Lajmet më të reja nga ekonomia dhe biznesi

Kryetari i "Krajsler"-it dha dorëheqje

Kryetari i korporatës "Krajsler", njëri nga tre gjigantët udhëheqës të makinave në SHBA njoftoi se jep dorëheqje. Tom Lasorda e publikoi dje vendimin.

Më herët, "Krajsler" filloi procedurë për falimentim dhe mbrojtje nga kreditorët. Qeveria e SHBA-së i dha afat korporatës që deri më 1 maj të prezantojë plan financiar dhe riorganizim prodhues.

Drejtori i përgjithshëm i gjigantit i makinave në SHBA Riçard Nardel gjithashtu paralajmëroi se do ta braktisë funksionin, prej se do të mbarojë procedura për falementim, e cila mund të zgjasë 60 ditë. Në këtë periudhë korporata do t'i formojnë marrëdhëniet partnere me prodhuesin italian të automjeteve "Fiat".

Të dy fabrikat e "Krajsler" në Kanada u mbyllën të premten, prej se pa punë mbetën rreth shtatë mijë njerëz.

Fabrika për prodhim të pjesëve rezervë nga qarku i Torontos tani për tani vazhdon të punojë, por pritet që ajo të mbyllet pas dhjetë ditëve.

Mbyllet Panairi i Teknologjisë dhe Cilësisë 2009

Pas katër ditë të prezantimit të kompanive nga më të fuqishmet të Shqipërisë, rajonit e Evropës në fushën e energjetikës e infrastrukturës, është mbyllur në Tiranë Panairi Ndërkombëtar i Teknologjisë dhe Cilësisë 2009, pjesë e të cilit ishin edhe ndërmarrjet më profitabile nga Kosova si PTK, Aeroporti Ndërkombëtar i Prishtinës, KEK, Kompania “Ballkan” dhe Kostt-i.

Ky panair është cilësuar të jetë i pari i këtij lloji në Shqipëri dhe njëkohësisht më i madhi i krijuar në rajon për sektorin e energjisë elektrike dhe infrastrukturës.

Organizatorët kanë theksuar se një rëndësi më të madhe i ka dhënë edhe prania e kompanive gjigante nga Evropa si “Verbund”, “Becchetti”, “Enel”, “CEZ”, “Monkada”, “EVN”, “CAE”, “Adrix” etj.

Gjatë këtyre katër ditëve të panairit kompanitë kanë pasur mundësinë që të njohin veprimtarinë e njëra-tjetrës dhe të shohin mundësitë për të hyrë në investime e tregje të përbashkëta.

E veçanta e këtij panairi ishte synimi për arritjen e tregun 7 milionësh. Me një mbështetje të pakursyer të Shqipërisë dhe me krijimin e rrethanave të reja pas shpalljes së pavarësisë së Kosovës janë hapur mundësinë që shqiptarët të zgjerojnë tregun e tyre nga 4 e 3 milionë në 7 milionë.

Kjo bën që interesi gjeostrategjik i shqiptarëve si komb të jetë jashtëzakonisht i madh, të ketë një rritje cilësore dhe krijohen kushtet ku Shqipëria si vend dhe shqiptarët si komb janë në pozita ekspansioni, në pozitat e zgjerimit të tregut të tyre.

Në kuadër të këtyre nismave dhe për të gjetur bashkëpunues e investitor nga jashtë në Panairin Ndërkombëtar të Teknologjisë dhe Cilësisë 2009 kanë prezantuar edhe ndërmarrjet më profitabile nga Kosova si PTK-ja, Aeroporti Ndërkombëtar i Prishtinës, KEK-u, Kompania “Ballkan” dhe Kostt-i.

Përfaqësuesit e kompanive nga Kosova kanë deklaruar për Kosovapress se kanë arritur të vënë kontakte të shumta me kompani të fuqishme të Evropës, të cilat në të ardhmen edhe mund të jenë investitor në Kosovë.

Ndryshe, në kuadër të panairi i cilësuar edhe si “panairi 7 milionësh” i mbajtur në ambientet e Pallatit të Kongreseve në Tiranë ka përmbledh edhe një sërë aktivitetet tjera, si me konferenca e forume të ndryshme për energjetikën e infrastrukturën. /kosovapress/

Miliarderi rus Abramovich humbet jahtin e tij në një lojë poker online

Miliarderi i famshëm rus, Roman Abramovich duket se kësaj here nuk ka patur fat në lojë. Sipas sajtit “Metropolitan Post”, gjatë qëndrimit të tij në Spanjë për të ndjekur nga afër lojën e Chelsit të tij kundër Barcelonës, Abrahamovich ka humbur në poker , një ndër barkat e flotës së tij, konkretisht njërin nga jahtet e tij gjigandë dhe luksozë, i cili kushton rreth 500 milione euro.

Një humbje jo shumë e vogël për manjatin rus, i cili gjatë viteve të fundit ka ndjerë reduktimin e pasurisë së tij, që sipas të përditshmes angleze “Sunday Times” është pakësuar edhe me 4 miliarde euro të tjera për shkak të krizës ekonomike globale.

Kohët e fundit qarkullojnë informacione sipas të cilave Abramovich është shumë i apasionuar pas bixhozit. Madje thuhet se e fejuara e tij Daria Zhukova i ka vendosur ultimatumin: “Ose mua ose lojën”.

Mediat thonë se Manjati paska rënë në një kompromis sipas të cilit nuk do të luante më në kazino port ë paktën ti lejohej loja në sitin online “Everest Poker”, I cili është shumë i preferuar nga njerzit e njohur si, Paris Hilton apo Hugh Hefner.

Në fakt pasioni i Abramovich duket se ka përfshirë edhe të fejuarën e tij, e cila tashmë adhurn të luajë online me shoqen e saj Paris Hilton.

Cifti pritet të mbërrijë në Sardengna në fillim të majit për të marrë pjesë në turneun “Everest Poker European Cup” në bordin e jahtit të tyre “Eclipse” që kushton 360 milion dollarë dhe është i kompletuar me sallë kinemaje, diskotekë, dy fusha për ku ulen helikopterët dhe një dhomë të mbushur me tavolina pokeri dhe krupiere të bukura.

Transiti në Shqipëri u kushton 150 euro kosovarëve

Tarifë e kripur spedicionere për transitin e makinave me targa të përkohshme nga Durrësi në Morinë

"Pasi e blemë makinën në Gjermani, kaluam tre shtete dhe paguam gjithsej 60 euro, ku përfshiheshin taksa e rrugës në Austri dhe pagesat e autostradave në të gjithë Italinë deri në Bari. Por kur mbërritëm në Durrës, u përballëm me tarifën surprizë për ‘shërbime doganore‘ prej 150 eurosh".

Kështu tha Lumtur Ahmeti, një shqiptar nga Kosova, që pati vendosur të përshkojë një rrugë më të gjatë vetëm për të parë punimet në autostradën Rrëshen-Kalimash.

Kureshtja për të parë autostradën patriotike që besohet se do të bashkojë shqiptarët e dy shteteve, i kushtoi ca shtrenjtë, por nuk kishte zgjidhje tjetër. Për të përshkruar më pak se 200 kilometra, u detyrua të paguajë 2.5 herë më shumë nga sa kishte paguar për të përshkruar plot 1400 kilometra.

Në Kosovë ka 130 mijë makina, dhe çdo vit në këtë vend hyjnë rreth 10 mijë makina të përdorura që blihen kryesisht në Gjermani. Për shkak të gjendjes së keqe të rrugëve në një pjesë të Kroacisë dhe në Malin e Zi, kalimi nga Shqipëria mund të bëhet rruga më e rehatshme për në Kosovë.

Por 150 eurot, të cilat nuk janë taksa që hyjnë në buxhetin e shtetit, janë goxha para për të justifikuar vetëm 200 kilometra rrugë. Shumica dërrmuese e makinave të përdorura që importohen në Shqipëri dhe Kosovë përdorin targa të përkohshme gjermane, të cilat i lejojnë të qarkullojnë në të gjithë botën pa kosto të tilla.

Nëse kalon nga Kroacia për shembull, një tarifë e tillë spedicionere nuk ekziston. Por kjo gjë nuk ndodh në Shqipëri. Në fund, Lumturit i pëlqeu spektakli i ofruar nga makineritë e rënda që shikohen në qafë të Shpalit, por tarifa spedicionere prej 150 eurosh i la një shije të hidhur.

Tarifa e agjencisë doganore

Doganat detyrojnë çdo makinë që hyn në Shqipëri me targa të përkohshme të kontraktojë një agjenci doganore për të blerë një "garanci". Garancia shërben për të shmangur rrezikun e përdorimit të makinës së importuar pa paguar taksa doganore.

Për një shqiptar që hyn në Han të Hotit, garancia kushton 7 mijë lekë, por për një kosovar natyrisht që kushton më shtrenjtë. Shumë më shtrenjtë. "Ky është një problem që zor se mund të marrë zgjidhje", shpjegon një ekspert doganor. Makinat janë malli më i rënduar me taksa nga lista e mallrave që importohen në Shqipëri.

Për makinat e benzinës, taksat doganore fillojnë nga 130 mijë lekë të reja, ndërsa për ato të naftës nuk ka më lirë se 160 mijë lekë. Dhe duke qenë se shqiptarët, ashtu si edhe kosovarët, dinë të manipulojnë numrat e shasisë dhe të përdorin një palë targa në shumë makina të ndryshme, gjatë viteve të fundit përpjekjet e doganave u përqendruan në ndalimin e hyrjes së makinave në Shqipëri pa paguar fillimisht taksat doganore.

Si pasojë e këtyre përpjekjeve, edhe makinat që importohen në Kosovë duke përdorur Shqipërinë, nuk mund t‘u shpëtojnë tarifave të kripura të agjencive doganore. Heqja e tarifës së spedicionit për kalimet transit nga Durrësi për në Kosovë apo Maqedoni, as që çohet nëpër mend sot për sot. Me taksa doganore më të larta sesa vlera e makinave, një skemë e tillë do të krijonte një kanal të leverdishëm për të gjithë, për t‘i shpëtuar doganës më absurde në botë.

Rruga patriotike, e penalizuar

Qeveria shqiptare shpreson se rruga Durrës-Kukës do të fillojë të përdoret sadopak kur kosovarët të kryejnë një pjesë të importeve të veta përmes Portit të Durrësit. Por burokracitë doganore zor se do të lejojnë zhvillimin e transitit. Pagesat për garanci që lëshohen nga agjencitë doganore janë një makth i vërtetë edhe për biznesin vendas.

"Importojmë mallra në Durrës dhe i zhdoganojmë në Shkodër. Duhet të paguajmë dy herë agjenci doganore dhe nuk e kuptojmë pse nuk mund t‘i zhdoganojmë direkt në Durrës", thoshte dy ditë më parë Ferdinant Melgushi, biznesmen fasonist në Shkodër.

Taksat doganore në Shqipëri janë pothuajse zero, por importuesit paguajnë Tatim mbi Vlerën e Shtuar si dhe taksa të tjera, në rastin e makinave, të ashtuquajturën "taksë ndotjeje". Ata që kalojnë mallra transit paguajnë një tarifë minimale zyrtare, por duhet ta garantojnë faktin se do të dalin nga Republika e Shqipërisë përmes agjencive, të cilat në këto raste rrisin koston e përdorimit të Shqipërisë si korridor rajonal. Nëse një makinë me targa të përkohshme gjermane kalon nga bregdeti dalmat, nuk detyrohet të paguajë asnjë tarifë doganore as në Kroaci dhe as në Malin e Zi. /shqip/

Brenda muajit hapet tuneli i Kalimashit

Bashkimi i dy anëve të tunelit të Kalimashit vepra më e rëndësishme e rrugës Durrës- Kukës është në muajin e fundit. Në fillim të muajit qershor siç bëjnë të ditur burime të stafit teknik të kompanisë Enka njëri nga dy tunelet do të jetë gati për t’u përshkuar me makinë. Vepra që ka tashmë edhe një karakter simbolik, atë të bashkimit të dy anëve të kufirit Shqipëri- Kosovë, po shkon drejt finalizimit të saj.

Kështu nga seksioni i tunelit të parë i gjatë 5.5 kilometra kanë ngelur pa u gërmuar edhe 164 metra, çka do të thotë se deri më tani tuneli është punuar në 96 për qind të tij. Distanca e mbetur sipas drejtuesve teknikë të kompanisë me ritmet e deritanishme gërmohet për një muaj.

Ndërkohë në seksionin e tunelit të dytë që është paralel dhe me të njëjtin gjatësi me të parin puna do të kërkojë edhe më shumë kohe. Deri më tani ai është germuar në 92 për qind të volumit të punës dhe mbeten për t’u përshkruar edhe 430 metra lineare. Deri më tani në këtë tunel është punuar me dy turne, ndërkohë që po punohet me një intensitet edhe më të lartë.

Tuneli është vepra e parë e këtij lloji në Shqipëri dhe kostoja e ndërtimit të tij është më shumë se 200 milion euro. Objektivi është që të paktën shpimi në të dy seksionet të përfundojë deri në fund të muajit qershor të këtij viti. /alsat/

FIAT, interesohet edhe për OPEL-in gjerman

Kompania italiane e prodhimit të automjeteve, FIAT, duket se do ta zgjerojë operacionin e saj financiar në kuadrin e krizës financiare që ka prekur dukshëm këtë sektor.

Bëhet e ditur paraprakisht se pas angazhimit tek sipërmarrja likuide amerikane Chrysler, koncerni italian i automjeteve FIAT, është i vendosur të blejë edhe OPEL-in gjerman.

Për këtë gjë, informacionet njoftojnë se shefi italian i FIAT, Sergio Marchionne, do të flasë të hënën në Berlin me ministrin e Ekonomisë Karl-Theodor zu Guttenberg dhe me ministrin e Jashtëm Frank-Walter Steinmeier.

Sipas gazetës gjermane “Süddeutsche Zeitung”, Marchionne do t'i paraqesë qeverisë gjermane një plan fillestar, i cili parashikon që fabrikat gjermane të Opelit në Rüsselsheim, Eisenach, Kaiserslautern dhe Bochum do të mbeten, por jo në përmasat e tyre të tanishme.

Marchionne kërkon të krijojë në fakt, një koncern global automjetesh, që prodhon në vit të paktën pesë milionë automjete.

Por bëhet e ditur se përveç FIAT-it, për OPEL-in, po interesohet edhe furnizuesi austriako-kanadez për pjesë automjetesh, Magna.

Pritet përmirësim i situatës energjetike në vend

Riparimi i defektit përkatësisht rrjedhjeve në kaldanë e njësisë B1 të Termocentralit “Kosova B”, pritet të bëhet sot gjatë orëve të pasdites.

Ndryshe njësia B1 e TC “Kosova B”, ka rënë nga puna dje, gjë që ka rënduar edhe situatën e furnizimit me energji elektrike duke kthyer reduktimet për të gjitha kategoritë.

Deri në kthimin e kësaj njësie kategoria A do të furnizohet 4 me 2, ndërsa kategoria B dhe C, 3 me 3 .

Për të zbutur situatën energjetike në vend KEK menjëherë ka filluar me importimin e 100 megavat/orë energji elektrike. /Telegrafi/

Sot hapet Bursa e punësimit

Me nismën e Aleancës Kosovare të Bizneseve në Prishtinë organizohet sot Bursa e parë e punësimit, me synimin për gjetjen e vendeve të reja të punës për të zbutur papunësinë në vendin tonë.

Të ftuar në hapjen e bursës që do të zgjasë dy ditë janë presidenti Fatmir Sejdiu dhe kryeministri i Republikës së Kosovës, Hashim Thaçi. /rtk/

Papunësia në Serbi do të arrijë në 21%

Shkalla e papunësisë në Serbi sivjet do të arrijë në 21 për qind, për dallim nga 18 për qind sa ishte në vitin 2008.

Këtë e vlerësoi grupi bankar Unikredit, duke shtuar se papunësia në vitin 2010 do të rritet në 21,5 për qind.

Sipas burimit të njëjtë, BPV-ja serbe sivjet do të shënojë rënie për 2,5 për qind në 29,5 miliardë euro, ndërsa vitin e ardhshëm rënia do të zvogëlohet në 0.7 për qind.

Inflacioni në Serbi sivjet do të arrijë 7.8 për qind, vitin e ardhshëm do të bie në 6,5 për qind prej 11,7 për qind të vitit të kaluar. /Makfaks/

Kosova duhet të liberalizojë tregun e sigurimeve

Guvernatori i Bankës Qëndrore të Kosovës, Hashim Rexhepi tha se Kosova ka një liberalizim të kontrolluar të tregut të sigurimeve, mirëpo ende nuk e ka ligjin përkatës për sigurime të përgjithshme. Sipas tij, liberalizimi i plotë i tregut të sigurimeve do të ishte forma më e mirë për sektorin e sigurimeve në Kosovë.

Këto tema u diskutuan në konferencën e sotme rajonale e cila u mbajt në Prishtinë.

Përfaqësues të vendeve të rajonit, Kroacisë, Shqipërisë dhe Maqedonisë thanë se ata kanë bërë një hap përpara në krijimin e legjislacionit për liberalizimin e tregut të sigurimeve në përputhje me standardet e BE-së. /telegrafi/

Kosova, sot anëtare e FMN

“Unë jam shumë optimist që nesër kjo do të ndodhë deri në ora 5 të pasdites sipas kohës amerikane, kur do të përfundojë procesi votimit. Jam i sigurt që Kosova do të bëhet anëtare e Fondit Monetar Ndërkombëtar dhe në bazë të informacioneve që kam është arritur kuorumi i nevojshëm për vendimmarrje nga ana e Fondit Monetar Ndërkombëtar”, ka thënë të hënën gurvenatori i Bankes Qendrore, Hashim Rexhepi.

Sipas tij, kjo është në interes të Kosovës dhe është punuar mjaft për të ardhur deri tek ky anëtarësim.

Ndërsa për anëtarësimin në Bankën Botërore, Rexhepi ka theksuare se procesi i votimit në Bankën Botërore përfundon në mes të muajit qershor.

Rexhepi ka theksuar se, njëkohësisht, diku në mesin e muajit maj do të jetë konferenca vjetore e Bankës për Zhvillim dhe Rindërtim, ku Kosova ka shfaqur interesim për tu anëtarësuar.

"Shpresojme që edhe në këtë drejtim do të bëhen hapat e nevojshëm që të rregullohet anëtarësimi i vendit tonë në Bankën për Zhvillim dhe Rindërtim", tha Rexhepi. /Telegrafi/

PTK mundëson komunikimin edhe në minierën e Trepçës

Komunikim më të mirë më botën nëntokësore, mundësi të reja dhe shumë të volitshme telekomunikuese, Posta dhe Telekomunikacioni i Kosovës, shumë shpejt do t’ia ofrojë edhe Minierës së Trepçës, në Stan Tërg.

Në kuadër të projektit për shtrirjen e fijeve optike nëpër tërë territorin e Kosovës, PTK ka njoftuar se ka planifikuar që një gjë të tillë ta bëj edhe në pjesën veriore të Kosovës, gjegjësisht në Stan Tërg, ku gjendet edhe miniera.

Në një takim që Kryeshefi Ekzekutiv i PTK-së, Shyqyri Haxha pati të hënën me Drejtorin e Përgjithshëm të Kompleksit të Minierave të Treçës, Ferat Shalën, u diskutua për mundësitë e shumta në përmirësimin e kushteve tejet të vështira të punës, përfshirë edhe mundësitë e varfëruara të komunikimit.

Përmes shtrirjes së fijeve optike deri në këtë lokacion, do të mundësohet qasja direkte në galeritë nëntokësore, ku gjatë ditës punojnë me qindra punëtorë.

Përpos këtij projekti me rëndësi madhore, PTK ka njoftuar se gjatë takimit të dy udhëheqësit e dy kompanive me rëndësi strategjike për vendin, kanë diskutuar edhe mundësitë e ofrimit të pakove të ndryshme që ofrojnë operatori mobil Vala dhe Telekomi i Kosovës, si njësi biznesi të PTK-së

“Një problem i madh për kompleksin e minierës së Trepçës është edhe borxhi i madh që kjo kompani ka ndaj PTK-së, ku pjesa më e madhe e borxhit u tha të jetë trashëguar nga strukturat e mëhershme udhëheqëse, gjegjësisht ato të para pavarësisë së Kosovës.

Për të gjitha këto, të dy krerët e këtyre dy ndërmarrjeve kanë rënë dakord që të gjejnë format adekuate të cilat do të lehtësonin dhe të përmirësonin kushtet mjaft të vështira të komunikimit. /Telegrafi/

Ekonomia e BE-së do tkurret me 4 %

Ekonomia e vendeve të BE-së do të pësojë një tkurrje prej 4 për qind këtë vit, shumë më tepër se parashikimi.

Komisioni Evropian ka rishikuar parashikimin e bërë më parë nga komisioneri për Ekonominë dhe Çështjet Monetare, Joaquin Almunia, që ka vlerësuar se rimëkëmbja do të ndodhë në vitin 2010.

Përkeqësimi i krizës ekonomike globale, rënia e niveleve të tregtisë dhe ajo e vlerës së shtëpive, ka nxitur tkurrjen, tha komisioneri. Ai shtoi se rimëkëmbja e ekonomisë nuk do të nisë deri në gjysmën e dytë të vitit tjetër.

Almunia parashikon edhe rritje të papunësisë në eurozone në 11,5 për qind në 2010. /Telegrafi/tch/

Presidenti Sejdiu pjesëmarrës në forumin ekonomik në Turqi

Presidenti i Republikës së Kosovës, Fatmir Sejdiu, do të udhëtojë nesër për në Stamboll të Turqisë, ku do të marrë pjesë në Forumin Ekonomik Euro-Aziatik.

Në këtë forum Presidenti Sejdiu do të ketë mundësi të mbajë edhe një fjalim.

Po ashtu, gjatë qëndrimit të tij disaditësh në Turqi, Presidenti Sejdiu do të takohet me presidentë shtetesh dhe me ministra të vendeve të ndryshme pjesëmarrëse në këtë forum. /Telegrafi/

Hapet Bursa e punësimit 2009

Me synimin për gjetjen e vendeve të reja të punës dhe zbutjen e papunësisë, sot në Prishtinë, u organizua bursa e parë e punësimit në të cilën qytetarët e Kosovës mund të aplikojnë për punë në 35 kompani të ndryshme të cilat janë pjesëmarrëse.

Projekti “Bursa e punësimit 2009” i Aleancës Kosovare të Biznesit (AKB) i mbështetur nga Ministria e Punës dhe Mirëqenies Sociale synon të punësojë punëtorë në sektorë të ndryshëm dhe paraqet një mundësi të shkëmbimit të informacioneve në mes subjekteve të tregut të punëdhënësve- punëmarrësve.

Në hapjen e bursës së punësimit e cila do të zgjasë deri në pasditën e të martës të pranishëm ishin krerët më të lartë shtetërorë, presidenti Fatmir Sejdiu dhe kryeministri Hashim Thaçi.

Juncker paralajmëroi për krizë sociale në Evropë

Kryetari i Eurogrupit dhe kryeministër i Luksenburgut, Jean-Claude Juncker paralajmëroi se ekziston rreziku që në Evropë të shfaqet kriza sociale për shkak të rritjes së pritur të papunësisë.

"Po shkojmë drejt krizës sociale, sepse do të ketë krizë me punësimin dhe vendet e punës", tha Juncker pas takimit me ministrat e Financave të vendeve të Eurozonës, që po mbahet në Bruksel.

Juncker bëri thirrje që të gjitha përpjekjet të kahëzohen drejt mbisundimit social dhe ekonomik të kësaj situate. Ai u bëri thirrje drejtorëve të ndërmarrjeve evropiane që t'i shmangin largimet masive nga puna, duke dhënë në atë mënyrë shembull për përgjegjësi sociale.

Komisioni Evropian dje i bëri parashikimet e sivjetme ekonomike për vendet e BE-së dhe kumtoi se pret që gjatë viteve 2009 dhe 2010 në BE të shkurtohen 8,5 milionë vende të punës. KE parashikon se papunësia do të arrijë 9,9 për qind në Eurozonë këtë vit dhe 11,5 për qind në vitin 2010. /mia/

Deti, burimi i ri i energjisë

Deti mund të jetë furnizuesi i ardhshëm i energjisë elektrike për shumë vende të botes.

Ndoshta jo në sasi aq të mëdha, por sërish të mjaftueshme. Duke shfrytëzuar baticat, rrymat nënujore, ndryshimin e nivelit të kripës në grykëderdhjen e lumenjve, apo diferencën e temperaturës në sipërfaqe të ujit të oqeaneve me atë të thellësisë, mund të përftohet energji thonë shkencëtarët.

Vetëm përzierja e ujit të kripur me atë të ëmbël do të kishte një potencial shfrytëzimi prej 2.000 terawat/orë për një vit, ku një terawat/orë është i barazvlefshëm me 1 miliard kilovat/orë.

Dikush e përshkruan shfrytëzimin e ujit të kripur për energji një thesar që ia vlen të eksplorohet. Në këtë prizëm, amerikanët janë vënë sërish përpara dhe po projektojnë vendosjen e disa të ashtuquajturve "mullinj" në det, pranë bregut të Floridas. /Telegrafi/tch/

Katari do të ndërtojë elektrocentralin më të madh në Lindjen e Afërt

Katari do të fillojë me ndërtimin e elektrocentralit me vlerë prej 3,9 miliardë dollarëve, që duhet të paraqet objektin më të madh të ngjashëm në Lindjen e Afërt, lajmërojnë mediumet.

Projekti "Ras Girtas" duhet të fillojë punën në prill të vitit 2011.

Elektrocentrali do të prodhojë 2.730 megavatë rrymë në orë, si dhe 286 milionë litra ujë të dekripëzuar në dite.

200 milionë euro nga tregtia ilegale

Qarkullimi nga tregtia me emigrantë ilegalë të cilët me anë rrugës detare arrijnë në Greqi, në vitin 2008 është mbi 200 milionë euro.

Sipas mediumeve greke, të cilat analizojnë se nëse kësaj shume i shtohen edhe paratë e fituara nga tregtia me migrantë që zhvillohet me anë të rrugës tokësore, shuma do të ishte shuëm e lartë.

Çmimoren për bartjen e emigrantëve, kriminelët e bëjnë në varësi me distancën dhe mënyrën e udhëtimit.

Sipas të dhënave të autoriteteve greke, udhëtimi nga Pakistani deri në Angli, do të mund të kushtonte rreth 30.000 dhe 40.000 euro. Deri në Gjermani është 15.000 euro. Përveç kësaj ekzistojnë çmime edhe për grupe, të cilët përveç përmes Greqisë shpesh herë barten edhe përmes Turqisë.

Çmimi mesatar i udhëtimit të një emigranti është diku rreth 20.000 euro.

Panairi i Mobilierisë hap dyert nesër

SHoqata e Prodhuesve te Drurit prezenton në për te katërtin vit radhazi prezneton panairin e specializuar te përpunuesve te drurit, duke ofruar mundësi kontaktimi, prezantimi dhe biznesi për kompanitë vendase dhe te huaja kryesisht nga Kosova, Maqedonia, Gjermania, Shqipëria, Italia, etj.

Panair do të hapet nesër dhe do të jetë i hapur deri më 9 maj. Ky panair sjell ide dhe realizime te mobilimit modern dhe klasik ,te shtëpive, dhoma gjumi, kuzhinave, salloneve,etj), te hoteleve dhe restoranteve, zyrave, sallave te mbledhjeve, konferencave, ambienteve sociale etj, si dhe parkete, shkalle, dyer e dritare të të gjitha llojeve etj. /telegrafi/

Importi i energjisë, gjysma nga Serbia

Importet e energjisë elektrike i kushtuan 211 milionë euro gjatë vitit 2008, shifër kjo absolutisht më e larta e regjistruar ndonjëherë, njoftoi Qendra Shqiptare për Tregtinë Ndërkombëtare, ACIT, në raportin vjetor. Nga këto para, 52 për qind ikën në Serbi, një vend që nuk është eksportues neto i energjisë elektrike, 36 për qind përfunduan në Zvicër, ndërsa pjesa tjetër në vende të tjera.

Importet e energjisë elektrike qenë më të shtrenjtat të shënuara ndonjëherë. Çdo kilovat, nga 2.4 miliardë të tillë të importuara në 2008-ën, kushtoi 10.5 lekë. Shpenzimet për energji importi qenë 16 për qind më të larta sesa në vitin 2007 dhe ato u importuan përgjatë të gjithë vitit.

Një pjesë e konsiderueshme e energjisë së importuar u klasifikua si "humbje në rrjet", një term që nënkupton vjedhjet. Vjedhjet e energjisë elektrike rriten në raport të drejtë me sasinë e energjisë së futur në rrjet.

Gjatë vitit të kaluar, 2.1 miliardë nga 6.6 miliardë kilovat të furnizuara gjithsej, u vodhën ose humbën në rrjet. Humbjet u rritën me 10 për qind, pavarësisht deklarimeve të shumëfishta të autoriteteve për reduktim të vjedhjeve apo spektakleve të ofruara me prerje telash. Importet e vitit të kaluar përbëjnë 75 për qind të të ardhurave të KESH-it.

Shqipëria ka shpenzuar afërsisht 400 milionë euro gjatë dy viteve të fundit për të blerë energjinë e konsumuar. Sa për krahasim, termocentrali që po ndërtohet në Vlorë ka fuqi të instaluar 93 MW dhe po kushton rreth 100 milionë euro. Në rast se paratë e shpenzuara për import do të përdoreshin për ndërtim termocentralesh, Shqipëria do të kishte të gjithë energjinë e nevojshme.

Importet e energjisë elektrike kanë ndihmuar në thellimin e deficitit tregtar dhe deficitit të llogarisë korrente të vendit. /shqip/

Borxh nga katër banka për Rrëshen-Kalimashin

Pas shumë mundimesh dhe negociatash të vështira, qeveria shqiptare arrin t‘i bindë bankat për marrjen e kredisë me vlerë 250 milionë euro. Marrëveshja u nënshkrua dje pasdite nga ministri i Financave, Ridvan Bode, dhe përfaqësuesve të dy bankave kryesore, "Alpha Bank" dhe "Deustche Bank". Pjesa dërrmuese e kredisë do të përdoret për të mbuluar financimin e rrugës Rrëshen-Kalimash, pjesë e Durrës-Kukës.

Nisur nga situata e vështirë financiare që po kalojnë bankat e huaja, qeveria pranoi që shuma të jepet e ndarë në dy këste dhe nga disa banka që do të përfaqësohen nga dy të parat. Ministria e Financave deklaroi dje zyrtarisht se, "kredia do të shpërndahet në dy transhe.

E para prej 95 milionë eurosh do të disbursohet brenda muajit maj dhe e dyta prej jo më tepër se 155 milionë eurosh, që do të agregohet nga sindikata e gjerë, do të shpërndahet brenda muajit qershor".

Po sipas ministrisë, e cila negocioi për qeverinë shqiptare, kredia merret për të financuar nevojat e buxhetit të shtetit për shpenzime kapitale për vitin 2009, duke përfshirë financimin e mbetur të rrugës Rrëshen-Kalimash, vlera e së cilës po prek majat e buxhetit, prej 800 milionë eurosh.

Ministria e drejtuar nga Ridvan Bode konfirmon faktin se, një numër i madh bankash të tjera, me aktivitet ndërkombëtar, por edhe lokal, kanë shprehur interes për t‘u përfshirë në sindikatën e gjerë që do të disbursohet në formën e një transhi të dytë.

"Ky zhvillim shumë pozitiv tregon edhe një herë besimin që institucionet financiare ndërkombëtare kanë në ekonominë tonë dhe në ecurinë e reformave të ndërmarra nga qeveria", tha dje ministria. Gjithashtu, sipas saj, marrja e kësaj kredie do ta rrisë stabilitetin financiar në vend dhe do të zvogëlojë ndjeshëm nevojën e qeverisë për të financuar buxhetin nga tregu i brendshëm bankar.

Kushtet dhe interesat e kredisë nuk janë bërë të ditura për momentin nga ministria, por mendohet se nuk do të jenë më të larta se 7 për qind.

Qeveria shqiptare do të rishikojë taksat për automjetet dhe mallrat nga Kosova

Qeveria shqiptare do të rishikojë të gjitha taksat dhe tarifat doganore për mallrat dhe automjetet që vijnë nga Kosova drejt territorit tonë.

Ky lajm bëhet i ditur nga burime të Ministrisë së Financave, sipas të cilave qeveria është duke studiuar edhe një herë normën e tarifave të taksave në pikat kufitare me Kosovën, me qëllim lehtësimin e tyre.

Sipas të njëjtave burime, një veprim i tillë ka për qëllim stimulimin e shtimit të fluksit të mallrave dhe mjeteve drejt Shqipërisë dhe anasjelltas. Një lëvizje të tillë në marrëdhëniet ekonomike me Kosovën, qeveria po e ndërmerr edhe prej nisjes së sezonin turistik, nga ku pritet fluksi më i madh i pushuesve drejt brigjeve tona.

Në Kosovë aktualisht numërohen rreth 130 mijë makina, dhe çdo vit në këtë vend hyjnë rreth 10 mijë makina të përdorura që blihen kryesisht në Gjermani. Për shkak të gjendjes së keqe të rrugëve në një pjesë të Kroacisë dhe në Malin e Zi, kalimi nga Shqipëria mund të bëhet rruga më e rehatshme për në Kosovë.

Për makinat e benzinës, taksat doganore fillojnë nga 130 mijë lekë, ndërsa për ato të naftës nuk ka më lirë se 160 mijë lekë. Taksat doganore në Shqipëri janë pothuajse zero, por importuesit paguajnë Tatim mbi Vlerën e Shtuar si dhe taksa të tjera, në rastin e makinave, të ashtuquajturën "taksë ndotjeje".

Ata që kalojnë mallra transit paguajnë një tarifë minimale zyrtare, por duhet ta garantojnë faktin se do të dalin nga Republika e Shqipërisë përmes agjencive, të cilat në këto raste rrisin koston e përdorimit të Shqipërisë si korridor rajonal. Agjencionet e shpendicionit per kalim ne Shqiperi ju marrin qytetareve nga 150 euro per automjet. /albania/

BSPK paralajmëron protestë me 16 Maj

Drejtuesit e Bashkimit të Sindikatave të Pavarura të Kosovës po përgatiten për protestën e paralajmëruar për 16 maj, përmes së cilës sindikalistët synojnë të realizojnë kërkesat e tyre.

Kryetari i BSPK-së, Haxhi Arifi, ka thënë se dialogu social është me rëndësi të madhe për proceset demokratike që lidhen me integrimet euroatlantike, ndërsa sipas tij, ky dialog nuk guxon të jetë vetëm si synim teorik dhe përcaktim i programeve partiake e qeveritare, por duhet të bëhet realitet.

Rreth zhvillimit të kësaj proteste, drejtuesit e BSPK-së do të njoftojnë sot në një konferencë për media. /rtk/

Kompjuterizohen dhe informatizohen shkollat dhe universitetet në vend

Kryeministri i Republikës së Kosovës, Hashim Thaçi duket se premtimin paraelektoral për pajisjen e të gjitha shkollave dhe universiteteve në vend me fije optike.

Ky projekt do të realizohet falë një memorandum të Mirëkuptimit që është nënshkruar sot nga ana e kryeministri të Republikës së Kosovës, Hashim Thaçit dhe kryeshefit ekzekutiv të PTK-së, Shyqyri Haxhës.

Me rastin e nënshkrimit të memorandumit, Thaçi është shprehur se marrëveshja në fjalë do ta lehtësojë në masë të madhe implementimin e projektit madhor të Qeverisë së Republikës së Kosovës për informatizimin, kompjuterizimin e çdo shkolle në Republikën e Kosovës.

“Në bashkëpunim të ngushtë kësaj radhe me PTK-në, projekti i nënshkruar ka për qëllim lidhjen e të gjitha institucioneve shkollore të Kosovës me fije optike”.

Nga ana e tij, kryeshefi ekzekutiv i PTK-së, Shyqyri Haxha ka pohuar se ky është investimi më i madh që PTK-ja ka investuar ndonjëherë në Kosovë.

“Projekti është afër 80 milion euro. Kemi gjithsej 1080 shkolla, në gjithë territorin e Kosovës dhe ky projekt do të përfshijë te gjitha shkollat edhe universitet”.

Haxha po ashtu ka premtuar se zotimi i PTK-se është që të përmbyllet kjo sa më shpejt, por edhe përgjegjësitë që kanë ministritë përkatëse janë zotuara që t’i kryejnë, kështu që është një projekt që fillon sivjet dhe do të përmbyllet në kohën më të përshtatshme dhe më të shpejt të mundshme. /Telegrafi/

Shala, sonte bëhemi pjesë e FMN-së

Deri në ora 18:00, sipas kohës së Uashingtonit, pritet të votohet në Fondin Monetar Ndërkombëtar për anëtarësimin e Kosovës në këtë organizatë.

"Jam absolutisht i sigurt dhe optimist që sot deri në ora 18:00 do të përmbyllet me sukses procesi i anëtarësimit të Kosovës në FMN, përkatësisht do të përmbyllet me sukses votimi në favor të anëtarësimit të Kosovës në FMN”, tha ministri i Ekonomise dhe Financave, Ahmet Shala.

Sipas tij, konfirmimi zyrtar pritet pas 3-4 ditësh dhe vetëm atëherë mund të lëshojnë zyrtarisht deklarata për rezultatet e votimit, pasi që theksoi se votimi në FMN është konfidencial.

Komiteti për anëtarësim në FMN ka aprovuar kuotën për anëtarësim të Kosovës në FMN, e cila kap shumën prej 65 milionë euro. Kjo shumë i jep fuqinë votuese Kosovës në FMN, që është përafërsisht e njëjtë me shtetet e regjionit. /telegrafi/

Kosova - anëtare e Fondit Monetar Ndërkombëtar

Kosova ka fituar vota të mjaftueshme për anëtarësim në Fondin Monetar Ndërkombëtar. Nga 185 vende anëtare, afro 100 vende kanë votuar për pranimin e Kosovës. Rezultatet e votimit do t’i paraqiten sot Bordit të Drejtorëve Ekzekutivë, ndërsa zyrtarisht do të bëhet i ditur të premten.

Në një konferencë për media, Ministri i Ekonomisë Ahmet Shala dje bëri të ditur se anëtarësimi i Kosovës nuk do të ketë drejtpërdrejt pagesë të menjëhershme prej 65 milionë eurosh në FMN duke theksuar se Kosova mund të tërheq kredi të buta nga FMN-ja.

Po ashtu ministri Shala ka deklaruar që Kosova që nga momenti i konfirmimit do të jetë anëtare e barabartë me të gjitha shtetet tjera në FMN.

Shala vlerësoi se anëtarësimi i Kosovës në FMN është parakusht për anëtarësim në çdo institucion tjetër financiar ndërkombëtar. Sipas tij anëtarësimi në fond hap dyert për anëtarësim edhe në Bankën Botërore. /RTK/

Meksika do të humb 2.3 mld $ për shkak të gripit të derrave

Gripi vdekjeprurës H1N1 do ta kushtojë Meksikën 2.3 miliardë dollarë, lajmëroi ministri meksikan i Financave, Agustin Karstens.

Pasojat nga kriza sanitare, për shkak të cilave u mbyllën ferma dhe magazina të tëra, si dhe të ardhurat e zvogëluara nga turizimi, do të sjellin deri te rënia e Bruto Prodhimit Vendor për 0.3 dhe 0.5 për qind.

Paralelisht me këtë, autoritetet në Meksikë lajmëruan se në vend janë regjistruar 64 të infektuar nga gripi i derrave, me çka numri i të sëmurëve u ngjit në 840 njerëz.

Deri tani nga gripi i ri në Meksikë vdiqën 26 persona./Makfaks/

Aeroport, rritet numri i udhëtarëve përkundër krizës

“Rritja e numrit të udhëtarëve për 10 përqind në Prill të këtij viti është inkurajuese jo vetëm për menaxhmentin e Aeroporti Ndërkombëtar të Prishtinës por edhe për Kosovën në tërësi, duke pasur parasysh që një pjesë e madhe e vendit tonë varet nga të ardhurat e bashkatdhetarëve dhe nga ardhja e tyre në Kosovë”, ka deklaruar Altin Ahmeti, Koordinator i ANP-së për marrëdhënie me jashtë.

Sipas Ahmetit, janë rreth 8 mijë udhëtarë më shumë se në prill të vitit 2008 dhe ky numër i udhëtarëve dëshmon se kriza financiare, e cila ka ndikuar ndjeshëm në uljen e numrit të udhëtarëve në aeroporte të ndryshme në botë, ende nuk ka pasur ndikim në ANP.

“Në muajin Prill 2008, nëpër ANP kaluan 81457 udhëtarë ndërsa në Prill 2009, 88950 udhëtarë. Ndërsa në rang vjetor, duke krahasuar 4 muajt e parë të këtij viti, me vitin e kaluar, rritja e numrit të udhëtarëve është në shifrën e 3 përqind-shit".

Ai po ashtu ka pohuar se krahas rritjes së numrit të udhëtarëve, rritje të dukshme në Aeroportin Ndërkombëtar të Prishtinës kanë pasur edhe fluturimet e kompanive ajrore.

“Janë mbi 100 fluturime më shumë që janë realizuar në prill të këtij viti duke krahasuar me prill të 2008. Derisa në prill 2008 kemi pasur 329 fluturime, tani kemi 437 fluturime.

“Është kjo një rritje e konsiderueshme prej gati 33 përqind dhe nga ky shtim i numrit të udhëtarëve dhe të fluturimeve gjithashtu presim edhe rezultate më të mira financiare këtë vit. Kjo rritje e numrit të fluturimeve dhe udhëtarëve, veqmas duke marrë për bazë krizën financiare globale, është drejtëpërdrejt si rezultat i disa vendimeve strategjike të menaxhmentit si puna 24 orë dhe futja e programit nxitës për aviokompanitë, çka i ka shtyrë këto kompani të rrisin numrin e fluturimeve”, tha tutje Koordinatori i ANP-së, Altin Ahmeti.

Ndryshe ANP, vitin e kaluar pati një rritje të numrit të udhëtarëve prej gati 15 përqind , krahasuar me vitin 2007. Derisa në vitin 2007 pati vetëm 990 mijë udhëtarë civil, në 2008 numri i tyre arriti 1 milion e 137 mijë udhëtarë. /Telegrafi/

Fiat mohon mbylljen e impianteve

Shtëpia automobilistike “Fiat” ka përgënjeshtruar të përditshmen gjermane “Frankfurter Allgemeine Zeitung”, sipas së cilës kompania parashikonte shkurtimin e 18 mijë vendeve pune dhe mbylljen e 10 impianteve Fiat-Opel.

“Informacionet e publikuara nga ‘Frankfurter Allgemeine Zeitung’, rreth projektit Fiat-Opel, nuk janë të vërteta dhe nuk janë pjesë e asnjë plani të Fiat-it”, thuhet në një komunikatë për shtyp të kompanisë. /Telegrafi/tch/

Pranimi i Kosovës në FMN shumë i rëndësishëm, vlerësojnë ekspertët

Anëtarësimi i Republikës së Kosovës në Fondin Monetar Ndërkombëtar konsiderohet shumë i rëndësishëm për Kosovën si në rrafshin politik, po ashtu edhe në atë ekonomik. Ekspertët vendorë të ekonomisë vlerësojnë se anëtarësimi në këtë institucion ndërkombëtar do ta radhisë Kosovën në mesin e vendeve me peshë ekonomike.

Ekspertët e ekonomisë vlerësojnë se pranimi i Kosovës në FMN është shumë i rëndësishëm si në aspektin politik, po ashtu edhe atë ekonomik. Drejtori i Institutit për studime të Avancuara-GAP, Shprend Ahmeti, konsideron anëtarësimi i Kosovës në këtë institucion ndërkombëtar është edhe njohje e shtetësisë së Kosovës nga një institucion i rëndësishëm ndërkombëtar.

Kryetari i Odës Ekonomike të Kosovës, Besim Beqaj vlerëson se anëtarësimi i Kosovës në këtë institucion, është konfirmim i bashkësisë ndërkombëtare për mbështetjen e zhvillimit të Kosovës.

Profesori i financave ndërkombëtare, Safet Merovci, konsideron se pas anëtarësimit, tani Kosova mbikëqyret drejtpërdrejt nga FMN-ja. Njëkohësisht kjo dëshmon se Kosova ka peshë ekonomike dhe politike ne botë, thekson ai.

Ndërkaq, drejtoresha e Odës Ekonomike Amerikane, Mimoza Kusari Lila, shprehet se pas anëtarësimit, Kosova do të ketë qasje në 184 shtete sa janë anëtare të FMN-së.

Ndryshe, nga 185 vende anëtare, afro 100 sosh kanë votuar për pranimin e Kosovës në FMN. Rezultati e votimit do t’i paraqitet sot Bordit të Drejtorëve Ekzekutiv, ndërsa zyrtarisht do të bëhet i ditur të premten. Ndërkaq deri më 3 qershor duhet të përfundojë edhe procesi i votimit për anëtarësim të Kosovës në Bankën Botërore. /rtk/

Tadiq: E kundërshtojmë pranimin e Kosovës në FMN

Presidenti Boris Tadiq, tha se Serbia ka pasur pak gjasë, që ta pengoj hyrjen e Kosovës në Fondim Monetar Ndërkombëtar, por, sipas tij, kjo nuk do të thotë se Kosova është bërë shtet i pavarur.

“Ky nuk është lajm i mirë, por nuk është as tragjik, pasi një vend bëhet vërtetë shtet i pavarur dhe ndërkombëtarisht i njohur, vetëm kur të bëhet anëtar i Kombeve të Bashkuara”, tha Boris Tadiq.

Ai theksoi se Serbia “e kundërshton dhe çdo herë do ta kundërshtoj pavarësinë e Kosovës”. /rel/

Bursa 2009 ofroi 500 vende tjera pune

Ka përfunduar projekti “Bursa e punësimit,2009”, që u mbajt me 4 dhe 5 maj në Prishtinë nën përkujdesjen e Ministrisë së Punës dhe Mirëqenies Sociale (MPMS) dhe të Aleancës Kosovare të Biznesit (AKB).

Me rastin e mbylljes së këtij projekti, përfaqësues të MPMS-së dhe të AKB-së, njoftuan të mërkurën se me ndërmjetësimin e projektit ‘Bursa e punësimit 2009” janë punësuar në kompanitë kosovare 78 qytetarë, ndërkaq gjatë vitit pritet të fillojnë punën edhe 500 të tjerë.

“Gjatë dy ditëve “Bursa e punësimit 2009” ka pasur rreth 3 mijë vizitorë, 2.280 aplikacione të profileve të ndryshme. Prej tyre, janë përzgjedhur 578 të punësuar, prej të cilëve 78 veçse kanë filluar punën sot, ose fillojnë nesër apo pasnesër. Kurse 500 të tjerë do të punësohen brenda vitit”,ka deklaruar Agim Shahini kryetar i AKB-së. /Telegrafi/

Konsumatorët Prepaid të Vala-s tashmë qasje në tërë botën

Operatori publik mobil Vala, ka lansuar shërbimin e ri, Prepaid USSD Roaming, me çmim deri në 50 përqind më lirë se Postpaid Roaming-u aktual dhe me 200 operatorë botëror.

Bazuar në një njoftim zyrtar të kompanisë me këtë shërbim të ri të Vala-s, të gjithë konsumatorët Prepaid tash e tutje mund të marrin telefonat e tyre mobil kudo në botë dhe të përdorin shërbimin USSD Roaming me një çmim shumë të volitshëm.

Me këtë rast Kryeshefi Ekzekutiv i PTK-së, Shyqyri Haxha, në një konferencë me gazetarë ka deklaruar se ky është një sukses historik i kompanisë, duke marrë parasysh që konsumatorët tanë Prepaid, e që janë mbi 840 mijë, tash e tutje mund të shërbehen me telefonat e Valës kudo në botë dhe do të kenë qasje në telefoni.

“Duhet theksuar se pranimi i SMS-vë jashtë Kosovës me shërbim Prepaid Roaming, do të jetë pa pagesë, e që është një lehtësi shumë e madhe për konsumatorët”.

Thirrjet me Prepaid Roaming, kur konsumatori gjendet jashtë vendit, duhet të realizohen në këtë mënyrë: të shtypet *123*0037744XXXXXX# ok për thirrje, pastaj dëgjohet një sinjal dhe thirrja duhet te ndalet. Pas 5 sekondash zilja e telefonit cingëron dhe krijohet lidhja. Kjo procedurë duhet përsëritur për secilën thirrjet.

Ndërkohë, për SMS, mënyra e dërgimit është e njëjtë sikur kur konsumatori gjendet brenda në Kosovë: 044xxxxxx.

Në një të ardhme shumë të shpejt, Kryeshefi Ekzekutiv i PTK – së, ka premtuar risi të tjera shumë atraktive dhe cilësore për konsumatorët e Vala-s.

Ndërkohë, Haxha ka njoftuar se brenda një kohe shumë të shkurtër, është arritur që numri i konsumatorëve të Vala-s të shtohet edhe për 100 mijë. Përderisa nga fundi i këtij vitit, numri i përgjithshëm i konsumatorëve synohet të rritet në 1 milion e 200 mijë konsumatorë. /Telegrafi/

Prezantohen kapacitetet energjetike të Kosovës

Sot në Stamboll të Turqisë ka hapur punimet Forumi i 12 Euroaziatik ku po merr pjesë edhe një delegacion nga Kosova, në kuadër të të cilat janë presidenti Fatmir Sejdiu, ministrja e Energjisë Justina Shiroka –Pula dhe ministri i Mjedisit dhe Planifikimit Hapësinor, Mahir Yagcılar.

Në sesionin për energjinë, ministrja, Justina Shiroka-Pula ka prezantuar të arriturat dhe sfidat e Kosovës në fushën e energjetikës dhe ka vlerësuar se problemet energjetike janë probleme të përbashkëta dhe kanë dimension rajonal dhe më gjerë.

Ministrja Pula me këtë rast ka thënë se përkundër faktit se Kosova është një vend i vogël, kur bëhet fjalë për energjinë vendi ka burime të konsiderueshme primare të saj, e veçanërisht linjit nga i cili mund të gjenerohet energji jo vetëm për Kosovën por edhe për vendet përreth.

“Kosova është duke rishikuar politikat dhe strategjinë energjetike duke krijuar hapësirë për investimet private në këtë sektor. Kështu me asistencën e Bankës Botërore, Komisionit Evropian dhe USAID-it, në Kosovë do të ndërtohen kapacitete të reja gjeneruese prej 1000 MW në fazën e parë deri në vitet 2016-2017”.

Ajo më tutje tha se Kosova synon të integrohet në rrjetat ndërkombëtare të gazit natyror që vijnë nga Euroazia. Sa i përket legjislacionit, ministrja tha se e gjithë korniza ligjore në fushën e energjetikës po bëhet konform direktivave të Bashkimit Evropian.

Duke u ndalë te bashkëpunimi ndërshtetëror, ministrja Pula tha se Kosova është e hapur për bashkëpunim në fushën e energjisë me të gjithë vendet duke theksuar marrëveshjen e nënshkruar me Shqipërinë dhe marrëveshjet në proces me Maqedoninë, ndërkohë që ka paralajmëruar një marrëveshje të tillë edhe me Malin e Zi.

Konkurrencë e fortë për drejtor të ATK-së

Në konkurrencë për drejtor të Administratës Tatimore të Kosovës është drejtori aktual Naim Fetahu, i cili është kundërshtuar nga ICO, Shaqir Totaj, menaxher i rajonit të Prizrenit në ATK dhe ish menaxher i Njësit të Tatimpaguesve të Mëdhenj, në të cilën pozitë ka qenë mjaft i suksesshëm, Elmaz Pireva, poashtu ish punonjëse lartë e ATK-së, Adem Zogijani, kandidat i PDK-së për Fushë Kosovë etj.

Intervistimi i këtyre kandidatëve pritet të kryhet gjatë ditës së nesërme.

Drejtori i tanishëm Naim Fetahu, gëzon mbështetjen e qeverisë dhe është emëruar në këtë pozita nga qeveria e Kosovës, pa konkurs. Ai ka qenë kryetar i degës së PDK-së, në Podujevë. Zgjedhja e tij provokoi reagimin e Zyrës Ndërkombëtare Civile, ICO, e cila kërkoi shpalljen e konkursit.

Ndërsa kandidati tjetër konkurrent dhe me përvojë në menaxhim është Shaqir Totaj, menaxher rajonal i Prizrenit. Ai me herët ka drejtuar Njësitin për Tatimpaguesit e Mëdhenj dhe gjatë kësaj kohe ky njësit ka arritur ti trefishojë të ardhurat për buxhet.

Edhe kandidatja tjetër me potencial Elmaz Pireva, ka pasur pozita të larta në ATK dhe së bashku me Shaqir Totajn, janë aty që nga themelimi i kësaj administrate. Momentalisht ajo është anëtare e bordit të Postë dhe Telekomit të Kosovës. /Telegrafi/

Porsche dhe Volkswagen drejt bashkimit

Dy nga prodhuesit më të famshëm të makinave në Gjermani, Volkswagen dhe Porsche, po diskutojnë perspektivat e një bashkimi.

Ata thanë se po punonin drejt krijimit të një grupi manifakturues të një makine të integruar, duke theksuar ndërkohë se Porsche do të ruajë pavarësinë që ka.

Porsche është aktualisht aksioneri më i madh tek Volkswagen, duke patur 50 % të aksioneve.

Megjithatë edhe sikur të kishte 75% të aksioneve, Porsche përësëri nuk do të mundte të merrte kontroll të plotë të Volkswagen-it si rezultat i një ligji të shtetit ë Saksonisë së poshtme që mban 20% të aksioneve mund të bllokojlë vendime strategjike.

Bashkimi i propozuar pason një valë konsolidimi në industrinë e makinave që është goditur rëndë nga kriza botërore ekonomike. /bbc/

Qeveria gjermane premton ndihmë për sektorin e energjisë

Zëvendësministri i Energjisë dhe Minierave, Blerim Rexha, ka pritur një delegacion gjerman të kryesuar nga Friederike Karcher, zyrtare për Kosovën në Ministrinë Gjermane për Bashkëpunimin Ekonomik, që po viziton këto ditë Kosovën.

Qëllimi i këtij takimi ishte prezantimi i palës gjermane i projekteve që janë parashikuar të mbështesin në fushën energjetike të Kosovës nga Qeveria Gjermane në kuadër të bashkëpunimit ndërshtetëror për këtë vit.

Me këtë rast zv.ministri Rexha, ka informuar palën gjermane për progresin e shpejte qe po shënon Kosova në plotësimin e infrastrukturës ligjore, e cila po përgatit Kosovën që në afate të shpejta të tërheq investime të konsiderueshme private në sektorin energjetik.

Ndërsa, Friederike Karcher zyrtare për Kosovën në Ministrinë Gjermane për Bashkëpunim Ekonomik e ka informuar zv.ministrin Rexha se Qeveria gjermane ndër prioritetet e para për mbështetje e ka sektorin e energjisë në Kosovë për këtë vit.

Qeveria gjermane në këtë vit fillimisht do të financoj studime të projekteve në fushat e ngrohjes së disa qyteteve dhe ato për rritjen e efiçiencës së energjisë” ka thënë Karcher.

Ndryshe, në takim të dyja palët janë dakorduar që të punohet bashkërisht në përgatitjen e Projekt propozimeve konkrete, ndër të cilat fusha e efiçiencës së energjisë dhe burimeve e ripërtëritshme.

Ndërkaq, përgatitja e përbashkët me shtetin gjerman në fushën e efiçencës është vlerësuar në takim se do të arrij që Kosova të përmbush obligimet të rëndësishme që ka ndaj Traktatit të Komunitetit të Energjisë si nënshkruese e këtij Traktati. /Telegrafi/

Beqaj në Samitin e Stambollit, flet për krizën globale

Kryetari i Odës Ekonomike të Kosovës Besim Beqaj është duke marrë pjesë në Samitin e 12-të të Euroazisë i cili po mbahet në Stamboll të Turqisë.

Organizator i këtij Samiti është Fondacioni Marmara dhe tema boshte të Samitit janë energjia, ekonomia ndërkombëtare dhe ekologjia.

Duke marr pjesë në këtë Samit në emër te OEK-ut, kryetari Beqaj do të flas rreth krizës globale financiare, koordinimit global për tejkalimin e saj dhe bashkëpunimin regjional.

Përveç personaliteteve të rëndësishme nga bota e biznesit në Samit marrin pjesë presidenti i Kosovës Fatmir Sejdiu dhe ai i Kroacisë Stjepan Mesiq. /Telegrafi/

Grevë në Trepcë

Minatorët e Kombinatit Trepça hynë në grevë sot për shkak të mospërmbushjës së kërkesave nga ana e Instiucioneve të Republikës së Kosovës.

Kjo është bërë e ditur përmes një komunikata për media, që ka ardhur nga minsatorët. Ata nuk kanë njoftuar për numrin e punëtorëve që kanë hyrë në grevë dhe detajet e tjera. /telegrafi/

Ruajta e konkurencës, prioritet

Për herë të parë Komisionit Kosovar i Konkurrencës ne emër te shtetit te Kosovës merr pjesë në Konferencën Ndërkombëtare te 14-të të Autoritetit Gjerman të Konkurrencës, organizuar ne Hamburg, përkrah autoriteteve homologe të konkurrencës të Bashkimit Evropian, shteteve të Evropës Juglindore dhe nga gjithë bota.

Kryetari i Komisionit z. Osman Ejupi, mori pjesë në konferencën e Autoritetit Gjerman të Konkurrencës me temë “Kompanitë dominuese- linja e holle mes rregullatorëve dhe konkurrencës”.

Në këtë konferencë referuan përfaqësues të lartë të Bundeskartelamt-it Gjerman, përfaqësues të Komisionit Evropian si Znj. Neelie Kroes dhe Drejtori i Përgjithshëm i DG Competition, Philip Loëe, si dhe të ftuar të tjerë, përfaqësues të bizneseve më të mëdha në vend si Drejtori Ekzekutiv i Deutche Telecom apo Presidenti i linjës ajrore Lufthansa Airlines, përfaqësuesja e NOKIA etj.

Në këtë konferencë u nënvizua fakti i rëndësishëm i marrëdhënieve midis konkurrencës dhe rregullatorëve, liberalizimi i sektorëve të ekonomisë. U theksua rëndësia që kanë ligjet rregullatorë drejt një konkurrence të lirë dhe efektive.

Nga ana e Komisioneres së KE-së u nënvizua fakti i eliminimit të barrierave të hyrjes në treg në sektorët e rregulluar, rëndësia e konkurrencës në treg si dhe veprimtaria e Autoriteteve të Konkurrencës në trajtimin e praktikave anti-konkurruese edhe ne rastet kur nuk ndërhyjnë entet rregullatore.

Gjithashtu nga ana e Drejtorit të DG Competition u trajtuan disa aspekte në lidhje me nenin 82 të Traktatit të BE-së dhe konkretisht se çfarë do trajtohet si pozitë dominuese, pjesët e tregut që duhet të zotërojë një ndërmarrje që të konsiderohet si dominante në treg etj. Gjithashtu u diskutua rreth çmimeve të ulta në treg si dhe reflektimin që paraqesin këto çmime në mundësinë e rritjes së fuqisë ekonomike të një ndërmarrjeje. Qëllimi final i veprimtarisë së autoriteteve të konkurrencës është ruajta e konkurrencës.

Gjithashtu me interes ishin dhe prezantimet e paraqitura nga përfaqësuesit e komunitetit të biznesit, si përfaqësues të bizneseve më të mëdha në vend dhe njëkohësisht me pozitë dominuese në vend. U theksua politika që ata ndiqnin duke eliminuar rrezikun e abuzimit me pozitën dominuese që ata zotëronin.

Zharku njofton Turkun rreth zhvillimit të turizimit në vend

Ministri i Tregtisë dhe Industrisë, Lutfi Zharku priti në takim sot ministrin e Turizmit, Kulturës, Rinisë dhe Sporteve të Republikës së Shqipërisë, Arian Turku, që ishte i shoqëruar nga bashkëpunëtorë dhe nga ambasadori i Shqipërisë në Kosovë, Islam Lauka.

Fillimisht ministri Zharku, homologun e tij nga Shqipëria e njoftoi për zhvillimet që janë duke u bërë nga MTI për zhvillimin e industrisë së turizmit në Kosovë.

Gjatë këtij takimi u bisedua për intensifikimin e bashkëpunimit midis institucioneve përkatëse të Kosovës dhe të Shqipërisë.

Të dy ministrat, Zharku dhe Turku, u pajtuan se bashkëpunimi në fushën e turizmit ndërmjet dy vendeve nuk duhet të përkufizohet vetëm në panaire, por edhe për shkak të lidhjeve të natyrshme të kombit tonë, ky bashkëpunim duhet të thellohet dhe zgjerohet edhe në fushat tjera. /Telegrafi/

Rashiq merr pjesë në Seminarin për sistemin e pensioneve

Me ftesë të Bankës Botërore, ministri i MPMS, Nenad Rashiq, po qëndron në Bruksel, ku është duke i zhvilluar punimet Seminari për Sistemin e Pensioneve në Kohën e Krizës Financiare. Seminari është organizuar nga Banka Botërore, ndërsa po marrin pjesë përfaqësues të qeverive të Evropës dhe rajonit të Azisë Qendrore (ECA).

Bazuar në një njoftim zyrtar të MPMS-së, ky seminar organizohet me qëllim të gjetjes së mundësive për tejkalimin e krizës ekonomike financiare, që ka goditur edhe sistemin e pensioneve në mbarë botën.

“Kriza ekonomike financiare ka reduktuar ndjeshëm vlerat e aseteve, me pasojë për të ardhurat e tanishme dhe të ardhshme të pensioneve. Qeveritë janë duke reaguar në mënyra të ndryshme ku janë duke i shikuar mundësitë e zbatimit të reformave si moshën e pensionimit, kontributin e normave”.


Tutje në njoftimin zyrtar thuhet se tashmë është bërë e ditur se nga kiza ekonomike globale është prekur edhe Trusti i Pensioneve të Kosovës ku vlera e përgjithshme ka rënë në dhjetëra milion euro.

“Këto shqetësime kanë ndikuar në shtrimin e shumë pyetjeve në hartimin dhe zbatimin e financimit të skemave të pensioneve”.

Objektivat e këtij seminari janë nxitja e një diskutimi të hapur nga përfaqësuesit e qeverive të vendeve pjesëmarrëse në lidhje me pensionet në kohë krize dhe potencialin social, fiskal e financiar në reformën afatshkurtër dhe afatgjatë. /Telegrafi/

KEK: Nuk kemi falë asnjë borxh të konsumatorëve

Korporata Energjetike e Kosovës (KEK) me anë të një njoftimi zyrtar ka sqaruar opinionin se nuk ka falur asnjë borxh të konsumatorëve deri sot, dhe nuk planifikon të falë as në të ardhmen asnjë borxh të tillë.

“Kohën e fundit kanë qarkulluar dezinformata, të cilat janë plasuar edhe nëpër media se kinse KEK-u ua paska falur borxhin këtij apo atij komuniteti. KEK demanton fuqishëm këto dezinformata, dhe sqaron se i konsideron të gjithë konsumatorët në mënyrë të barabartë, pra nuk i ndanë në vija etnike, religjioze apo racore, dhe do të kërkojë nga të gjithë shlyerjen e borxhit deri në centin e fundit”, thuhet në njoftimin zyrtar të KEK-ut.

KEK tutje ka shtuar se, vendosmërisë së korporatës i janë përgjigjur një numër i madh i konsumatorëve, dhe po i përgjigjen gjithnjë e më tepër.

“Këtë e tregojnë edhe shifrat e inkasimit. Gjatë katërmujorit të parë të këtij viti inkasimi bruto ka arritur në 56 milionë euro, që është 40 për qind më i lartë se katërmujori i parë i vitit 2008, kur ishin inkasuar 40 milionë euro. Prodhimi i energjisë elektrike është rritur për 11.7 për qind, ndërsa situata e furnizimit me qymyr është jashtëzakonisht stabile, ku në deponitë e TC “Kosova A” dhe TC “Kosova B” rezervat nuk janë asnjëherë nën 400 mijë tonë”. /Telegrafi/

Shqipëria e gatshme për pritjen e turistëve nga Kosova

Shqipëria sivjet është më e gatshme për të pritë turistë nga Kosova, ka thënë ministri i Kulturës dhe Turizmit i Shqipërisë, Ardian Turku. Në Panairin e Tirizmit që po mbahet në Prishtinë, Turku njëherit ka ofruar siguri për të gjithë.

Hyrja e Shqipërisë në NATO-s dhe nënshkrimi i Marrëveshjes së stabilizim-asociimit, tregojnë se Shqipëria ka arritur standarde të larta demokratike dhe institucionale dhe garantojnë se bregdeti shqiptar ofron siguri për të gjithë vizitorët, tha ministri Turku. Ai përmendi investimet e shumta, posaçërisht në infrastrukturën rrugore.

”Rruga e quajtur ‘rruga e kombit shqiptar’ që do të lidhë Portin e Durrësit me Kosovën po shkon drejt punimeve përfundimtare, nga ana tjetër një aks tjetër është ajo që e lidh Vlorën dhe Sarandën”, tha ministri Turku.

Ministri Turku tregoi se janë bërë përmirësime edhe në ujësjellës dhe kanalizime. Po ashtu është bërë përmirësimi i furnizimit me energji elektrike. Ministri potencoi se qeveria shqiptare po i kushton rëndësi të madhe turizmit.

“Është një sektor që po avancon me ritme jashtëzakonisht të mëdha dhe po zë një vend të rëndësishëm në ekonominë shqiptare.”

Turku bëri të ditur se së shpejti turistët do të kenë mundësi të shohin udhërrëfyesin dhe spotin, ku tregohen bukuritë e bregdetit shqiptar, të cilët sipas ministrit do të promovohen edhe në Kosovë. /rtk/

SHBA, bankave u duhen 75 mld $

Sipas një analize shtetërore, dhjetë nga 19 bankat më të mëdha në SHBA duhet të rrisin kapitalin e tyre me gjithsej 75 miliardë dollarë, në mënyrë që të përgatiten kundër ndonjë lloj ashpërsimi të mundshëm të krizës ekonomike dhe financiare.

Ekspertët kishin llogaritur nevoitjen e deri rreth 200 milionë dollarëve.

Sipas një raporti të publikuar në Washington, ka dalë se vetëm Bank of Amerika ka nevojë për rreth 33,9 miliardë dollarë.

Edhe Citigroup, Morgan Stanley dhe Wells Fargo kanë nëvojë për kapital.

Ministri amerikan i financave Timothy Geithner, e quajti raportin shpresëdhënës duke shtuar, se ai është i sigurtë se bankat do të mund t`i plotësojnë nevojat për kapital, pa ndihmën e shtetit. /bbc/

Toyota njofton humbjen e parë vjetore

Toyota, prodhuesi më i madh i makinave në bote, ka njoftuar humbjen e parë për këtë vit, ndërsa kriza ekonomike globale ka ulur kërkesën për automjetet e saj.

Kompania japoneze ka shënuar një humbje prej 4,4 miliardë dollarë, ndërsa pritet një tjetër humbje më e madhe gjatë vitit financiar. Ashtu si shumë kompani rivale me të, Toyota ka ulur prodhimin për shkak të rënies së shitjeve.

Ajo ka bërë fajtore për këtë edhe rritjen e çmimit të lëndës së parë, si dhe forcimin e jenit, që i bën më të shtrenjta makinat e saj në botë.

Sipas presidentit Katsuaki Watanabe, humbja është pasoje e uljes së shitjeve të automjeteve, veçanërisht në SHBA dhe Evropë. /Telegrafi/tch/

BE për shkurtimin e orarit të punës

Liderët e Bashkimit Evropian (BE) u rekomanduan sipërmarrjeve që ta shqyrtojnë mundësinë e shkurtimit të orarit të punës me qëllim që të zvogëlohet vala e largimeve nga puna gjatë krizës ekonomike.

Ruajtja e vendeve ekzistuese të punës përmes shkurtimit të përkohshëm të orarit të punës është njëra prej gjashtë rekomandimeve për të cilat Bashkimi u mor vesh me përfaqësuesit e punëdhënësve dhe sindikatave në Samitin për punësim në Pragë.

Shkurtimi i orarit të punës, megjithatë, nuk do të thotë se punëtorët nuk do të shkojnë në punë. Ata, gjatë një ose dy ditëve të punës në javë, do të mund t`i përkushtoheshin arsimimit plotësuese ose kurseve për kualifikim, që do t`i paguante shteti.

Vlerësohet se në BE, ky sistem do të mund të ruante një milion vende të punës.

Numri i të papunëve në 27 shtete të Bashkimit, në mars, u rrit për 626 mijë, gjegjësisht në 20,15 milionë që përmban madje 8,3 për qind të fuqisë punëtore.

Sipas parashikimeve, kriza ekonomik do të mund ta rriste numrin e të papunëve në 26,5 milionë, gjegjësisht 10,9 për qind të popullatës së aftë për punë. /Makfaks/

Ulqini ofron sivjet për kosovarët ulje çmimesh prej 20 deri në 30 %

"Komuna e Ulqinit këtë verë përveç kushteve më të mira, për pushuesit nga Kosova ofron edhe ulje çmimesh prej 20 deri 30 % krahasuar me vitin e kaluar”, u tha në një koktej rasti në Prishtinë të organizuar nga kryetari i komunës së Ulqinit, Gëzim Hajdinaga.

Ky vendim, sipas delegacionit nga Ulqini është marrë nga Qeveria e Malit të Zi bashkë me pushtetin lokal, të cilët këtë vit kanë stimuluar sektorin privat me ulje taksash.

Për akomodim sa më të rehatshëm pothuajse janë bërë të gjitha përgatitjet për të pritur fluksin e pushuesve nga Kosova.

“Përgatitjet janë bërë, Qeveria e Malit të Zi ka marrë masa po ashtu edhe komuna e Ulqinit me uljen e taksave dhe do të ketë ulje çmimesh prej 20-30%”, ka thënë Selatin Xheloshi

Tri vitet e fundit, sipas ulqinakëve ka pas rënie të pushuesve nga Kosova, ndërsa, sivjet ata janë optimist se Ulqinit do t’i kthehet zhurma dhe jeta e natës, marrë parasysh natyrën e bukur dhe investimet që janë bërë në Ulqin.

“Mbi të gjitha Ulqini ka natyrën, ka mikpritjen, ka traditën për turizëm dhe ne si komunë kemi vu dorë për furnizim me ujë, me gjelbërim që Ulqini të marrë epitetin evropian, ashtu siç kemi paralajmëruar”, ka thënë Gëzim Hajdinaga, kryetar i komunës së Ulqinit

Për Hajdinagën, fakti që Kosova tani me auto-udhën Prishtinë - Durrës do të ketë dalje në det, nuk paraqet shqetësim, ngase sipas tij, pushuesit nga Kosova nuk e harrojnë adresën e vjetër – plazhet e bukura të Ulqinit. /rtk/

Napolitano: Mafia mund të përfitojë nga kriza

Presidenti italian, Giorgio Napolitano kërkon që niveli i gatishmërisë në radhët e policisë italiane të jetë i lartë, pasi mafia mund të përfitojë nga turbulencat e krizës ekonomike.

"Ekziston rreziku që organizatat mafioze të përfitojnë nga kriza aktuale për të marrë në dorë kontrollin e kompanive që ndodhen në vështirësi”.

Napoli po ashtu pohoi se, niveli i gatishmërisë, duhet të jetë gjithnjë i lartë. /Telegrafi/tch/