Home
Qeveria e Kosovës e konsideron sundimin e rendit dhe të ligjit ndër prioritet kryesore të vendit, krahas zhvillimit ekonomik dhe ndërtimit të infrastrukturës për perspektivën evropiane.
Zëvendëskryeministri Hajredin Kuçi, në mbledhjen e Bordit të Përbashkët Koordinues për Sundim të Ligjit, u zotua se Qeveria do të punojë me përkushtim të shtuar, në mënyrë që këto prioritete të përmbushen, ndërkohë që pret ndihmë edhe nga Misioni i Bashkimit Evropian për Sundim të Ligjit – EULEX.
“Natyrisht se Qeveria e Republikës së Kosovës ka shumë prioritete të rëndësishme, por janë tri kryesore: e para sundimi i rendit dhe ligjit, e dyta zhvillimi ekonomik dhe e treta infrastruktura për perspektivën evropiane. Në të tri këto prioritete forca udhëheqëse me siguri do të jetë Qeveria e Kosovës, por gjithsesi forcë ndihmëse në këtë proces do të jetë misioni i EULEX-it në Kosovë, prej të cilëve presim ndihmën dhe bashkëpunimin konkret”, ka thënë Kuçi, transmeton KosovaPress.
Nga ana e tij, shefi i EULEX-it, Yves de Kermabon, tha se viti i kaluar ka shënuar fillim të mbarë të misionit të EULEX-it në përpjekjet e përbashkëta për sundim të ligjit. “Jemi të pranishëm në Kosovë, duke përfshirë edhe Kosovën veriore, ku kemi filluar që të bashkëpunojmë me partnerët tanë në polici, në dogana dhe në gjykata”, u shpreh ai.
