknika të mekanizimit të lartë të nxjerrjes së kromit, të cilat do të lejojnë shfrytëzimin e xeherorëve me përmbajtje deri në 2% kromite deri tani të lëna pas dore si nga procesi i shfrytëzimit, ashtu edhe nga kërkimet e bëra në të kaluarën. Nga studimet e kryera deri tani JAB ka përvijuar rezervat që do të shfrytëzohen në përputhje me standardet ndërkombëtare.

Rezervat minerale të përcaktuara nga JAB janë të parat në Shqipëri që plotësojnë kushtet e standardit JORC, një sistem ndërkombëtar i klasifikimit të rezervave minerare, i përdorur në vendet e Azisë dhe Australi.

Shfrytëzimi i rezervave minerale me përmbajtje të ulët lejojnë që të nxirret më shumë krom nga vendburimet minerale. Teknikat unike të kompanisë do të bëjnë të mundur nxjerrjen e kromit 5 deri 10 herë më shumë se sa ka qenë e mundur nga praktikat e mëparshme.

Miratohet Ligji mbi Partneritetet Publiko Private dhe Koncesionet

Kuvendi i Kosovës miratoi sot “Ligjin mbi Partneritetet Publiko Private dhe Koncesionet në Infrastrukturë dhe Procedurat për dhënien e tyre”. Në vazhdimësi të reformimit strukturor të ekonomisë, Partneritetet Publiko Private i ofrojnë Kosovës mundësinë për të modernizuar dhe zgjeruar infrastrukturën dhe shërbimet e saja publike dhe do të hapin derën për zhvillimin e saj të qëndrueshëm ekonomik duke lehtësuar kufizimet fiskale.

Bazuar në një njoftim zyrtar të Ministrisë së Ekonomisë dhe Financave (MEF), Partneritetet Publike Private si mjet bashkëkohorë i politikave do t’i mundësojnë Qeverisë së Kosovës uljen e hendekut në mes të fondeve publike në dispozicion dhe kostos së infrastrukturës dhe shërbimeve publike të nevojshme.

“Brenda prizmit të opsioneve të PPP-së, ekziston një numër i pafund i strukturave potenciale të transaksionit të PPP-së si kontratat menaxhuese, koncesionet, skemat e ndërtim-operim-transferimit, etj”.

Tutje në po të njëjtin njoftim zyrtar, thuhet se aprovimi i këtij ligji, përmes infuzionit të kapitalit dhe ekspertizës menaxheriale nga ana e sektorit privat, do ti jap shtytje efikasitetit, duke e bërë Kosovën më konkurruese me vendet tjera në rajon.

“Ligji mbi PPP-të është tërësisht në pajtim me dispozitat legjislative model të UNCITRAL-it dhe EBRD-së, dhe me direktivat e BE-së lidhur me PPP-të dhe koncesionet. Ligji është i favorshëm për investitorët dhe do të krijojë një kuadër lehtësues si për qeverinë qendrore ashtu edhe për autoritetet komunale në implementimin dhe zgjerimin e infrastrukturës dhe shërbimeve publike”

MEF po ashtu ka njoftuar se Ligji në fjalë krijon edhe dy organe kompetente përbrenda administratës publike Komisionin Drejtues Ndër-Ministror (KDNM – PPP) dhe Njësinë e Centralizuar të PPP Partneritetet Kosova.

“KDNM PPP e përbërë nga 3 ministra dhe një përfaqësues të emëruar nga kryeministri, e kryesuar nga ministri i MEF-it, themelohet për kontrollimin dhe koordinimin e Projekteve të PPP në të gjithë sektorët ekonomik dhe shoqëror”.

Duhet cekur se ky ligj nuk do të zbatohet për privatizimin ose heqjen e të drejtës së një infrastrukture publike ose ndërmarrje publike, e as për miniera, minerale, të drejta nëntokësore dhe për të drejtat e hapësirës ajrore. /Telegrafi/

Banja e Kllokotit, plotëson investimet

Ndonëse po mbushet një vit që nga marrja e përgjegjësive, Agjencia Kosovare e Privatizimit ende nuk ka arritur të privatizojë ndërmarrjet shoqërore në vendbanimet me shumicë serbe.

Por, drejtori i Bordit të AKP-së, Dino Hasanaj, nuk pranon që AKP-ja ka dështuar në këtë drejtim, duke thënë se do të përmbushin mandatin e tyre dhe do të privatizojnë të gjitha ndërmarrjet brenda territorit të Kosovës. Komentet ai i bëri pas takimit të sotëm të Bordit të drejtorëve të AKP-së.

Gjithashtu propozimin e menaxhmentit të AKP, Bordi i Drejtorëve sot mori vendimin që të liroj nga raportimi i mëtutjeshëm për investime dhe punësim Ndërmarrjen e Re Banja e Kllokotit.

Propozimi i menaxhmentit për lirim nga obligimi për raportim të Ndërmarrjes së Re Banja e Kllokotit erdhi si rezultat i përmbushjes së zotimeve për punësim dhe investime nga ana e pronarit të ndërmarrjes.

Në këtë takim të Bordit të Drejtorëve gjithashtu janë aprovuar “Listat Finale” të punëtorëve të pranueshëm për 20% në lidhje me Ndërmarrjet “Birraria e Pejës,” Pejë; “Plantacioni i Pemëve,” Ferizaj; dhe “Kosovarja,” Prishtinë; pas shqyrtimit të të gjitha ankesave nga Komisioni për Shqyrtimin e Ankesave të Punëtorëve pranë AKP-së.

Këto Lista do të publikohen në përputhje me dispozitat ligjore në fuqi, dhe të gjitha ankesat eventuale pas publikimit të tyre mund t’i drejtohen Odës së Veçantë të Gjykatës Supreme të Kosovës.

Një vendim tjetër i Bordit të Drejtorëve ishte edhe aprovimi i valëve 38 dhe 39 të privatizimit, si dhe aprovimi i rezultateve të valës së 35-të të privatizimit.

Mbledhja e ardhshme e Bordit të Drejtorëve do të mbahet në fund të muajit korrik.rtk/telegrafi/

Fiati, interes ndaj Opelit, por jo ofertë të re

Fiati është ende i interesuar për Opelin, por nuk do të paraqesë një ofertë të re. Kështu është shprehur administratori i grupit, Marchionne pas takimeve të fundit në Detroit për të shpejtuar programet me Chrysler.

Deklaratat e tij kanë ardhur pasi shtypi gjerman ka folur për prezantim të ofertave të reja me të detajuara për Opelin nga ana e katër konkurrentëve të interesuar për blerjen e kompanisë.

“Nuk besoj se mund të përmirësohet oferta e Fiatit”, është shprehur Marchionne.

Bien gurë në tunelin e Kalimashit

Automjetet që janë nisur për të udhëtuar drejt Kukësit janë ndalur duke mos u lejuar të hyjnë brenda në tunel.

Shkak për këtë ka qenë një rënie gurësh brenda në tunel.

Bëhet e ditur se në një gjatësi prej 1 kilometri brenda tunelit, nuk është realizuar betonimi dhe si rrjedhojë është vënë rrjetë mbrojtëse.

Por ndërkohë në këtë pjesë ka nisur rënie e gurëve, çka ka bërë që të mos lejohet futja e automjeteve brenda në tunel.

Ende nuk ka të dhëna të mëtejshme, ndërsa pritet që të vërtetohet se cili ka qenë shkaku kryesor për këtë problem të menjëhershëm pas përurimit që i bëri dje Kryeministri Berisha aksit Rrëshen - Kalimash.

Nderkohe qe Ministria e Transporteve ne nje reagim te vone, ka deklaruar se nuk ka probleme me qarkullimin dhe se tuneli dhe rruga funksionojne normalisht. /Shekulli/

Të hënën Kosova zyrtarisht e FMN-së

Kosova bëhet javën që vjen zyrtarisht anëtari më i ri i FMN. Fondi Monetar Ndërkombëtar njoftoi se shteti i ri i Kosovës bëhet anëtari i 186 i kësaj organizate financiare.

Në një konferencë për shtyp, Alistir Tomson zëdhënësi i FMN-së tha se diten e hënë autoritetet kosovare firmosin dokumentat e fundit të marrëveshjes me FMN-në.

Fondi Monetar Ndërkombëtar i ka ofruar Kosovës, vendit me të varfër në Evrope anëtarësim, që muajin e shkuar.

Për Kosovën qenia anëtar i FMN-së është një arrije e madhe pasi vendi ende nuk njohet nga gjithë anëtarët e OKB-së.

Kosova u bë e pavarur në 17 shkurt 2008 dhe është njohur nga 60 vende përfshi dy të tretat e BE-së.

Kosova shpreson shumë shpejt të bëhet dhe anëtar i Bankës Botërore. Përfitimi do të jetë terheqja e huave nga këto organizata financiare për të mëkembur ekonominë e vendit. /balkanweb/

Kosova ende pa ligjin e punës

Kosova ende nuk ka ligjin e saj të punës, ndërsa shkalla e papunësisë është shumë e lartë, ndërsa ata që punojnë nuk ka kush t’i mbrojë. Qeveria thotë se është duke hartuar një ligj të zbatueshëm e funksional që do të ketë përparësi zbutjen e papunësisë, ndërsa sindikalistët thonë se ligji duhet të përfshijë edhe sigurimin e kushteve më të mira për ata tashmë që kanë një vend pune.

Kryetari i Bashkimit të Sindikatave të Pavarura të Kosovës, Haxhi Arifi, tha në një bisedë për Zërin e Amerikës, se më të goditurit nga mungesa e ligjit të punës janë ata që punojnë në sektorin privat në të cilin janë të punësuar rreth 250 mijë punëtorë, të cilët në të shumtën e rasteve nuk kanë kontratë pune, nuk kanë mbrojtje në punë e as mbrojtje shëndetësore.

Ministri i Punës dhe Mirëqenies Sociale në qeverinë e vendit, Nenad Rashiq tha se Ligji i punës duhet të jetë në pajtim me standardet ndërkombëtare në mënyrë që të jetë i dobishëm. Ai thotë se tash për tash më e rëndësishmja është që të ulet shkalla e papunësisë.

“Nëse tash kemi sipas të dhënave zyrtare papunësinë në shkallë prej 44 për qind, atëherë çfarë kuptimi do të kishte ligji nëse kjo përqindje është vazhdimisht e tillë. Prandaj përparësi e qeverisë është pikërisht kjo zbutje e papunësisë”, tha Rashiq

Arifi ndërkaq tërheq vërejtjen se shkalla e papunësisë është edhe më e lartë. “Realiteti është përmbi 60 % janë të papunë, ata që evidentohen në entin e punësimit janë statistika që i grumbullojnë entet por ne kemi punëtorë që i kanë humbur të gjitha shpresat që të gjejnë një vend pune përmes enteve d.m.th ku shkojnë e lajmërohen dhe është një përqindje bukur e madhe edhe 15 % shkojnë e lajmërohen atje, për atë themi se afër 60 % sot i kemi të papunësuar në Kosovë”, tha Arifi.

Kjo shkallë e papunësisë ka kushtëzuar një shkallë të lartë edhe të varfërisë që përfshinë gati gjysmën e popullsisë së vendit. Autoritetet shpresojnë se me anëtarësimin e vendit në Bankën Botërore dhe Fondin Monetar Ndërkombëtarë mund të sigurohet më shumë mbështetje financiare ndërkombëtare për rimëkëmbjen ekonomike të vendit.

Të hënën, presidenti Fatmir Sejdiu dhe kryeministri Hashim Thaçi do të nënshkruajnë edhe zyrtarisht anëtarësimin e Kosovës në Fondin Monetar dhe Bankën Botërore. /VoA/

Përgënjeshtrohet lajmi për shembjen e gurëve në tunelin e Kalimashit

Ministria e Transporteve në Shqipëri ka përgënjeshtruar raportin e televizionit News24, i cili të shtunën ka raportuar për shembjen e gurëve në tunelin Rrëshen–Kalimash, lajm i cili është botuar më pastaj në shumë media në gjuhën shqipe.

Drejtori i Përgjithshëm i Rrugëve, Andi Toma në konferencën për shtyp, të shtunën, u shpreh se: “Në tunelin Rrëshen-Kalimash nuk ka asnjë shembje, as një aksident”.

Kjo,sipas Tomas, “është një përpjekje mjerane në vrazhdën e përpjekjeve denigruese ndaj veprës më të madhe të kombit. Është përpjekja e fundit, sipas tij, përpara humbjes së përkrahësve të tyre politikë.

Operatori ndërkombëtar ka konfirmuar që çdo gjë është normale. “Ju garantoj që qytetarët ecin në siguri të plotë në tunel. Tuneli është vënë në shfrytëzim brenda standardeve të sigurisë”, ka thënë Toma. /Telegrafi/

Kriza në Kosovë, shqetësim vetëm remitencat

Me gjithë shtrirjen e krizës, autoritetet kosovare thonë se ekonomia e Kosovës, gjatë vitit 2008, kishte një rritje reale të produktit të brendshëm bruto prej 5.4 %. Rritja ekonomike në vitin 2008, sipas tyre, u gjenerua nga rritja e konsumit privat dhe e investimeve publike, të cilat, në masë të madhe, u financuan nga kreditë e sektorit privat, dërgesat e emigrantëve, rritja e konsiderueshme e shpenzimeve publike, si dhe nga asistenca e jashtme.

Ministri i Ekonomisë dhe Financave, Ahmet Shala, thotë se nga indikatorët ekonomikë që përcjellin, në baza ditore, trendët e krizës ekonomike, nuk ka ndonjë shqetësim shumë të madh në indikatorët makroekonomikë, përveç në eksport, e që, në fakt, sipas tij, kjo fushë nuk ka qenë një faktor shumë signifikant në strukturën ekonomike të Kosovës.

“Të gjithë parametrat tregojnë se gjendja në sistemin bankar është stabile, depozitat janë rritur, kthimi i kredive është në rritje, kreditë e këqija janë në zvogëlim nga 4,9 në 3,2. Kjo nënkupton që biznesi kosovar është stabil”, thotë ministri Shala.

Ministri Shala thotë se shqetësim për kosovarët është mundësia e uljes së remitencave. Sipas tij, kjo do të vërehet varësisht se sa afekton kriza ekonomike kosovarët që janë duke punuar në botën e jashtme, si dhe nga tkurrja e investimeve të huaja ndaj projekteve për Kosovën.

“Deri më tani, nuk ka ndonjë shenjë të fuqishme që mund të paraqesë shqetësim. Ne kemi ndërtuar mekanizmat tonë intervenues për çdo rast, por shpresoj që kjo të mos ndodhë asnjëherë në vitet e ardhshme”.

”Shifrat e para të këndelljes ekonomike kanë filluar të shihen në horizontet botërore. Unë shpresoj që nga pjesa e dytë e këtij viti do të fillojë një rigjallërim apo një ndalje e trendit negativ botëror dhe me këtë Kosova do të kalojë më lehtë”, deklaroi zoti Shala.

Përkundër asaj që kriza ekonomike globale është në rënie e sipër të këtij recesioni, ekspertë për çështje ekonomike thonë se gjatë këtij viti, bizneset kosovare do të preken edhe më tepër nga kriza globale.

Eksperti për çështje ekonomike, Flamur Keqa, thotë se trendi i zvogëlimit të investimeve të jashtme, i cili ka vazhduar në vitin 2008 dhe i cili ka qenë më i ulët për 13 apo 14 për qind në krahasim me vitin 2007, do të vazhdojë edhe gjatë vitit 2009.

“Viti 2009 ka ende problem me ekonominë botërore dhe me ekonominë rajonale dhe interesi i këtyre vendeve për të investuar në Kosovë do të jetë më i vogël. Kështu që bizneset dhe ekonomia kosovare do të ndjejnë akoma krizën ekonomike globale”, thotë zoti Keqa.

Sipas tij, ekonomitë e huaja nuk do të jenë të interesuara që produktet kosovare t’i pranojnë në tregjet e tyre, sepse, siç thotë Keqa, secili shtet, duke filluar nga shtetet e zhvilluara industriale, është duke zhvilluar moton “Konsumoni produktet vendore”. /rel/

AAK reagon ndaj vendimit të qeverisë për importimin e mishit

Grupi punues për bujqësi pylltari dhe zhvillim rural i Aleancës për Ardhmërinë e Kosovës, e cilëson si të gabuar vendimin e qeverisë së Kosovës që tani e tutje importues të mishit në Kosovë të jenë vetëm kompanitë ndërkombëtare.

Ky subjekt politik ka shprehur brengosjen e saj edhe për gjendjen e përgjithshme, që sipas tyre është jo e mirë në sektorin e bujqësisë në përgjithësi.

Vendimi i Qeverisë së Kosovës që importues të produkteve me prejardhje shtazore në Kosovë të jenë kompanitë ndërkombëtare është gabim tha prof, Imer Rusinovci, udhëheqës i grupit për bujqësi pylltari dhe zhvillim rural i AAK-së.

Duke folur për gjendjen e kulturave bujqësore në Kosovë, të cilën e vlerësoi si të mjerë, Rusinovci tha se vendi ynë kategorizohet në grupin e shteteve importuese, duke eksportuar para të gatshme nga buxheti i saj.

Nevojat e Kosovës për prodhime ushqimore janë të mëdha tha ai dhe shtoi se mbi 50% e produktit bujqësor aktualisht në Kosovë vjen nga importi.

Sipas Rusinovcit, në Kosovë rreth 68% e sipërfaqeve të përgjithshme janë punuese dhe 32% janë kullosa, prandaj hartimi i programeve të qarta për zhvillimin dhe avancimin e sektorit të bujqësisë është çelësi kryesor i zhvillimit ekonomik. /rtv21/

Kina dhe Perëndimi i hyjnë luftës tregtare

Shtetet e Bashkuara të Amerikës dhe Bashkimi Evropian dorëzuan një padi në Organizatën Botërore të Tregtisë kundër kuotave të eksportit të lëndëve të para të vendosura nga qeveria kineze, duke dhënë shenja për një luftë tregtare në horizont.

Shumë vende po përpiqen të ndihmojnë prodhimin vendas gjatë kësaj krize, ndërsa ekspertët besojnë se një luftë tregtare mund ta zhysë botën më shumë në kaos dhe pasiguri ekonomike.

SHBA-të kanë miratuar një ligj shumë të debatuar, "Bli Amerikane", dhe Kina i është përgjigjur me një masë të ngjashme, "Bli Kineze".

Washingtoni ka dorëzuar një protestë diplomatike kundër ligjeve të Kinës për shitjen e kompjuterëve personalë. Por situata u përkeqësua ditët e fundit, kur BE dhe SHBA dorëzuan ankesa tek Organizata Botërore e Tregtisë kundër masave kineze për të ndaluar eksportin e qymyrit.

Ndalesa e eksportit e ka bërë qymyrin më të lirë në Kinë dhe ka favorizuar prodhimin vendas të çelikut e të mallrave të tjera energji-intensive, gjë që ka shqetësuar prodhuesit amerikanë e evropianë të këtyre mallrave.

"Kina po i bën lëndët e para më të lira për kompanitë e veta. Sot më shumë se kurrë tregtia është me rëndësi të jashtëzakonshme për të nxjerrë nga recesioni ekonominë tonë", tha Ron Kirk, përfaqësuesi i SHBA për tregtinë ndërkombëtare. Ministria kineze e Tregtisë hodhi poshtë akuzat.

"Ne synojmë thjesht të mbrojmë ambientin dhe burimet natyrore. Politikat tona janë në përputhje me rregullat e OBT-së", tha Pekini në një deklaratë.

Kina dorëzoi një ankesë tjetër në OBT kundër ndalimit amerikan mbi importin e pulave.

Jagdish Bhagwati, profesor në Universitetin e Kolumbias, mendon gjithsesi se ankesa e Uashingtonit për ndalimin e eksportit të qymyrit nga Kina ka pak gjasa të sjellë ndonjë përfi tim në OBT.

"Politikat aktuale proteksioniste të SHBA-ve nuk na japin shumë hapësira për t‘u ankuar kundër të tjerëve", tha ai.

Prishje në Kosova A –rikthehen reduktimet e energjisë në mbarë vendin

Për shkak të një defekti blloku 3 i Termocentralit Kosova A ka ndalur punën, duke shkaktuar kështu reduktime të ashpra në gjithë Kosovën, ndërkohë që kthimi në punë i këtij blloku pritet të bëhet më së largu deri pasnesër.

Zëdhënësi i KEK-ut, Viktor Buzhala, tha se aktualisht konsumatorët janë duke u furnizuar kategoria A 5:1, B 4:2 dhe kategoria C 3:3. /rtk/

OEK përshëndet vendimin mbi anulimin e tenderit të mishit

Oda Ekonomike e Kosovës e ka mirëpritur vendimin e Qeverise se Republikës se Kosovës mbi anulimin e tenderit për importin e mishit dhe prodhimeve të mishit i cili ka ardhur si rezultat i angazhimit dhe rekomandimit të komunitetit të biznesit dhe Këshillit Drejtues të OEK-ut.

Gjithashtu OEK-u zotohet që në partneritet me Qeverinë ti shpejtoj proceset e zhvillimit ekonomik të Kosovës.

Këshilli Drejtues i OEK-ut duke përkrahur politika e Qeverise për aplikimin e standardeve evropiane që sigurojnë cilësi për produktet që importohen në tregun e Kosovës i ka rekomanduar Qeverisë anulimin e tenderit dhe ka kërkuar që akreditimi i importuesve të mishit të bëhet në bazë të procedurave ekzistuese ligjore. /Telegrafi/

Termocentrali, kërkohet dorëheqja e Kryeministrit

Vendimi i marrë për projektin “Kosova C/e Re” nuk është një vendim që është marrë me nguti dhe që mund të rishikohet nga Qeveria e Kosovës apo nga Kryeministri Thaçi. Ai ka ardhur si një rezultat i një presioni shumëvjeçar ndaj Kosovës, presion të cilit nuk i rezistoi dot Qeveria e Kosovës, thuhet ne komunikatën e Lëvizjes për Bashkim.

Vendimi i fundit i Qeverisë së Kosovës – Kryeministrit Thaçi për projektin “Kosova C/e Re” është një vendim që i dëmton rëndë interesat ekonomike të së tashmes dhe së ardhmes së Kosovës. Pjesa më e hidhur, më e dëmshme dhe me efekte tepër negative edhe në zhvillimet e ardhshme politike të Kosovës dhe popullit të saj është pjesa e shitjes së pasurive nëntokësore të Kosovës. Shitja po kryet nën maskën e dhënies me koncesion. Dhënia me koncesion e minierës një miliardë tonëshe të thëngjillit për 40 vjet dhe shfrytëzimi i saj me kapacitet 2000 MW nuk është asgjë tjetër veçse shitje, thuhet tutje ne komunikate.

Sipas saj, pasuritë nëntokësore të një vendi janë pasuri kombëtare dhe ato nuk guxojnë t’iu shiten as pronarëve të huaj, as atyre vendorë. Ato duhet të mbeten pasuri kombëtare! Edhe shfrytëzimi i tyre duhet të bëhet me një politikë ekonomike racionale të bazuar në parimin e zhvillimit të qëndrueshëm që merr parasysh çështjet ekonomike, sociale, mjedisore dhe mosshterimin e mundësive për brezat e ardhshëm. Vendimi i djeshëm i qeverisë Thaçi është në kundërshtim të plotë me këtë parim dhe rrjedhimisht në kundërshtim të plotë me nevojat e zhvillimit të Kosovës.

Qeveria dhe PTK financojnë ndërtimin e 45 shtëpive

Kryeministri i Republikës së Kosovës, Hashim Thaçi dhe Kryeshefi ekzekutiv i Postë Telekomit të Kosovës, Shyqyri Haxha, kanë nënshkruar sot një Marrëveshje të mirëkuptimit për ndërtimin e 45 shtëpive për kategoritë e shoqërisë në gjendje të rëndë sociale.

Me këtë rast Kryeministri Thaçi është shprehur se marrëveshja e nënshkruar në mes të Qeverisë së Republikës së Kosovës dhe PTK-së përfshin përfundimin e një projekti për ndërtimin e 45 shtëpive për kategoritë e rrezikuara të shoqërisë kosovare, shtëpi për kategoritë pastrehë, për invalidët dhe veteranët e luftës, familjet e dëshmorëve, familje me gjendje të rëndë sociale, familje të viktimave të luftës dhe për familjet e minoriteteve.

“Ne do të vazhdojmë në mënyrë të pakursyer, të ndihmojmë në këtë drejtim brenda mundësive dhe kapaciteteve që kemi si Qeveri e Republikës së Kosovës dhe PTK”.

Ndërkaq Kryeshefi Ekzekutiv i PTK-së, Shyqyri Haxha u shpreh se në bashkëpunim me Qeverinë e Republikës së Kosovës, PTK-ja më në fund ofron një ndihmë prej afër gjysmë milion euro për ndërtimin e 45 shtëpive.

“Këto shtëpi, kryesisht do të jenë për familje të rrezikuara. Shpresojmë që të mos ketë familje të tilla në të ardhmen, por ne do të bëjmë çmos që t’i zbusim këto gjendje të vështira”. /Telegrafi/

Danimarka vendi më i shtrenjtë për jetesë në BE, Bullgaria vendi më i lirë

Nga 27 vendet e Bashkimit Evropian, Danimarka është vendi më i shtrenjtë për jetesë, me çmime konsumuese të cilat arrijnë 141 për qind krahasuar me mesataren e BE-së, ndërsa Bullgaria është vendi më i lirë me 51 për qind nga mesatarja, njoftoi Eurostat.

Krahasimi i çmimeve të mallrave nga konsumimi i gjerë dhe shërbimet në vitin 2008 ka treguar se Irlanda është në vendin e dytë mes vendeve më të shtrenjta, me çmime të cilat janë 127 për qind krahasuar me mesataren e Unionit.

Në listë pas Irlandës, pasojnë Finlanda, Luksemburgu, Suedia dhe Belgjika.

Çmimet në Gjermani janë 104 për qind krahasuar me mesataret, thekson Eurostat.

Hetimi ka treguar se çmime konsumuese më të ulëta, pas Bullgarisë, kanë vendet ish-komuniste nga Evropa Qendrore dhe Lindore - Rumania, Lituania, Polonia dhe Hungaria.

Turizmi bullgar, në krizë të thellë

Të ardhurat nga turistët e huaj në Bullgari pritet të ulen me 25 për qind në krahasim me vitin e kaluar, ndërkohë që bankat bullgare në fund të sezonit mund të detyrohen të marrin nën pronësi rreth 300 hotele private, si pasojë e falimentimeve të prodhuara nga kriza ekonomike, njoftoi dje media vendëse.

Rreth 20 për qind e hoteleve bregdetare të Bullgarisë janë mbyllur sakaq dhe industria e turizmit ka shënuar një rekord dhomash të padhëna me qira prej 60 për qind të totalit, deklaroi Rumen Draganov, kreu i Institutit për Analizimin dhe Vlerësimin e Turizmit.

Në vitin 2008, Bullgaria fitoi rreth 2.4 miliardë euro nga turistët e huaj, por këtë vit fitimet pritet të ulen në 1.9 miliardë euro. Përveç krizës ekonomike, ekspertët akuzojnë si përgjegjës edhe shërbimet e këqija turistike, si dhe investimet joeficente të kryera gjatë viteve të fundit.

Draganov beson se një numër gjithnjë e më i madh pronarësh hotelesh në Bullgari nuk do të jenë në gjendje të shlyejnë këstet e tyre të kredive dhe do të detyrohen të mbyllin dyert e veta.

"Ne po shohim se mosshitja e dhomave këtë vit po shkatërron aftësinë e hoteleve për të paguar borxhet. Kjo shpjegon edhe arsyen se pse në kulm të sezonit, disa nga hotelet po qëndrojnë të mbyllura", shtoi ai. Pavarësisht përpjekjeve të qeverisë dhe fleksibilitetit të treguar nga bankat, duket se situata ka pak gjasa për përmirësim.

Qeveria, termocentrali me qymyr është i pastër

Kush kundërshton është antiglobalist i paguar nga mafia.

Qeveria shqiptare u angazhua gjatë dy ditëve të fundit të mbrojë planin e vet për të lejuar një kompani italiane të ndërtojë një megatermocentral elektrik me qymyr në Shqipëri, duke sulmuar opozitën dhe duke akuzuar këdo që e kundërshton një ide të tillë si "antiglobalist të paguar nga mafia".

Kryeministri Sali Berisha deklaroi ditën e miratimit të projektit për park energjetik në Porto Romano, se nuk ka paragjykime për lëndën që do të përdoret për ndërtimin e termocentralit, por që gjithsesi TEC-i, qoftë edhe me qymyr, duhet të respektojë ambientin.

Dje, zëvendësministri i Ekonomisë, Eno Bozdo, argumentoi se TEC me qymyr ka në shumë vende të Europës, dhe për më tepër në shumë prej këtyre vendeve po ndërtohen të rinj.

"Edhe nëse do të ketë një TEC për t‘u ndërtuar në këtë park, ju sigurojmë se ai do të ndërtohet brenda të gjitha parametrave mjedisore që kërkon BE, dhe që aplikohen sot nga të gjithë fqinjët tanë si Italia, Greqia etj.", tha Bozdo, i cili i shoqëroi shpjegimet për parkun energjetik me akuza kundër kreut të opozitës.

"Efekti i ndërtimit të një TEC-i është një kontribuues i papërfillshëm në krahasim me masakrën urbane, të pakthyeshme, me të cilën është përballur Tirana", tha Bozdo.

Projekti i termocentralit me qymyr në Porto Romano është hartuar nga kompania italiane ENEL, e cila synon të zhvendosë në Shqipëri një projekt që nuk u lejua ta realizojë në Itali për shkak të shqetësimeve ambientale. Shqipëria ka nevojë për 500-700 MW termocentrale për të zgjidhur krizën e vet energjetike, por projekti italian është tri herë më i madh.

Termocentralet me qymyr prodhojnë energji elektrike me kosto më të ulët dhe me ndotje më të madhe. Shumë vende parapëlqejnë t‘i mbajnë në punë këto termocentrale, për shkak se besojnë që ndotja ambientale kompensohet nga kostoja e ulët e energjisë (rreth 20-25 euro për MW).

Por në rastin e Shqipërisë situata është ndryshe, për shkak se vendi ynë duket se do të blejë energji me çmim tregu dhe do të mbajë për vete edhe ndotjen e energjisë që do të shitet në tregun italian. Si zakonisht, Kryeministri Berisha nuk dha ndonjë detaj konkret mbi të ashtuquajturën "mafia antiglobaliste". Akuza të tilla ndaj kundërshtarëve politikë i ka cilësuar po vetë si "gjuhë fushate

Kriza në SHBA, bankat bllokojnë 386 mijë prona

Në Shtetet e Bashkuara të Amerikës, 1.53 milionë familje nuk mund të përballojnë qeratë e shtëpive të tyre dhe kreditë duke u detyruar me hir a pahir të prishin kontratat me pronarët e shtëpive dhe bankat.

Kjo plagë ekonomike thotë CNN duket se po përkeqësohet duke qenë se kjo shifër është 15 përqind më e lartë se e njëjta periudhë në vitin 2008, që përbën rekordin më të lartë deri tani. Sipas të dhënave, deri më tani bankat amerikane kanë marrë në zotërim afro 386 mijë prona.

Por parashikohet që deri në fund të vitit mbi 3.2 milionë amerikanë do të marrin njoftimin për sekuestrimin e pronës së tyre.

Administrata Obama ka paraqitur si objektivin e saj shpëtimin e 4 milionë pronarëve të shtëpive dhe qeramarrësve, të cilët nuk arrijnë të përballojnë krizën.

Kosova me Këshilli ekonomik-social

Këshilli ekonomik-social do të themelohet nga Ministria e Punës dhe Mirëqenies Sociale, Ministria e Ekonomisë dhe Financave, Ministria e Tregtisë dhe Industrisë; Ministria e Arsimit, Shkencës dhe Teknologjisë dhe Ministria e Shëndetësisë.

Gjithashtu pjesëmarrës në krijimin e këtij këshilli do të jenë përfaqësues të Bashkimit të Sindikatave të Pavarura të Kosovës (BSPK), Konfederatës së Sindikatave të Lira të Kosovës (KSLK), Odës Ekonomike të Kosovës (OEK) dhe përfaqësues të Aleancës Kosovare të Biznesit (AKB), të cilët do të kenë anëtarët e tyre në këtë këshill.

Ora, qytetarët të jenë aksionarë të termocentralit

Ne si shoqëri kemi kapital thëngjillin dhe ate duhet të materiaizojmë në mënyrën më të mirë. Dhe pse pjesmarrja Kosovare në këto investime të mos jet 51 %. Ndoshta një variant i mbledhjes së të mjeteve mund të jet edhe huaja popullore, ku qytetarët do të kishin akcionet e tyre në Elektroekonmi, thuhet në komunikatën e partisë ORa

Sipas saj, me vite të tëra ekspertet nga Elektroekonomia ia aritën të kundërvihen me sukses ndërtimit të kapaciteteve të reja energjetike të bazuara në linjitin e Kosovës.

" Ky projekt i cili fillojë të qarkulloj si ide ne vitet tetdhjeta, më vonë filloj të merr edhe konturat e veta e të cilat edhe sot pak ndryshojnë nga projektet e bera me 1985. Në atë kohë projekti nuk kishte investitor dhe detyrë te saktë projektuese. Por në te gjitha bisedat e Elektro Ekonomisë së Jugosllavisë kryesishtë flitej se për këte do të vendosin strukturat shoqërore politike. Dhe aty përmrndet fuqia e kapcitetve energjetike prej 2.100 MW dhe shfrytëzimi i basenit të Sibovcit 30 vjet", potencon komunikata.

Tutje aty thuhet se ndërtimi i termocentralit të një kapaciteti sipas nevojave të vendit është gjithsesi i nevojshëm, por duhet shiku mundësia e ndërtimit të centarleve me energji alternative dhe me miqësore ndaj ambintit.

" Nëse në vende tjera kostoja e një vendi të punës është 10.000 €, atëhre ky projekt me vlere prej 3.5 miliard € i cili qarkullon në opinion sa punëtorë do të i punësojë? Ndoshta më mirë do të ishte që të gjinden projekte ku çmimi i kostos të vendit të punës të jet më i ulët"./telegrafi/

.















*****



Zyra për informim

Partia Reformiste ORA

Tel: + 381 38 546 600

Mob: + 377 44 508 360

Ulpiana U-1, Hyrja II, Kati I, Nr. 10

Prishtinë - Kosovë

info@ora-kosova.org

www.ora-kosova.org

Nafta stabilizohet në 61 dollarë

Niveli aktual i çmimit të naftës është rreth 20 dollarë më poshtë nga objektivi i vendosur nga Organizata e Vendeve Eksportuese të Naftës. Sipas OPEC-ut, kuotat e arit të zi në bursa duhet të luhaten rreth 80 dollarëve për fuçi që situata në tregjet financiare të konsiderohet normale.

Rënia e vazhdueshme e çmimit të arit të zi është shkaktuar nga pasiguritë që ka shkaktuar kriza ekonomike botërore, e cila është shoqëruar me rënie të kërkesës në nivel globale.

LDD-ja kundërshton vendimin e qeverisë për ndërtimin e Termocentralit “Kosova e Re”

Lidhja Demokratike të Dardanisë kritikoi sot vendimin e Qeverisë për ndërtimin e Termocentralit “Kosova e Re” dhe dhënien me koncesion të minierës së Sibovcit. Ky veprim, sipas sekretarit të përgjithshëm Lulzim Zeneli, dëmton interesat e shtetit të Kosovës.

Zeneli akuzoi Qeverinë se me rastin e vendimit për ndërtimin e TC “Kosova e re” ka anashkaluar rekomandimet e ekspertëve, të cilët vlerësojnë se Kosova nuk ka nevojë për një termocentral me kapacitet prej 2 mijë megavatesh.

“Është për habi sjellja e Qeverisë së Kosovës ndaj pasurive të Kosovës, ndaj një resursi që është konsideruar në interes strategjik për shtetin e Kosovës. Na sjell para dileme dhe pikëpyetje të madhe se deri ku mund të shkojnë këta njerëz, këta individë të koketojnë me pasurinë e Kosovës dhe koketojnë me të ardhmen dhe perspektiven e vendit", ka thënë Zeneli.

DTA: Ekonomia në SHBA po nis rimëkëmbjen

Ekonomia në Shtetet e Bashkuara të Amerikës po nis rimëkëmbjen e saj dhe duket se të parët që po e ndiejnë këtë janë ndërtuesit e shtëpive, të cilët po ndihen më mirë për shanset që ajo po u jep.

Një fakt të tillë e tregon një raport i Departamentit të Tregtisë Amerikane, i cili tregon sesi ndërtimi i shtëpive të reja u rrit me 3.6 përqind në qershor, shifra më e lartë në shtatë muaj.

Raporti thotë gjithashtu se kërkesat për ndërtime të reja u rritën në 8,7 përqind në qershor.

Shifrat e fundit në tregun e shtëpive pasojnë një raport negativ dje që paralajmëron se rreth 1 presje 5 milionë pronarë amerikanë janë në rrezik të humbasin shtëpitë e tyre. Sinjale të ndryshme rreth ekonomisë amerikane në vështirësi po reflektohen edhe në kompanitë më të mëdha të botës.

Përshembull, gjiganti amerikan General Electric tha sot se pati të ardhura në tremujorin e dytë, por fitimet pothuajse iu përgjysmuan.

Kina vazhdon të jetë superfuqi botërore

Nuk është çudi. Ndërsa e gjithë bota është mbërthyer nga kriza globale financiare, Kina ka arritur të ketë një rritje ekonomike në semestrin e dytë prej 7.9 përqindësh, kjo falë paketave të mëdha stimuluese monetare dhe fiskale.

Në fakt të dhënat, të publikuara në Ministria e Ekonomisë kanë kapërcyer edhe parashikimet e ekonomistëve më të mëdhenj, që kishin parashikuar maksimumi një rritje prej 7.5 përqind të GDP-së kineze.

Por me një paketë prej 585 milionë dollarës, Pekini zyrtar ka arritur të forcojë pikat e prekura eksportet, investimet dhe konsumin e brendshëm.

Rimëkëmbja e ekonomisë së tretë botërore ka ardhur pasi autoritetet kanë përdorur sistemin bankar e kontrolluar nga shtetit për të dizenjuar atë që cilësohet si zgjerimi më dramatik monetar në histori.

Bankat kanë dyfishuar dhënien e kredive duke rritur fluksin dhe volumin e këmbimeve tregëtare brenda vendit.

Vetë Banka Botërore deklaroi se Kina do të jetë nga të parat që do të udhëheqë ekonomikë globale në daljen nga recensioni.

Citygroup, profit prej 3 miliardë dollarë

”Citygroup” ka qenë njëra nga bankat më të goditura nga kriza kreditore dhe recesioni. Kjo bankë nga qeveria amerikane ka marrë 45 miliardë dollarë dhe garanci për mbrojtje nga humbjet në “pronë të rrezikshme” në vlerë prej më shumë se 300 miliardë dollarë.

Banka “Citygroup” ka befasuar Wall street-in edhe në çerekun e dytë të këtij viti, duke shënuar profit deri në tre miliardë dollarë ose 49 centë për aksion dhe jo humbje sikurse kishin pritur analistët.

Në këtë formë, kjo bankë me seli në New York iu është bashkëngjitur bankave të tjera, të cilat kanë publikuar rezultate të mira për tremujorin e dytë.

Në tremujorin e dytë të vitit të kaluar, “Citygroup” kishte shënuar humbje prej 2,86 miliardë dollarë, përkatësisht 55 centë për aksion.

Analistët për tremujorin e dytë të këtij viti kishin pritur humbje prej 37 centë për aksion.

Kosova, jashtë statistikave të Eurostat

Sipas të dhënave të Shërbimit të Statistikës të Komisionit Evropian “Eurostat”, krahasimi i çmimeve të mallrave për konsumim të gjerë dhe shërbime për vitin 2008, ka treguar se Shqipëria, Maqedonia, Bullgaria, Bosnja e Hercegovina dhe Serbia janë vendet më të lira në Evropë. Kosova nuk përmendet në asnjë statistikë.

Çmimet e mallrave të konsumit të përditshëm në Shqipëri janë më të lira se në vendet e tjera të Evropës. Sipas të dhënave më të fundit nga Eurostat, Shqipëria renditet ndër vendet që kanë indeksin e çmimit të jetesës më të ulët se vendet e tjera.

Të dhënat nga Eurosat bëjnë të ditur se mesatarja e indeksit të çmimit të jetesës për Shqipërinë arrin në 53%, në krahasim me mesataren e përgjithshme të Bashkimit Evropian.

Sipas të dhënave nga Eurostat, vendi më i shtrenjtë për jetesë është Danimarka e cila ndiqet më pas nga Norvegjia, Zvicra, Finlanda dhe Islanda. Mesatarja e indeksit në Danimarkë arrin në 141%, shumë më tepër në krahasim me mesataren e përgjithshme të BE-së.

Vendi më i lirë, pjesë e Unionit Evropian është Bullgaria me 51%, gati gjysmën e mesatares së përgjithshme. Nivelet e çmimeve për ushqim dhe pije jo-alkoolike në Shqipëri për vitin 2008 arrijnë në 74% të mesatares së përgjithshme të BE-së, kundrejt 82% të Serbisë dhe 75% të Malit të Zi.

Për pijet alkoolike dhe duhanin niveli i çmimeve varion nga 57% në Shqipëri, 54% në Serbi dhe 45% në Malin e Zi. Në 27 vendet e BE, çmimet janë më ulëta në Rumani 61% të mesatares dhe më e larta në Irlandë 184%. Sipas Eurostat, ky ndryshim i madh i çmimeve vjen si rezultat i dallimeve në taksimin e këtyre produkteve ndërmjet shteteve anëtare.

Për veshje, niveli i çmimeve në Shqipëri është më i ulëti ndërmjet vendeve të Ballkanit, konkretisht 90%, krahasuar me 113% në Malin e Zi dhe 104% në Serbi. Për kategorinë e pajisjeve elektronike, Shqipëria e kalon mesataren e përgjithshme duke shkuar në shifrat e 122%, ndërkohë që në vendet e tjera të Ballkanit nuk kalojnë 100%. Për restorantet dhe hotelet, variacionet e çmimeve nuk ndryshonin shumë ndërmjet Shqipërisë dhe vendeve fqinjë.

Industria e turizmit të Malit të Zi merr një goditje

Vetëm 277,000 turistë e kanë vizituar Malin e Zi këtë vit.

Numri i turistëve që vizituan Malin e Zi në gjysmën e parë të 2009 ra me 7% krahasuar me të njëjtën periudhë të vitit të kaluar ndërsa numri i atyre që kaluan natën në këtë vend ka rënë për 9%.

Lajmi është bërë i ditur nga ministri i turizmit Predrag Neneziç.

Sipas tij, 277,000 turistë vizituan Malin e Zi gjatë kësaj periudhe kohore, duke kaluar një total prej 1.5 netësh në hotelet dhe njësitë e tjera turistuike të vendit.

PTK shet 10 mijë numra për një javë

Lansimi në treg i numeracionit të ri 045 si dhe ndërtimi i 45 shtëpive për raste sociale, dy ngjarje këto që ndodhën javën që lamë pas janë vlerësuar mjaft të suksesshme nga menaxhmenti i kompanisë më profitabile në vend.

Bazuar në një njoftim zyrtar të kompanisë, ky sukses vlerësohet me faktin se pas një pune bukur të gjatë dhe negociatave të mundimshme me Monaco Telecomit, kodin e të cilët e shfrytëzon VALA, Kryeshefi Ekzekutiv i PTK-së, Shyqyri Haxha dhe ekipi i tij arritën që të lansojnë enumeracionin e ri 045.

Numeracioni i ri vjen edhe si rrjedhojë e arritjes në 900 mijë konsumatorë të operatorit Vala, me numeracionin 044, duke e shpenzuar atë.

“Kjo ka shtyrë menaxhmentin, që në bazë të kërkesave të konsumatorëve, të rrisim kapacitet tona edhe për 900 mijë numra të tjera, pra me një kapacitet prej 1.8 milionë konsumatorë”, ka deklaruar Haxha.

Ai tutje ka shtuar se me lansimin e numeracionit të ri 045 më baza mujore në buxhetin e PTK-së do të derdhen milion euro të tjera, që automatikisht nënkupton më shumë të hyra edhe për buxhetin e konsoliduar të Qeverisë së Republikës së Kosovës.

Në një njoftim zyrtar të PTK-së, thuhet se vetëm javën që lam pas janë shitur rreth 10.000 numra të ri me 045 çka definitivisht vërteton interesim të jashtëzakonshëm të konsumatorëve.

Në po të njëjtin njoftim thuhet se, po gjatë javës që lam pas PTK dhe Qeveria e Republikës së Kosovës, kanë nënshkruar një Memorandum mirëkuptimi për ndërtimin e 45 shtëpive për kategoritë me gjendje të rëndë sociale.

”Ky memorandum, i përkrahur me rreth gjysmë milioni euro nga PTK, u nënshkrua vetëm një ditë pas lansimit të numeracionit 045 dhe ka qenë ideja e Kryshefit Ekzekutiv që të ndërtohet 45 shtëpi si rrjedh e suksesit më rastin e lansimit të 045”.

45 shtëpi do të ndërtohen për invalidët dhe veteranët e luftës së UCK familjet e dëshmorëve, familjet në gjendje të rëndë sociale, familjet e viktimave të luftës. /Telegrafi/

PD pro termocentralit

Partia e Drejtësisë ka përshëndetur fillimin e ndërtimit të kapaciteteve të mirëfillta energjetike të shtetit të Kosovës, duke kërkuar nga institucionet e vendit shkallën më të lartë të përgjegjësisë dhe të transparencës me këtë rast.

Përmes një komunikate për opinion Partia e Drejtësisë kërkon që gjatë procesit të vendim-marrjes për ndërtimin e termocentralit Kosova e Re, si minimum, të sigurohet:

Respektimi i standardeve më të larta ndërkombëtare për ruajtjen e mjedisit duke e bërë ndërtimin gradual të kapaciteteve të planifikuara energjetike në pajtim me sugjerimet e ekspertëve;

Ruajtja maksimale e fondit të ujit për qytetarët dhe sektorin e bujqësisë;

Së paku 51 % e pronësisë së shtetit të Kosovës në termoelektranën e re, duke siguruar përfitimin maksimal ekonomik nga resursi kryesor natyror i vendit, si dhe pamundësimin e monopolit në sektorin e energjetikës nga ana e investitorit të huaj.

Bie blloku, rikthehen reduktimet

Për shkak të rënies nga sistemi të njësisë B1 të KEK-ut, i gjithë territori i Kosovës është përfshirë me reduktime të ashpra të furnizimit me energji elektrike për të tri kategoritë. Zyrtarë të Korporatës Energjetike të Kosovës kanë konfirmuar se shkak i rënies së mbrëmshme nga sistemi ka qenë një ndërprerje në linjën 220.

Ndërkohë, Blloku B1 është kthyer në funksion, por reduktimet do të vazhdojnë për kategorinë C, 4:2 në favor të territ.

Mbyllja e Kosovës A mund të lë 850 punëtorë pa punë

Mbyllja e termocentralit Kosova-A, i cili aktualisht ka rreth 850 punëtorë, paraqet shqetësim për punëtorët e këtij termocentrali, që mund të humbasin vendet e tyre të punës.

SPEK ka vetëm një marrëveshje të nënshkruar me menaxhmentin e KEK-ut, por tash, pas vendimit për shuarjen e këtij termocentrali, as kjo sindikatë nuk e di se çfarë do të ndodhë.

Madje, nënkryetari i saj, Mustafë Nimani, thotë se me mbylljen, siç është planifikuar të termocentralit Kosova-A, mbi 80 për qind e punëtorëve do të jenë në pension pasi mbërrijnë kohën e paraparë për pensionim të rregullt.

Nga ana tjetër, zyrtarë të qeverisë thonë se edhe pse s’ka asgjë konkrete deri më tash, punëtorët do të sigurohen përmes pakove sociale dhe formave të tjera.

Zëdhënësi i qeverisë, Memli Krasniqi, pohon se për t’i konkretizuar gjërat, duhet një takim i nivelit të lartë. Si formë kompensimi, ai përmendi disa pako sociale. /ktv/

Lukoili rus së shpejti në Kosovë dhe Shqipëri

Menaxheri i përgjithshëm i Lukoilit për Maqedoni, Andrej Kuku ka deklaruar së kjo kompani shumë shpejtë do ta shtrijë veprimtarin e saj në Kosovë dhe Shqipëri, te vetmet vende në Ballkan që ende nuk është e pranishme.

Në pyetjen cilat janë planet e mëtutjeshme të LUKOIL-it në rajon, janë hapur filiale pothuajse në secilin shtet të Ballkanit, përveç se në Shqipëri dhe Kosovë dhe se a do të hyjë kompania edhe në këto tregje, menaxheri i përgjithshëm Kuku njoftoi se në të ardhmen e afërt pritet hapja e frimave-si motra të LUKOIL-it edhe në Shqipëri dhe Kosove.

PTK nënshkruan marrëveshje me Raiffeisen Bank

Posta dhe Telekomi i Kosovës, ka nënshkruar të premten një marrëveshje me Raiffeisen Bank, nëpërmes të cilës mundësohet dërgimi i letrave dhe pakove brenda dhe jashtë Kosovës, përmes shërbimeve të Postës së Kosovës.

Marrëveshja ofron shërbime specifike për nevoja të bankës dhe e bën Postën e Kosovës një partner të besueshëm të biznesit kosovar.

“Posta e Kosovës, Njësi Biznesi e PTK Sh.a., ka kënaqësinë që tash e tutje do të bashkëpunojë me Raiffeisen Bank, duke i ofruar asaj shërbimet e veta, siç janë ato të pranimit dhe dorëzimit të dërgesave postare, duke e çuar në këtë mënyrë bankën edhe më pranë konsumatorëve të vet ”, ka thënë Kryeshefi Ekzekutiv i PTK, Shyqyri Haxha, me rastin e nënshkrimit të kontratës.

Posta e Kosovës, me anë të kësaj kontrate do të kryej edhe shëbimin tjetër atë të shpërndarjes së dërgesave - përkujtimin lidhur me gjendjen e llogarisë të klientëve, të cilët posedojnë Visa Credit Card, duke i njoftuar gjithashtu me shumën minimale që duhet ta paguajnë brenda afatit, në mënyrë që mos të aplikohen tarifat ndëshkuese.

Njëherësh, kjo marrëveshje do të ndikojë në mënyrë të drejtpërdrejtë në rritjen e të hyrave të Postës së Kosovës, që është edhe synim i menaxhmentit.

Nga ana e tij, Robert Wright, Drejtor ekzekutiv i Raiffeisen Bank, ka thënë se kjo marrëveshje do t’i mundësojë bankës që t’u ofrojë shërbime të nivelit të lartë klientëve të vet.

“Raiffeisen Bank, përpos mjeteve të ndryshme të komunikimit, shfrytëzon letrën si mjet klasim dhe efektiv komunikimi me klientët e saj. Arritja e kësaj marrëveshjeje është një hap në trendin e bashkëpunimit mes PTK dhe Raiffeisen Bank, duke mundësuar kështu krijimin e rrethanave më të favorshme për konsumatorët tanë”, ka theksuar Wright.

Kjo marrëveshje bëhet në kuadër të angazhimit të Postës së Kosovës që të zhvillojë shërbimin postar dhe pasohet nga marrëveshje tjera, të arritura gjatë këtij viti me pothuaj të gjitha bankat komerciale që veprojnë në Republikën e Kosovës. /Telegrafi/

Aeroporti i kthen 5.4 milion euro kredi Raiffeisen Bankë-s, para koncesionit

Menaxhmenti i Aeroportit Ndërkombëtarë të Prishtinës, ia ka kthyer sot Raiffeisen Bankës, një kredi prej 5.4 milionë eurove, kredi që kishte marrë nga ish-menaxhmenti i kompanisë në vitin 2007, për disa investime kapitale në Aeroport.

Marrëveshja për kthimin e kredisë u nënshkrua, në selinë qendrore të Raiffeisen Bank në Prishtinë nga ana e Drejtorit Menaxhues të ANP-së, Agron Mustafa dhe Drejtorit të Përgjithshëm të Raiffeisen Bank Kosovë, Robert Wright.

Në vitin 2007, ANP-së nga ana e Raiffeisen Bank i qe lejuar një kredi në shumën prej 13.5 milion eurosh dhe afat kthimi deri në vitin 2012, por aeroporti ka përdorur vetëm gjysmën prej tyre.

“Jam shumë i lumtur që sot po kthejmë kredinë prej 5.4 milion eurosh, tre vjet para kohë. Dua të falënderojë drejtorin e përgjithshëm të bankës Robert Wright për përkrahjen e dhënë gjatë vitit 2007 dhe njëkohësisht të sigurojë atë që bashkëpunimi i mirë mes dy kompanive tona do të vazhdojë edhe në të ardhmen”, tha pas ceremonisë së nënshkrimit të marrëveshjes Drejtori Menaxhues i ANP-së, Agron Mustafa.

Sipas Mustafës , kthimi i kredisë në këtë kohë për ANP-në, në veçanti kur Aksionari i ANP-së, në këtë rast Qeveria e Kosovës, ka bërë të ditur zhvillimin e ardhshëm të ANP-së, dhënien me koncesion deri në fund të vitit 2009, nënkupton rritjen edhe më shumë të vlerës së kompanisë.

“Kthimi i kredisë para dhënies me koncesion nënkupton shtimin e atraktivitetit të ANP-së para investitorëve potencial, sepse është shumë më mirë të hyhet në këtë proces pa pasur borxhe ndaj palëve të treta. Pas kthimit të kredisë, ANP-ja do të ketë fleksibilitet edhe më të madh në krijimin e politikave të brendshme financiare. Por me duhet të theksoj se Raiffeisen Bank do të jetë një prej partnerëve tanë të biznesit” tha tutje drejtori Mustafa.

Nga ana tjetër, drejtori i Përgjithshëm i Raiffeisen Bank, Robert Wright, potencoi se ka qenë kënaqësi bashkëpunimi me ANP-në.

“Është kënaqësi që kemi bashkëpunuar me ANP-në gjatë këtyre viteve dhe veçmas janë për t’u përshëndetur rezultatet e shumta pozitive të ANP-së kohëve të fundit. Shfrytëzoj rastin të falenderoj z. Mustafa dhe shpresoj që edhe në të ardhmen do të kemi bashkëpunim e duhur” tha Wright, gjatë ceremonisë së rastit.
Aeroporti Ndërkombëtarë i Prishtinës edhe pse ka kthyer përnjëherësh kredinë prej 5.4 milion eurosh, ka një gjendje shumë të mirë financiare.

Aktualisht shuma e parave kesh që ndodhet në banka është rreth 7.5 milion euro. Kthimi i kredisë tre vjet para kohe ia ka kursyer kompanisë rreth 600 mijë euro, para që do të paguheshin për kamata dhe interesa, nëse kredia do të paguhej në afat të rregullt kohorë.

Vetëm 6 mujorin e parë të këtij viti, pas rishikimi të buxhetit që ju bë ditën e premte, 17 korrik, kompani doli në me fitim neto prej 4.1 milion eurove. /Telegrafi/