Lajme te reja nga bota e Sporti

Cech i ngazëllyer me portën e paprekur

Portieri i Chelseat, Petr Cech, është i ngazëllyer me ruajtjen e portës së paprekur në Barcelonë në ndeshjen e mbrëmshme gjysmëfinale të Ligës së Kampionëve.

Cech iu mohoi golat Thierry Henry, Daniel Alves, Samuel Eto’o dhe zëvendësuesit Alexander Hleb, derisa gjiganti spanjoll përpiqej të sigurojë një avantazh të rëndësishëm në ndeshjen e parë.

“Ata janë një kërcënim i madh në sulm, dhe ne dëshiruam ta eliminojmë këtë. Të ruash portën e pastër në Barcelonë, gjithmonë është një rezultat i mirë. Shpresojmë ta përsërisim të njëjtën paraqitje defensive edhe në Stamford Brodge, plus në shtëpi ne gjithmonë shënojmë”, ka thënë Cech.

“Nuk ka asgjë më të mirë se sa të ndalosh një prej ekipeve më të mira në botë. Kemi shansin të dalim para fytyrave të tyre dhe të mos iu japin rast të luajnë”, ka thënë kapiteni John Terry.

Hiddink: Messi u neutralizua

Menaxheri i Chelseat, Guus Hiddink, ishte i ngazëllyer me mënyrën se si ekipi i tij “neutralizoi” Lionel Messin gjatë barazimit të mbrëmshëm në Barcelona.

“Messi sonte u neutralizua shumë mirë taktikisht. Bosingwa bëri një punë të mirë dhe kishte ca ndihmë nga Malouda në të majtë dhe një përkrahje të mirë nga qendra kur Messi futej brenda. Mund të ndodhë një herë ta ndalosh, por nuk mendoj se kjo do të ndodhë dy herë”, ka thënë Hiddink.

“Barcelona luan futboll të bukur dhe posedimi është vendimtar në ndeshjen e tyre. E vetmja gjë të cilën ata nuk arritën ta bëjnë është të shënojnë gol dhe mendoj se Cech bëri një punë të mirë”, ka shtuar holandezi.

Ferguson fans i Fabregas

Menaxheri i Manchester United, Sir Alex Ferguson, thotë se ai është një fans i madh i kapitenit të Arsenalit, Cesc Fabregas.

Mancheser United dhe Arsenal do të ndeshen sonte në takimin e parë gjysmëfinal të Ligës së Kampionëve në Old Trafford, dhe para ndeshjes Ferguson ka shprehur admirimin e tij për mesfushorin spanjoll.

“Fabregas është një futbollist i shkëlqyeshëm. Gjithmonë interesoheni për lojtarët më të mirë të rinj, por ne nuk kemi pasur rast të nënshkruajmë me të. Arsene ishte atje para meje”, ka thënë Ferguson.

NBA: Boston mposht Chicagon në kohën shtesë

Chicago Bulls dhe Boston Celtics kishin nevojë edhe një herë për kohë shtesë për të vendosur fituesin e ndeshjes, dhe këtë herë ishin kampionët.

Paul Pierce ka bërë tre gjuajtje të njëpasnjëshme në minutat vendimtare për të ndihmuar Celtics të mposhtin Bulls me rezultat 106-104 dhe për të marrë avantazhin prej 3-2 në serinë e ndeshjeve të rundit të parë të play-offit në Konferencën Lindore.

Kjo ishte hera e tretë në pesë ndeshjet që ekipet shkonin në kohë shtesë.

Rajon Rondo shënoi 28 pikë, 11 asistime dhe tetë kërcime, dhe Kendrick Perkins 16 pikë, 19 kërcime dhe shtatë bllokime për fituesit e ndeshjes.

Ben Gordon shënoi 26 pikë dhe Joakim Noah 11 pikë dhe 17 kërcime për Chicagon. Ndeshja e gjashtë do të luhet të enjten në fushë të Bulls.

Bilic kërkohet nga Chelsea

Trajneri i kombëtares Kroate, Slaven Bilic, është emri i fundit i cili lidhet me stolin e ekipit anglez Chelsea.

The Sun shkruan se drejtori ekzekutiv i bluve, Peter Kenyon, tashmë ka zhvilluar kontakte me trajnerin kroat.

Ndërkohë, menaxheri aktual i Chelseat, Guus Hiddink, është duke ndihmuar aktivisht klubin të gjejë pasuesin e tij për sezonin e ardhshëm, dhe holandezi është një mik i afërt me kroatin Bilic.

Ish-ylli i West Hamit ka kontratë me kombëtaren kroate deri në vitin 2010, por ai mund të joshet nga një detyrë aq sfiduese siç është ajo në Chelsea, pjesërisht nëse planet e tij për Kupën Botërore dështojnë.

Wenger: Ronaldo është vetëm një prej shumë rreziqeve

Trajneri i Arsenalit, Arsene Wenger, në prag të takimit të sotëm me Manchester United, thotë se Cristiano Ronaldo është vetëm një prej shumë rreziqeve.

Edhe pse portugezi nuk e ka formën e sezonit të kaluar, ai edhe më tej llogaritet si një nga futbollistët më të rrezikshëm të Manchester United.

“Sigurisht se do të përpiqemi ta ruajmë të qetë Ronaldon, por nëse fokusoheni vetëm në të, dikush tjetër do të jetë i rrezikshëm. Nuk jemi të shqetësuar nga ndonjë person i veçantë”, ka thënë Wenger.

Trajneri francez nuk do të mund të llogarisë në shërbimet e sulmuesit të lënduar Robin van Persie, si dhe rusit Andrei Arshavin i cili nuk ka të drejtë loje, por ai do të ketë në disponim sulmuesin Emmanuel Adebayor.

“Adebayor është plotësisht i gatshëm dhe është një lojtar i rëndësishëm, si edhe të tjerët. Shumë sulmues varen nga kualiteti i lojës ekipore andaj nuk duhet të rritet presioni ndaj sulmuesve. Gjithçka varet nga loja ekipore”, ka shtuar francezi mes tjerash.

Essien: Në Stemford Bridge do të sulmojmë

Mesfushori i Chelseat, Michael Essien, beson se Chelsea do të luajë një futboll shumë më sulmues në ndeshjen e kthimit në Londër.

Blutë e irrituan mbrëmë Barcelonën në Camp Nou duke luajtur një lojë të mbyllur defensive dhe duke ndaluar sulmin e vendasve për të nxjerrë barazim pa gola, që ishte edhe synimi i ekipit të drejtuar nga Guus Hiddink.

“Është e vërtetë se i shqetësuam ca, nuk i shfrytëzuam letrat tona sulmuese ende, andaj shpresojmë se këtë do ta bëjmë në ndeshjen e kthimit në Stamford Bridge”, thotë Essien.

“Ne jemi një ekip që luajmë me shumë vetëbesim në fushë vendore, do të krijojmë më shumë raste dhe është e nevojshme ta bëjmë këtë, pasi kemi nevojë për fitore dhe gol për t’u plasuar në finale”, ka shtuar ganezi.

FIA ndëshkon McLarenin

McLaren Mercedes merr një ndëshkim të kushtëzuar nga Federata Ndërkombëtare e Automobilizmit në lidhje me mashtrimin gjatë garës se Australisë.

Skuadra anglo-gjermane ka marrë një pezullim prej tri garash por që për momentin nuk do të jetë operativ. Sipas vendimit të dhënë nga FIA në mbledhjen e jashtëzakonshme të zhvilluar në Paris, dënimi do të aplikohet vetëm nëse mblidhen fakte të reja në lidhje me këtë çështje ose në rast se gjatë 12 muajve shihen përsëritje të këtij veprimi nga McLaren.

Gjatë Çmimit të Madh të Australisë, Hamilton dhe një prej drejtuesve të McLaren, Dave Ryan gënjyen komisarët e pistës në lidhje me parakalimin e Trullit nën regjimin e makinës së sigurisë, veprim që solli skualifikimin e pilotit italian të Toyotas.

Edhe para garës së Malajzisë kur u pyeten sërish drejtuesit e skuadrës McLaren dhe piloti i saj britanik të cilët sërish nuk e pranuan se kishin gënjyer por pak ditë përpara mbledhjes së Këshillit Botëror në Paris, Martin Whitmarsh i dërgoi një letër FIA-s ku i kërkonte falje për atë që kishte ndodhur. /tch/

Trezeguet mund t’i bashkëngjitet Interit

Sulmuesi i Juventusit, David Trezeguet, mund të kalojë te rivalët e Inter, thotë agjenti i tij Antonio Caliendo.

Në një intervistë për Goal.com agjenti i francezit nuk e ka mohuar mundësinë që Trezegol ta veshë fanellën e skuadrës më të urryer të tifozëve të Juventusit.

“David paraqet një vlerë të cilën e ka në pronë Juve. Por siç e kam thënë disa herë më parë, në futboll asgjë nuk është e pamundur, sidomos nëse Zlatan Ibrahimovici largohet nga Inter (Trezeguet mund ta zë vendin e tij)”.

“Bianconerët duhet të vendosin nëse do ta largojnë Trezeguet, dhe nëse kjo ndodh, atëherë ai do të gjejë një skuadër tjetër”, ka thënë Caliendo.

Berlusconi: Vendimi për Ancelottin në fund të sezonit

Presidenti i Milanit, Silvio Berlusconi, ka njoftuar se e ardhmja e trajnerit Carlo Ancelotti do të vendoset në fund të sezonit.

“Sa i përket Ancelottit, do të vendosim atë që është më e mira për Milanin në fund të sezonit në një mënyrë miqësore dhe pastaj do të shohim se çfarë do të ndodhë”.

“Asnjëherë nuk kemi folur se jemi duke kërkuar zëvendësues të Ancelottit dhe nuk kemi përmendur asnjë emër”, ka thënë Berlusconi për “Sky Sport Italia”.

Derisa është spekuluar shumë për largimin e Kaka drejt Real Madridit ose Manchester Unitedit, Berlusconi thotë se shpreson që ai të mbetet në San Siro.

“Shpresoj që Kaka do të qëndrojë. Ata të cilët janë të lumtur dhe dëshirojnë të qëndrojnë janë të mirëpritur ta bëjnë këtë”, ka shtuar presidenti i Rossonerëve.

Malouda kritikon "aktrimin" e lojtarëve të Barcës

Anësori i Chelseat, Florent Malouda, kërkon nga gjyqtari i cili do ta drejtojë ndeshjen e ardhshme në Stamford Bridge, ndërmjet Chelseat dhe Barcelonës, të mos ndikohet nga ‘veprimet teatrale’ të Blaugranëve.

“Kemi qen vërtet të fuqishëm psiqikisht t’i rezistojmë aktrimit të tyre, sepse kur ti vrapon pas topit dhe e sheh kundërshtarin tënd duke u rrëzuar, duhet të mbetesh i qetë dhe i përqendruar mos të reagosh se mund të ndëshkohesh”.

“Shpresoj që gjyqtari nuk do t’u ndihmojë atyre në ndeshjen kthyese. Është pjesë e lojës sonë që të krijojmë presion ndaj kundërshtarit. Mirëpo është punë e gjyqtarit që të na ndihmojë që ta realizojmë këtë në mënyrë të drejtë”, ka thënë francezi për “Daily Mail”.

Daliq afër Kombëtares

Trajneri kroat Zlatko Daliq ka arritur të mërkurën në Tiranë për t’u takuar me zyrtarët e Federatës Shqiptare te Futbollit, me të cilët do të diskutojë mundësinë e marrjes së drejtimit të Përfaqësueses kuqezi.

Kombëtarja shqiptare ka mbetur pa trajner që nga largimi i holandezit Arie Haan, për shkak të rezultateve të dobëta, ndërsa FSHF-ja ka përgatitur listën me disa emra dhe ka biseduar me disa prej tyre për mundësinë e angazhimit.

Por siç duket ish-trajneri i klubeve Varteks dhe Rijeka të Kroacisë dhe Dinamos së Tiranës, është kandidati potencial për ta zënë stolin e lënë bosh nga Haan.

Djajtë mposhtin Topçinjtë

Takimi i parë gjysmëfinal ndërmjet Manchester Unitedit dhe Arsenalit, i zhvilluar të mërkurën mbrëma në Old Trafford ka përfunduar me fitoren minimale të Djajve të Kuq.

Kampionët në fuqi treguan lojë shumë më të mirë në të dyja pjesët e takimit duke e vënë në presion vazhdimisht Arsenalin dhe duke e detyruar të tërhiqet në gjysmën e vetë të fushës.


Megjithatë, përkundër presionit të kundërshtarit mysafirët arrinin të zhvillonin lojën e vet kohë pas kohë, por duke mos qenë të rrezikshëm përpara portës së Van Der Sarit.

Një rast shumë të mirë të pashfrytëzuar në pjesën e parë e pati sulmuesi argjentinas, Carlos Tevez, i cili u gjet përballë portierit Almunia, mirëpo portieri i Arsenalit u tregua më i suksesshëm në të dyja goditjet e argjentinasit.

Shumë shpejt pas këtij rasti erdhi goli i vetëm në ndeshje, të cilin e shënoi mbrojtësi John O'Shea, i cili u gjet më së miri brenda gjashtëmbëdhjetëmetërshit në minutën e 17-të.

Edhe pjesa e dytë ishte mjaft energjike, ndërsa Arsenali u këndell pakëz më tepër dhe u vërejt më shumë në fushë në krahasim me pjesën e parë të ndeshjes.

Mirëpo ishin sërish vendasit ata të cilët e dirigjonin takimin.

Rastin më të mirë për Arsenalin e pati Adebayor, i cili pranoi një top nga Song, mirëpo goditja e tij përfundoi jashtë portës (64’).

Në saje rasteve të shumta të Manchesterit, vlen të përmendet një super-goditje e Cristiano Ronaldos (70’), e cila tundi transversalen e portierit Almunia.

Sido që të jetë, fitorja minimale nuk siguron asgjë, megjithëse mospranimi i golit nga United ishte veprimi më i mirë për të qenë favorit në ndeshjen e kthimit.

Nga ana tjetër Arsenali duhet të jetë shumë i vëmendshëm dhe të shënojë gola në ndeshjen e kthimit e cila zhvillohet pas një jave në Emirates Stadium.

Messi preferon fitoren kundër Chelseat

Superylli argjentinas Lionel Messi ka pranuar se ai ka dëshirë më të madhe që Barcelona të shënojë fitore kundër Chelseat në mesjavën e ardhshme, sesa kundër Real Madridit në fundjavë.

Barcelona të shtunën do të udhëtojë në Santiago Bernabeu për ta zhvilluar ndeshjen kryesore të La Ligas, ‘el Clasico-n’, ndërsa humbja do të thoshte rrezik për titullin.

Nga ana tjetër, të mërkurën Blaugranët udhëtojnë në Stamford Bridge ku do ta zhvillojnë ndeshjen e kthimit të gjysmëfinales së Ligës së Kampionëve kundër Chelseat, të cilën ndeshje nuk guxojnë ta humbin, se përndryshe do të jenë jashtë.

“Unë do ta preferoja fitoren kundër Chelseat, sepse edhe nëse humbim kundër Madridit, ne sërish do të jemi në krye të tabelës, derisa në Ligën e Kampionëve nuk ka hapësirë për gabime”, është cituar Messi nga “Marca”.

Adriano kthehet te Flamengo ?

Që nga prishja e kontratës me Interin, Adriano është lojtar i lirë, ndërsa mediat nuk kanë hezituar të spekulojnë se ku mund të transferohet braziliani.

Disa spekulime e lidhin sulmuesin me një transferim të mundshëm te rivalët e qytetit të zikaltërve, Milan, ndërsa të tjera spekulime flasin se ndoshta do ta mbyll karrierën futbollisitke që në moshën 27-vjeçare.

Si do që të jetë, mediat në Brazil pohojnë se ekziston një mundësi e madhe që ‘Perandori’ të kthehet te ish-skuadra e tij Flamengo, ndërsa sipas globoesporte.com, Adriano do të jetë lojtar i Flamengos që në javën e ardhshme.

Wenger: Do ta përmbysim rezultatin në Emirates

Arsenali është mposhtur me rezultat prej 1-0 nga Manchester Unitedi në ndeshjen e parë gjysmëfinale të zhvilluar në Old Trafford, ndërsa trajneri i Topçinjve, Arsene Wenger, beson se skuadra e tij do ta përmbys këtë rezultat në ndeshjen e kthimit dhe do të vazhdojë në finalen e Romës.

“E mira është se nuk pranuam më shumë se një gol dhe si rezultat i kësaj kemi një mundësi të madhe që ta përmbysim rezultatin në shtëpi”.

“Mendoj se gjërat janë ende në baraspeshë dhe ju siguroj se do të shihni një Arsenal tjetër javën që vjen”, është shprehur Wenger për “Sky Sports” pas ndeshjes.

Elano dëshiron të qëndrojë te City

Mesfushori brazilian Elano thotë se ai dëshiron të mbetet te Manchester City.

“Ky është fundi i sezonit tim të dytë me City-n dhe, nëse do të ishte në duart e mia, unë do të ulesha në tavolinë dhe diskutoja vazhdimin e kontratës tash”, ka thënë Elano.

“Do të më pëlqente të rinovoja kontratën me Cityn dhe të qëndroj këtu edhe për një kohë të gjatë. Më pëlqen Anglia dhe kënaqem me jetën në Manchester. Jam shumë i lumtur këtu”, ka shtuar braziliani.

OShea: Goli një dhuratë e hershme për ditëlindje

Autori i golit të vetëm për Manchester United në fitoren e mbrëmshme ndaj Arsenalit, John O'Shea, është i ngazëllyer me golin e shënuar.

Irlandezi thotë se ka qenë babai ai i cili i ka rënë i pari në mend pasi ka shënuar golin e fitores, në prag të pritjes së ditëlindjes së 28-të të tij, të cilën e feston sot.

“Është një dhuratë më e hershme për ditëlindjen time, por duhet t’ia dedikoj këtë gol babait tim. Ai ka kaluar ca kohë të vështira së fundi, dhe jam i sigurt se do të buzëqeshë ca”, ka thënë OShea.

“Në pjesën e parë, mund të kishim shënuar edhe disa gola të tjerë. Portieri i tyre bëri disa mbrojtje të mira. Ne kemi avantazhin, e ruajtëm portën të paprekur dhe e dimë se jemi në gjendje të shënojmë edhe gol në udhëtim në Emirates. Por asgjë ende nuk ka marrë fund”, ka shtuar autori i golit.

NBA: Nuggets vazhdojnë në rundin e dytë

Denver Nuggets ka fituar serinë e parë të play-offit që nga viti 1994, duke mposhtur New Orleans Hornets me rezultat 107-86 në ndeshjen e pestë mes tyre, që i dha avantazhin 4-1.

Carmelo Anthony shënoi 34 pikë, Chauncey Billups 13 pikë dhe 11 asistime dhe J.R. Smith 20 pikë për Nuggets. Tek Hornets, Davie West udhëhoqi me 24 pikë, ndërsa Chris Paul kontribuoi me 12 pikë dhe 10 asistime.

Denver Nuggets do të ndeshet me Dallas Mavericks në rundin e dytë, pasi ky i fundit eliminoi San Antonio Spurs po ashtu në pesë ndeshje.

Ferguson: Arsenali favorit për ndeshjen e kthimit

Menaxheri i Manchester United, Sir Alex Ferguson, thotë se Arsenali do të ketë avantazh në ndeshjen e kthimit gjysmëfinale të Ligës së Kampionëve.

Pas fitores 1-0 në ndeshjen e mbrëmshme, Ferguson ndjen se Arsenali do të ketë mundësinë për të nxjerrë në fushë gjatë vikendit kundër Portsmouthit ekipin rezervë, duke marrë parasysh se topçinjtë e kanë të siguruar vendin e katërt.

Por, Ferguson nuk mund të thotë se të njëjtën gjë mund ta bëjnë edhe djajtë e kuq, që kërkojnë tre pikë ndaj Middlesbrough që është në rrezik për të rënë nga Premier League.

“Avantazhi i madh i Arsenalit është se ata mund ta aktivizojnë edhe Pat Rice (ndihmës-trajnerin) në anën e djathtë të mbrojtjes dhe Arsene të aktivizohet vet në qendër të mbrojtjes të shtunën”, thotë Ferguson.

“Ne duhet të luajmë me ekipin i cili duhet ta fitojë ndeshjen. Kemi një ndeshje të vështirë në Middlesbrough që është e papërshtatshme. Duket se do të ketë ca ndryshime. Mbrojtja do të jetë e njëjtë, përveç Rio, por mesfusha dhe sulmi mund të ndryshojnë tërësisht”, ka shtuar skocezi.

Almunia: United nuk është i pamposhtur

Portieri i Arsenalit, Manuel Almunia, llogarit se topçinjtë ende kanë shanse të kualifikohen për në finalen e Ligës së Kampionëve, edhe pse në ndeshjen e parë u mposhtën me rezultat 1-0.

“Ishte vështirë në pjesën e parë, pasi Manchester United luajti shumë fuqishëm, sulmoi me të gjitha forcat. Ne ishim të përgjumur në ato momente”, ka thënë Almunia.

“Kisha shumë punë në pjesën e parë, por gjithmonë e prisni këtë kur udhëtoni në Old Trafford. Prisni shumë sulm pasi ata kanë lojtar fantastik ofensiv”.

“E prisnim këtë para ndeshjes, por në pjesën e dytë ata u lodhën ca dhe Arsenali tregoi se United është një ekip që mund të mposhtet”, ka shtuar spanjolli.

Cana zëvendësim i Alonsos te Liverpooli ?

Menaxheri i Liverpoolit, Rafa Benitez, është duke menduar një transferim befasues për kapitenin e Marseille, mesfushorin e kombëtares shqiptare Lorik Cana, nëse Xabi Alonso shitet gjatë kësaj vere.

Siç raportojnë mediat angleze, Benitez është një fans i madh i shqiptarit dhe ka intensifikuar interesimin për të ditëve të fundit.

Trajneri spanjoll thuhet se ka kërkuar informata nga ish-lojtari i Liverpoolit, Boudewijn Zenden, i cili tash aktivizohet tek lideri i tabelës së kampionatit francez.

Cana do t’i kushtonte klubit anglez rreth 10 milionë funte, që mund të mbulohet nga buxheti i Benitez, veçanërisht nëse Alonso shitet tek Juventusi apo Arsenali, që janë dy nga ekipet e interesuara për të.

Benitez njeh lojën e Canës edhe nga takimet që ekipi i tij i ka zhvilluar me Marseillen në dy sezonet e fundit, në fazën grupore.

Messi: City kurrë nuk do të bëhet një klub i madh sa Barca

Sulmuesi i Barcelonës ka hedhur poshtë çdo opsion për të kaluar në Premier League duke thënë se dëshirë e tij është të mbetet tek klubi spanjoll.

“Mendoj vetëm për Barcelonën dhe jo për klube të tjera, përfshirë edhe Manchester Cityn. Sigurisht, interesimi i klubeve tjera më bën të ndjehem mirë, por e ardhmja ime qëndron në Barcelona”, ka thënë Messi.

“Barça ka një histori shumë më të mirë, andaj mendoj se një klub si Manchester City kurrë nuk do të mund të bëhet një klub i madh si Barcelona. Ndoshta pas një periudhe të caktuar mund ta arrijë, por nuk mendoj se kjo do të ndodhë brenda natës”, ka shtuar argjentinasi.

Interi do të ofrojë lojtarë dhe para plus për Riberyn

Kampioni i Serie A, Interi, është i gatshëm të harxhojë para dhe të japë lojtarë për të marrë shërbimet e yllit të Bayern Munich, Franck Ribery.

Corriere dello Sport shkruan se presidenti i Interit, Massimo Moratti, shpreson të dalë fitues ndaj rivalëve të tjerë si Manchester United, Chelsea dhe Barcelona, në luftë për të marrë francezin, duke ofruar para plus lojtarët Amantino Mancini dhe Maxwell, në një marrëveshje e cila do të kam vlerën e afro 35 milionë funteve.

Harxhimet e Interit nuk do të përfundojnë këtu, me edhe sulmuesin e Udineses, Fabio Quagliarella, po ashtu të gjendur në listë krahas atij të Genoas, Diego Milito.

Berlusconi nuk do ta ndalojë Kakan të largohet

Presidenti i Milanit, Silvio Berlusconi, thotë se ai nuk do ta ndalojë superyllin brazilian Leite Kaka të largohet, nëse ai vendos kështu.

Kaka mes shumë klubeve së fundi është lidhur edhe me një kalim në Manchester United, por Berlusconi shpreson që ai të qëndrojë.

“A do të qëndrojë Kaka? Shpresoj se po. Ju të gjithë e dini se si veprojmë në Milan, ne nuk i detyrojmë lojtarët. Ata që qëndrojnë janë të lumtur me ne”, ka thënë Berlusconi, duke nënkuptuar se gjithçka mbetet në duart e vetë lojtarëve.

“Kur Shevchenko na tha se dëshironte të luajë në Angli dhe çdokush e din se sa e donim atë, ne nuk menduam se ishte e drejtë t’i themi jo. Ishte dëshirë e madhe e tij, që na ishte përsëritur shpesh”, ka thënë Berlusconi.

Vazhdon gjahu për trajner të Kombëtares

Duket se ardhja në kryeqytetin shqiptar e ish-trajnerit të Dinamos së Tiranës, Zlatko Daliq, është më shumë për t’u ndihmuar drejtuesve të Federatës Shqiptare të Futbollit në lidhje me gjetjen e pasuesit të Arie Haan.

Lista e gjatë e trajnerëve pretendentë tashmë është shkurtuar, ndërsa emri që qarkullon në mediat shqiptare është kroati Branko Ivankoviq.

Ivankoviq ka qenë trajner i Rjekës, Vartesit dhe Hannoverit, ndërsa prej kombëtareve e ka drejtuar Iranin, me të cilin në vitin 2006 u kualifikua në Kampionatin Botëror në Gjermani.

Pas Iranit, Ivankoviq ka udhëhequr skuadrën e suksesshme kroate Dinamo Zagreb deri në vitin 2008. Mësohet se kroati është njëri nga më të preferuarit e presidentit të FSHF-së, Armand Duka.

Cannavaro: Nuk e kam tradhtuar Juventusin

Kontrata e Fabio Cannavaros me Real Madridin përfundon në fund të këtij sezoni, ndërsa është njoftuar se 35-vjeçari është në bisedime për t’u rikthyer të skuadra të cilën e braktisi pas skandalit Calciopoli në vitin 2006.

“E kam shpjeguar disa herë se çfarë ndodhi në vitin 2006. E kuptoj që dikush mund të ketë pritur një tjetër veprim nga ana ime, mirëpo transferimi te Real Madridi ishte në marrëveshje me Juventusin. Për këtë arsye raportet e mia me drejtorët e rinj dhe me lojtarët ‘e vjetër’ ka qenë e shkëlqyer gjatë këtyre viteve”.

“Unë i respektoj tifozët dhe mendimet e tyre, mirëpo shpresoj dhe dëshiroj që qëndrimi negativ që kanë ndaj meje të zhduket”, ka thënë mbrojtësi italian në një intervistë për “La Gazzetta dello Sport”.

Fabregas: Do të luajmë ndryshe në shtëpi

Cesc Fabregas beson se Arsenali do të luajë shumë më mirë kundër Manchester Unitedit në ndeshjen e kthimit të gjysmëfinales së Ligës së Kampionëve, e cila do të zhvillohet mesjavën e ardhshme në Emirates.

Në ndeshjen e parë të zhvilluar në Old Traffor të mërkurën mbrëma Topçinjtë u mposhtën me rezultat prej 1-0 nga Djajtë e Kuq, me një gol të John O'Shea.

“Ne kemi treguar se sa të fortë jemi në shtëpi kur i kemi mposhtur ata (Unitedin) në Premier League”.

“Kemi humbur vetëm 1-0, ndërsa kemi kaluar rezultatet shumë më të vështira në Ligën e Kampionëve. Manchester United e meritoi fitoren dhe tani është koha që ne të luajmë mirë në Emirates dhe t’i mposhtim ata”, ka thënë spanjolli për “Evening Standard".

Marcelo i bindur në fitoren e Realit

Marcelo është i bindur se Rea Madridi do ta mposhtë Barcelonën në 'el Clasico-n' e të shtunës dhe nuk shqetësohet se me cilin rezultat do të përfundojë ndeshja.

“E dëshiroj vetëm fitoren. Nuk më intereson nëse rezultati do të jetë 1-0 ose 3-2. E dëshirojmë fitoren dhe do ta marrim atë”.

“Do të jetë një ndeshje e vështirë, mirëpo është një ndeshje në të cilën dëshirojnë të gjithë të luajnë. Ky do të jetë Clasico më i nxehtë i të gjitha kohërave”, ka thënë braziliani për “AS”.

Ronaldo dëshiron arritjet e Giggsit

Cristiano Ronaldo dëshiron të arrijë sukseset e bashkëlojtarit të tij Ryan Giggs, i cili të mërkurën mbrëma bëri paraqitjen e 800-të për Manchester Unitedin.

Vazhdimisht spekulohet se Ronaldo do të kalojë te Real Madridi në fund të sezonit, ndërsa admirimi që ka shprehur portugezi për Giggsin, i cili është shpallur lojtari më i mirë i Ligës Premier këtë sezon, lë të kuptohet se Ronaldo do të luajë edhe për shumë vite për Djajtë e Kuq.

“Është një arritje e pabesueshme. Ai e ka merituar çmimin sepse ka pasur një sezon të shkëlqyer, duke i ndihmuar skuadrës të shënojë gola”.

“800 ndeshje (për Unitedin) është e pabesueshme. Edhe unë shpresoj të bëhem si ai një ditë”, është cituar nga tabloidi “The Sun” lojtari më i mirë në botë për vitin 2008.

Raul: Jemi favoritë kundër Barcelonës

Kapiteni dhe legjenda e Real Madridit, Raul, beson që skuadra e tij ka epitetin e favoritit në el Clasico-n e të shtunës kundër Barcelonës në Stantiago Bernabeu.

“Po luajmë në Bernabeu dhe Madridi është favorit. Cilado skuadër mund të fitojë, mirëpo atmosfera dhe tifozët do ta bëjnë të veten”.

“Duhet të kemi besim në vete dhe në mënyrën tonë të lojës, dhe e dimë se e kemi shansin që t’i shkaktojmë probleme Barcelonës”.

“Është një ndeshje, e cila gjithmonë është e veçantë për shkak të rivalitetit, mirëpo kësaj radhe po luajmë për titull dhe kjo e bën edhe më të veçantë përballjen.

“Nëse fitojmë të shtunën atëherë do të kemi një mundësi të madhe që të shpallemi kampionë. Ndërsa çdo rezultat tjetër përveç fitores do të na i vështirësonte punët”, ka thënë kapiteni për “AS”.

Chiellini: E meritojmë vendin e dytë

Paraqitja e dobët e Juventusit në katër ndeshjet e fundit në Serie A, ka bërë që Bianconerët të humbin pozitën e dytë në tabelë, të cilën aktualisht e mban Milani me dy pikë më tepër se Zonja e Vjetër.

“Qëllimi ynë tani mbetet vendi i dytë, sepse mendoj se gjatë gjithë sezonit ne e kemi merituar më shumë se Milani”.

“Kritikat ndaj nesh janë krejtësisht normale. Sepse deri para një muaji pritej shumë nga ne. Deri para një muaji ne po kalonim një sezon të shkëlqyer. Sido që të jetë ne vazhdojmë të mbesim të bashkuar dhe të gjithë e përkrahim Ranierin”, ka thënë mbrojtësi i Juves, Giorgio Chellini, për “Juventus Channel”.

Evra: Messi dhe Barca nuk më frikësojnë

Patrice Evra më herët ka deklaruar se Unitedi është dashur të fitonte, së paku me rezultat 4-0, në ndeshjen e parë gjysmëfinale të zhvilluar të mërkurën mbrëma në Old Trafford kundër Arsenalit. Ndërsa tashmë i konsideron Djajtë e Kuq në finale dhe për kundërshtar parashikon Barcelonën.

“Unë mund të luaj kundër një lojtari si Messi dhe nuk ia kam frikën askujt, unë e luaj lojën time”.

“Megjithatë, është e nde herët të mendohet për këtë. Duhet të luajmë mirë edhe në ndeshjen kthyese kundër Arsenalit dhe pastaj do ta vazhdojmë ëndrrën”.

“Luajtëm mirë dhe Arsenali nuk mundi të bënte asgjë kundër nesh. Tash na mbetet ta përsërisin të njëjtën gjë në Emirates dhe do të jemi në finale”, ka thënë mbrojtësi francez për “The Manchester Evening News”.

Robben mund të luajë në el Clasico

Anësori i Real Madridit, Arjen Robben, është kthyer të enjten në fushën stërvitore dhe mund të jetë i gatshëm për t’u ndeshur me Barcelonën në fundjavë.

Holandezi parashikohej të mungonte në këtë përballje shumë të rëndësishme për Los Blancos, mirëpo rikthimi i tij në stërvitje ka dhënë shpresë që ai mund t’i kalojë të gjitha testet që të jetë në fushë të shtunën mbrëma.

Në faqen zyrtare e Real Madridit shkruan se Robben është rikuperuar plotësisht nga lëndimi i këmbës së majtë dhe pritet të luajë në ndeshjen e madhe.

Ndërkohë në stërvitje kanë munguar Wesley Sneidjer dhe Guti. I pari pritet të mungojë deri në fund të sezonit, ndërsa Guti është jashtë të gjitha mundësive që të luajë të shtunën.

Kupa UEFA: Hamburg mposht Wederin

Hamburgu ka shënuar fitore minimale, 1-0, në udhëtim tek Werder Bremeni në ndeshjen e parë të gjysmëfinales gjermane të Kupës UEFA, derisa ndeshja tjetër, ajo ukrainase mes Dinamo Kievit dhe Shakhtar Donetsk, ka përfunduar me barazim 1-1.

Një gol i shënuar nga Piotr Trochowski në minutën e 28-të të ndeshjes, ka mjaftuar t’i japë një fitore të merituar dhe të rëndësishme në udhëtim Hamburgut.

Mysafirët dominuan në pjesën e parë të ndeshjes duke krijuar një varg rastesh tjera përveç golit të shënuar, ndërsa vendasit u rikthyen në pjesë të dytë duke kërcënuar disa herë, por megjithatë nuk arrinin të gjenin golin e barazimit.

Gjysmëfinalja tjetër mes dy ekipeve ukrainase ka përfunduar me barazim 1-1. Vendasit e Dinamo Kievit kaluan në epërsi që në pjesë të parë, me anë të një autogoli të shënuar nga mbrojtësi Dmytro Chygrynskiy, i cili devijoi një goditje të Olexandr Aliyev nga gjuajtja e lirë (22’), ndërsa mysafirët barazuan me anë të Fernandinho në pjesën e dytë të ndeshjes (68’).

Ndeshjet e kthimit kur do të përcaktohen edhe dy finalistët, do të zhvillohen pas një jave.

Legrottaglie: Pritjet kanë qenë të mëdha

Juventusi po kalon nëpër një fazë shumë të vështirë, pasi që tashmë e ka humbur pozitën e dytë në tabelë, ndërsa mbrojtësi Nicola Legrottaglie thotë se e kupton dëshpërimin e tifozëve.

“Ne i kuptojmë tifozët, por edhe ata duhet të kuptojnë se ne e kemi dhënë maksimumin në fushë”.

“Ne mundohemi t’i fitojmë ndeshjet tona, por nëse dështojë është për faktin se në fushë ekziston edhe kundërshtari. Ndonjëherë duhet të pranosh se nuk ke mundur të bësh asgjë më shumë”.

“Është e vërtetë që së fundmi nuk e kemi treguar atë që e shfaqnim në fillim të Kampionatit, por do të ndryshojmë në këto ndeshjet e fundit të sezonit dhe do ta arrijmë pozitën e dytë”, ka thënë mbrojtësi italian për “Sky Sport”.

Gattuso: Ende nuk jam gati për lojë

Mesfushori i Milanit, Gennaro Gattuso, ka filluar të stërvitet që nga java e kaluar pas një kohe të gjatë qëndrimi jashtë fushe, mirëpo ai pohon se ende nuk është i gatshëm për lojë.

“Më janë dashur gjashtë muaj që të shërohem dhe tash kam filluar të stërvitem”.

“Dalëngadalë po e kthej nivelin tim të lojës, mirëpo kjo po merr kohë. Po e ndjej që gjuri im ende nuk është gati”, ka thënë ‘shkatërruesi’ për to tuttomercatoweb.

Parashikohej që 31-vjeçari të luante në ndeshjen kundër Juventusit më 10 maj, mirëpo këto deklarata e vënë në dyshim paraqitjen e tij në këtë derbi.

Zanetti: Scudetto është në duart tona

Interi është shtatë pikë para Milanit në krye të tabelës në Serie A kur kanë mbetur edhe pesë javë lojë, ndërsa përkundër mundësive teorike që zikaltrit ta humbin titullin, kapiteni Javier Zanetti thotë se skuadra e tij do të bëjë gjithçka që të përfundojë e para në tabelë.

“Është e drejtë që Mlani duhet të besojë (për ta fituar Scudetton), sepse është një skuadër e madhe me një histori të madhe”.

“Mirëpo, fati ynë varet nga ne dhe për këtë sezon duhet të vazhdojmë të tregojmë më të mirën nga vetja”, ka thënë argjentinasi.

Rooney pret më shumë nga vetja

Sulmuesi i Manchester Unitedit, Wayne Rooney, vazhdon të impresionojë me paraqitjet e tija në pozita të ndryshme, siç ishte ajo në ndeshjen kundër Arsenalit, mirëpo vetë lojtari është shprehur i pakënaqur me paraqitjen e tij.

“Nuk mendoj se ishte njëra nga paraqitjet e mia më të mira”.

“Unë e bëra punën time për skuadrën, mirëpo nuk më dukej që ofroja sa duhet në sulm, kështu që shpresoj të përmirësohem javën e ardhshme”.

“Në disa ndeshje është më mirë të luash në atë pozitë (anën e majtë), sepse ke më shumë hapësirë dhe e përcjell gjithë ndeshjen, mirëpo disa herë është më mirë të lush në qendër të sulmit”, ka shpjeguar anglezi për “Sky Sports News”.

Iniesta: Nuk ka favorit ndërmjet Realit dhe Barcës

Andres Iniesta ka deklaruar se nuk ka favorit për ‘el Clasicon’ e të shtunës, e cila zhvillohet ndërmjet Real Madridit dhe Barcelonës në Santiago Bernabeu.

“Nuk ka favorit. Është shumë vështirë ta parashikosh fituesin. Është një ndeshje ku statistikat nuk kanë vlerë”.

“Ne duhet të vazhdojmë me lojën tonë dhe të mundohemi për sukses. Ndeshjet e këtilla dallojnë nga të gjitha të tjerat, janë emocionet më të mëdha dhe gjithçka... Por nuk duhet të harrojmë se janë vetëm tre pikë, për të cilat realisht po luftojmë”, ka thënë mesfushori spanjoll.

Walcott në listën e Juventusit

Mediat italianë spekulojnë që kohës së Claudio Ranierit te Juventusi po i vjen fundi, ndërsa ish-mesfushori bardhezi, aktualisht trajner i Barit, Antonio Conte, pritet ta marrë drejtimin e Zonjës së Vjetër.

Sipas “Corriere dello Sport”, me ardhjen e Fabio Cannavaros, mbrojtja e Juves do të duket më stabile, ndërsa Bianconerët planifikojnë forcimin e mesfushës dhe sulmit.

Talenti i Arsenalit, Theo Walcott, është futur në listën e ngushtë të lojtarëve të cilët do të transferohen këtë verë, ndërkohë që mesfushori i Valencias, David Silva, dhe asi i Werder Bremenit, Diego, vazhdojnë të jenë në listën e dëshirave të Juves.

Tevez: Mund të kaloj në Spanjë

Sulmuesi i Manchester Unitedit, Carlos Tevez, edhe një herë e ka bërë të ditur se ardhmja e tij te kampioni i Ligës Premier nuk është e sigurt, ndërkohë që ai mund të transferohet për një aventurë në Spanjë në fund të këtij sezoni.

“Është e vërtetë se kam kaluar shumë kohë në bankën rezervë dhe dëshiroj të luaj më shumë. Mirëpo secilën herë që më jepet mundësia bëj gjithçka që mundem dhe i shfrytëzoj të gjitha përparësitë e mia”.

“Personalisht e shoh veten më shumë larg Unitedit, sesa që do të qëndroj. Nuk kam arsye ta gënjej askënd, sidomos tifozët të cilët më përkrahin shumë dhe nuk dëshiroj t’i gënjej ata’.

“Derisa e mbaj fanellën e Unitedit, do ta lë shpirtin tim në fushë. Por nuk e di se çfarë do të ndodhë në të ardhmen. Do të dëshiroja të shkoj në Spanjë, mirëpo ende nuk e di se çka do të ndodhë”, ka thënë argjentinasi për “Cadena COPE”.

City do të bëjë ofertë për Robbenin

Sipas tablodit britanik "The Daily Mirror", pasanikët nga Liga Premier, Manchester City, në fund të sezonit do të bëjnë një ofertë për anësorin e Real Madridit, Arjen Robben.

Holandezi nuk bën pjesë në planet e presidentit në ardhje Florentino Perez, prandaj madrilenët do të shqyrtojnë ofertat për largimin e tij.

Pritet që City të ofrojë 20 milionë euro për shërbimet e Robbenit, ndërsa kjo vlerë do t’i kënaqë kërkesat e Los Blancos.

Përveç Cityt, edhe Inter dëshiron shërbimet e holandezit, i cili gjatë qëndrimit te Chelsea nuk kishte kaluar formën më të mirë, prandaj Jose Mourinho dëshiron ta shfrytëzojë tani.

United ofron 30 milionë funte për Benzema

Manchester United është duke përgatitur ofertë të vlefshme 30 milionë funte për sulmuesin e Lyonit, Karim Benzema.

The Sun shkruan se menaxheri i djajve të kuq, Sir Alex Ferguson, e kishte dërguan vëllain e tij, Martin, të përcjellë sulmuesin nga afër gjatë javës së kaluar.

Ylli francezi shihet si një prej sulmuesve më të mirë në Evropë dhe United pritet të ketë një konkurrencë të fortë për nënshkrimin e tij nga Real Madrid, Barcelona dhe Chelsea.

Benzema, 21-vjeçar, do të shitet nëse Lyoni nuk arrin të sigurojë vend për në Ligën e kampionëve. Lyoni aktualisht është në pozitën e tretë, një pikë para Paris St Germain dhe në rrezik serioz për të përfunduar jashtë pozitës së dytë që dërgon në garën evropiane.

Ribery do t’i kushtojë Barcelonës 30 milionë euro

Barcelona tashmë ka të kompletuar marrëveshjen me yllin e Bayern Munich, Franck Ribery, bëjnë të ditur mediat spanjolle.

El Mundo Deportivo para ndeshjes El Classico shkruan se Barça ka mposhtur rivalin Real Madridin për të marrë shërbimet e anësorit francez.

Një delegacion i Barcelonës ishte në Ibiza këtë javë, ku qëndron me zyrë edhe agjenti i Ribery, Alain Migliaccio.

Shuma e transferimit është arritur me Bayernin, që thuhet të jetë 22 milionë funte dhe një lojtar i Barçës. Dy opsionet janë Eidur Gudjohnsen ose Alex Hleb, që të dy të vlerësuar me mbi 7 milionë funte.

Drejtuesit e Bayernit janë të bindur se fansat do ta pranojnë shitjen e yllit, duke marrë parasysh që e blenë atë për 20 milionë funte nga Marseille, dy vite më herët.

Anelka: Ancelotti do të ishte i mirë për Chelsean

Nicolas Anelka thotë se trajneri i Milanit, Carlo Ancelotti, do të ishte një person i shkëlqyeshëm për Chelsean.

“Nuk e njoh atë, por mendoj se ai është një menaxher shumë i mirë. Hiddink ka bërë një punë të shkëlqyeshme. Ai ka ndryshuar diçka, jo dukshëm, por ai është arsyeja se pse ne jemi sot këtu”, ka thënë Anelka.

“Mendoj se ai do të largohet pasi kështu ka thënë. Është shumë vonë. Kur ai nënshkroi, e dinte se ai do të qëndronte katër muaj dhe dëshironte të largohej të qëndrojë me ekipin kombëtar. Mendoj se ai dëshiron të bëjë një punë të mirë para se të largohet dhe ne duhet ta respektojmë këtë”, ka shtuar francezi.

Wenger përgatitet të shesë Adebayorin

Menaxheri i Arsenalit, Arsene Wenger, është duke u përgatitur të shesë sulmuesin kryesor të ekipit, Emmanuel Adebayor, në fund të këtij sezoni.

Mirror shkruan se Adebayor ka nënshkruar kontratë të re për të vazhduar me Arsenalin, por forma e tij po bie në mënyrë drastike dhe klubi do ta shesë atë, nëse mund ta sigurojë çmimin e duhur për të, dhe tashmë përgatit zëvendësim.

Sulmuesi i Togos verën e kaluar u lidh me një kalim në Milan, ndërsa e interesuar për të ishte edhe Barcelona. Arsenali raportohet se nuk dëshiron atë ta shesë para rivalëve të Premier League.

Adebayor ka shënuar vetëm dhjetë gola këtë sezon në ligën angleze.

Wenger e sheh Almunian si portier të Anglisë

Menaxheri i Arsenalit, Arsene Wenger, është i bindur se portieri Manuel Almunia do të mund të mund të përfaqësojë Anglinë një ditë.

Almunia një kohë të gjatë ka qenë në dilemë se cilën kombëtare do të zgjidhte ta përfaqësojë, atë të Spanjës ku është lindur, apo të Anglisë, nënshtetësinë e të cilit vend pritet shumë shpejt ta marrë.

“Nëse do të jetë e mundshme legalisht, pse jo? Besoj se ai jo vetëm që është mjaft i mirë, por ai është më i miri. Ka rregulla ndërkombëtare që duhet të respektohen, dhe më pas është një zgjidhje që i takon Asociacionit Anglez të Futbollit, ose dëshirës së Almunias”, thotë Wenger.

Keita: Nuk duhet të humbasim në Real
Mesfushori i Barcelonës, Seydou Keita, thotë se për ekipin katalanas më e rëndësishme është të mos humbasë në derbin e nesërm El Clasico ndaj Real Madridit në Bernabeu.

“Jam i sigurt se ata do të jenë të fuqishëm siç janë gjithmonë para tifozëve të tyre dhe duhet të fitojnë, dhe kjo është mirë për ne. Pavarësisht faktit do të jetë një ndeshje e vështirë...”, ka thënë Keita për El Mundo Deportivo.

“Mbi të gjitha ne duhet të udhëtojmë në Madrid për të mos humbur, pastaj. Nëse mund të fitojmë do të ishte e shkëlqyeshme, por e rëndësishme është të mos humbasim”, ka shtuar mesfushori nga Mali.

Henry udhëton në Bernabeu

Trajneri i Barcelonës, Pep Guardiola, ka zbuluar listën e 19 personave të cilët do të udhëtojnë në Bernabeu për ndeshjen e sotme El Clasico kundër Real Madridit, dhe në skuadër është përfshirë edhe Thierry Henry.

Francezi, pësoi një dëmtim në qafë në ndeshjes e mesjavës kundër Chelseat, edhe pse vazhdoi të qëndroi në fushë gjatë lojës.

Testet e fundit kanë konfirmuar se francezi është i shëndetshëm dhe do të përfshihet në ekip, edhe pse pritet që ai të qëndrojë në stol, pasi Guardiola dëshiron të pushojë njërin nga treshja e famshme e tij e sulmit.

Rafa Marquez është përjashtimi i vetëm nga emrat e njohur të ekipit. Meksikani dëmtoi gjurin e majtë gjatë të martës dhe do të qëndrojë jashtë fushe për tetë deri në dhjetë javë.

Ekipi prej 19 lojtarësh që do të udhëtojë në Bernabeu:

Portierë: Victor Valdes, Jorquera

Mbrojtës: Dani Alves, Pique, Puyol, Caceres, Abidal, Sylvinho

Mesfushorë: Xavi, Iniesta, Keita, Toure, Busquets, Hleb, Gudjohnsen

Sulmues: Bojan, Messi, Henry, Eto’o

Cili do të ishte formacioni më i mirë për ndeshjen El Clasico?